MATA 26
26
MATA 26
1Yɔ Yeesu da̧a̧s dɔglɔ wɔrɔ sɛw raa walɛsɛrɛ ɔ̧ɔ̧ wɔ
2a nɛ mɛɛ a Paska naab zɛ̧ɛ̧r yɛms eerɛ an gi tuurɔ, wɛɛ Za̧a̧n Waa bɔ gi gaay ma a dood naandu an hi dooge dɔ̧ɔ̧r ha.
3A ɔ̧t gbun bɔ gedu Bɛtmaakwookya gbɔlɛ wɔ hi dood Yahuduya ɗɛntɛ wɔ hi rek hi mɔks a Bɛtmaakwookya gbɔɔl mɔɔt bɔ Kayafas raadu. 4Hi wɔya̧a̧ an hi rek hi wa̧a̧ Yeesu hi kɛ̧ɛ̧tigi hi gbɔŋge. 5Hi wɛɛ hi raa
a taa an wɛ wa̧a̧g naab teesdu, à labɔ, gabs yɔ ɗund a doodsaal teesdu.
6Anyɔ Yeesu gi a Betani a Simɔŋ ɗobtilya bɔ gi raa du, 7nis za kamz kurum ki̧i̧l hɛmntya tik gbunu tusɔ sa̧a̧ttɔnɔ. Tikɔ hi wɔmn bet za rɔb yɔ gɔ hi el a albaatreyɔ. Yɔ Yeesu ɗɔɔt an gi lehinɛ, nɛɛ bɔ sɔɔ gubsig kurum bɔ zulha. 8Yɔ walɛsɛrɛ ɔ̧ɔ̧ wɔ hi gbɛn nɛɛ bɔ gub kurum bɔ anbɔ nɔɔhi, hi wɛɛ hi raa
a hinhatirgo bɔrɔ gɔ hi dag nɔ du! 9À hi zebr nɛ kurum bɔrɔ tusɔ gbɔɔltɔnɔ hi gɛ̧ɛ̧s ya̧a̧rya wɔ gɔ nɔ?
10Yɔ Yeesu mɛɛ hin bɔrɔ warihi
a nɛ mɔɔsig nɛɛ bɔ a nɔ dɔŋ nɔ? Benɛ woosib hinrɔb a be gbaŋgi. 11Nɛ gin ya̧a̧rya wɔ nɛ teesdu faa, yɛrɛ beya, be taa waak hi nɛɛ faa. 12Nɛɛ bɔ gubsib kurum yɛrɛ be muul an gi gɛmntsib i̧i̧k beenɛ a loor du. 13Be raasin rɔbo, a lɛlyɔ gɔ hi dɔk Dɔgl Rɔb bɔ ge a waal du sɛw hí fɔ̀k hinyɔ nis bɔ woosib gii an hi mɛksinge.
14Hɔnɛ walɛsɛrɛ wɔ koobl daa eer zaaya̧ gbun bɔ nuŋgɔ a Yahuda Iskaryudi rek a Bɛtmaakwookya gbɔlɛ wɔ hi, 15warihi
a an be gaan Yeesu naan du, nɛɛ be nɛ gaab nɔ?
Wɔrɔ hi ɓɛr tus gaat dumbili taarɛ hi gaage. 16Bɛɛ anbɔ ma Yahuda yɛɛl gbɔnɔ ɓɛɛki an gi gaahi Yeesu naan du.
17A Paska naab-ɔ̧t biitir bɔ kok gɔ taan hɛ̧ɛ̧t gɛ gedu, walɛsɛrɛ wɔ hi zaa hi war Yeesu
a ha̧a̧mɔ an wi rek wi gɛmntsum Paska naab lees ay nɔ?
18Yeesu raahi
a rekin a waal gbɔɔl du a nɔɔkin ge nɛ raage a Hingokya bɔ raa a ɔ̧t be sɛ̧ɛ̧bɔ, be nab Paska naab a mɔ lɛl du hi walɛsɛrɛ be.
19Walɛsɛrɛ wɔ hi rek hi woo hinyɔ Yeesu raahi nɛko, hi wɛɛ hi gɛms Paska naab lees bɔ gɔ. 20Yɔ ɔ̧t legɔ Yeesu zaa ɗɔɔt gɔ hi walɛsɛrɛ ɔ̧ɔ̧ wɔ koobl daa eerɛ an hi lehinɛ. 21Yɔ hi gi hinleko Yeesu raahi
a be raasin rɔbo: zaa nɛ gbun gi rɛ̧ɛ̧be.
22Yɔ walɛsɛrɛ ɔ̧ɔ̧ wɔ hi kɛm anbɔ hi mim ha̧a̧ltɔnɔ hi wɛɛ hi warig gbunu gbunu
a Waar i, nɛ bee ma gɛ mi?
23Yeesu wɛɛ goo
a za̧a̧nyɔ yaa naan hi bee lɛlgbunu a kokdak du gii gi rɛ̧ɛ̧sibya̧a̧. 24Za̧a̧n Waa bɔ gi wɔr an hinyɔ Bɛt ɗɛɛrwol dɔg gi zulha, yɛrɛ ya̧a̧rhant gis za̧a̧nyɔ gɔ gi rɛ̧ɛ̧ Za̧a̧n Waa bɔ! À hi mɔɔnɛ za̧a̧nɔ gɛ yɔ riisige.
25Yahuda, za̧a̧n bɔ gɔ gi rɛ̧ɛ̧ge warige
a Hingokya , nɛ bee ma gɛ mi?
Yeesu googe a anyɔ mɔ dɔgɔ,
mɔya!
26Yɔ hi gi hinleko Yeesu loo kok kiml bɔ baan Bɛto, ɓɛɛlɔ gaa walɛsɛrɛ ɔ̧ɔ̧ wɔ raahi
a loonɛ nɛ le, yɛrɛ gi muul beenɛ.
27Wɛɛ loo dakwaa bɔ bumhob gi du, baan Bɛto wɛɛ gaahi raahi
a yɔ̧nɛ nɛ sɛw, 28yɛrɛ gi ga̧a̧m beenɛ, ga̧a̧m yɔ gi zuunik Bɛt ya̧a̧wɔkɔ hi doodɛ. Gi gub a dood kit dɔŋgo an Bɛt gi bitsihi hinha̧a̧lya̧. 29Be dɔgsinɛ: yɛɛl ɓɔryɔ, be taa bumhob yɛrɛ zaa yɔ̧ko gi tuur a ɔ̧tyɔ gɔ be yɔ̧k zaa sekt hi nɛɛ a Baa be wáát du.
30Hi wɛɛ hi ɛɛ Paska hin-ɛɛnɛ, hi tuu hi re gɔ a Kɔ̧ɔ̧b Ga̧a̧t ha. 31Yɔ anbɔ Yeesu raa walɛsɛrɛ ɔ̧ɔ̧ wɔ:
a yɛms yɛrɛ gedu nɛ simdɔɔ a be dɔŋg nɛ sɛw nɛ nɔɔ nɛ ɔɔbe. Ya̧a̧nɛ Bɛt ɗɛɛrwolɔ raa a be gbɔm nɛɛra bɔ, tam maas wɔ hi gig fɔk sɛw hi hɛksɔ. 32Yɛrɛ kuudu gɔ be rɛml wɔrk du be ɗundɔ, be dosin a Galile.
33Piyɛr goo raage
a an nabeza nɔɔ hi ɔɔmɔ si̧, benɛ be taam nɔɔk ɔɔk nɛ zaŋ!
34Yeesu raage
a be raasum rɔbo: a yɛ̧ms yɛrɛ gedu mɔ faab dɔɔ taarɛ a mɔ mɛɛbe gɛ, kɔba gi ɔɔ kekugo.
35Piyɛr raage
a gi gi nɛ an be wɔr hi mɔɔ si̧, be taa nɛ hinɔ faak nɛ zaŋ a be mɛɛmɔ gɛ.
Walɛsɛrɛ zaadɛ wɔ hi ta̧a̧ anbɔ sɛw. 36Yɔ anbɔ Yeesu wɛɛ zaatin hi walɛsɛrɛ ɔ̧ɔ̧ a lɛlza bɔ nuŋgɔ a Gɛsɛmanɛ ge, yɔ hi tuurɔ raahi
a ɗɔɔtin hɛdi, bee be da be zɔ̧bs Bɛto.
37Yɔ gi reko kam Piyɛr hi Zebede waatɔ wɔ eerɛ, Yohana hi Yakuba. Yaala yɛɛl miŋki hi koltuunɛ. 38Wɛɛ raahi gɔ
a kpoos be gisib wɔtigi hurko. Kɔmbin hɛdi nɛ za̧a̧lɔl hi beya.
39Wɛɛ rek hɛml kaasi gbuut a hɛbtdi zɔ̧ Bɛt an yɛrɛ lɛ:
a Baaba, hinɔ gi ɗɛɛ, hɛmlinmɔ dakwaa ya̧a̧rhantya yɛrɛ be muutdu, hinza gɛ, taa anyɔ ha̧a̧be, gi anyɔ ha̧a̧ mɔya.
40Wɛɛ wɛɛz a walɛsɛrɛ ɔ̧ɔ̧ taarɛ wɔ hi, zɛ̧hi yoom du. War Piyɛr
a yɛrɛ ma nɛ́ ɗɛ̄ɛ̄ an nɛ za̧a̧lɔl hi bee kaasi gɛ ya? 41Za̧a̧nlɔlɛ nɛ zɔ̧ Bɛto an bɔnɛ mat a maatil du. Doo bɔ mɔkilɔ ha̧a̧g an gi woo rɔbo, wɛɛ muulɔ hɔ̧nighɔ̧nɔ.
42Wɛɛ rek hɛml dɔɔ eesimɛ, wɛɛ zɔ̧ Bɛt an yɛrɛ lɛ:
a Baaba, gi taa an dakwaa ya̧a̧rhantya yɛrɛ gi ha̧sa be yɔ̧g gɛ gɛ, woom anyɔ ha̧a̧mɔ!
43Wɛɛ wɛɛz a walɛsɛrɛ ɔ̧ɔ̧ wɔ hi, wɛɛ zɛ̧hi yoom du ɓɛ, yoom bɔ ɓɛrihi be hi ɗɛ̄ɛ̄ an hi za̧a̧lɔl gɛ be. 44Yeesu wɛɛ hɛml ɔɔhi dɔɔ taasimɛ, rek zɔ̧ Bɛto dɔghin an ya̧a̧ gbuna bɔ. 45Kuudu wɛɛ wɛɛz a walɛsɛrɛ ɔ̧ɔ̧ wɔ hi raahi
a nɛ yok nɛ holikhol ma ya? Yɛrɛ ɔ̧tɔ tuur ma, Za̧a̧n Waa bɔ gi gaayyik ma gɛrɛ a hinha̧a̧lya wɔ hi naandu. 46Ɗukinɛ wɛ rekɔ! Yɛrɛ za̧a̧n bɔ gib rɛ̧ɛ̧ko gi gɛdi!
47Yɔ Yeesu gi ya̧a̧boosig te walɛsɛrɛ ɔ̧ɔ̧ koobl daa eer wɔ zaaya̧ gbun bɔ nuŋgɔ a Yahuda zaa, hi dood saal kittɔnɔ. Dood saal kit wɔ hi gig fɔbzugo hi kamzig daŋbɛsim wɛ, hi sɔɔl wɛ. Bɛtmaakwookya gbɔlɛ wɔ hi Yahuduya ɗɛntɛ wɔ hii yaazihi. 48Yahuda, za̧a̧n bɔ gi rɛ̧ɛ̧k Yeesu goks nɛ dood saal wɔ hinyɔ gɔgi re gi gɔs Yeesu anyɔ lɛ:
a za̧a̧nyɔ gɔ be re be zɔm wɛktɔ, za̧a̧nɔ giya, wa̧a̧nɛge.
49Yahuda yɔ sɛ̧ɛ̧bɔ sɔɔ Yeesu dɔŋdi nɔɔktɔnɔ raage
a seko, Hingokya!
Wɛɛ zɔm wɛktɔ feed. 50Yeesu wɛɛ ta̧a̧ raa
a sa̧a̧ɔ, nɛ woom hinyɔ mɔ zaa wook ma mi!
Yɔ anbɔ, dood zaadɛ wɔ hi zaanɛ di hi yu̧u̧ hi wa̧a̧g gɔ. 51Doo za gbun bɔ gi waatingo nɛ hi Yeesu hɔ̧b daŋ-bɛsim a saŋk du dɛ̧ɛ̧rin Bɛtmaakwookya gbɔɔl mɔɔt bɔ gbaarɔ tɔnɔ. 52Yeesu wɛɛ raa wal bɔ
a wɛɛnum daŋbɛsim mɔ bɔ saŋk du. Ya̧a̧nɛ, dood wɔ hi gbɔ̧mnik dood daŋbɛsimi, hi gbɔ̧mnihi daŋbɛsim be. 53Mɔ́ mɛ̄ɛ̄ a be ɗɛɛ an be ɛr Baa be Bɛt gi yaasib walɛsɛrɛ ɔ̧ɔ̧ layaadɛ gi daar duk koobl daa eerɛ an hi ɗaasib gɛ ya? 54Nɛ à be gɔ nɛ anbɔ, hinyɔ gi Bɛt ɗɛɛrwol du yɔ da̧a̧ ri nɔ? Bɛt ɗɛɛrwol bɔ raa a gi an hinɔ gi wooy gi da̧a̧ anyɔ lɛ.
55A yɛmsɔ gedu, Yeesu wɛɛ raa dood saal wɔ
a gi an nɛ zaan daŋbɛsim wɔ hi sɔɔl wɔ nɛ wa̧a̧be an be gi nɛ luur ha̧a̧l wɔdwɔɔlikya ya? Ɔ̧t nuŋg sɛw be ɗɔɔtig nɛ a Bɛtluk du be hingoko, wɛɛ nɛ zāā nɛ wa̧a̧b gɛ be. 56Yɛrɛ hin wɔrɔ hi tuur an hinyɔ Bɛtya̧a̧kɛŋkya wɔ hi bi̧i̧ a Bɛt ɗɛɛrwol du gi wooyyɔ .
Yɔ anbɔ walɛsɛrɛ ɔ̧ɔ̧ sɛw hi nɔɔ hi ɔɔge hi reekɔ.
57Dood wɔ hi wa̧a̧ Yeesu hi kaŋg a Bɛtmaakwookya gbɔɔl mɔɔt bɔ Kayafas ge a lɛlyɔ Bɛtmaakdɔkya wɔ hi Yahuduya ɗɛntɛ wɔ hi mɔks ge. 58Hɔnɛ Piyɛr gi fɔbzig Yeesu kuudu hɛmltɔnɔ be, zaa tuur a Bɛtmaakwookya gbɔɔl mɔɔt bɔ gi raa du, da gul raa teesdu, gi ɗɔɔtig hi walɛsɛrɛ lɛl-ookya wɔ lɛlgbunu an gi see hinyɔ gɔ gi wooy gi da̧a̧.
59Bɛtmaakwookya gbɔlɛ wɔ hi Yahuduya ɗɛntɛ wɔ hi Yahuduya dɔglyɛ̧ɛ̧kya wɔ sɛw hi gis Yeesu ya̧a̧gɔ̧ɔ̧mik muul an hi wa̧a̧nig dɔglɛ hi gbɔŋge. 60An dood zaadɛ kittɔnɔ hi gisig ya̧a̧wɔk si̧, hí zɛ̄m dɔgl za yɔ rii an hi gbaasig dɔgl ha gi wɔr gɛ be. Kuudu dood eerɛ hi sɔɔz gɔ ma ɓɔrɔ, 61hi raa
a za̧a̧n yɛrɛ dɔgɔ a be ɗɛɛ an be ɛ̧br Bɛtluk bɔ be wɛɛ be wɔŋge ɔ̧t taarɛ.
62Bɛtmaakwookya gbɔɔl mɔɔt bɔ ɗuk war Yeesu
a mɔ taa hinza gook ya? Dood wɛrɛ hi gim nɔ gɛ̧ɛ̧niko?
63Yɔ anbɔ Yeesu gōō hinza gɛ kɔms sɔsɔg. Bɔrɔ wɛɛ warige
a be gim raak an mɔ dɛŋglsib hin a Bɛt Za̧a̧til bɔ gi nuŋg du, mɔɔ gi Masihu bɔ, Bɛt waaɔ ya? Raasiwi hinɔ, wi mɛɛ.
64Yeesu googe
a anyɔ mɔ dɔgɔ . Yɛrɛ be raasinɛ yɛɛl ɓɔryɔ, nɛ gbɛn Za̧a̧n Waa bɔ gi ɗɔɔt a Bɛt Tɛŋkya Sɛw naanrɔbo. Nɛ wɛɛ nɛ gbɛnig zaakɔ a kuus ha a bɛtha hɛw.
65Bɛɛ anbɔ Bɛtmaakwookya gbɔɔl mɔɔt bɔ taar gbandilɔ gɔ kpa̧s wɛɛ dɔgɔ
a yɛrɛ boo ya̧a̧ha̧a̧l a Bɛt zulha da̧a̧da̧, ha̧a̧wɛ dɔgl segya ma gɛ! Nɛ lag ya̧a̧ha̧a̧lɔ yɔ boo a Bɛt zulha be! 66Nɛ mɔk nɔ?
Wɔrɔ hi ta̧a̧
a nɛ dɔgl wa̧a̧gwa̧, ɔɔ gbɔŋkyɔ.
67Bɛɛ ma anbɔ hi yɛlsig set tulsig a muutdu, hi wɛɛ hi zɔ̧ɔ̧ge, 68zaadɛ hi dɛŋg be, hi wɛɛ hi raage
a mɔɔ Masihu, Bɛtya̧a̧kɛŋkya gbɔɔlɛ, taamɔ, mɔ dɔgsiw za̧a̧nyɔ dɛ̧mɔ!
69Piyɛr rek ɗɔɔt nɛ raa du a luk dɔŋya̧ di be, nis za gbaar zaa raage
a nɛ mɔɔ da gitin nɛ hi Yeesu Galileya bɔ hɛw ma mi?
70Piyɛr faag a dood lɔlgbar sɛw raa
a bé mɛ̄ɛ̄ hinyɔ ha̧a̧mɔ dɔk gɛ.
71Yɔ wɛɛ gi rek a tutin-gbar bɔ ge, nis za wɛɛ gbɛnige, raas dood wɔ hi gidi
a za̧a̧n yɛrɛ da gitin hi Yeesu Nazarɛdya bɔ elo.
72Piyɛr wɛɛ faag dɔɔ eesimɛ
a be dɛŋglɔ, be mɛɛ walɔ gɛ.
73Kuudu kaasi wɔ hi ginɛ dihɔ hi wɛɛ hi sɔɔz a Piyɛr ge hi raage
a hi rɔbo, mɔ gi zaaya̧ gbunyɔ. Ya̧a̧boon mɔ bɔ gii zunsiw anbɔ be.
74Yɔ anbɔ Piyɛr wɛɛ yɛɛl dɔki
a be dɛŋglɔ, bé gi ya̧a̧gɔ̧ɔ̧ko Bɛt gí ha̧a̧nib ya̧a̧rɛ! Bé mɛ̄ɛ̄ wal yɛrɛ gɛ!
Ɓɔrbɔ kɔba kek gɔ gbɔŋ... ! 75Piyɛr wɛɛ mɔk mɛɛ hinyɔ Yeesu da raag nɛ be
a an kɔba gɔ gi kekɔ, mɔɔ mɔ faabe gi dor dɔɔ taarɛ a mɔ mɛɛbe gɛ.
Wɛɛ tuu lak di kaa ha̧a̧ltɔnɔ.
Currently Selected:
MATA 26: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.
