ROMA 12
12
ROMA 12
1Yɛ̧ɛ̧dɛ mi wɛ, ya̧a̧nɛ mi gin zɔ̧ko hi Bɛt ya̧a̧rmɛɛkɔ an nɛ gaa muul nɛ an namb za̧a̧til yɔ hi gbɛɛr hi nɔms Bɛt a sɛŋk ha, yɔ gi hin gaati, hinyɔ Bɛt gɔ ta̧a̧ hinɔ, giigi woos nɛ yɔ gi an nɛ woos Bɛt nɛ ɗɔbsinge hi rɔbo. 2Bɔnɛ riitin hi dood wɔ ɔ̧tigi zulɛ, ɔɔn Bɛt gi zɛmr kpoos nɛ gi wɛɛn mɔkil nɛ sego, nɛ wɛɛ nɛ mɛɛ hinyɔ ha̧a̧ge: an hinyɔ bɛrɔ, hinyɔ bɛs Bɛto, hinyɔ hinza wag du gɛ.
3Hi gɛmsil yɔ Bɛt gaami mi gin raak nɛ gbunu gbunu, bɔ zaa gi tɔɔs zulɔ gi daarlɛlɛ. Yɔ anbɔ, bɔbe gi see zulɔ an ɗɔbsil yɔ Bɛt gɛ̧ɛ̧sige gi tuur lɛlɔge.
4Ya̧a̧nɛ an wɛ gin muul gbun si̧, muul wɛ gbun bɔ gin muul dɛɛt kittɔnɔ, hi sɛw hi taan woos gbun bɔ. 5Wɛ́ɛ́ Yeesu ɗɔbsigya wɔ hɛw, wɛ gi labɔ. Yɔ wɛ gi kittɔnɔ be, wɛ ɔks muul gbunu a Kristu ge, wɛ ɔks gbunu an hinwɔ hi ɔks a muul gbun bɔ muulɔge gbunu gbunu. 6Anyɔ Bɛt gaawɛ gaas sɔmsɔm anyɔ gɛmsilɔ gaawɛ, yɛwɛ woon hinɛ. Za̧a̧nyɔ Bɛt gaag ya̧a̧ɔkɛŋkya gaasɛ an gi kɛm ya̧a̧ɔ gi dɔgɔ, wooge an ɗɔbsilyɔ dagɔ.
7Za̧a̧nyɔ Bɛt gaag woosɔ an gi woos yɛ̧ɛ̧dɛ Yeesu fɔkyaadɛ woosɛ, woogwo; yɔ Bɛt gaage an gi gognhinɛ, gogig-gogɔ; 8yɔ Bɛt gaage an gi ɓats dood zaadɛ muulɛ, ɓaasigɓaasɔ; yɔ gɔ gi gɔ rɔbtigi, rɔgrɔbɔ hi kpoosɔ sɛw; yɔ gi dɔgl-gɛmsigya, gɛmsiggɛmsɔ hi tɛŋko; yɔ gɔ gi ɗaas ya̧a̧rha̧a̧kyaadɛ, ɗaagɗa hi hato.
9Ha̧a̧tig nɛ kpoos du gáage, inin hinha̧a̧lɛ, fɔn rɔbgɔki. 10Yɛgi hatinnɛ yɛ̧ɛ̧dums hat rɔbo, bɔbe gi ɗɔbs naaza hi tɛŋko. 11Bɔnɛ nabrɔ, i̧i̧yinɛ, ɔɔn Bɛt Mɔkilɔ gi ɗuks kpoos nɛ hi hato an laa, woosin Waar Yeesu woosɛ. 12Dagin hat a hinyɔ nɛ ook gedu, mɔn zɛksil yɔ hi gisin gɔko, waan Bɛt zɔ̧ki. 13Gɛ̧ɛ̧sin Bɛt doodɔ wɔ hi ha̧a̧kya̧a̧r rɔɔs nɛ. Zen rɔ̀bɛ rɔbtɔnɔ a nɛ raa du. 14Rɔbsin dood wɔ hi gin ya̧a̧kɛtingo, rɔbsinɛhi, bɔnɛ gɔsihi booto.
15Dagin hat hi dood wɔ hi gi hat dako, kaan hi dood wɔ hi kaako. 16Ɗɔɔtin nɛ gaatin boolum a nɛ tees du. Bɔnɛ pɛɛ zulɛ, ɔksin hi zultiisigya wɔ. Bɔnɛ see zul nɛ an nɛ gi hinmɛɛkya dubtɛyɔ. 17Doo gi gɔsin ha̧a̧lɛ bɔnɛ wɛɛnsig ha̧a̧lɛ. Tɛnɛ an nɛ gɔ hinyɔ bɛr gii a dood muutdu sɛw. 18Gi bɛrɔ, ɗɔɔtin rɔbtɔnɔ hi dood sɛw anyɔ nɛ ɗɛɛ sɛw. 19Bɔnɛ wɛns doo hin-a̧a̧bɔ yɔ woosinɛ, saammi rɔbɛ wɛ, ɔɔn Bɛt nɔɔtigɔ gi woos za̧a̧nɔ. Ya̧a̧nɛ hi bi̧i̧ a Bɛt ɗɛɛrwol du a Waar Bɛt raa:
a bee be wɛnsihi a̧a̧bya̧, bee be gbaasihi dɔglɛ.
20Yɛrɛ a̧a̧kil gi gi
ha̧a̧k za̧a̧nyɔ gim lɔlhɛ̧ɛ̧nuko, gaamɔg leesɛ, mɛm gi gig ha̧a̧ko, gaamɔg gi yɔ̧; ya̧a̧nɛ anyɔ mɔ gisig wook anbɔ, mɔ gisig laa-ɛ̧ɛ̧k mɔksig zulha!
21Bɔmɔ ɔɔ ha̧a̧l gi ɗɛɛmɔ, ɗɛɛm ha̧a̧lɛ hi hin rɔbo.
Currently Selected:
ROMA 12: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.