MATA 22

1Yeesu wɛɛ dɔks dood dɔgl hi ya̧a̧daanik ɓɛ raahi

2a Bɛt wáátɔ riitin an waar za yɔ gi gɛmtsig waawal lottins lees gbɔɔlɛ. 3Yaa gbaarɛ ɔ̧ɔ̧ wɔ hi rek hi elz dood wɔ gɔ hi le lottins lees bɔ an hi zaa hi le hinɛ, dood wɔ be hi iin zaakɔ. 4Wɛɛ yaa gbaarɛ ɔ̧ɔ̧ zaadɛ dɔɔmɛ raahi a dɔksin dood a be gbɛɛr naabaadɛ be wɔ hi tam be wɔ, be gɛms lees sɛw da̧a̧da̧ ma ɓɔryɔ, zaan nɛ le lottins lees bɔ ma!

5Dood wɔ hi elihi ya̧nɛ dɔglya̧ taa du, hi rek woos ya̧a̧nɛ, zaadɛ hi re bako, zaadɛ be, hi rek wɔdya̧ riŋnik be. 6Dood zaadɛ wɔ be, hi wa̧a̧ waar bɔ gbaarɛ ɔ̧ɔ̧ wɔ hi niihi, hi wɛɛ hi gbɔ̧hi. 7Yɔ waar bɔ lag dɔglɔ gi nɔɔsig ha̧a̧ltɔnɔ, yaa laaya ɔ̧ɔ̧ wɔ hi rek hi wa̧a̧hi hi gbɔ̧hi, hi kpɔɔ waal gbɔɔlya̧ bɔ be. 8Kuudu wɛɛ raa gbaarɛ ɔ̧ɔ̧ wɔ a hi gɛms lottins lees bɔ da̧a̧da̧, wɛɛ dood wɔ hi elihi nɛ hí rı̄ı̄ an hi zaa hi le gɛ be. 9Yɔ anbɔ rekin a bɔrignɔɔ wɔ hi du nɛ elz dood wɔ gɔnɛ zɛmzihi sɛw hi zaa lottins lees bɔ.

10Gbaarɛ wɔ hi rek a bɔrignɔɔ wɔ hi du hi elz dood wɔ hi zɛ̧hi sɛw, dood bɔbtin wɔ hi dood rɔ́bɛ wɔ sɛw, hi kamzihi a lottins lɛl bɔ ge, lɛl hi̧i̧s gɔ deder. 11Hɔnɛyɔ waar bɔ gul raa du gi see dood wɔ hi elzihi, gbɛn doo za gidu hegz lottins gban muul gɛ,

12warige a sa̧a̧ɔ mɔ guz ri hɛdi mɔ hegz lottins gban mɔ muul gɛ be? Wal bɔ kɔm hititi, tā̧ā̧ hinza gɛ. 13Waar bɔ raa lottins lees woosya wɔ a loozin ba̧a̧ni nɛ wɔmn wal yɛrɛ dɔɔɔ wɔ hi naanɔ wɔ nɛ gbalig lak di a lɛlwil du, gi kaa gi gboo nuŋgɔ a lak hɔ.

14Yeesu wɛɛ dɔgɔ

a yɔ anbɔ, hi el dood kittɔnɔ, wɛɛ dood wɔ hi herihi hi kit gɛ.

15Kuudu Farisaya wɔ hi rek hi watin an hi ton Yeesu hi hinwarki hi dɔglɔyɔ gɔ gi booko. 16Farisaya wɔ hi wɛɛ hi yaa walɛsɛrɛ ya̧ hi Waar Hirudus doodɔ an hi warig hinɛ

a Hingokya , wi mɛɛ a mɔ gi doo kpoosrɔbya, mɔ wɛɛ mɔ gok Bɛt gbɔnɔ hi rɔbo, hoobhā̧ā̧mɔ dood gɛ, mɔ taa seek dood bɛtig a muutdu be. 17Raasiwi hinyɔ mɔ mɔkig a dɔgl yɛrɛ hage: maak wɛ gaa gbɔnɔ an hi toos Waar gbɔɔl bɔ Kaysara toos ya, gaa gɛ ya ri?

18Yɔ Yeesu mɛɛ ha̧a̧lya̧, warihi

a nɛɛ dood mɛlha̧a̧lya wɛ, nɛ gib tolik hi dɔgl nɔ? 19Zunsinbe tusyɔ nɛ toonik toosɛ.

Hi kamsig tus gaat gbunu, 20Yeesu wɛɛ warihi

a bɔ muut yɛrɛ hi nuŋg yɛrɛ hi bi̧i̧ du yɔ nɔ?

21Hi ta̧a̧

a waar gbɔɔl mɔɔt bɔ Kaysara ɔ̧ɔ̧nɛ.

Yeesu wɛɛ raahi

gɔ a wɛɛnsin waar bɔ Kaysara hinyɔ ginɔ, wɛɛn nɛ wɛɛns Waar Bɛt hinyɔ gin be.

22Yɔ hi lag dɔgl bɔrɔ anbɔ hin kɔmsihi gɛrs hi ɗund hi ɔɔge hi rek be.

23A ɔ̧t gbun bɔ gedu Sadukiya zaadɛ wɔ gɔ hi dɔk a wɔrkɛ hi taa zaa rɛmluko hi zaa a Yeesu ge hi warige

24a Hingokya , Muusa raa a walza gi gin nisɛ, wal bɔ gi wɔrɔ gi ɔɔ waat gɛ, yɛ̧ɛ̧tɔ gi yɛr kuur bɔ an hi daks hindaɔ waato. 25Ɔ̧tza walɛ zaadɛ hi ginɛ wi teesdu, hi mɔɔhi hi nɔɔn-erɛ, gbɔɔl bɔ wɔr ma ɔs yɛ̧ɛ̧tɔ gii kuurɔ bɔ. 26Yɛ̧ɛ̧tɔ bɔ wɛɛ wɔrɔ, taasum bɔ wɔrɔ, wɔrk da̧a̧sihi hi nɔɔn-er sɛw. Hi nɔɔn-er sɛw hi yɛtin nɛ kuur bɔ gbunu gbunu be. 27Gɔ yɔ̧ɔ̧sumɔ nis bɔ wɛɛ wɔr be. 28Gɔ gi rɛmtig ɔ̧ti, yɔ hi nɔɔn-er sɛw bɔ, nis bɔ gi er bɔ ɔnɛ tir nɔ? Hii sɛw, hi waatin hi gii be!

29Yeesu wɛɛ ta̧a̧ raahi

a anyɔ nɛ mɛɛ Bɛt ɗɛɛrwol hi Bɛt gbɔlumsɔ gɛ, nɛ hɛɛ gbɔnɔyɔ. 30Yɔ anbɔ, a rɛmtig ɔ̧ti dood hi taa lootingo, hi wɛɛ an Bɛt walɛsɛrɛ ɔ̧ɔ̧ a bɛtha. 31Yɛrɛ nɛ́ záŋga rɛmtig dɔgl a ɗɛɛrwol du yɔ Bɛt raasinɛ 32a bee gi Abraham Bɛtɔ hi Isaaku Bɛtɔ, hi Yakuba Bɛtɔ gɛ ya? Bɛt ɔnɛ taa wɔrkɛ Bɛto, gi dood za̧a̧til wɔ Bɛt ya̧a̧nɛ.

33Yɔ dood saal wɔ hi kɛm Yeesu hingokɔ bɔ anbɔ hin kɔmsihi gɛrs ha̧a̧ltɔnɔ.

34Yɔ Farisaya wɔ hi lag a Yeesu ɗɛɛn Sadukiya wɔ dɔglɛ, hi eltin hi mɔksɔ. 35Doo za Bɛtmaakdɔkyayɔ gi hi teesdu yɔ ha̧a̧ge an gi tɛmn Yeesu ya̧a̧ɗantigi, war Yeesu

36a Hingokya , maakdɔglyɔ ɗɔb gi daarlɛl gɛ nɔni?

37Yeesu ta̧a̧ raa

a maakdɔgl yɔ ɗɔb gi daarlɛl gɛ a gi ha̧a̧mɔ Waar mɔ Bɛt hi kpoos mɔ sɛw, hi kol mɔ sɛw, hi mɔkil mɔ sɛw. 38Maakdɔgl biitir yɔ ɗɔb gi daarlɛl nɛ zaŋ giibɔ. 39Maakdɔgl eesim bɔ riitin zaaɔ gɛrɛ a gi ha̧a̧mɔ a namɔza ge an zul mɔ. 40Muusa maakdɔglɔ wɔ sɛw, hi Bɛtya̧a̧kɛŋkya wɔ hingokya̧ wɔ sɛw hi fu̧u̧ a maakdɔgl eerɛ wɛrɛ gedu.

41Anyɔ Farisaya wɔ hi mɔks lɛlgbunu Yeesu warihi hin raahi

42a nɛ mɔkig nɔ a Masihu bɔ gi zulha nɔ? Fu̧u̧ a bɔ zaŋgd du nɔ?

Hi ta̧a̧ge

a Masihu bɔ fu̧u̧ a Dawda zaŋgd du.

43Yeesu goo

a nɛ à anbɔ Bɛt Mɔkilɔ yɔ daas Dawda kpoos du, ri gi elig a Waar be nɔ? Raa 44a Waar Bɛt raa Waar be a ɗɔɔtum be naanrɔbo, gi tuur an be gbàà yɔ̧lhɛ̧ɛ̧nikya mɔ wɔ hi wɛɛ dɔɔ mɔ ɗa̧a̧klɛlɛ. 45Nɛ an Dawda el Masihu bɔ a Waar be, Masihu bɔ yɔ wɛɛ waaɔ ri be?

46Doo za gbun ɗɛɛ dɔglɔ bɔ ta̧a̧k gɛ. Hi sɛw hi kɔm hititi. Baar a ɔ̧tɔge, an bɔnɛ ɓɛ hoobha̧a̧gha̧ Yeesu hinwark ma.

Currently Selected:

MATA 22: NTD

Highlight

Copy