LUKA 5

1Ɔ̧tza Yeesu gi erk a zɛɛ mɛmbal ya̧ a Gɛnɛzarɛd, dood saal hi ɓɔytingo a gi dɔŋdi an hi lag Bɛt dɔglɔ yɔ gɔ gi dɔgsihi. 2Yeesu gbɛn lɛmb eerɛ a mɛmbal bɔ hage. Dut-wa̧a̧kya hi siz nɛ a lɛmbɔ gedu an hi dokt zagrya̧ wɔ hi wa̧a̧nik nɛ dutu. 3Yeesu re kar a lɛmb zaa gbun bɔ gedu a Simɔŋ lɛmb du. Wɛɛ zɔ̧ Simɔŋ an gi sɔɔsinge lɛmb bɔ a mɛm ha gi hɛml hi hɛbt bɔ kaasi. Yeesu ɗɔɔt a lɛmb bɔ gedu gi gogsig dood hinɛ. 4Yɔ da̧a̧s ya̧a̧boonɛ, raa Simɔŋ:

a rekumɔ a mɛm bɔ fɛɛtigɔ hage nɛ gbal zagr nɛ wɔ nɛ wa̧a̧n dutu.

5Simɔŋ wɛɛ ta̧a̧ge:

a Hingokya , wi wòos gbalkɔ lɛl gaaw hɛɛd, wi wa̧a̧ hinza gɛ. Yɛrɛ anyɔ mɔ dɔgɔ, ɔbe gbal zagr bɔ.

6Yɔ hi bɛɛ gbalko, hi wa̧a̧ dut gbɔɔltɔnɔ, wɛɛ zagrya̧ bɔ gi kaatirgo nɔɔha. 7Hi gbaas nahiza zaadɛ wɔ hi gi lɛmb zaa bɔ gedu naanɛ, an hi zaa hi ɗaasihi kasig a lɛmb bɔ gedu. Wɔrɔ hi zaa hi ɗaasihi dut wɔ kasugo, hi̧i̧s a lɛmb wɔ eer gedu dɛ̧ɛ̧d. Wag di kaasi an lɛmb wɔ hi im mɛm du. 8Yɔ Simɔŋ Piyɛr gbɛn anbɔ zagl a Yeesu dɔŋdi, raage:

a Waar i, hɛmlum be dɔŋdi, be gi wal hinha̧a̧lyayɔ.

9Hinɔ hoobha̧a̧ Piyɛr ha̧a̧ hi dood wɔ hi gi el sɛw a dut yɔ hi wa̧a̧ gbɔɔltɔnɔ gi dɔŋgo. 10Zebede waatɔ Yakuba hi Yohana, wɔ hi wootingo woos hi Simɔŋ, hoobha̧a̧hiha̧ hɛw. Yeesu raa Simɔŋ:

a bɔ hoob gi ha̧a̧mɔ, yɛɛl ɓɔryɔ, mɔ wɛɛ doodkamzigya a Bɛt wáát du an dut yɔ mɔ wa̧a̧zig be.

11Yɔ hi bɛɛ lɛmbya̧ wɔ kamzig a haŋk dɔŋya̧, hi ɔɔ hin sɛw hi fɔ Yeesu gɔ.

12Yeesu gi nɛ waal gbɔlɛ wɔ zaaɔ gedu. Wal za yɔ ɗobtil yɔ̧ɔ̧s muulɔ sɛw, bɛɛg gbɛnko, zaa zagl gi muutdu zɔ̧ge an yɛrɛ lɛ:

a Waar i, gi ha̧a̧mɔ, mɔ ɗɛɛ an mɔ za̧a̧sibe ɗobtil be bɔ gi da̧a̧.

13Yeesu yɔd naanɔ ki̧i̧ge raa:

a ha̧a̧be, ɗobtil bɔ da̧a̧ge.

Ɓɔrbɔ ɗobtil bɔ da̧a̧da̧ a wal bɔ gi muulɛ. 14Wɛɛ raage

a bɔmɔ dɔks doo za hin yɛrɛ. Yɛrɛ rekumɔ mɔ zuns Bɛtmaakwookya bɔ muul mɔ. Wɛɛm mɔ gaa gaasɛ anyɔ Muusa bi̧i̧, an mɔ mɛnsihi a mɔ za̧a̧za̧.

15Hɔnɛ Yeesu nuŋgɔ ɗuk daarlɛlɛ; wɛɛ yɔ dood saal hi lag dɔglɔ hi zaak a ge an hi lagsig dɔglɔ, wɛɛ an gi za̧a̧sihi hi gumsya̧ bɔ be. 16Gii be, tuu rek a hɛtdɔŋ du gi gbunu an gi zɔ̧ Bɛto.

17Ɔ̧tza ma Yeesu gi hingoko. Farisayaadɛ hi Bɛtmaak-dɔkyaadɛ hi fu̧u̧z a Galile hi a Yahuduya raat wɔ gedu sɛw, hi a Urusalima hi zaa hi ɗɔɔtugo. Waar Bɛt tɛŋkɔ gi hi Yeesu an gi za̧a̧s doodɛ.

18Wɛɛ dood hi pɛɛ wal za zaŋgd a sil du, hi tɛ gbɔnɔ an hi gunige hi gbaage a Yeesu muutdu. 19Anyɔ dood saal hi hi̧i̧s deder hi gbɛn lɛlyɔ gɔ hi gunig du gɛ be, hi kanig a luk zulha hi mibr lɛl za tuutiri hi sidz wal bɔ gedu hi silɔ a dood teesdu a Yeesu muutdu. 20Yɔ Yeesu gbɛn dood wɔ ɗɔbsigya̧, raa wal zaŋgd bɔ:

a waa be, be bitsum hinha̧a̧l mɔ bitsɔ.

21Yɔ Bɛtmaakdɔkya wɔ hi Farisaya wɔ hi gbɛn anbɔ hi yɛɛl hinmɔkugo. Hi wɛɛ hi raa:

a bɔ za̧a̧n yɛrɛ gi yɛɛl ya̧a̧ha̧a̧l book a Bɛt zulha wɛ yɔ? Bɔ ɗɛɛ an gi bis hinha̧a̧lɛ, Bɛt gii ɗɛɛ kpɔd!

22Yɔ Yeesu mɛɛ mɔkilya̧, warihi:

a nɔ nɛ gin mɔkil bɔrɔ nɛ kpoos du anbɔ? 23Nɔ daarlɛl hi raakɔ: a be bitsim hinha̧a̧l mɔ wɔ bitsɔ hi zaa raakɔ: a ɗundumɔ mɔ ɛmb nɔ? 24Nɛ yɛrɛ gi an nɛ mɛɛ a Za̧a̧n Waa bɔ gin tɛŋk hɛbtdi an gi bis hinha̧a̧lɛ.

Wɛɛ raa doo zaŋgd bɔ:

a ɗundumɔ mɔ loo sil mɔ, mɔ wɛɛ mɔ lɛlɛ.

25Wɛɛ ɓɔrbɔ wal bɔ ɗundɔ a dood lɔlgbar sɛw, loo silɔ wɛɛ gi lɛlɛ, gi baanik Bɛt nɔɔha. 26Hinɔyɔ yɔɔ doodɛ hi baan Bɛto. Yɔ hoobha̧a̧hi be, hi raa:

a hinyɔ wɛ gbɛn nɛɛk yɔɔyɔ.

27Yɔ anbɔ kuudu Yeesu tuu gbɛn tooszekya za nuŋgɔ a Lewi, gi ɗɔɔtig a toosluk du, raage:

a fɔbzibe.

28Lewi ɗukɔ, ɔɔ hin sɛw, fɔge. 29Lewi wɛɛ gɔs Yeesu lees gbɔɔltɔnɔ a gi raa du. Tooszekya zaadɛ kittɔnɔ hi dood zaadɛ hi lekhin hi hiya. 30Yɔ Farisaya wɔ hi Bɛtmaakdɔkya wɔ hi gbɛn anbɔ hi dɔntɔ hi Waar Yeesu walɛsɛrɛ ɔ̧ɔ̧ wɔ:

a nɔ nɛ hinletingo hi tooszekya wɛrɛ hi zɛnɛ waabil ha̧a̧lya wɛrɛ nɔ?

31Yɔ Yeesu lag anbɔ, raahi:

a dood wɔ hi gi rɔbtɔnɔ ha̧a̧hi gɛr gɛ, ha̧a̧ gumtil wɔ hiya. 32Bé zāā an be el dood rɔbɛ wɔ an hi zɛmr kpoosya̧ gɛ, be zaa an be el hinha̧a̧lya wɔ hiya.

33Dood hi war Yeesu :

a Yohana walɛsɛrɛ ɔ̧ɔ̧ wɔ hi waak hinlilko, hi Bɛt zɔ̧ko, Farisaya wɔ doodya̧ hɛw hi gɔk anbɔ. Wɛɛ walɛsɛrɛ mɔnɛ wɔ hi hinleko, hi yɔ̧ko, ri nɔ?

34Yeesu ta̧a̧hi:

a nɛ ɗɛɛ an nɛ fɛ̧ɛ̧ dood wɔ hi elzihi a lottins naab du an hi lil lees anyɔ wal nislookya bɔ gi hi hii ket ya? Taa anbɔ. 35Ɔ̧t yɔ gɔ hi ha̧s nislookya bɔ du gi zaako. Gɔ gi anbɔ hi lil gɔ ɔ̧tɔge.

36Wɛɛ dɔksihi ya̧a̧daanik za:

a taa an doo za gi taar gbandil sego, gi wɛɛ gi loo taakilɔ bɔ gi haktin gbandil wɔmɔ. À labɔ, yɔ taar gbandil seg bɔ taarɔ, wɛɛ taakilɔ bɔ loo, tɛŋkɔ riitin hi gbandil wɔm bɔ gɛ. 37Wɛɛ doo za gɔ tɔ̧ɔ̧ bumhob mukt a tik wɔm du gɛ. À labɔ, bum mukt bɔ yɔ gbɔmr tik wɔm bɔ, bum bɔ yɔ ha̧tir hi tik bɔ sɛw. 38Yɛrɛ bɛr an hi tɔ̧ɔ̧ bum mukt a tik seg du. 39Wɛɛ doo za be, à yɔ̧ bum nɔɔlɛ, taa an gi ha̧a̧g bum mukto. Yɔ raa a bum nɔɔl bɔ gii hɛ̧ɛ̧mɔ.

Currently Selected:

LUKA 5: NTD

Highlight

Copy