Mattha 20

Tha parable o tha hired labourers

1“Fer tha Kïngdom o Heiven ïs laik a fairmer that gan oot at tha scraich o day tae hire men tae wark ïn hïs vineyaird. 2He saed he wud pye thaim a siller coin#20.2 denarius fer tha day an he sent thaim oot ïntae hïs vineyaird. 3Aboot nine ïn tha moarnin, he gan oot an saen ithers stannin ïn tha mairket place wi naethin tae dae. 4He toul thaim, ‘Gae an wark ïn ma vineyaird as weel, an A'll pye ye a fair wage.’ 5Sae awa the' went. Tha fairmer gan oot an he daen tha same thïng aboot nuin, an then agane at thrie. 6Roon aboot five ïn tha eftèrnuin he gaed oot an fun still ithers stannin roon ïn tha mairket place. He axt thaim, ‘Why hae ye bin hangin aboot here aa day lang daein naethin?’ 7‘Acause naebodie haes tuk iz on,’ the' saed. He saed tae thaim, ‘Gae awa noo an wark ïn ma vineyaird as weel.’ 8Cum dailygan, tha fairmer saed tae hïs lansteward, ‘Caa tha warkers an pye thaim thair wages, stairtin wi tha last yins A tuk on an gaun bak tae tha furst.’ 9Tha warkers that wus hired roon five ïn tha eftèrnuin they cum, an iverie yin o thaim wus gien a siller coin apiece. 10Sae whan tha yins cum that wus hired furst, the' wur lukkin tae git mair. But iverie last yin o thaim wus onlie gien a siller coin tha same as tha ithers. 11Whaniver the' got ït, the' stairtit tae grummle agin tha fairmer. 12‘Thaim men that wus hired last warkt onlie tha yin oor,’ the' saed, ‘an ye hae traitit thaim tha same as us that haes daen tha maist o tha wark an tholed tha hait o tha day.’ 13But he saed bak tae yin o thaim, ‘Freen, A'm bein fair eneuch tae ye. Dïd ye no say ye wud wark fer yin siller coin? 14Tak whut's yours an aff ye gang. Fer A want tae gie tha man that wus hired last tha same as A gien you. 15Dae A no hae tha richt tae dae whut A laik wi ma ain siller? Or dae ye begrudge me bein guid tae tha ithers?’ 16Sae tha last wull be foremaist,” saed Jesus, “an tha foremaist wull be last. [Monie fowk ïs caad, but few sing'lt oot.]”

Yinst mair Jesus foretells hïs deith

17Noo as Jesus wus on tha róad up tae Jerusalem, he tuk tha twal follaers aside, an he saed tae thaim, 18“Lïsten here, we'r fer Jerusalem, an tha Sinn o Man wull be bethrayed tae tha heid preeshts an tha maistèrs o tha Laa. The' wull condemn hïm tae deith, 19an the'll turn hïm ower tae tha Gentiles fer tae be mockt an whuppt an hung up on a cross. But on tha thurd day he'll rise tae life agane!”

Tha wants o a mither

20Then tha mither o Zebedee's sinns cum tae Jesus, an hir twa sinns alang wi hir. Faain doon afore hïm, she axt a favour o hïm. 21“Whut ïs ït ye want?” he axt. She saed, “Wud ye see tae ït that yin o these twa sinns o mine wull sït at yer richt han, an tha tither at yer left han, ïn yer Kïngdom?” 22“Ye dïnnae ken whut ye'r axin,” Jesus saed tae thaim. “Can you drïnk tha cup o sufferin that A'm gaun tae drïnk, [or can ye be baptised wi tha baptisin that A am tae be baptised wi]?” “Ay, that we can,” the' saed. 23Jesus toul thaim, “Yis'll shairlie drïnk frae ma cup o sufferin, but tae sït at ma richt or ma left han side ïsnae fer me tae say. Ma Faither haes made thaim places readie fer tha yins he's sing'lt oot.” 24Whan tha ither ten follaers heerd aboot thïs, the' wur wile ang'rie wi tha twa brithers. 25But Jesus caad thaim thegither an saed, “Ye ken that thaim that rule ower tha Gentiles laird ït ower thair ain fowk, an thair heidyins aye lets thaim know wha's tha boss. 26Wi you ït's no tae be laik that. Na, whaiver wants tae be impoartin amang ye maun be yer sarvint, 27an whaiver wants tae be foremaist amang ye maun be yer slave; 28jist tha wye tha Sinn o Man dïdnae cum tae be tendit tae, but fer tae sarve ithers, an tae gie up hïs life as a ransom fer monie fowk.”

Tha hailin o tha twa blin men

29As Jesus an hïs follaers wur leain Jericho, a bïg crood o fowk follaed hïm. 30An lo an behoul, sïttin on tha bunker o tha róad, thair wus these twa men that wur blin. An whaniver the' heerd Jesus wus passin bye, the' cryed oot, “Loard, Sinn o Davit, tak peetie on iz!” 31Tha thrang chackt thaim an toul thaim tae be quait, but the' guldèrt aa tha mair, sayin, “Loard, Sinn o Davit, tak peetie on iz!” 32Whaniver he heerd thaim, Jesus stapt. Then he caad tae thaim, “Whut dae yis want me tae dae fer ye?” 33“Loard,” the' saed, “we want oor sicht bak.” 34Hïs hairt went oot tae thaim an he püt hïs hans on thair een. An at yinst the' got thair sicht bak, an the' follaed eftèr Jesus.

Currently Selected:

Mattha 20: USNT

Highlight

Copy