ROMA 13
13
ROMA 13
1Yɛ dood sɛw hi tiis zulya̧ a dood gbɔlɛ dɔŋdi. Ya̧a̧nɛ dood gbɔlɛ wɔ waar umsya̧ sɛw gi fu̧u̧zig a Bɛt ge, wɛɛ dood nabl wɔ sɛw hi dag tɛŋkya̧ a Bɛt ge. 2Yɔ anbɔ mɔ in hinyɔ za̧a̧n gbɔɔl bɔ raa, mɔ ɓaasig dɔglyɔ Bɛt raa giya. Wɛɛ dood wɔ hi ɓaak anbɔ lab hi kamsig zulya̧ dɔgl-gbaakyɔ.
3Za̧a̧nyɔ gi wook hin rɔbo hoob ɗɛɛ an gi ha̧a̧g dood gbɔlɛ gɛ, gɛ dood wɔ hi wook ha̧a̧lɛ. Gi ha̧a̧m an hoob gi ha̧a̧m dood gbɔlɛ gɛ, gɔm rɔbo hi baanumɔ. 4Dɔgl-gbɛɛrikya gi Bɛt woosɔya an gi gɔsum rɔbo. Gid mɔ gɔ ha̧a̧lɛ, hoob yɛgi ha̧a̧mɔge, ya̧a̧nɛ dāg tɛŋkɔ bɔ Bɛt gaag ya̧a̧rtɔs gɛ. Gi Bɛtwoosya an gi tuusin Bɛt nɔɔtigɔ gi ha̧a̧n za̧a̧nyɔ gɔ ha̧a̧l ya̧a̧rɛ.
5Yɔ anbɔ, gi an nɛ tiis zul nɛ a dood gbɔlɛ dɔŋdi, taa a Bɛt nɔɔtigɔ bɔ gi dɔŋg kpɔd, lab gɛ, nɛ mɔk an mɔkil yɔ nɛ kpoos du ha̧a̧g gi gin gbɔnɔ rɔb gaako. 6Hinɔ gii hɛw nɛ gi toostooko. Waar ɛ wɔ hi hi wookwoos bɔrɔ hi woosig Bɛt giya.
7Toosinɛhi hinyɔ hi gin fɔk sɛw. Toon toosɛ a za̧a̧nyɔ gi an nɛ tooge. Toon hinyɔ hi dɛ̧ɛ̧sin a za̧a̧nyɔ gi an nɛ tooge, gɔn hoobo a za̧a̧nyɔ gi an nɛ gɔsig hoob ge, ɗɔbsin za̧a̧nyɔ gi an nɛ ɗɔbsige. 8Bɔ doo gi fɔn belko, gɛ gɔ gi ha̧a̧tinnɛ. Ya̧a̧nɛ doo yɔ gig ha̧a̧k a naaza hi muulɛ gi wook hinyɔ Bɛtmaakdɔglɔ raa sɛw. 9Nɛ mɛɛ maakdɔgl wɔ:
a bɔmɔ naamansi, bɔmɔ gbɔm zulɛ, bɔmɔ looluurɛ, bɔmɔ ɗɔkin hinɛ.
Dɔgl wɛrɛ hi hin zaadɛ wɔ sɛw hi ɔks hi gi a dɔgl yɛrɛ gedu:
a gi ha̧a̧mɔ namɔza an zul mɔ.
10Za̧a̧nyɔ ha̧a̧g naaza taasig hinha̧a̧l wooko. Yɔ anbɔ, gi gim ha̧a̧k a namɔza muulɛ, mɔ wook Bɛtmaakɔ sɛw. 11Yɛrɛ ma nɛ mɛɛ ɔ̧tyɔ wɛ gi gedu ɓɔryɔ, nɛ mɛɛ a rɛŋkɔ yoom du riiri. Ya̧a̧nɛ, za̧a̧tig wɛ sɛ̧ɛ̧b daar ɔ̧tyɔ wɛ yɛɛl ɗɔbsig nɛ gedu daarɔ. 12Yɛms bul taalɔ, lɛlgaakil sɛ̧ɛ̧bɔ. Yɛwɛ bis lɛlwil woosɔ, yɛwɛ loo lɛlgaal nɔk wɔd wɔ naan du an wɛ ɗɛɛn lɛlwilɔ.
13Yɛwɛ ɛmb ɛmbil rɔb anyɔ gɔ wɛ ɛmbik lurk du, wɛ ɔɔ daŋkt ha̧a̧lɛ hi bum-wɔniki, mansnaak ha̧a̧lɛ, hi ɓi̧i̧limi, hi gbaani, hi ka̧a̧si. 14Hegin za̧a̧tig nɛ seg yɔ gi a Waar wɛ Yeesu Kristu ge an dimnaan yɔ nɛ hek muulɛ, wɛɛ bɔnɛ yaa kpoos nɛ a doo hɛbtdi muulɛ, an bɔnɛ fɔ ɗɔkumɔ.
Currently Selected:
ROMA 13: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.