MATA 23

1Yɔ anbɔ Yeesu boos dood saal wɔ hi walɛsɛrɛ ɔ̧ɔ̧ wɔ dɔgl raahi

2a Bɛtmaakdɔkya hi Farisaya gɔ hi wadil Muusa maakdɔglɔ wɔ. 3Yɔ anbɔ, kɛmsinɛhi tɔnɛ nɛ woo hinyɔ hi raasin sɛw, yɛrɛ bɔnɛ fɔ woosya̧ naandu ɔnɛ. Wɛɛ dɔgl yɔ hi dɔko, hí woo hinɔ du gɛ be. 4Hi wɔk hinɗɔmn ɗɔbtɛ hi gis dood gbaak zul ha; ha̧a̧hi naanwalya̧ ki̧i̧nik mɔɔti an hi yɛsihi hinɗɔmnya̧ bɔ gɛ be.

5Hi wook woosya̧ sɛw hi zulpɛɛki an dood hi gbɛnihi kpɔd. Bɛtmaakwɔdya̧ yɔ gɔ hi malk muutdu, zaabe a naanyɛ̧li, hi wɛɛnihi fɛɛtɛ hi daarlɛlɛ, hi wɛɛ hi zi̧bs gbanya̧ gbɔlɛ tɔlya̧ wɔ an dood hi seehi. 6Ha̧a̧hi ɗɔɔtillɛl rɔbɛ a lees gbɔlɛ leklɛlɛ, hi ɗɔɔtillɛl hɔɔtɛ wɔ daarlɛlɛ a mɔksilluk wɔ gedu. 7Ha̧a̧hi an dood hi hu̧u̧r di hi boohi a luum wɔ ha hi, an hi wɛɛ hi elihi a hingokya wɛ.

8Yɛrɛ nɛya, taa an hi elin a hingokya. Gɛ nɛ gin hingoknɛya gbun kpɔd: beeya, wɛɛ, nɛɛ sɛw, nɛ gitin yɛ̧ɛ̧dɛyɔ. 9Bɔnɛ el doo za hɛbtdi a baa be! Gɛ nɛ gin Baa nɛ Bɛt yɔ gi a bɛtha kpɔd. 10Bɔnɛ ɔɔ dood hi elin a waar i. Bee, Masihu bɔ, bee gi Waar nɛ kpɔd. 11Za̧a̧nyɔ gi gbɔɔl gi daarlɛl a nɛ teesdu gi wɛɛ woosnɛya. 12Za̧a̧nyɔ tɔɔs zulɔ be hi tiisige, za̧a̧nyɔ tiis zulɔ wɛɛdis be hi dɔɔsige.

13Nɛɛ Bɛtmaakdɔkya wɛ hi Farisaya wɛ, mɛlya ha̧a̧l wɛ, ya̧a̧rhant gisinɛ! Nɛ gi dood Bɛt wáátɔ gbɔnɔ yɛ̧ktugo. Nɛɛ hi zul nɛ nɛ gul gɛ, wɛɛ nɛ ɔ̄s dood wɔ ha̧a̧hi Bɛt gbɔnɔ gulk an hi gul gɛ be. [ 14Nɛɛ Bɛtmaakdɔkya wɛ hi Farisaya mɛlya ha̧a̧l wɛ, ya̧a̧rhant gisinɛ! Nɛ wɔɔlik hinyɔ kuurɛ nɛɛd wɔ hi gin sɛw, nɛ wɛɛ nɛ zɔ̧k Bɛt zi̧i̧tɔnɔ an hi seenɛ an dood rɔbɛ. Yɔ anbɔ nɛ́ dag dɔgl-gbaak gi daarlɛlɛ. ]

15Nɛɛ Bɛtmaakdɔkya wɛ hi Farisaya, mɛlya ha̧a̧l wɛ, ya̧a̧rhant gisinɛ! Nɛnɛ nɛ gbɛ̧ɛ̧kig a lɛlyɔ hɛbt gi ge sɛw, nɛ gbɛ̧ɛ̧kig a mɛmbal wɔ du sɛw a lɛmb du an nɛ dag doo gbunu gi zɛmr mɔkilɔ gi fɔnɛ, wɛɛ yɔ nɛ dagige nɛ wɛɛnig doo laazɛŋk gbɔnɔ fɔkya daar nɛɛ dɔɔ eerɛ. 16Nɛɛ yɔ̧ɔ̧rɛ wɔ nɛ tɛlik yɔ̧ɔ̧rɛ zaadɛ, ya̧a̧rhant gisinɛ! Nɛ raa a za̧a̧n za gi dɛŋglhin hi Bɛtluk nuŋgɔ, taa hindɛŋglik rɔbo; gi dɛŋglhin hi hɛɛlmɔtyɔ gi a Bɛtluk du, dɛŋglhin rɔb tuu gɔ ma ɓɔrɔ.

17Yoo wɛrɛ, yɔ̧ɔ̧rɛ wɛrɛ, nɔni gi hinɗɔbt nɔ? Hɛɛlmɔt gii ya, Bɛtluk yɔ wɛɛn hɛɛlmɔt hingaat gii ya ri? 18Nɛ wɛɛ nɛ raa a doo gi dɛŋglhin hi Bɛtmaak sɛŋk nuŋgɔ, taa hindɛŋglik rɔbo. Gid nɛ dɛŋglhin hi gaas yɔ hi gbaa a Bɛtmaak sɛŋk hage nuŋgɔ, hindɛŋglik rɔb tuu gɔ ma ɓɔrɔ.

19Yɔ̧ɔ̧rɛ wɛ! Nɔni gi hinɗɔbt nɔ? Gaas gii ya, Bɛtmaak sɛŋk gii ya ri? Nɛ Bɛtmaak sɛŋk gii ma mi? 20Za̧a̧nyɔ dɛŋglhin hi Bɛtmaak sɛŋk bɔ nuŋgɔ, dɛŋglhin hi lɛl bɔ hi hinyɔ gi hage sɛw. 21Za̧a̧nyɔ dɛŋglhin hi Bɛtluk nuŋgɔ, dɛŋglhin hi Bɛtluk nuŋgɔ hi Bɛt nuŋgɔ yɔ gi waak gedu hɛw. 22Za̧a̧nyɔ dɛŋglhin hi bɛtha nuŋgɔ, dɛŋglhin hi Bɛt waar ums ɗɔɔtillɛlɔ bɔ nuŋgɔ hi Bɛt yɔ ɗɔɔt hage.

23Nɛɛ Bɛtmaakdɔkya wɛ hi Farisaya mɛlya ha̧a̧l wɛ, ya̧a̧rhant gisinɛ! Gɔ nɛ ha̧sig Bɛt gaasɔ a kalde kpas wɛ hi kumbe kpas wɔ nɛ zebtig gedu, nɛ gisig tusɔ gbaako an dimi. Yɛrɛ nɛ wɛɛ nɛ ɔɔ hinwɔ hi gogɔ hi ɗɔb hi daarlɛl a Bɛtmaak du, an hinwooki hi gbɔnɔ, ya̧a̧rmɛɛki, hi ɗɔbsigi. Hin wɛrɛ hii bɛrɔ an nɛ woo. Wɛɛ bɔnɛ ɔɔ wɔ hi zɛ̧ɛ̧r wookɔ.

24Yɔ̧ɔ̧rɛ wɔ nɛ tɛlik yɔ̧ɔ̧rɛ zaadɛ! Nɛ dakig tɔmsir waat wɔ nɛ wɛɛ nɛ i̧i̧k gɛloba gii a buudu! 25Nɛɛ Bɛtmaakdɔkya wɛ hi Farisaya mɛlya ha̧a̧l wɛ, ya̧a̧rhant gisinɛ! Nɛ nɛɛtig mɛmdak bɔ kuuɔ hi kokdak bɔ kuuɔ, nɛ wɛɛ nɛ ɔɔ buuya̧ du hi̧i̧s hi doolek nɛ wɔ hi ɗɔkum ha̧a̧l wɔ nɛ kpoos du.

26Farisaya yɔ̧ɔ̧ri, nɛɛtum dakwaa bɔ buuɔ kete, ɓɔr kuuɔ bɔ gi gaa gɔ sɛw.

27Nɛɛ Bɛtmaakdɔkya wɛ hi Farisaya mɛlya ha̧a̧l wɛ, ya̧a̧rhant gisinɛ! Nɛ riitin an looryɔ hi buusige gi bɛr a kuuha, wɛɛ a buu du hi̧i̧s hi wɔrkɛ lɛŋk wɛ hi hinza dokil wɛ sɛw. 28Nɛɛ hɛw nɛ gbunɔ giya, nɛ bɛs doo a muulɛ, wɛɛ kpoos nɛ hi̧i̧s hi mɛlɛ hi ha̧a̧lɛ.

29Nɛɛ Bɛtmaakdɔkya wɛ hi Farisaya mɛlya ha̧a̧l wɛ, ya̧a̧rhant gisinɛ! Nɛ wɔmsig Bɛtya̧a̧kɛŋkya wɔ hi wɔr nɛ loor bɛtɛ; nɛ wɛɛ nɛ bi̧i̧lik kɔ̧ɔ̧tig a dood riitɛ wɔ hi loor ha. 30Nɛ wɛɛ nɛ dɔko a an wi gi nɛ a ɗɛntɛ waabil bɔ doos gedu, yɔ wi ɔks hi baa wi hii an wi gbɔm Bɛtya̧a̧kɛŋkya wɔ gɛ. 31Yɔ anbɔ nɛ book dɔgl nɛ nɛ ta̧a̧ko a nɛ gi dood wɔ hi gbɔm Bɛtya̧a̧kɛŋkya wɔ waat ya̧a̧nɛ. 32Bɛrɔ! Nɛ yɛrɛ da̧a̧sin hinyɔ baa nɛ hi da hi baar nɛ wookɔ ma.

33Nɛya, kpolumdɔ̧ɔ̧t wɛ! gi an nɛ nɔ̀ɔ̀ dɔgl yɔ gɔ gi matin laazɛŋk du ri nɔ? 34Yɔ anbɔ, laginɛ, be gisin yaak Bɛtya̧a̧-kɛŋkyaadɛ hi dood hinmɛɛkya dubtɛ wɛ hi Bɛtmaakdɔk-yaadɛ. Nɛ gbɔm zaadɛ, nɛ doohi a dɔ̧ɔ̧r ha, nɛ lɛbt zaadɛ hi kpooti a mɔksilluk nɛ wɔ hi du be, nɛ wɛɛ nɛ tɛkihi a waal gbɔlɛ wɔ hi du sɔmsɔm an nɛ kɛtinihi ya̧a̧. 35Kuudu dood riitɛ wɔ hi gbɔ̧hi nɛ sɛw ga̧a̧mya̧ gi wɛɛ nɛ zulha; gi baar a hinriitwookya bɔ Abɛl wɔrk muulɛ gi tuur a Barakiya waawal Zakariya yɔ nɛ gbɔŋg a Bɛtluk bɔ teesɔ gedu hi Bɛtmaaksɛŋk bɔ.

36Be gisin raak rɔbo, wɔrkɛ wɔrɔ ya̧a̧r-hantya̧ bɔ sɛw gi wɛɛ a dood wɔ hi waak ɓɔryɔ hi zulha.

37Urusalima! Urusalima! Mɔɔ yɔ mɔ gbɔŋk Bɛtya̧a̧-kɛŋkya wɔ mɔ wɛɛ mɔ gi duutingo dood wɔ Bɛt yaasimɔhi bet an hi wɔrɔ! Ha̧a̧b nɛ an be mɔks waat mɔ wɔ dɔɔ baari a be dɔŋdi an kɔɔnɔɔ gi buuk waatɔ a pakir du? Yɔ anbɔ da ha̧a̧n nɛ gɛ! 38Bɛrɔ! Yɛrɛ hi ɔɔ raat nɛ wɛɛ beemɛ. 39Yɛrɛ be gisin raako: gi baar ɓɔryɔ nɛ taab zaa gbɛniko gi tuur an nɛ dɔgɔ a an Bɛt gi rɔbs Za̧a̧nyɔ gi zaak a Waar Bɛt nuŋg du!

Currently Selected:

MATA 23: NTD

Highlight

Copy