MATA 7
7
MATA 7
1Bɔnɛ gbaas doo dɔgl an bɔ Bɛt gi gbaas nɛɛ dɔgl be.
2Bɛt gi gbaas nɛɛ dɔgl anyɔ nɛ gis dood gbaak be. Bɛt gi goosin hin hi goonis yɔ nɛ gis dood hin goonik be. 3Nɔ mɔ seek betwaa yɔ gi a namɔza yɔ̧l du mɔ gbɛ̄n ga̧a̧t yɔ gi a mɔ yɔ̧l du gɛ? 4Mɔɔ yɔ mɔ gin ga̧a̧t yɔ̧l du, gi an mɔ raa namɔza ri a ɔbe ha̧tsum betwaa mɔ yɔ̧l du, nɔ?
5Mɛlya ha̧a̧lɛ! Ha̧sum ga̧a̧t bɔ gi mɔ yɔ̧l du kete, ɓɔr yɔ̧l mɔ gi ɔɔ gaak rɔbtɔnɔ an mɔ ha̧ts namɔza betwaa ɔnɛ bɔ gi yɔ̧l du. 6Bɔnɛ gaa kaa wɔ hin gaatyɔ fu̧u̧z a Bɛt ge an bɔhi zɛmrzɔ hi lɔmtinɛ. Bɔnɛ bits hab wɔ root nɛ rɔbɛ wɔ, an bɔhi ɗa̧a̧k dɔɔ du tɔs. 7Ɛrinɛ hi gaanɛ, tɛnɛ nɛ zɛmɔ, ɓàànɛ hi gborsinɛ. 8Yɔ anbɔ, za̧a̧nyɔ zɔ̧bɔ gi dagɔ, za̧a̧nyɔ tɛbɔ gi zɛmɔ, za̧a̧nyɔ ɓaa luk gbɔnɔ hi kpɛ̧rsige.
9Bɔ za̧a̧nɔ a nɛ teesdu waaɔ gi ɛrig koko gi gaag bet nɔ? 10Gi ɛrig dutu, gi gaag beks nɔ? 11Nɛɛ yɔ nɛ gi ha̧a̧lɛ nɛ́ mɛɛ waat nɛ hii hinrɔb gaako, gi gis Baa nɛ yɔ bɛtha gii gi ɔs dood wɔ hi ɛrig hinrɔb gaak ya? 12Yɔ anbɔ hinyɔ ha̧a̧nɛ an dood hi woosin sɛw, nɛɛ be woosinɛhi anbɔ be; Bɛtmaakdɔglɔ hi hinyɔ Bɛtya̧a̧kɛŋkya wɔ hi dɔg nɛ giibɔ.
13Guzin a gbɔnɔ ɓɔ̧ɔ̧yyik bɔ gedu! Gbɔnɔ za fɛɛt giro, hi gbɔnɔ zayɔ bɛr daaki, gii gi kaŋk laa du, wɛɛ dood kittɔnɔ hi fɔk gedu. 14Yɛrɛ gbɔnɔ yɔ gi kaŋk a za̧a̧tig du daakɔ ɓaaɓa, wɛɛ daaklɛl bɔ ɓɔ̧ɔ̧yyɔ. Wɔ hi gi fɔk gedu hi kit gɛ. 15Oon zul nɛ hi Bɛt-ya̧a̧kɛŋkya ya̧a̧gɔ̧ɔ̧nya wɔ hi zaak a nɛɛge hi wɛɛnik muulya̧ an tamɔ. Wɛɛ a hi kpoos du be hi gi ler-gumyɔ. 16Nɛ́ mɛɛhi a hi woos du. Nɛ̍ mɛɛ be a gɔ hí ha̧b inaboohi a tɛ̧ɛ̧-kobsya muul gɛ. Wɛɛ gɔ hí ha̧b yɔmntnɔɔ huml a gaŋzaŋ muul gɛ.
17Tɛ̧ɛ̧ rɔb sɛw gɔ hum huml rɔbo, tɛ̧ɛ̧ ha̧a̧l be gɔ hum huml ha̧a̧l be. 18Tɛ̧ɛ̧ rɔb dɛɛ̄ an gi hum huml ha̧a̧l gɛ, wɛɛ tɛ̧ɛ̧ ha̧a̧l be ɗɛɛ an gi hum huml rɔb gɛ be. 19Tɛ̧ɛ̧ yɔ gi sɛw gí hum huml rɔb gɛ hi gboge hi yaag laa du. 20Yɔ anbɔ, nɛ mɛɛnihi woosya̧ bɔ giya. 21Dood wɔ gɔ hi elib a Waar i, Waar i, hii taa gulik hi sɛw a Bɛt wáát du. Gɛ dood wɔ gɔ hi woo hinyɔ Baa be bɛtha ha̧a̧ge.
22A dɔgl gbaak ɔ̧ti dood kittɔnɔ hi raabe a Waar i, Waar i, nɛ wi kɛm dɔgl a mɔ ya̧a̧ du wi dɔg a mɔ nuŋg du mi? Nɛ wi nin loorɛha̧a̧l a mɔ nuŋg du mi? Nɛ wi woo gɛrs kittɔnɔ a mɔ nuŋg du mi? Ri mɔ giw ɔɔk kaŋkɔ a Bɛt wáát du nɔ? 23Bee be wɛɛ be raahi a be mɛɛn nɛ gɛ zaŋ, nɛɛ dood hinha̧a̧l wookya wɛ, hɛmlin hi beya! 24Yɛrɛ za̧a̧n yɔ gi lak dɔgl yɛrɛ be dɔko, gi wɛɛ gi woo hinɔ, riitin an doo yɔ mɛɛhin gi zul du gi wɔm lukɔ a hɛɛlkpar ha.
25Bɛl naŋgɔ, mɛm tuu zɛɛ du, zɛk ha̧a̧l fɛb a luk bɔ muulɔ ge hi tɛŋko, anyɔ hi wɔŋg a hɛɛlkpar ha be, ɛ̧b gɛ. 26Yɛrɛ za̧a̧nyɔ lag dɔgl wɛrɛ be dɔko gi wɛɛ gi wōō hinɔ gɛ, riitin an za̧a̧nyɔ taan zul gɛ gi wɔm lukɔ a hɔ̧ɔ̧l ha. 27Bɛl naŋgɔ, mɛm tuu zɛɛ du, zɛk ha̧a̧l fɛb a luk bɔ muulɔ ge, luk bɔ ɛ̧btir hɛbt di sɛw.
28Yɔ Yeesu da̧a̧s dɔglɔ, dood saal wɔ hi kɛmɔ, hinɔgok bɔ kɔmsihi gɛrsɛ. 29Anyɔ gii bōō dɔglɔ an Bɛtmaakdɔkya wɔ gɔ hi book gɛ, gisihi hingok an dooyɔ gin tɛŋko.
Currently Selected:
MATA 7: NTD
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.