MATA 27
27
MATA 27
1Yɔ lɛl gaa bi̧i̧ltɔnɔ Bɛtmaakwookya gbɔlɛ wɔ hi Yahuduya ɗɛntɛ wɔ sɛw hi mɔks hi wɔ̀ kɔlki a Yeesu zulha an hi gbɔŋge. 2Hi wa̧a̧ Yeesu hi wɔge hi wɛɛ hi kaŋge a hɛbtzulya bɔ Pilatu ge. 3Yɔ Yahuda, za̧a̧n yɔ rɛ̧ɛ̧ Yeesu gbɛn hi wa̧a̧ Yeesu hi rek hi gisig dɔgl-gbaak anbɔ, mɛɛ hinyɔ gɔ gi woo gɛ, wɛns Bɛtmaakwookya gbɔlɛ wɔ hi Yahuduya ɗɛntɛ wɔ tus bɔ hi toog nɛko tus gaat dumbili taarɛ, 4raahi
a yɔ be rɛ̧ɛ̧ za̧a̧n yɔ taan hin-a̧a̧b gɛ, be gaag a wɔrk naan du, be woo hinha̧a̧lɛ!
Wɔrɔ hi googe
a dɔgl wi gidu ya? Dɔgl mɔɔnɛ.
5Yahuda yɔ lag anbɔ bis tus bɔ a Bɛtluk du dihɔ wa̧a̧ gbɔnɔ tuu rekɔ, da kar ba̧a̧n ɓɛyɔ. 6Bɛtmaakwookya gbɔlɛ wɔ hi sɛ̧ɛ̧k tus gaat wɔ bis hɛbtdi hi raa:
a tus yɛrɛ ga̧a̧mtusɛ; maak wɛ gāaw gbɔnɔ an wɛ loo wɛ gbaa a Bɛtluk tusgbaaklɛl du gɛ.
7Yɔ hi watin dɔglɔ hi loo tus bɔ, hi zemn nám dɔnwɔŋkya bako an hi gbaas dood rɔ̀bɛ loorlɛlɛ. 8Yɔ anbɔ, tuur a ɔ̧ti gi zulɛ, hi elik bak bɔ a ga̧a̧mbako, 9an hinyɔ Bɛtya̧a̧kɛŋkya bɔ Zeremi dɔg amntɔnɔ gi wooyyɔ
a hi loo tus gaat dumbili taarɛ 10hi zemn nám dɔnwɔŋkya bako anyɔ Waar Bɛt raasib dɔglɔ.
11Yɔ hi kam Yeesu gi erk a hɛbtzulya bɔ Pilatu muutdu, warige
a mɔɔ gi Yahuduya waar gbɔɔl ya?
Yeesu goo
a anyɔ mɔ raa.
12Hɔnɛyɔ Bɛtmaakwookya gbɔlɛ wɔ hi Yahuduya ɗɛntɛ wɔ hi gig hingɛ̧ɛ̧nik be, wɛɛ gōō hinza ma gɛ. 13Yɔ anbɔ, Pilatu warige
a mɔ taa kɛŋk dɔgl kit wɔ hi gim gɛ̧ɛ̧nik ya?
14Yeesu kɔm hititi, gōō nɛ hinza gbun mɔɔt gɛ; bɛɛ anbɔ hin kɔms hɛbtzulya bɔ gɛrs gbɔɔltɔnɔ. 15Hɔnɛyɔ Paska naab gɔ rii, hɛbtzulya bɔ gɔ gi waasig dood saal wɔ luknɔya za gbun yɔ hi ɛrige bisigi. 16Doo za luknɔya giro nuŋgɔ a Barabas, dood sɛw hi mɛɛ gabsɔ dɔglɛ. 17Yɔ anbɔ, Pilatu war ma dood saal wɔ hi mɔksɔ
a ha̧a̧nɛ an be bitsin bɔ? Barabas gii ya, Yeesu bɔ nuŋgɔ zaa a Kristu gii ya?
18Gii hɛbtzulya bɔ mɛɛ be a hi gaanib Yeesu naandu hi ka̧a̧syɔ. 19Wɛɛ, yɔ Pilatu da gi ɗɔɔtig a dɔgl-gbaak luk du
a gi ɗɔɔtillɛlɛ, nistɔ yaasig ramsɛ a bɔmɔ gɔs nɛ wal riit bɔrɔ hinza nɛ zaŋ. Hinɔ giya lel yɛms du yorum gi ha̧a̧nib ya̧a̧r gbɔɔltɔnɔ a gi dɔŋgo.
20Hɔnɛ Bɛtmaakwookya gbɔlɛ wɔ hi Yahuduya ɗɛntɛ wɔ hi sɔmb dood saal wɔ an hi ɛr Pilatu gi bis Barabas gi ɔɔ Yeesu hi gbɔŋge. 21Hɛbtzulya bɔ wɛɛ warihi
a dood eerɛ wɛrɛ ha̧a̧nɛ an be bitsin nɔni?
Wɔrɔ hi ta̧a̧
a Barabas giya!
22Wɛɛ warihi
a Yeesu yɔ nuŋgɔ a Kristu be woosig nɔ?
Dood sɛw hi ta̧a̧
a doomɔg dɔ̧ɔ̧r ha!
23Pilatu wɛɛ warɔ
a woo nɔ hinɔ ha̧a̧lɔ nɔ?
Wɔrɔ hi wɛɛ hi ɓooya̧a̧ hi tɛŋko
a doomɔg a dɔ̧ɔ̧r ha kpɔd!
24Yɔ Pilatu ɗɛɛ hinza gɔk gɛ, gi wɛɛ gi gbɛn gabs gi ɗundig a dood teesdu loo mɛm nɛɛn naanɔ a dood saal wɔ hi lɔlgbar sɛw dɔgɔ
a wal yɛrɛ wɔrkɔ dɔgl be taa du! Dɔgl nɛɛnɛ!
25Dood saal wɔ sɛw hi ta̧a̧
a an ga̧a̧mɔ gi wɛɛz wi zulha hi waat wi zulha!
26Bɛɛ anbɔ Pilatu bitsihi Barabas wa̧a̧ gbɔnɔ rek be. Wɛɛ raa dood zaadɛ hi lɛb Yeesu hi kpoot yɔ hi yɛɛn tusɛ, wɛɛ loo Yeesu gaa dood naandu an hi rek hi doog dɔ̧ɔ̧r ha.
27Pilatu laaya ɔ̧ɔ̧ wɔ hi loo Yeesu hi kaŋg hɛbtzulya bɔ raaɔ bɔ ge du, laaya wɔ hi zɛɛr nɛ sɛw hi mɔks lɛlɔdi. 28Hi hod gbandilɔ wɔ hi wɛɛ hi heksig dimnaan hob muulɛ. 29Hi wɛɛ hi haŋg kal kobsya hi heksig zulha, hi wɛɛ hi gaag bɔ̧ɔ̧kkok wa̧a̧ a naanrɔbo. Hi zagl gi muutdu hi kpɛ̧ɛ̧lig hi raag anyɔ lɛ,
a seko ya, Waar Yahuduya!
30Hi tulsig set muulɛ, hi wɛɛ hi loo bɔ̧ɔ̧kkok bɔ hi gaag nɛ hi lɛmnig zulha.
31Yɔ hi kpɛ̧ɛ̧lig gi da̧a̧ anbɔ hi hod dimnaan hob bɔ, hi wɛɛ hi heksig gbandilɔ wɔ muulɛ, hi kaŋg ma gɔ an hi rek hi doog a dɔ̧ɔ̧rha.
32Yɔ dood hi tuuzig hi Yeesu hi dagtin hi wal za Kirɛnɛya nuŋgɔ a Simɔŋ hi fɛ̧ɛ̧ge pɛɛ Yeesu dɔ̧ɔ̧rɔ bɔ kamɔ. 33Yɔ hi rek hi tuur a lɛlyɔ gɔ hi el a Golgota (raakɔ a zullɛŋk lɛlɛ) ge, 34hi gaa Yeesu bum yɔ hi ɔksin yɛ̧ɛ̧s zobtil an gi yɔ̧, hɔnɛ gii yɔ dag be iinɔ.
35Hi looge hi doog a dɔ̧ɔ̧r bɔ hage hi wɛɛ hi gɛ̧ɛ̧tin gbandilɔ wɔ hi len subudyɔ. 36Hi wɛɛ hi ɗɔɔt dihɔ hi ooge. 37Hi bi̧i̧ hinza a tɛ̧ɛ̧hɛɛk fɛɛt ha a ZA̧A̧N YƐRƐ GI YEESU , YAHUDUYA WAAR YƆ, hi doo gi zullɛl ha a dɔ̧ɔ̧r muulɛ, an hi zuun dɔglɔ. 38Hi wɛɛ hi doo luurɛ ha̧a̧l eerɛ a dɔ̧ɔ̧r zaadɛ ha a gi dɔŋdi: gbunu a gi naanrɔbo, zaa gbunu a gi naanyɛ̧li. 39Dood wɔ hi daak hɔdi hi namsig zulya̧ hi Yeesu niiko,
40a mɔɔ Bɛtluk-ɛ̧brikya bɔ, wɔŋkya bɔ ɔ̧t taarɛ! Za̧a̧sum zul mɔ ma! Gid mɔ gi Bɛt waayɔ, sizum dɔ̧ɔ̧r bɔ hage ma!
41Bɛtmaakwookya gbɔlɛ wɔ hi Bɛtmaakdɔkya wɔ hi Yahu-duya ɗɛntɛ wɔ hi gig kpɛ̧ɛ̧lik an hin gbun bɔ hɛw, hi raako:
42a woy! za̧a̧s dood zaadɛ be, yɛrɛ ɗɛɛ an gi za̧a̧s zulɔ ma gɛ ya? Nɛ gii gi Israhilaya waar i ma. Sizig ma ɓɔri a dɔ̧ɔ̧r bɔ hage, wɛɛ be, wɛ ɗɔbsig ma! 43Gbaa kpoosɔ sɛw a Bɛt ge, dɔg a bee be Bɛt waayɔ. Bɛrɔ! Yɛwɛ see kinsa Bɛt ha̧a̧g gi muulɛ an gi za̧a̧sig ɓɔri be!
44Wɛɛ luurɛ ha̧a̧l wɔd wɔɔlikya wɔ hi doohi dɔ̧ɔ̧r ha a gi dɔŋdi hi gig niik lab be.
45A lurk teesdu der, lɛlwil a waal bɔ gedu sɛw, am tuur a naaba̧a̧n du. 46Yɔ ɔ̧t gi a naaba̧a̧n du Yeesu ɓooya̧a̧ ha̧a̧ltɔnɔ el hinɛ a
ꞌꞌEli, Eli, laama sabaktani? ꞌꞌ
Raakɔ a
Bɛt be, Bɛt be, mɔ ɔɔb nɔ?
47Dood zaadɛ wɔ hi erk nɛ lɛlɔdi hi lag anbɔ hi raa
a za̧a̧n yɛrɛ gi elik Eliya giya!
48Ɓɔrbɔ zaaya̧ gbun nɔɔ da looz bɔɔm tɔ̧ɔ̧z mɛm haatil gedu sa̧a̧ a bɔ̧ɔ̧kkok mɛs ha dɔns Yeesu ya̧a̧gbarɔ an gi yɔ̧. 49Hɔnɛ dood zaadɛ wɔ hi raa
a erum kete, kinsa Eliya gi zaa gi za̧a̧sig be!
50Yeesu wɛɛ ɓooya̧a̧ ha̧a̧ltɔnɔ wɔr gɔ.
51Yɔ anbɔ gbandil fɛɛt bɔ hi mal a Bɛtluk du taar tees du der, yɛɛl taarik wɛɛha had wɛɛdisɛ. Hɛbt namɔ, hɛɛl gbɔlɛ wɔ hi ɓɛɛlɔ. 52Loor wɔ hi mibtir be Bɛt doodɔ wɔ hi wɔr nɛ kittɔnɔ hi rɛmlɔ hi ɗund 53hi tuuz a loor wɔ gedu be. Yɔ hi ɗund a Yeesu rɛmtigɔ kuu, hi gul a waal gbɔɔl gaat bɔ Urusalima gedu, dood kittɔnɔ hi gbɛnihi be. 54Laaya gbɔɔl Romaya bɔ gi erk di hi laaya dɛɛt wɔ hi ook nɛ an bɔhi loo Yeesu muulɔ bɔ dɔ̧ɔ̧r ha luurɛ, yɔ hi gbɛn hɛbt bɔ beekɔ anbɔ hi hinyɔ tuur sɛw hoob gi ha̧a̧hi ha̧a̧ltɔnɔ hi dɔgɔ
a hi rɔbo, wal yɛrɛ gi nɛ Bɛt waayɔ!
55Nɛɛd zaadɛ kittɔnɔ hi gi erk nɛ hɛmltɔnɔ hi lɔl seezugo. Hii da fɔbz nɛ Yeesu a Galile hi gaag nɛ leesɛ. 56A hi teesdu Mariyama Magdalaya bɔ giro, Mariyama yɔ gi Yakuba hi Yusufu nàaya̧ hi Zebede waatɔ wɔ naaya̧ hi ginɛ du be.
57Yɔ ɔ̧t legɔ doo rɔɔsya zayɔ fu̧u̧ a Arimate waal gbɔɔl du tuurɔ, nuŋgɔ a Yusufu; gi Yeesu fɔkya ɔ̧ɔ̧n hɛw, 58rek zɛm Waar Pilatu warig Yeesu muulɔ bɔ. Yɔ anbɔ Pilatu raa a hi rek hi gaa Yusufu Yeesu muulɔ bɔ.
59Yusufu rek loo Yeesu muulɔ bɔ, wɛɛ da loo gbandil buu fɛr fɛɛti wɔbtinge, 60kam i̧i̧ a loor seg ɔ̧nɛ yɔ su̧u̧ hi naanɔ a hɛɛl gbɔɔl du gedu. Wɛɛ kibl hɛɛl fɛɛti mibtin loor bɔ ya̧a̧gbarɔ rekɔ. 61Mari-yama Magdalaya bɔ hi Mariyama zaa bɔ hi gidi hi ɗɔɔt hi riitin hi loor bɔ ya̧a̧gbarɔ der.
62Yoosugɔ holum-ɔ̧tyɔ hi gɛms wɔd gedu talɔ, Bɛtmaak-wookya gbɔlɛ wɔ hi Farisaya wɔ hi rek hi mɔks a Pilatu muutdu, 63hi raage
a ɗɛntyɔ, be mɔk be mɛɛ a Yeesu , wal ya̧a̧gɔ̧ɔ̧nya bɔ ginɛ za̧a̧til da dɔg nɛ a kuudu ɔ̧t taarɛ be rɛmlɔ be ɗundɔ. 64Yɛrɛ, raam laaya wɔ hi rek hi oo loor bɔ gi tuur ɔ̧t taasimɛ, an bɔ walɛsɛrɛ ɔ̧ɔ̧ wɔ hi rek hi loo wɔrkɔ bɔ luur an hi wɛɛ hi raas dood kuudu: a Yeesu wɛɛ rɛmlɔ ɗuundɔ. Kuudu ya̧a̧gɔ̧ɔ̧nɔ yɔ tɔɔ yɔ daar doos bɔ hɛw.
65Yɔ Pilatu lag anbɔ wɛɛ raahi
a nɛ loon layaadɛ lɛl-ookyaadɛ gɛrɛ, nɛ da nɛ rek nɛ oo loorlɛl bɔ bɛttɔnɔ anyɔ nɛ ɗɛɛ.
66Yɔ anbɔ hi re gɔ. Yɔ hi rekɔ hi see loorbet bɔ, hi wɛɛ hi loo ba̧a̧ni hi wɔmn loorbet bɔ hi wɛɛ hi gbaa laaya wɔ hi oo gɔ.
Currently Selected:
MATA 27: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.
