MARKUS 11
11
MARKUS 11
1Yɔ Yeesu hi walɛsɛrɛ ɔ̧ɔ̧ wɔ hi sɛ̧ɛ̧bik tuurik a Urusalima, a Baytifaaze hi Betani raatya̧, hi tuur a Kɔ̧ɔ̧b Ga̧a̧tya̧ dɔŋdi. Yeesu yaa walɛsɛrɛ ɔ̧ɔ̧ wɔ eerɛ hi dorɔ. 2Raahi:
a rekinɛ a raa bɔ gi nɛ muutdu bɔ ge. Gɔ nɛ bɛɛ talik gedu, nɛ zɛm pɛɛzum waa za yɔ ha̧ya, doo za kār ɗɔ̄ɔ̄tir a gi yɛl ha kɛn gɛ. Nɛ́ pidige, nɛ́ kamsibege hɛdi. 3Za̧a̧n za gi warinɛ: a nɔ nɛ gɔk hin lab nɔ? Raanɛge a ha̧a̧ Ɗɛnt bɔ giya, gi ɔsinge nɛ kamzig hɛdi nɔɔktɔnɔ.
4Walɛsɛrɛ wɔ hi rek hi zɛm pɛɛzum waa bɔ gɔ lakdi a gbɔnɔya̧, ha̧y a raaya̧ gbarɔ, hi pidige. 5Dood zaadɛ wɔ hi ginɛ di hi warihi gɔ:
a nɛ gɔk nɔ? Nɛ pidig pɛɛzum waa yɛrɛ nɔ?
6Hi ta̧a̧nihi hinyɔ Yeesu raa nɛko, wɔrɔ hi wɛɛ hi ɔɔhi hi rekɔ. 7Hi kams Yeesu pɛɛzum waa bɔ, hi ɓuu gbandilya̧ a pɛɛzum bɔ gi yɛl ha, Yeesu kar ɗɔɔt hage. 8Dood kittɔnɔ hi ɓuu gbandilya̧ a gbɔnɔ du an hi zuun hatya̧. 9Wɔ hi ɛmbik a Yeesu muutdu hi wɔ hi gig fɔk hi ya̧a̧ ɓooluko:
a Hozana, raakɔ a seko gbɔɔltɔnɔ! An Bɛt gi rɔbs Za̧a̧nyɔ zaa a Waar Bɛt nuŋg du. 10Bɛt rɔbs baa wɛ Dawda waar umsɔ, waar ums yɔ gi zaako! An bant gi wooy a bɛtha a Bɛt ge!
11Yeesu gul a Urusalima wɛɛ rek a Bɛtluk du. Yɔ sɔ̧ɔ̧ hin wɔ gi dɔŋdi gi dā̧ā̧ sɛwi, wɛɛ rek a Betani hi walɛsɛrɛ ɔ̧ɔ̧ wɔ koobl daa eerɛ. Lɛl da ginɛ bulkbul be.
12Yoosugɔ, yɔ hi tuuzig a Betani a̧a̧kil ha̧a̧ Yeesu. 13Gbɛn yɔmntnɔɔ za hi kpas a lakilɛ, rek see a kɛnsa huml gi hage be. Hɔnɛyɔ sɛ̧ɛ̧b a tɛ̧ɛ̧ bɔ dɔŋgɔdi zɛm kpas wɔ hii kpɔd. Sɛɛ bɔ gɔ hum nɛ gedu da rı̄ı̄dir gɛ ya̧a̧nɛ. 14Yeesu raa yɔmntnɔɔ bɔ:
a an bɔ̄ doo za gi les nɛ huml mɔ wɔ zaa zaŋ!
Walɛsɛrɛ ɔ̧ɔ̧ wɔ hi lag hinɔ be.
15Yeesu hi walɛsɛrɛ ɔ̧ɔ̧ wɔ hi zaa a Urusalima. Yeesu gul a Bɛtluk du. Yɔ gulɔ zɛm dood hinriŋsya wɔ hi hinzekya wɔ a duhɔ. Wɛɛ yɛɛlihi niniki. Wɛɛ bisil tus-i̧i̧kya wɔ silya̧ wɔ hi gbaak tus hage, hi gutu zebtigya wɔ ɗɔɔtilya̧ lɛl wɔ. 16Wɛɛ ɔ̄ɔ̄ doo za an gi tan wɔdɔ a Bɛtluk bɔ gedu gɛ. 17Kuudu wɛɛ gogsihi hin an yɛrɛ lɛ:
a Bɛt ɗɛɛrwolɔ raa a hi el luk be a dood dɔ̧ɔ̧t sɛw Bɛtzɔ̧kluk ma mi? Yɛrɛ nɛya, nɛ wɛɛn an luurɛ wa̧lɔ.
18Yɔ Bɛtmaakwookya gbɔlɛ wɔ hi kɛmɔ hi Bɛtmaakdɔkya wɔ, ha̧a̧hi ka̧a̧syɔ. Hi ɓɛɛ gbɔnɔ an hi gbɔŋge, wɛɛ hoob ha̧a̧hige be, yɔ hingokɔ bɔ kɔms saal wɔ gɛrs giya. 19Yɔ ɔ̧t legɔ, Yeesu hi walɛsɛrɛ wɔ hi tuu hi ɔɔ waal bɔ gɔ.
20Bi̧i̧l du yɔ hi daako, hi gbɛn yɔmntnɔɔ bɔ Yeesu boog nɛ koot hi yɛ̧ɛ̧s elo. 21Yɔ Piyɛr mɛks hinyɔ daa nɛko, wɛɛ raa Yeesu :
a Hingokya , seem yɔmntnɔɔ bɔ mɔ booge kootɔ.
22Yeesu ta̧a̧ raahi:
a ɗɔbsin Bɛto. Be raasin rɔbo: 23za̧a̧nyɔ raa ga̧a̧t yɛrɛ, a ha̧sum hɛdi mɔ re mɔ gi̧i̧ a mɛmbal du, gí fāā a gi kpoos du gɛ, gi ɗɔbs a hinyɔ gi raako gi tuurɔ, hinɔ gi tursige. 24Ya̧a̧nɛ be raanɛ: a hinyɔ nɛ ɛrk sɛw hi zɔ̧ki, ɗɔbsin a nɛ dag hinɔ da̧a̧da̧, wɛɛ hinɔ gi tursin be.
25Gɔ nɛ gi a erkillɛl ha an nɛ zɔ̧bɔ, doo za gi woosin nɛ hin a̧a̧bi, bitsinɛge an Baa nɛ yɔ bɛtha gi bitsin hinha̧a̧l nɛ hɛw be. [ 26Gid nɛ́ bı̄ts dood zaadɛ gɛ, Baa nɛ yɔ gi a bɛtha taasin hinha̧a̧l nɛ wɔ bisig be. ]
27Yeesu hi walɛsɛrɛ ɔ̧ɔ̧ wɔ hi wɛɛ a Urusalima. Yɔ Yeesu gul a Bɛtluk du gi ɛmbiko, Bɛtmaakwookya gbɔlɛ wɔ hi Bɛtmaakdɔkya wɔ hi ɗɛntɛ Bɛtlukya wɔ hi zaa a ge, 28hi warige:
a mɔ wook hin wɛrɛ hi nɔ tɛŋkɔ nɔ? Bɔ gaam tɛŋkɔ an mɔ woon hin wɛrɛ lɛ nɔ?
29Yeesu raahi:
a ɔbe warin hin gbunu, nɛ́ gòòsibe, gid nɛ gòòbe, bee be raasin za̧a̧nyɔ gaazib tɛŋk yɔ be woonik hin wɛrɛ be. 30Wɛɛ ɛrihi: a nɛ bɔ yaaz Yohana an gi hotin dood Bɛtmɛm nɔ? Bɛt gii ya, dood ya ri? Goosinbe ma!
31Wɔrɔ hi watin gɔ hi tees du:
a nɛ an wɛ raa a Bɛt gii yaazig be, yɔ raa a nɛ nɛ ɔɔg ɗɔbsig ma nɔ? 32Wɛɛ an wɛ raa a dood be ...,
hoob ha̧a̧wɛ saal bɔ ha̧a̧, à hi lag anbɔ be, anyɔ hi mɔkig sɛw a Yohana gi Bɛtya̧a̧kɛŋkya hi rɔbo yɔ hi ɔɔwɛ gɛ. 33Hi wɛɛ hi raa Yeesu gɔ:
a wi mɛ̄ɛ̄ gɛ.
Yeesu wɛɛ raahi gɔ be:
a nɛ gi lab be, bee be taasin dɔk tɛŋk yɔ be woonik hin wɔrɔ be.
Currently Selected:
MARKUS 11: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.
