Mairk 13

Jesus foretells whut's aheid

1Yin day, as Jesus wus gaun oot o tha Temple gruns, yin o hïs follaers saed tae hïm, “Maistèr, wud ye jist luk at thon stanewark, an thaim wunnèrfu biggins!” 2Jesus saed bak tae hïm, “Dae ye see these great biggins? No yin stane here wull be left abain tha ither, that'll no be tummelt doon!” 3An Jesus wus sïttin on tha Moont o Olives fornent tha Hoose o God, whan Petèr, Jeames, Jhone an Andra axt hïm on tha quait: 4“Tell iz, whan wull aa thïs cum aboot? Wull thair be onie sign ït's gaun tae happen?” 5An Jesus saed tae thaim, “Tak heed an dïnnae let oniebodie lead yis aglee. 6Fer monies a yin wull cum ïn ma name, sayin, ‘A be tha Christ’, an the'll lead monie fowk aglee. 7Whan ye hear tell o wars an o taak aboot wars, dïnnae be püt aboot. Fer sitch thïngs maun happen, but tha enn ïs no near jist yit. 8Nations wull mak war on ither nations, an kïngdoms wull rise up agin ither kïngdoms; thair wull be irthquakes ïn monie pairts, an thair wull be dirths ower tha lan tae. But aa thïs ïs onlie tha stairt o tha bairin pains cumin on. 9Ye maun tak heed. The' wull han yis ower tae tha cooncils, an gie yis a whuppin ïn tha Meetin Hooses. On ma accoont ye wull be stud afore guviners an kïngs, as a wutness tae thaim. 10But afore thïs, tha Guid News maun be praicht tae aa tha nations. 11Noo whaniver yis ir lïftit, an brocht tae thrial, dïnnae be ower enxious aboot whut yis ir gaun tae say, but whan tha time cums jist say whutiver God tells yis tae. Fer then ït'll no be yous that'll be taakin, but ït'll be tha Halie Spïrit. 12Brithers wull han ower thair brithers tae be kïllt, an faithers thair weans. An weans wull rise up agin thair faithers an mithers, an hae thaim püt tae deith as weel. 13Ye'll be haitit bi aa fowk on accoont o me, but tha yin that tholes tae tha enn wull be saved.

Be on yer gaird

14But whaniver yis see ‘tha abomination o desolation’, [spauk aboot bi Daniel tha proaphit] stannin whar ït shudnae be, then thaim at's ïn Judea maun tak tae tha hïlls (Reader, ye'll unnèrstan ma mainin here.)#13.14 Mairk ïs taakin aboot tha settin up o sumthin detestable fer fowk tae boo doon tae ïn tha halie Hoose o God 15Naebodie that's on hïs ruiftap#13.15 It says: “on tha ruif o hïs hoose”. Tha ruifs wur flet ïn thaim days, shud be gaun bak doon tae get ocht oot o ït; 16an naebodie that's awa oot ïntae hïs fiel shud be gaun bak fer hïs cóat. 17In thaim days ït'll be tarrible fer weemen that's expectin, an fer mithers wi weans at tha breesht. 18Pray tae God that thïs daesnae happen ïn tha wuntèr. 19Fer ïn thaim days thair'll be sitch wile sufferin#13.19 tribulation; time o troubles - faur waur ner thair iver wus frae tha time God made tha warl til noo - an ye'll niver see tha laik agane. 20Gin tha Loard daesnae cut thaim days shoart, thair's naebodie wud be saved; but ït's on accoont o hïs ain chosen yins, that he's cut tha days shoart. 21An ïf oniebodie shud say tae ye at that time, ‘Luk! Here ïs tha Messiah!’, or, ‘Thair he's thonner!’, dïnnae tak onie heed. 22Fer fauss messiahs an fauss proaphits wull rise up an dae signs an wunnèrs, an fowk wull be tuk ïn bi thaim, ay, an e'en tha chosen yins micht be tuk ïn tae. 23But tak heed, A hae toul ye aa thïs aheid o time, sae as ye'll know.

Tha cumin o tha Sinn o Man

24But ïn thaim days, eftèr tha time o sufferin, ‘tha sin wull be mirkit, an tha muin wull no gie onie licht; 25tha starns wull be faain oot o heiven, an tha pooers o tha lïft wull be dinnelt.’ 26An then aa fowk wull see tha Sinn o Man cumin ïn tha cloods, ïn michtie pooer an glorie. 27An then he wull senn hïs angels oot, tae gether thegither [hïs] chosen yins frae tha fower wuns, frae tha ootermaist pairt o tha irth tae tha ootermaist pairt o heiven.”

A lesson frae tha fïg tree

28“Noo, lairn thïs lesson frae tha fïg tree. As shuin as ïts brenches stairts tae bud, an ïts leafs cum oot, ye ken tha simmer ïs no faur aff. 29In tha same wye, whaniver ye see these thïngs happenin, ye'll ken tha time ïs nearhan, ay, at tha verie dure ïtsel. 30A'm tellin ye tha truith, thair's fowks leevin noo that'll no dee, afore aa these thïngs haes cum aboot! 31Heiven an irth wull pass awa, but ma wurds wull niver pass awa.

32Naebodie kens tha day or oor whan aa thïs wull happen, nether tha angels ïn heiven, ner tha Sinn hissel. Tha Faither alane kens. 33Tak heed, keep a luk-oot, [an pray], fer ye dïnnae ken whan that time wull be. 34Fer tha cumin o tha Sinn o Man ïs laik a man gaun tae a faur-awa lan, that haes left hïs hoose ïn tha chairge o hïs sarvints. He gien thaim aa thair ain wark tae dae, an he toul tha dureman tae be on tha luk-oot fer hïm cumin bak. 35Sae yous be on tha luk-oot tae, fer ye dïnnae ken whan tha Laird wull be bak - whuther at tha gloamin, or at mïdnicht, or ïn tha wee smaa oors, or at tha scraich o day, 36less cumin on ye o a suddent he'll fin ye sleepin. 37Whut A say tae ye, A say tae yin an aa: ‘Be on tha luk-oot!’ ”

Currently Selected:

Mairk 13: USNT

Highlight

Copy