MARKUS 10
10
MARKUS 10
1Yeesu ɗuk hɔdi hi walɛsɛrɛ ɔ̧ɔ̧ wɔ hi rek a Yahuduya hɛbt du, hi wɛɛ hi rek a Urdum zɛɛ bɛrk zaabɔ ge. Dood saal hi wɛɛ hi mɔks gi dɔŋdi, Yeesu wɛɛ yɛlsihi hingok gɔ anyɔ gɔ gi waanik nɛ faa. 2Farisaya wɔ hi zaa a ge an hi goog dɔgl wa̧a̧nuko. Hi ɛrige:
a maak wɛ gaa gbɔnɔ an doo gi hɛɛtin hi nisɔ ya?
3Yeesu ta̧a̧hi:
a Muusa raan a ri?
4Hi ta̧a̧
a Muusa gaa gbɔnɔ a doo gi bi̧i̧ ɗɛɛrwol hɛɛtinsya an gi ga̧a̧rin nisɔ.
5Yeesu wɛɛ raahi:
a Muusa bi̧i̧sin hin bɔrɔ a nɛ kpoos ɓaatil dɔŋ ro. 6A waal yɛɛliki, Bɛt yɔ kim hin sɛw hi bi̧i̧: a kim doo, walɔ hi nisɛ. 7Yɔ anbɔ, wal gi ɔɔ baatɔ hi nɔɔtɔ gi ɔks hi nisɔ; 8hi eerɛ hi wɛɛ muul gbunu. Yɔ anbɔ hí gɛ̧ɛ̧y gɛ, hi ɔks muul gbun kpɔd. 9Bɔ doo gi gɛ̧ɛ̧ hinyɔ Bɛt ɔksɔ.
10Yɔ hi gi a raa du, walɛsɛrɛ wɔ hi wɛɛ hi ɛrig dɔglɔ. 11Yeesu raahi:
a za̧a̧nyɔ nin nisɔ gi wɛɛ gi lootin hi nis za dɔɔmi, gɔ mansi a zaa biitir bɔ gi zulha. 12Nis gi hɛɛtin hi walɔ be, gi wɛɛ gi lootin hi wal za dɔɔmi, gɔ mansi hɛw.
13Dood hi kams Yeesu ya̧a̧mwaato an gi ki̧i̧hi. Walɛsɛrɛ ɔ̧ɔ̧ wɔ hi za̧br dood wɔ. 14Yɔ Yeesu gbɛn anbɔ nɔɔgnɔ, raahi:
a ɔɔn ya̧a̧mwaat wɔ hi zaa a beege, bɔnɛ ya̧a̧nihi. Ya̧a̧nɛ Bɛt wáátɔ gi a dood wɔ hi gi an ya̧a̧mwaat hi. 15Be raasin rɔbo: za̧a̧nyɔ tā̧ā̧ Bɛt wáátɔ an waa yɔ gɔ hi zeg gɛ, taa gulik gedu zaŋ.
16Wɛɛ kur ya̧a̧mwaat wɔ gi naan du, gbaasihi naan muulɛ rɔbsihi.
17Yɔ Yeesu gi wa̧a̧k gbɔnɔ, za̧a̧n za zaa hi nɔɔkili zagl gi muutdu warige:
a Hingokya rɔbo, be woo nɔ an be dag za̧a̧tig faa nɔ?
18Yeesu warige:
a mɔ elib nɔ a be rɔbo? Doo za taa rɔbo, gɛ Bɛt gi gbun kpɔd. 19Mɔ mɛɛ Bɛt maakdɔgl wɔ gaa: a bɔmɔ gbɔm zulɛ, bɔmɔ naamansi, bɔmɔ looluurɛ, bɔmɔ gɔ̧ɔ̧s doo ya̧a̧, bɔmɔ loo doo za hin hi maato. Ɗɔbsum baa mɔ hi nàà mɔ.
20Wal bɔ raage:
a be fɔb maak wɔrɔ lab sɛw yɔ be gi ya̧a̧mi.
21Yeesu sɔ̧ɔ̧ge, ha̧a̧g gi muul be, wɛɛ raage:
a zɛ̧rsum hin gbun kpɔd: rekum mɔ zebr hinwɔ mɔ gin sɛw mɔ wɛɛ mɔ gaa ya̧a̧rya wɔ tus bɔ, mɔ dag rɔɔsyɔ gi bɛt ha, kuudu mɔ wɛɛ mɔ fɔbzibe.
22Yɔ wal bɔ lag dɔgl wɔrɔ anbɔ miimɔ, yɔ gin rɔɔs gbɔɔltɔnɔ be, wa̧a̧ gbɔnɔ, reekɔ. 23Yɔ Yeesu see walɛsɛrɛ ɔ̧ɔ̧ wɔ hi er hi gɔ̧ɔ̧ge raa:
a ɓaaɓa an dood rɔɔsya hi tal a Bɛt wáát du.
24Dɔgl wɔrɔ kɔms walɛsɛrɛ wɔ gɛrsɛ. Yeesu wɛɛ raahi ɓɛ:
a waat be wɛ, talkɔ a Bɛt wáát du ɓaaɓa. 25Ɓaaɓa an gɛloba gi gul zel gɔ̧ɔ̧s du. Ɓaaɓa zaŋ be an doo rɔɔsya gi gul a Bɛt wáát du.
26Yɔ dɔgl wɔrɔ wɛɛs walɛsɛrɛ wɔ gɛrs yɛ̧ltɔnɔ ɓɛ, hi wɛɛ hi ɛtinu:
a ɔnɛ bɔ ɗɛɛ an gi za̧a̧ nɔ?
27Yeesu seehi, wɛɛ raahi:
a hin bɔ lab ɓaas dood ɓaas nɛ zaŋ; Bɛt ɔnɛ ɓāāsig gɛ. Ɔnɛ ɗɛɛ hin sɛw.
28Piyɛr wɛɛ raage:
a kɛmɔ, wi ɔɔ hin sɛw, wi fɔbz mɔya.
29Yeesu gòòge:
a be raasin rɔbo: za̧a̧nyɔ ɔɔ raaɔ, yɛ̧ɛ̧dɛ ɔ̧ɔ̧, siŋdɛ ɔ̧ɔ̧, nɔɔtɔ, baatɔ, waatɔ, zaa bakɔ a be dɔŋgo hi a Dɔgl Rɔb bɔ gi dɔŋgo, 30gi dag raato, hi yɛ̧ɛ̧dɛ, hi siŋdɛ, hi nàa, hi waato hi bak yɔ̧ɔ̧lɔ nɔɔnɛ nɔɔnɛ gi daarlɛlɛ a waabil yɔ ɓɔryɔ gedu, hi ya̧a̧kɛtil hɛw. A waabil yɔ gɔ gi zaa gedu be, gi dag za̧a̧tig faa. 31Wɔ hi dor kittɔnɔ hi wɛɛ kuudɛ. Kuudɛ wɔ be hi wɛɛ doosɛdɛ.
32Yeesu hi walɛsɛrɛ ɔ̧ɔ̧ wɔ hi gi a gbɔnɔ du an hi dɔɔ a Urusalima. Yeesu gisihi gbɔnɔ dorko. Walɛsɛrɛ wɔ kpoosya̧ naamɔ, dood zaadɛ wɔ hi gihi nɛ fɔko hoobha̧a̧hiha̧ be. Yeesu wɛɛ loo walɛsɛrɛ wɔ koobl daa eerɛ wɛɛ yɛlsihi raak hinyɔ gɔ gi tursige. 33Raa:
a yɛrɛ wɛ dɔɔk a Urusalima, hi wa̧a̧ Za̧a̧n Waa bɔ ma a Bɛtmaakwookya hi Bɛtmaakdɔkya wɔ hi naan du, an hi gbaasig dɔgl gi wɔrɔ, hi wɛɛ hi gaage dood wɔ hi mɛɛ Bɛt gɛ hi naan du. 34Hi kpɛ̧ɛ̧lige, hi tusil set gi muulɛ, hi lɛge hi wɛɛ hi gbɔ̧ŋge. Gɔ gi kuudu ɔ̧t taarɛ gi rɛml a wɔrk du.
35Kuudu Zebede waatɔ Yakuba hi Yohana hi sɔɔ a Yeesu dɔŋdi hi raage:
a Hingokya , ha̧a̧wi an mɔ woosiw hinyɔ gɔ wi ɛrumɔ.
36Yeesu warihi:
a ha̧a̧n an be woosin nɔ.
37Hi raage:
a gɔ wí gi a mɔ gbɔlums du, mɔ gaaw gbɔnɔ an wi ɗɔɔt a mɔ naanrɔbo, zaa gbun a mɔ naanyɛ̧li.
38Hɔnɛ Yeesu wɛɛ ta̧a̧ raa:
a nɛ́ mɛ̄ɛ̄ hinyɔ nɛ ɛrik gɛ. Nɛ ɗɛɛ an nɛ yɔ̧ ya̧a̧rhant a dakwaa bɔ gɔ be yɔ̧ gedu ya? Nɛ ɗɛɛ an nɛ dag Bɛtmɛm yɔ gɔ be dag ya?
39Hi googe:
a yɔ wi ɗɛɛɗɛ.
Yeesu goohi:
a oo! nɛ gɔ nɛ yɔ̧ ma a dakwaa bɔ gɔ be yɔ̧ gedu, nɛ dag Bɛtmɛm yɔ gɔ be dagɔ. 40Ɗɔɔtigɔ a be naanrɔbo, hi a be naanyɛ̧li, taa a be naan du an be gaanɛ; gis wɔ Bɛt gɛmtsihi ya̧a̧nɛ.
41Yɔ walɛsɛrɛ koobl zaadɛ wɔ hi kɛm hin bɔrɔ anbɔ, kpoosya̧ nɔɔhinɔ a Yakuba hi Yohana hi zulha. 42Yeesu elzihi wɛɛ raahi:
a nɛ mɛɛ a wɔ hi gihi seek a waar ɛ hɛbtyayɔ a dood wɔ hi mɛɛ Bɛt gɛ hi teesdu hi wɛɛk gbɔɔl a dood zulha, dood gbɔlɛ wɔ be hi gisihi zuunik tɛŋk be. 43Hin bɔ lab bɛ̄r an gi tal a nɛ teesdu gɛ. Za̧a̧nyɔ ha̧a̧g an gi wɛɛ gbɔɔl a nɛ teesdu, gi wɛɛsin woosya nɛ. 44Za̧a̧nyɔ ha̧a̧g an gi wɛɛ doosi a nɛ teesdu, gi wɛɛ gbaar nɛ nɛ sɛw. 45Ya̧a̧nɛ, Za̧a̧n Waa bɔ hi zulɔ, zāā an dood hí wɛɛsig woosyaadɛ gɛ, zaa an gi wɛɛs dood woosyaya̧ an gi gaa kolɔ i̧i̧nisɛ a dood kit dɔŋgo.
46Hi tuur a Zeeriko. Yɔ̧ɔ̧r za nuŋggɔ a Bartimɛ, Timɛ waawal giya, gi ɗɔɔtig a gbɔnɔya̧ gi hin zɔ̧kugo. Yeesu hi walɛsɛrɛ ɔ̧ɔ̧ wɔ, hi saalzanɔ gbɔɔl hi tuuk a waal bɔ gedu. 47Yɔ kɛm a Yeesu Nazarɛdya bɔ gii gi daako, wɛɛ yɛɛl ya̧a̧ɓoolikyɔ:
a Yeesu Waar Dawda waawalɔ mɛɛsibe ya̧a̧rɛ.
48Dood kittɔnɔ hi yɛɛlig ya̧a̧lik
a wagsige!
Gii be wɛɛ ɓoolya̧a̧ ha̧a̧ltɔnɔ daarin lɛlɛ:
a Dawda waawalɔ, mɛɛsibe ya̧a̧rɛ!
49Yeesu lagɔ erɔ, raa dood a elsinbege. Hi el yɔ̧ɔ̧r bɔ hi raage:
a ɓaasum kpoos mɔ, ɗukum ha, Ɗɛnt bɔ gimɔ elko.
50Yɔ̧ɔ̧r bɔ bis gbandilɔ hɛbtdi ɗuk rek a Yeesu ge. 51Yeesu warig gɔ:
a ha̧a̧mɔ an be woosum nɔ?
Yɔ̧ɔ̧r bɔ googe:
a Ɗɛntyɔ, gɔmɔ an be gbɛn lɔlɛ.
52Yeesu wɛɛ raage:
a rekumɔ, anyɔ mɔ ɗɔbsibe, mɔ za̧a̧za̧!
Wal bɔ lɔlɔ gaa ɓɔrbɔ fɛfɛd. Yeesu yɔ wɛɛ gi reko fɔge.
Currently Selected:
MARKUS 10: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.
