MARKUS 7

1Farisaya wɔ hi Bɛtmaakdɔkya wɔ zaadɛya̧ hi fu̧u̧z a Urusalima hi mɔks a Yeesu ge. 2Hi gbɛn walɛsɛrɛ ɔ̧ɔ̧ wɔ zaadɛya̧ hi lek kok hi naan ɓi̧i̧limyɔ, raakɔ a hí nɛ̄ɛ̄ naanya̧ anyɔ Farisayaadɛ maak dɔg gɛ.

3Ya̧a̧nɛ, Farisaya wɔ hi Yahuduya wɔ zaadɛya̧ sɛw hi wa̧a̧k maak yɔ ɗɛntɛya̧ ɔnihi: gid hí nɛ̄ɛ̄ naanya̧ rɔbtɔnɔ gɛ, hí lēhin gɛ. 4Gɔ hi fu̧u̧z a luumha, hi zaa hi hot maakhotil kete ɓɔr hi ɔɔ hinleko. Hi wa̧a̧k maak zaadɛ wɔ hi dag kittɔnɔ: an mɛmdak wɔ nɛɛtugɔ, hi zaa hi gedig wɔ hi dɔn tus wɔ nɛɛtugɔ. 5Farisaya wɔ hi Bɛtmaakdɔkya wɔ hi ɛr Yeesu gɔ:

a nɔ nɛ walɛsɛrɛ mɔ wɔ hí fɔ̄b maak yɔ ɗɛntɛ hi gog gɛ, hi lek kokya̧ hi naan ɓi̧i̧lim nɔ?

6Yeesu goohi:

a nɛya, dood mɛlya wɛ, Esaya da dɔgsin rɔbo a Bɛt dɔgl du, anyɔ bi̧i̧: a Bɛt raa: a dood wɛrɛ hi gib ɗɔbsig hi dɔgl tɔsyɔ, wɛɛ kpoosya̧ hɛ̧ml hi beeya. 7Ɗɔbsig yɔ hi gib fɔmnuko gi hin tɔsyɔ. Hi gok dɔgl yɔ dood waal du hi woo hi zulya̧ hi wɛɛ hi gogsingo an ginɛ Bɛt dɔgl ɔ̧ɔ̧n giya.

8Yeesu raa:

a nɛ in dɔgl yɔ Bɛt gaa an nɛ wɛɛ nɛ fɔb hinyɔ dood hi gogsinɛ.

9Wɛɛ raahi ɓɛ:

a nɛ nɛ mɛɛ dɔgl yɔ Bɛt gaa bisig yɛ̧ltɔnɔ an nɛ wɛɛ nɛ fɔb maak nɛnɛ ma mi? 10Ya̧a̧nɛ Muusa gi raa: a ɗɔbsum baa mɔ hi nàà mɔ; wɛɛ: a za̧a̧nyɔ nii baatɔ, zaa lab gɛ nɔɔtɔ, hi gbɔŋge.

11Yɛrɛ nɛya, nɛ dɔk a doo gi raa baatɔ, zaabe nɔɔtɔ: a hinyɔ gɔ be kamsum an be ɗansumɔ, be gaa Bɛt gaasɛ, hinɔ gi kɔrbaŋyɔ (raakɔ a gaas yɔ hi gaa Bɛto). 12Nɛ́ tā̧ā̧ an za̧a̧n gi ɗaas baatɔ hi nɔɔtɔ gɛ. 13An bɔrɔ labɔ, nɛ ha̧tirgo Bɛt dɔgl ɔ̧ɔ̧nɛ a baa nɛ maak bɔ ɔsin nɛ gogsig dood zaadɛ gi dɔŋgo. Nɛ wɛɛ nɛ wook hin zaadɛ anbɔ kittɔnɔ hɛw.

14Kuudu Yeesu wɛɛ elz dood saal wɔ raahi:

a lagsinbe dɔgl be nɛ sɛw, kɛn hin yɛrɛ: 15Hinza ɗɛ̄ɛ̄ an gi gul doo buu du gi wɛɛnig ɓi̧i̧limya gɛ. Hinyɔ gi tuuzig a doo kpoos du be, gii gi wɛɛnik doo ɓi̧i̧limya. [ 16Za̧a̧ni gin tɔn an gi kɛmɔ, gi kɛmɔ! ]

17Yɔ Yeesu ɔɔ dood saal wɔ gi gul a raa du, walɛsɛrɛ ɔ̧ɔ̧ wɔ hi ɛrige an gi wadsihi ya̧a̧daanik bɔ hinɔ. 18Yeesu ɛrihi:

a nɛɛ hɛw zul nɛ taa an nɛ kɛm hinza zaŋ ya? Nɛ́ mɛ̄ɛ̄ a hinyɔ fu̧u̧ a lakdi gi gul a doo buu du ɗɛ̄ɛ̄ an gi wɛɛnig ɓi̧i̧limya gɛ gɛ ya? 19Anyɔ hin bɔ labɔ taa gulk a kpoos du gɛ, gi tiik a ha̧d du wɛɛ gi tuuzig a yaatillɛl du. Hin bɔ lab gi raak a lees wɔ sɛw hi taa ɓi̧i̧limyaadɛ.

20Wɛɛ raa ɓɛ:

a hinyɔ gi fu̧u̧zig a doo kpoos du, gii gi wɛɛnik doo ɓi̧i̧limya. 21Yɔ anbɔ, a dood kpoos bɔ gedu ro mɔkil ha̧a̧l wɔ hi fu̧u̧zugo: an zɛlko, luurɛ, zulgbɔŋki, 22mansi, ɗɔkum ha̧a̧lɛ, ha̧a̧lwooki, maatili, ya̧a̧kɛtili, lɔlha̧a̧lɛ, ya̧a̧ha̧a̧lɛ, zulpɛɛki, hi yooya̧a̧. 23Hinha̧a̧l wɔrɔ sɛw hi fu̧u̧zig a doo kpoos du ro hi wɛɛnik doo ɓi̧i̧limya.

24Kuudu Yeesu ɗuk hɔdi rek a Tiir hɛbt du, re da sil a raa za du, hā̧a̧g an doo za gi mɛɛ a gi raa bɔ gedu gɛ, wɛɛ ɗɛ̄ɛ̄ an gi yaat gɛ be. 25Ànyɔ nis za waaɔsiŋ ya̧a̧m gin loorɛha̧a̧l muul du be, yɔ kɛm hi book Yeesu nuŋggɔ anbɔ, zaa zagl gi dɔŋdi. 26(Nis bɔ be, rɔ̀byɔ, taa Yahuduya, hi mɔɔg a Femisi, a Siriya hɛbt du. ) Zɔ̧ Yeesu an gi nin loorɛha̧a̧l bɔ gi a waaɔ siŋg bɔ gi muul du. 27Yeesu raage:

a ɔɔm ya̧a̧mwaat wɔ hi hi̧i̧ kɛnɛ, hinɔ bɛ̄r an hi loo ya̧a̧mwaat leesya̧ hi bits kaawaat gɛ.

28Nis bɔ googe:

a hɔɔ, mɔ dɔg rɔbo, Ɗɛntyɔ, kaawaat wɔ hi gi a sil ya̧di, hi lek kok rumnt wɔ ya̧a̧mwaat hi zaasil be.

29Yeesu raage:

a hin bɔrɔ mɔ goo hage, wɛɛm mɔ lɛlɛ; loorɛha̧a̧l bɔ tuutu ma a waa mɔ muul du.

30Nis bɔ wɛɛ wɛɛ gɔ gi lɛlɛ, zɛm waaɔ bɔ gi kusig sil ha. Loorɛha̧a̧l bɔ tuu gi muul du ma da̧a̧da̧.

31Hɔnɛyɔ Yeesu ɔɔ Tiir hɛbtɔ, tal a Sidɔŋg, wɛɛ daa a lɛlyɔ gɔ hi el a Waal Gbɔlɛ Koobl ge, wɛɛ wɛɛz a mɛmbal bɔ Galile ge. 32Hi kamsig wal za lag-su̧u̧ki, hi zɔ̧g an gi gbaasig naan muulɛ. 33Yeesu sɔɔnig aakil du gi gbunu; yɔ hi hɛ̧mltin hi saal bɔ, yaa naanwalɔ a wal bɔ tɔn du, tus seto ki̧i̧n wal bɔ mɛlɔ. 34Wɛɛ pɛɛ lɔlɔ wɛɛha, holɔ, wɛɛ raa wal bɔ:

a ꞋꞋEfataꞋꞋ,

raakɔ

a kpɛ̧ɛ̧rumɔ!

35Ɓɔrbɔ wal bɔ tɔnɔ kpɛ̧ɛ̧rɔ, mɛlɔ wadɔ, wɛɛ yɛɛl ya̧a̧book rɔbtɔnɔ. 36Yeesu ɓaas dood sɛw an bɔhi raas hin bɔ lab za̧a̧n za. Wɛɛ gi hi gbork ɓaasigi, hii be hi gbosig dɔglɔ book be. 37Yɔ hin bɔ lab kɔms dood gɛrs gbɔɔltɔnɔ, hi wɛɛ hi raa:

a hinyɔ gi wook sɛw bɛɛrɔ. Gi wook an lagɛ wɔ hi lagtɔnɛ, su̧u̧kɛ wɔ be hi booya̧a̧!

Currently Selected:

MARKUS 7: NTD

Highlight

Copy