MATA 6

1Oon zul nɛ an bɔnɛ woo Bɛtmaakfɔk nɛ a dood muutdu an hi mɛksinɛ. Nɛ́ wook anbɔ nɛ taa dɔɔrɔɔs nɛ dak a Baa nɛ yɔ gi a bɛtha gi naan du. 2Gɔ mɔ gaak ya̧a̧rya wɔ gaasɛ, bɔmɔ ɓoolya̧a̧ an dood mɛlya wɔ gɔ hi wook a mɔksilluk wɔ hi du, hi gbɔnɔ wɔ hi du an dood hi baanihi. Be gisin dɔk rɔbo: dood wɔrɔ lab hi dag dɔɔrɔɔsya̧ dag ma.

3Yɛrɛ mɔɔ gɔ mɔ gi gaas gaako, bɔ naanyɛ̧l mɔ gi mɛɛ hinyɔ naanrɔb mɔ gi gɔko, 4an gaas mɔ bɔ gi kɔm a yaatil du, an Baa mɔ yɔ gi gbɛnik hinyɔ gɔ hi wook a yaatil du gi gaam dɔɔrɔɔs mɔ.

5Gɔ nɛ gi Bɛt zɔ̧ko, bɔnɛ riitin an dood mɛlya wɔ. Yɔ anbɔ, ha̧a̧hi erkig a mɔksilluk wɔ hi du, hi a gbɔnɔ hɛksum wɔ hi du an hi zɔ̧b Bɛto dood sɛw hi gbɛnihi hi mɛksihi. Be gisin raak rɔbo: dood wɔrɔ sɛw hi dag dɔɔ-rɔɔsya̧ dag ma. 6Yɛrɛ mɔya, gɔ mɔ zɔ̧k Bɛto, gulum mɔ luk du mɔ kpɛ̧ɛ̧ gbɔnɔ, mɔ zɔ̧b Baa mɔ Bɛt yɔ gi a yaatil du, wɛɛ Baa mɔ yɔ gi gbɛnik hinyɔ gɔ hi wook a yaatil du gi gaam dɔɔrɔɔs mɔ.

7Gɔ nɛ gi zɔ̧ko bɔnɛ dɔg dɔgl kittɔnɔ tɔstɔs anyɔ dood wɔ hi mɛɛ Bɛt gɛ gɔ hi gɔko. Yɔ anbɔ hi mɔk a Bɛt gi kɛmsib a dɔgl be kit wɔ hi dɔŋgo. 8Bɔnɛ riitin an hiya; Baa nɛ yɔ gi a bɛtha mɛ̍ɛ̍dir nɛ hinyɔ ha̧a̧n gaatyɔ.

9Zɔ̧k yɔ gɔ nɛ zɔ̧bɔ gi anyɔ lɛ: Baa wi yɔ gi a bɛtha, an nuŋg mɔ gi ɗɔbɔ, 10an waar ums mɔ gi zaa, an ha̧a̧tig mɔ gi wooy hɛbt di an bɛtha. 11Gaawi lees yɔ gɔ gi riiwi nɛɛko. 12Bitsiwi hinha̧a̧l wi, an wii yɔ wi bitsig dood zaadɛ hi gɔsiw be. 13Bɔmɔ ka̧wi a maatil du, za̧a̧siwi a loorɛha̧a̧l tɛŋk du. [Waar umsɛ, tɛŋko, hi gbɔlumsɛ hi gi mɔɔ faa. Aanbɔ! ]

14Yɔ anbɔ gid nɛ bits dood zaadɛ hinha̧a̧lya̧ wɔ hi gɔsinɛ, Baa nɛ yɔ bɛtha gi bitsin hinha̧a̧l nɛ be. 15Nɛ́ bı̄tsihi hinha̧a̧lya̧ wɔ gɛ, Baa nɛ yɔ bɛtha taasin hinha̧a̧l nɛ wɔ bisig be.

16Gɔ nɛ gi hinlilko, bɔnɛ mim an dood ha̧a̧l mɛlya wɔ gɔ hi zɛmr muutya̧ an dood sɛw gɔ hi gbɛnihi, hi mɛɛ a hi hinlilko. Be raasin rɔbo: dood wɔrɔ lab hi dag dɔɔrɔɔsya̧ dag ma. 17Yɛrɛ mɔɔ gɔ mɔ hinlilko, huum kurum mɔ zulha, urum muut mɔ, 18an bɔ dood hi mɛɛ a mɔ lilk hinɛ, gɛ Baa mɔ yɔ gi a yaatillɛl du hɔdi gɔ gi mɛɛ kpɔd; wɛɛ Baa mɔ yɔ gi gbɛnik hin yɔ gɔ hi wook a yaatillɛl du gi gaamɔ dɔɔrɔɔs mɔ.

19Bɔnɛ mɔkts zul nɛ rɔɔs a waal du, a lɛlyɔ hin gɔ kug gedu, wɛɛ ga̧a̧r gɔ hi ha̧tir gedu, wɛɛ a lɛlyɔ luurɛ gɔ hi ɓɛlk luk ge hi tɛŋko an hi loo wɔd luurɛ. 20Mɔktsin zul nɛ rɔɔs a bɛtha a lɛlyɔ hin gɔ kɔɔ du gɛ, wɛɛ ga̧a̧r gɔ hi ha̧tir hin du gɛ, a lɛlyɔ luurɛ gɔ hi gun tɛŋk an hi loo hin luur du gɛ. 21Yɔ anbɔ lɛlyɔ rɔɔs mɔ gi ge, kpoos mɔ gi lɛlɔge be.

22Yɔ̧l gi muul pitilayɔ, yɔ̧l mɔ gi gi gaak rɔbtɔnɔ, muul mɔ sɛw gi gaak rɔbtɔnɔ be. 23Wɛɛ yɔ̧l mɔ gi gaa gɛ, muul mɔ sɛw gis lɛlwilɔ. Lɛlgaal yɔ mɔ muul gigi lɛlwilɔ, lɛlwil bɔ wilkɔ gi ri! 24Doo za ɗɛ̄ɛ̄ an gi woos baa eer woos gɛ; yɔ hɛ̧ɛ̧n zaa gbun lɔlɛ, yɔ wɛɛ yɔ ha̧a̧g a zaa bɔ gi muulɛ; zaabe, yɔ ɗɔbs zaa gbunu, wɛɛ yɔ bɔ̧ɔ̧ zaa gbunu. Nɛ́ ɗɛɛ an nɛ woos Bɛt woosɔ hi tus woosɔ eer sɛw ya̧a̧gbun du gɛ.

25Hinɔ gii be gisin raako a bɔnɛ zɛks zul nɛ a kol nɛ dɔŋgo nɛ ɛrɔ a be zɛm leesɔ ay be le an be za̧a̧n nɔ? Be zɛm hinyɔ̧k ay be yɔ̧ nɔ? Gbunɔ, bɔnɛ zɛks zul nɛ nɛ ɛrɔ a be zɛm gbandil ay be heg muul nɔ? Kol taa hinɗɔbt dāār lees gɛ ya? Muul taa hinɗɔbt dāār gbandil gɛ ya? 26Seen nɔɔs wɔ bɛtha hi balhin gɛ, hi ɓɛr gɛ, hi tɔ̧ɔ̧ hinza bil du gɛ. Yɛrɛ Baa nɛ yɔ bɛtha gihi leniko. Nɛ́ wɛ̄ɛ̄ gbɔɔl nɛ daarihi gɛ ya? 27A nɛ teesdu bɔ ɗɛɛ hi zulɔ zɛksigɔ an gi zibts kolɔ yɛms kaasi nɔ?

28Nɛ wɛɛ nɛ zɛksig zul nɛ nɔ hi gbandil dɔglɛ? Seen tulkɔ̧ɔ̧r wɔ hɛt du tɔɔkya̧ ma mi! Hi taa hinza wooko wɛɛ hi taa hinza tɛɛko, hi wɛɛ hi gi hinbɛt be! 29Yɛrɛ be raasinɛ, Sulemaanu hi zulɔ hi gbɔlumsɔ sɛw, dāg gbandil bɛtigya an wɔrɔ zaaya̧ gɛ. 30Nɛ Bɛt gi heksig hɛt wɔ hi za̧a̧k nɛɛko hi yɔ gɔ hi kpɔɔhi yoosig a laa du gbandil bɛti, yɔ heks nɛɛ gbandil yɔ daarlɛl gɛ ya? Nɛɛ dood ɗɔbsil fɛŋya wɛ!

31Yɔ anbɔ bɔnɛ zɛks zul nɛ nɛ raa a be le nɔ? Zaa lab gɛ, be yɔ̧ nɔ? Be heg nɔ? 32Yɛrɛ hin wɔrɔ lab sɛw, dood wɔ hi mɛɛ Bɛt gɛ hi gi hinya̧ hii tɛko. Baa nɛ yɔ gi a bɛtha mɛɛmɛ a hin wɔrɔ ha̧a̧n sɛw. 33Yɛɛlin nɛ woos Bɛt wáátɔ hinɛ hi hinyɔ ha̧a̧g kete, kuudu Bɛt gi wɛɛ gi goktsin hin wɛrɛ ha sɛw. 34Yɔ anbɔ bɔnɛ zɛks zul nɛ hi hinyɔ gɔ gi tuur yoosugo. Yoosig bɔ hinɔ gi zɛks zul ɔ̧ɔ̧n be. Ya̧a̧rhant yɔ gi zaak ɔ̧t nuŋg sɛw, rii ɔ̧t ɔ̧nɛ gbunu.

Currently Selected:

MATA 6: NTD

Highlight

Copy