MARKUS 8

1A ɔ̧tɔge saal kit hi mɔks sekto. Yɔ dood wɔ hi taan lees an hi le gɛ, Yeesu el walɛsɛrɛ ɔ̧ɔ̧ wɔ raahi:

2a dood wɛrɛ hi ha̧a̧sib ya̧a̧rɛ, anyɔ hi gitin hi bee ɔ̧t taarɛ, wɛɛ hi taan lees be. 3Àn be yaahi a hi lɛl a̧a̧kili, yɔ hi maatilo a gbɔnɔ di; wɛɛ dood zaadɛ wɔ hi gi hi teesdu hi fu̧u̧z lɛlya̧ hɛmltɔnɔ be.

4Walɛsɛrɛ ɔ̧ɔ̧ wɔ hi gòòge:

a yɔ hi zɛm ma kokɔ ay an hi lenihi hɛdi a hɛt dɔŋg du nɔ?

5Yeesu ɛrihi:

a nɛ gin kok kiml baari?

Hi ta̧a̧:

a nɔɔn-erɛ.

6Wɛɛ raa saal wɔ hi ɗɔɔt hɛbt di. Loo kok kiml wɔ nɔɔn-erɛ baan Bɛto, wɛɛ ɓɛɛlɔ, gaa walɛsɛrɛ ɔ̧ɔ̧ wɔ kok wɔ an hi gɛ̧ɛ̧s dood wɔ. Fɔkya wɔ hi gɛ̧ɛ̧s dood saal wɔ kok wɔ. 7Hi gin nɛ dut dɛɛt kaasi. Yeesu loo dut wɔ baan Bɛto, wɛɛ raahi hi gɛ̧ɛ̧sihi hɛw.

8Dood wɔ hi le kok bɔ hi hi̧i̧. Hi wɛɛn kok ɓɛɛkil wɔ zɛ̧ɛ̧r dɛl hi̧i̧sil nɔɔn-erɛ. 9Dood wɔ hi gi nɛ kitigya̧ sɛ̧ɛ̧b hin duk nasɔ. Kuudu Yeesu wɛɛ yaahi hi lɛlɛ. 10Gii wɛɛ kar ɓɔrbɔ a lɛmb du hi walɛsɛrɛ ɔ̧ɔ̧ wɔ hi rek a Dalmanuta hɛbt du.

11Farisaya wɔ hi zaa hi yɛɛl hinfaltingo hi Yeesu an hi tolig hi dɔglɛ. Ya̧a̧nɛ hi ɛrig an gi woo hinmɛksingoya gi zuun a tɛŋkɔ fu̧u̧z a Bɛt ge. 12Yeesu hol dubtɔnɔ, wɛɛ raa:

a nɔ dood wɛrɛ hi waak ɔ̧ti gi zulɛ hi gib gɛrs hinmɛksingoya wark nɔ? Be raasin rɔbo: gɛrs za gbun taa an gi zu̧u̧niy a dood wɛrɛ hii.

13Wɛɛ ɔɔhi hɔdi, kar lɛmb du rek a mɛmbal kasiŋ za. 14Walɛsɛrɛ wɔ hi zɛn kokya̧ look zɛnɔ. Hi gin kok kiml gbun a lɛmb du. 15Yeesu raahi anyɔ lɛ:

a oonɛ, wa̧a̧n zul nɛ hi Farisaya wɔ hɛ̧ɛ̧tya̧ hi Waar Hirudus hɛ̧ɛ̧tɔ bɔ.

16Walɛ-sɛrɛ wɔ hi watin hi tees du:

a yɔ wɛ taan kok gɛ giya.

17Yeesu yɔ mɛksɔ, wɛɛ ɛrihi:

a nɔ nɛ watingo a yɔ nɛ taan kok gɛ gii nɔ? Nɛ́ wā̧ā̧ hinɔ kpoos du kɛn gɛ, nɛ́ mɛ̄ks hinɔ kɛn gɛ ya? Nɛ gin kpoos ɓaatili ya? 18Nɛ gin lɔlɛ, nɛ́ gbɛ̄n gɛ ya? Nɛ gin tɔnɛ, nɛ́ kɛ̄ŋ gɛ ya? 19Nɛ́ mɛ̄ks ɔ̧tyɔ be ɓɛls dood duk nɔɔn wɔ kok kiml nɔɔn wɔ gedu gɛ ya? Nɛ wɛɛn kok kiml ɓɛɛkil wɔ dɛl hi̧i̧sil baari nɔ?

Hi ta̧a̧ge:

a koobl daa eerɛ.

20Wɛɛ raahi:

a yɔ be ɓɛls dood duk nas wɔ kok kiml nɔɔn-er wɔ, nɛ wɛɛn kok ɓɛɛkil wɔ dɛl hi̧i̧sil baari nɔ?

Hi ta̧a̧:

a nɔɔn-erɛ.

21Hɔnɛ Yeesu wɛɛ warihi:

a nɛ́ kɛ̄ms hinɔ gɛ tɛ̧ ya?

22Hi zaa a Baytizaada. Dood hi kams Yeesu yɔ̧ɔ̧r za, hi zɔ̧ge an gi ki̧i̧ge.

23Yeesu wa̧a̧ yɔ̧ɔ̧r bɔ naan muulɛ, kaŋg a raa lako, tutsig set lɔl du, gbaa naan gi muulɛ, ɛrige:

a mɔ gbɛnik hinza ya?

24Wal bɔ pɛɛ lɔlɔ raa:

a be gbɛnik dood tii, be gihi gbɛnik an tɛ̧ɛ̧, hi wɛɛ hi ɛmbiko.

25Yeesu wɛɛ yaa naan gi lɔl du. Yɔ wal bɔ sɔ̧ɔ̧ lɔlɔ gbigi, lɔlɔ kpɛ̧ɛ̧rɔ, gi gbɛnik hin sɛw gaattɔnɔ. 26Yeesu yaag gi lɛlɛ, raage:

a bɔmɔ wɛɛ a raa bɔ gedu.

27Yeesu hi walɛsɛrɛ ɔ̧ɔ̧ wɔ hi rek a raat zaadɛ du, a hɛbt za yɔ nuŋgɔ a Kaysariya-Filipi gedu. Yɔ hi gi gbɔnɔ di, Yeesu war walɛsɛrɛ ɔ̧ɔ̧ wɔ:

a dood hi raak a bee bɔ?

28Hi googe:

a zaadɛ hi raak a mɔɔ Yohana Bɛtmɛm Hotingoya bɔ, zaadɛ be, hi raak a mɔɔ Eliya;

wɛɛ zaadɛ ɓɛ hi raak a mɔɔ gi Bɛtya̧a̧kɛŋkya amntɛ wɔ zaaɔ.

29Wɛɛ warihi:

a nɛɛ be, nɛ raak a bee bɔ?

Piyɛr gòòge:

a mɔɔ Masihu bɔ.

30Gɔ ma Yeesu wɛɛ magihi gɔ an bɔhi raas doo za a bee gi Masihu bɔ. 31Hɔnɛyɔ Yeesu yɛls walɛsɛrɛ ɔ̧ɔ̧ wɔ hingoko, raahi:

a gi an Za̧a̧n Waa bɔ gi ha̧a̧ya̧a̧r gbɔɔltɔnɔ; ɗɛntɛ Bɛtlukya wɔ hi Bɛtmaakwookya gbɔlɛ wɔ, hi zaa hi Bɛtmaakdɔkya wɔ hi bisige. Hi gbɔŋge, wɛɛ kuudu ɔ̧t taarɛ gi rɛml a wɔrk du.

32Gisihi raak hin bɔrɔ lab gaattɔnɔ. Piyɛr tɔrige yɛɛlig dɔ̧ɔ̧lik a hinyɔ dɔg anbɔ dɔŋgɔ. 33Hɔnɛ Yeesu wɛɛ zɛmr sɔ̧ɔ̧ walɛsɛrɛ ɔ̧ɔ̧ zaadɛ wɔ, wɛɛ dɔ̧ɔ̧l Piyɛr :

a Saydanu, da mɔ rek hɔ, hɛmlum hi beya! Mɔ́ mɔ̄k hin an Bɛt gɛ, mɔ mɔkig an dood her.

34Kuudu elz dood saal wɔ hi walɛsɛrɛ ɔ̧ɔ̧ wɔ, wɛɛ raahi

a za̧a̧n za gi ha̧a̧ge an gi fɔbzibe, gi in zulɔ, gi pɛɛ dɔ̧ɔ̧rɔ gi wɛɛ gi fɔbzibe. 35Ya̧a̧nɛ za̧a̧ni ha̧a̧g an gi za̧a̧s kolɔ, gi wagsige; za̧a̧nyɔ gɔ gi wags kolɔ a be dɔŋgo hi Dɔgl Rɔb bɔ gi dɔŋgo, gi za̧a̧sige. 36À za̧a̧n za dag waal sɛw, gi wɛɛ gi wags kolɔ, bɛn nɔ?

37Za̧a̧n za gi an gi gaa nɔ an kolɔ gi za̧a̧ nɔ? 38Dood wɔ hi waak ɔ̧ti gi zul hi ɔɔ Bɛt an nis yɔ gi naak mansi gi ɔɔ waltɔ, hi wɛɛ hi gɔk hinha̧a̧lɛ. Za̧a̧n za seem gi ha̧a̧g beya hi dɔgl be a dood wɛrɛ hi teesdu, Za̧a̧n Waa bɔ, gɔ gi zaa a Baatɔ gbɔlums du, hi Bɛt walɛsɛrɛ gaatɛ wɔ, gi ha̧a̧nig seem hɛw be.

Currently Selected:

MARKUS 8: NTD

Highlight

Copy