LUKA 4

1Yɔ Bɛt Mɔkilɔ hi̧i̧s a Yeesu kpoos du tuu a Urdum du, Bɛt Mɔkilɔ kaŋge a hɛtdɔŋ du, 2a lɛlyɔ da loorɛha̧a̧l maatig ge, gi waa ɔ̧tɔ dumbili nas ge. A ɔ̧t wɔrɔ gedu sɛw lehin gɛ. Wɛɛ yɔ ɔ̧t wɔrɔ hi tal di sɛwi a̧a̧kil ha̧a̧ge. 3Loorɛha̧a̧l bɔ zaa raage:

a mɔd gi Bɛt Waayɔ, raam bet yɛrɛ gi wɛɛ koko.

4Yeesu ta̧a̧ raage:

a Bɛt dɔgl raa: a doo gɔ za̧a̧n kok kpɔd gɛ.

5Loorɛha̧a̧l bɔ dɔɔnig wɛɛha zunsig hɛbt bɔ wáátɔ sɛw ɓɔrbɔ, 6wɛɛ raage:

a be gaam hɛbt bɔ sɛw waar umsɔ hi gbɔlumsɔ; hi gaa nɛ bee gaa be, be gaak za̧a̧nyɔ ha̧a̧b sɛw. 7Yɔ anbɔ gid mɔ zagl di mɔ ɗɔbsibe, hɛbt bɔ sɛw gigi mɔɔnɛ.

8Yeesu ta̧a̧ge:

a Bɛt dɔgl raa: a mɔ ɗɔbs Waar mɔ Bɛt gii gi gbunu, mɔ wɛɛ mɔ woos gii hin kpɔd.

9Loorɛha̧a̧l bɔ wɛɛ kaŋge a Urusalima, da gbaage a Bɛtluk hɔɔt zulha der, raage:

a gid mɔ gi Bɛt Waayɔ, gi̧i̧m hɛbt di. 10Ya̧a̧nɛ, Bɛt dɔgl raa a Bɛt gi raa walɛsɛrɛ ɔ̧ɔ̧ wɔ a mɔ zulɛ hi oomɔ, 11hi wɛɛ hi kàm naan du an bɔmɔ kubr dɔɔ a bet muulɛ.

12Yeesu ta̧a̧ge:

a hi dɔgɔ a bɔmɔ maat Waar mɔ Bɛto.

13Kuudu yɔ loorɛha̧a̧l bɔ maatige hi hin wɔrɔ sɛwi, rek ɔɔge. Gi ook ma ɔ̧tza.

14Yɔ anbɔ, Bɛt Mɔkilɔ tɔɔ Yeesu kpoos du hi tɛŋko. Yeesu wɛɛ a Galile hɛbt du, hi wɛɛ hi yɛɛl nuŋgɔ booki a waal wɔ hi sɛ̧ɛ̧b di gedu sɛw. 15Gis dood hingoko a mɔksilluk wɔ hi du, hi wɛɛ hi gig baanik lɛl sɛw.

16Yeesu rek a Nazarɛd a lɛlyɔ hi kaŋkig nɛ ge. A holum-ɔ̧ti, gul a Yahuduyaadɛ mɔksilluk du anyɔ rɔ̧ɔ̧s nɛ gɔko. Ɗunda an gi zaŋga ɗɛɛrwoli, 17hi gaag Bɛtya̧a̧kɛŋkya bɔ Esaya ɗɛɛrwolɔ. Yɔ pidɔ, zɛm lɛlza yɔ hi bi̧i̧ anyɔ lɛ

18a Waar Bɛt Mɔkilɔ gi be zulha, anyɔ gɛbsibe an be dɔks ya̧a̧rya wɔ Bɛt dɔglɔ rɔbo. Yaazibe an be dɔks luknɔyaadɛ a hi bisihibisɔ an hi tuu luknɔ du, be dɔks yɔ̧ɔ̧rɛ a lɔlya̧ gi kpɛ̧ɛ̧rɔ, be gbaa dood wɔ hi gihi gɔluko, wɔ hi taan tɛŋk an hi ɓats dood wɔ hi gihi gɔlik zulɛ, a aakil du. 19An be dɔks hinha̧a̧lya wɔ a wɛl yɔ Bɛt ya̧a̧rmɛɛkɔ gɔ gi mid gedu tuurɔ.

20Wɛɛ ka̧a̧ ɗɛɛrwol bɔ gaa lɛl-ookya bɔ, gii wɛɛ ɗɔɔtɔ. Dood wɔ hi gi nɛ a mɔksilluk bɔ gedu sɛw hi doo lɔlya̧ a gi muulɛ. 21Hɔnɛ wɛɛ yɛlsihi raaki:

a nɛɛko, bi̧i̧s yɔ nɛ lagɔ, hinɔ wooy da̧a̧da̧ ma.

22Yɔ hi lag dɔgl hɛmnt bɔ tuu gi ya̧a̧ du anbɔ hinɔ kɔmsihi gɛrsɛ. Hi sɛw hi boo dɔglɔ, bɛsihibɛsɔ, hi wɛɛ hi warɔ:

a nɛ wal yɛrɛ Yusufu waawal gii ma mi?

23Yeesu raahi:

a gi fɔnɛ ri ɓɛ; nɛ dɔgsib ya̧a̧daanik yɛrɛ dɔksɔ: a gɛrɔ, za̧a̧sum zul mɔ ma mi! Nɛ wɛɛ nɛ raa be: a wi lag hinyɔ mɔ woo a Kapɛrnayum, wɛɛm mɔ woo a mɔ waal du ma be mi!

24Wɛɛ dɔgɔ:

a be dɔksin rɔbo: ɗɛ̄ɛ̄ an hi ta̧a̧ Bɛtya̧a̧kɛŋkya za an doo rɔb a gi waal du gɛ. 25Be gisin dɔk hi rɔbo: yɔ Bɛtya̧a̧kɛŋkya bɔ Eliya giro, yɔ bɛtha kpɛ̧ɛ̧y wɛl taarɛ hi sɛɛ nɔɔn-gbunu, a̧a̧kil ha̧a̧l gi tuur hɛbt di sɛw, kuurɛ hi gi nɛ gi kittɔnɔ a Israhila. 26Yɔ anbɔ Bɛt yāāz Eliya a kuur nɛɛ za Israhilaya ge gbun gɛ; gɛ yaazig a Saarɛbta a Sidɔŋg hɛbt du, a nis za kuur yɔ gi rɔ̀b ge. 27Wɛɛ, yɔ Elisuya giro, ɗobtilya hi kit a Israhila hɛbt du hɛw, wɛɛ yɔ anbɔ, hi zā̧ā̧s zaaya̧ gbun gɛ; gɛ Naaman, Siriyaya bɔ.

28Dood wɔ hi gi a mɔksilluk bɔ ge du, hi lag hin wɔrɔ, hi sɛw, kpoosya̧ nɔɔhinɔ. 29Wɛɛ hi ɗukɔ hi wa̧a̧ Yeesu hi tuunig waal gbɔɔl bɔ lakɔ ge, hi kaŋge a gol za zulha a lɛlyɔ hi gbaa nɛ waalya̧ gbɔɔl ge an hi yaarig hage gi mat hɛbt di. 30Yeesu wɛɛ daa hi teesdu rekɔ.

31Wɛɛ, Yeesu rek a Kapɛrnayum waal gbɔɔl du a Galile hɛbt du, gi goksig dood hin a holum-ɔ̧ti. 32Ànyɔ gi ya̧a̧book an za̧a̧nyɔ gin tɛŋk an gi gog hinɛ, hingokɔ bɔ kɔms dood gɛrsɛ. 33Doo za gi a mɔksilluk bɔ gedu gin loorɛha̧a̧l muul du, ɓooya̧a̧ raa:

34a hey, Yeesu Nazarɛdya, dɔgl mɔ nɔ hi wiya? Mɔ zaa an mɔ ha̧tirwiha̧tir ya? Be mɛɛ a mɔɔ bɔ! Mɔɔ Doo Gaat yɔ Bɛt yaazige.

35Yeesu ya̧a̧lig raage:

a loorɛha̧a̧lɛ, waksumɔ, tuum a za̧a̧n yɛrɛ gi muul du.

Loorɛha̧a̧l bɔ zikt wal bɔ gbalig hɛbt di a saal bɔ gedu, wɛɛ tuu gi muul du ɔɔge, gāag kosgumn gɛ. 36Yɔ dood sɛw hoobha̧a̧hi, hi ɛtinu:

a nɔ dɔglɔ lɛ be?

Gɔ raa loorɛ wɔ hi gbɔlumsɛ hi tɛŋko, loorɛ wɔ hi tuutu!

37Nuŋgɔ ɗuk raat wɔ a waal bɔ sɛ̧ɛ̧b di gedu sɛw.

38Yeesu tuu ɔɔ mɔksilluk bɔ rek gul a Simɔŋ raa du. Zul gi laak Simɔŋ gɔnsiŋ ha̧a̧ltɔnɔ. Hi zɔ̧bs nis bɔ Yeesu. 39Yeesu rekɔ er a nis bɔ zulɔ lɛl bɔ gi kusig ge. Ya̧a̧l zullaan bɔ hi tɛŋko, zullaan bɔ da̧a̧ gɔ. Ɓɔrbɔ nis bɔ ɗukɔ gaahi leesɛ.

40Yɔ ɔ̧t legɔ, hi kams Yeesu dood wɔ hi gin nɛ gums gaŋsɛ gaŋsɛ. Yeesu gbaa naan hi muul gbunu gbunu za̧a̧sihi. 41Loorɛha̧a̧l wɔ hi tuu a dood muul kittɔnɔ, hi kaak nɔɔha hi raako:

a mɔɔ gi Bɛt waaɔ, mɔɔ gi Bɛt waaɔ.

Yɔ anbɔ Yeesu gihi ya̧a̧lik be, ɔ̄sihi gbɔnɔ an hi booya̧a̧ gɛ. Hii be hi mɛɛmɛ a gii gi Masihu bɔ. 42Yɔ lɛl bɛɛ gaako, Yeesu tuu rek a hɛtdɔŋ du, dood saal kittɔnɔ hi mɛɛg tɛkyɔ, yɔ hi tuurɔ hi midige, ha̧a̧hi an hi a̧a̧n Yeesu a bɔgi re gi ɔɔhi. 43Hɔnɛ wɛɛ raahi:

a gi an be dɔks waal zaadɛ gbɔlɛ wɔ Bɛt wáátɔ dɔgl bɔ hɛw. Hi yaazib nɛ woosɔ giya.

44Wɛɛ rek dɔg Bɛt dɔglɔ a mɔksilluk wɔ hi du a Yahuduya be.

Currently Selected:

LUKA 4: NTD

Highlight

Copy