MARKUS 6

1Yeesu ɔɔ lɛl bɔ rek a waal yɔ tɔɔ gedu. Walɛsɛrɛ ɔ̧ɔ̧ wɔ hi fɔge.

2Yɔ Yahuduya wɔ holum-ɔ̧tya̧ tuurɔ, Yeesu yɛɛl hingok a mɔksilluk du. Dood kit wɔ hi gisig dɔglɔ lako, kɔmsihi gɛrs gbɔɔltɔnɔ. Hi war

a hin wɔrɔ hi gisig fu̧u̧zig hi anbɔ? Dag nɔ nɛ hinmɛɛkɔ anyɔ hi gɛrs wɛrɛ gi wooko?

3Nɛ gii gi ma Mariyama waawal tɛ̧ɛ̧hɛɛkya bɔ ma mi? Nɛ gi ma Yakuba hi Yozɛs hi Yahuda hi Simɔŋ hindaya̧ gii ma mi?

Nɛ siŋdɛya̧ hi waak a wɛ teesdu dihɛ ma mi?

Hin bɔ lab gii gi dood wɔ hi dɔg hin anbɔ ya̧a̧nik an bɔhi ɗɔbs Yeesu . 4Hɔnɛyɔ anbɔ Yeesu raahi

a hi ta̧a̧k Bɛtya̧a̧kɛŋkya a lɛl sɛw. Yɛrɛ wɛɛ gi doo tɔsi a gi mɔɔklɛlɛ, a nɛsɛ ɔ̧ɔ̧ hi doodɔ hi tees du.

5Yeesu ɗɛ̄ɛ̄ an gi woo gɛrs dihɔ gbun mɔɔt gɛ; gɔ gbaa naanɔ gii kpɔd a gumtil zaadɛ wɔ hi muul gi za̧a̧sihi. 6Hin kɔms Yeesu gɛrsɛ anyɔ dood wɔ hi ta̧a̧ ɗɔbsig gɛ. Wɛɛ, Yeesu ɛmb gbɛ̧ɛ̧ka a raat dɛɛt wɔ hi sɛ̧ɛ̧b di gedu ɓɛ, gi hingok nɔɔha.

7Elz walɛsɛrɛ ɔ̧ɔ̧ wɔ koobl daa eerɛ yɛɛlihi yaak a lɛl za eerɛ, eerɛ. Gaahi tɛŋk an hi ɗɛɛ loorɛha̧a̧l wɔ, 8wɛɛ raahi anyɔ lɛ:

a rɔ̀bs bɔ nɛ reko, bɔnɛ loo hinza, gi sɔɔl gɛ. Bɔnɛ loo koko, bɔnɛ loo saa, an tus hɛw a nɛ ziba du, bɔnɛ loo. 9Hegin taal nɛ, bɔnɛ heg gbandil eerɛ.

10Wɛɛ raahi ɓɛ:

a gid nɛ tuur a waal gbɔɔl du, nɛ́ kɔm a raa yɔ gɔ hi elin duge, gi tuur an nɛ ɗuk nɛ ɔɔ waal bɔ. 11Gid nɛ rek a lɛlyɔ dood wɔ hi waak ge hí zēnɛ gɛ, hi insin dɔgl nɛ bɔ kɛŋko, ɗukin hɔdi, nɛ́ pub luus wɔ nɛ dɔɔ muulɛ, an gi wɛɛsihi hinmɛksingoya.

12Walɛsɛrɛ wɔ hi res dood wɔ Bɛt dɔgl bɔ dɔk gɔ an hi zɛmr kpoosya̧. 13Hi nink loorɛha̧a̧l kittɔnɔ, hi wɛɛ hi gis gumtil kittɔnɔ kurum huuko hi gihi za̧a̧sugo. 14Anyɔ hi book Yeesu nuŋggɔ lɛl sɛwi, waar Hirudus lag hi book Yeesu dɔglɔ. Dood zaadɛ hi raako:

a Yohana bɔ gi dood hotingo nɛ Bɛtmɛm gii wɛɛ gi rɛml a wɔrk du. Yɔ anbɔ gii gin tɛŋk hɛw an gi woo gɛrsɛ.

15Hɔnɛ dood zaadɛ hi wɛɛ hi raako:

a Eliya giya.

Zaaɗɛ hi raak ɓɛ:

a riitin hi Bɛtya̧a̧kɛŋkya wɔ amntɔnɔ zaaɔ giya.

16Yɔ Hirudus kɛm anbɔ raa:

a Yohana bɔ gi dood hotingo nɛ Bɛtmɛm giya! Be dɛ̧ɛ̧r zulɔ be, wɛɛ rɛmlɔ!

17Yɔ amntɔnɔ be, Hirudus hi zulɔ gii ta̧a̧ an doodɔ hi wa̧a̧ Yohana hi wɔ̀ge, hi yaag luknɔ du. Woo hin bɔrɔ a yɛ̧ɛ̧tɔ Filib nistɔ Hiruduya yɔ gii wɛɛ gi wɔɔg gi dɔŋgo. 18Hinɔ gii Yohana gi da gi raa Hirudus:

a rı̄ı̄ an mɔ waa hi yɛ̧ɛ̧ mɔ nisɔ gɛ!

19Nis bɔ Hiruduya kɛ̄m anbɔ, hin nɔɔgnɔ a Yohana zulha, yɔ anbɔ gbaasig ya̧a̧burs an gi gbɔŋge, wɛɛ ɗɛ̄ɛ̄ gbɔnɔɔ lɛl gɛ be. 20Anyɔ Hirudus mɛɛ a Yohana gi doo hinrɔb wookya, doo gaati, hoobha̧a̧ge gig ooko. Gɔ gisig dɔglɔ kɛŋko, yɔɔgyɔ, wɛɛ gisig lak dɔglɔ hi hat be.

21Bɔ labɔ, ɔ̧tyɔ ha̧a̧ nis bɔ Hiruduya tursig gɔ a Hirudus wɛlɔ yɔ hi mɔɔg naabɔ gedu. Hirudus gaa dood woosyaadɛ ɔ̧ɔ̧ gbɔlɛ wɔ hi laya gbɔlɛ wɔ, hi ɗɛntɛ zaadɛ gbɔlɛ rɔbɛ wɔ hi fu̧u̧z a Galile lees gbɔɔltɔnɔ. 22Nis bɔ Hiruduya waasiŋ gul nabhin gɔ a waar bɔ muut du a luk du naas lɛl du. Yɔ hin har Waar bɔ Hirudus hi rɔ̀bɛ ɔ̧ɔ̧ wɔ, raa wawa bɔ gɔ:

a ɛribe hinyɔ ha̧a̧mɔ, be gaam hinɔ.

23Wɛɛ dɛŋglsig hin anyɔ lɛ:

a be dɛŋglsum hin a hinyɔ gɔ mɔ ɛr hage, an hɛbt be gbaŋ za hɛw, be gaamɔ.

24Wawa bɔ tuu re ɛr nɔɔtɔ gɔ:

a nàà be, gi an be ɛr nɔ?

Nɔɔtɔ ta̧a̧:

a ɛrum Yohana bɔ gi hotingo nɛ dood Bɛtmɛm zulɔ bɔ giya.

25Wawa bɔ wɛɛz nɔɔktɔnɔ a waar bɔ ge, ɛrige:

a ha̧a̧be an mɔ dɛ̧ɛ̧z Yohana Bɛtmɛm Hotingoya bɔ zulɔ ɓɔryɔ, mɔ gaab a hɛb du.

26Waar bɔ lag anbɔ kpoosɔ ɗɔɔbɔ; an hinyɔ dɛŋgl a rɔ̀bɛ wɔ hi lɔlgbar be, hā̧a̧g an gi ans wawa bɔ hinyɔ ɛrig gɛ be. 27Wɛɛ ɓɔrbɔ yaa lɛl-ookya za, raag a gi dɛ̧ɛ̧z Yohana zulɔ bɔ gi kamzɔ. Laaya bɔ rek a luknɔ du dɛ̧ɛ̧z Yohana zulɔ bɔ

28kamz a hɛb du, zaa gaa wawa bɔ, wɛɛ wawa bɔ zaa gaa nɔɔtɔ. 29Yɔ Yohana walɛsɛrɛ ɔ̧ɔ̧ wɔ hi lag dɔglɔ anbɔ labɔ, hi zaa hi loo Yohana wɔrkɔ bɔ hi re hi i̧i̧ a loor du.

30Yeesu tɔmsɔya wɔ hi wɛɛzɔ hi mɔks a gi dɔŋg di, hi fɔksig hinyɔ hi woo, hi hinyɔ hi goks doodɛ. 31Dood wɔ hi zaako, hi wɔ hi wɛɛko hi kiitɔ. Yɔ anbɔ lɛl fɛ̄ɛ̄ Yeesu hi walɛsɛrɛ ɔ̧ɔ̧ wɔ lees lek ma gɛ. Ya̧a̧nɛ gi raahi:

a zaan hi beya a lɛl fɛɛtil du an nɛ hol kaasi.

32Hi re gɔ mukya̧ a lɛmb du a lɛl fɛɛtil du.

33Hɔnɛyɔ dood kittɔnɔ hi gbɛnihi reko. hi mɛksihimɛksɔ; dood wɔ a waal gbɔlɛ wɔ du sɛw hi nɔɔ hi dor a lɛlyɔ Yeesu hi walɛsɛrɛ ɔ̧ɔ̧ wɔ gɔ hi tuur nɛ ge. 34Yɔ Yeesu gi tuuzig a lɛmb du gi gbɛn saal gbɔlɛ wɔ, hi ha̧a̧sig ya̧a̧r be; hi riitin ma an tam wɔ hi taan nɛɛra. Wɛɛ yɛlsihi hingok kittɔnɔ. 35Anyɔ ɔ̧t gi leko, Yeesu walɛsɛrɛ ɔ̧ɔ̧ wɔ hi sɔɔ gi dɔŋdi. 36Hi raage:

a ɔ̧t leegɔ, lɛl yɛrɛ gi hɛtdɔŋg be; yaam dood wɔ a raat wɔ hi sɛ̧ɛ̧b di gedu an hi re hi zebz hinyɔ gɔ hi le.

37Yeesu wɛɛ goohi:

a nɛɛ hi zul nɛ, gaanɛhi leesɛ!

Walɛsɛrɛ ɔ̧ɔ̧ wɔ hi wɛɛ hi ɛrige:

a ha̧a̧mɔ an wi re wi zebz kok kiml hi tus gaat tɛmɛrɛ eerɛ an wi zaa wi gaahi hi le ya?

38Yeesu wɛɛ ɛrihi:

a nɛ gin kok kiml baari? Rekinɛ nɛ sɔ̧ɔ̧zɔ.

Yɔ hi wɛɛ hi watin hi teesdu, hi wɛɛ hi raasige:

a wi gin kok kiml nɔɔn hi dut eerɛ.

39Wɛɛ raa walɛsɛrɛ ɔ̧ɔ̧ wɔ a raan dood hi ɗɔɔt mɔksillɛl gbunu gbunu a hɛtyɛ̧s wɔ ha. 40Dood wɔ hi ɗɔɔt mɔksillɛl kittɔnɔ. Mɔksillɛl gbunu dood hi gi du yɔ̧ɔ̧lɔ nɔɔnɛ, zaa dumbili nɔɔnɛ. 41Yeesu wɛɛ loo kok kiml wɔ nɔɔn hi dut eerɛ wɔ, pɛɛ lɔlɔ wɛɛha, baan Bɛto. Ɓɛɛ kok kiml wɔ, gaa walɛsɛrɛ ɔ̧ɔ̧ wɔ hi gɛ̧ɛ̧s doodɛ. Wɛɛ gɛ̧ɛ̧sihi dut eerɛ wɔ hi sɛw.

42Hi sɛw hi le hi hi̧i̧. 43Walɛsɛrɛ wɔ hi wɛɛn kok kiml ɓɛɛkil wɔ hi dut wɔ zɛ̧ɛ̧r dɛl koobl daa eerɛ. 44Walɛ wɔ hi gi saal bɔ gedu hi le lees bɔ sɛw, hi gi duk nɔɔnɛ. 45Ɓɔrbɔ Yeesu fɛ̧ɛ̧ walɛsɛrɛ ɔ̧ɔ̧ wɔ an hi kar a lɛmb du, hi dor a mɛmbal kasiŋ zaabɔ ge a Baytizaada gbaŋgi, an gii gi yaak saal wɔ kuudu be. 46Yeesu waar ihi, wɛɛ dɔ̀ɔ̀ a ga̧a̧t ha an gi zɔ̧ Bɛto.

47Yɔ yɛms bulɔ, lɛmb bɔ gi a mɛmbal tees du. Yeesu gi gi gbun a hɛbt di a ɗundir ha. 48Wɛɛ gbɛn walɛsɛrɛ ɔ̧ɔ̧ wɔ hi nuuk lɛmb bɔ hi mɔɔto, anyɔ zɛk gihi fɛko gi gihi wɛɛnik kuudu kuudu. A bi̧i̧l ɗɔbt du, Yeesu ɛmz a mɛmbal bɔ hage, rek hii ge, zɛ̧hi, gɔ gi daarihi nɛ daarɔ. 49Yɔ walɛsɛrɛ wɔ hi gbɛnig gi ɛmbik a mɛmbal bɔ hage, hi rum a ɗoodyɔ, hi ɓoo kaalɛ. Yɔ hi gbɛnig be, hi sɛw hoob ha̧a̧hiha̧. 50Ɓɔrbɔ Yeesu booya̧a̧, raahi:

a ɓaasin kpoos nɛ. Beya, bɔ hoob gi ha̧a̧nɛ!

51Wɛɛ kar zɛ̧hi a lɛmb bɔ gedu; zɛk bɔ erɔ. Hin wɛɛs fɔkya wɔ gɛrs gbɔɔltɔnɔ, 52anyɔ hí kɛ̄m kok kiml wɔ gɛrsɔ gɛ; kpoosya̧ ɓaaɓa, ya̧a̧nɛ. 53Yɔ hi kar mɛmbal bɔ, hi zaa a Gɛnɛzarɛd hɛbt du, hi ha̧b lɛmbya̧ a haŋkya̧.

54Yɔ hi bɛɛ tuuk a lɛmb bɔ gedu, dood hi mɛks Yeesu mɛksɔ. 55Hi nɔɔ hi wɛɛ a waal bɔ duge sɛw, lɛl yɔ hi kɛm a Yeesu gedu sɛw hi gisig gumtil wɔ kamsig a tɛ̧ɛ̧waak ha. 56Lɛlyɔ Yeesu gi rek du sɛw, a raat dɛɛt wɔ du, a waal gbɔlɛ du, hi raat wɔ a hɛt dɔɔ du gedu sɛw, dood hi tudzig gumtil wɔ hi gihi zaanik a luumha hi gig zɔ̧k an gi ɔɔhi hi ki̧i̧ gbandilɔ tɔl wɔ mɔɔti. Dood wɔ hi gig ki̧i̧k sɛw hi za̧a̧kza̧.

Currently Selected:

MARKUS 6: NTD

Highlight

Copy