LUKA 20

1Ɔ̧tza ma Yeesu gis dood hingok a Bɛtluk du, gi Dɔgl Rɔb bɔ dɔglɔ dɔko. Bɛtmaakwookya gbɔlɛ wɔ hi Bɛtmaakdɔkya wɔ hi Yahuduya ɗɛntɛ wɔ hi zaa, hi warige:

2a raasiwi tɛŋk yɔ mɔ woonik hin wɛrɛ, hi za̧a̧nyɔ gaam gbɔnɔ!

3Yeesu ta̧a̧hi:

a bee hɛw, ɔbe warin hin gbunu. 4Raasinbe za̧a̧nyɔ yaaz Yohana an gi hotin dood Bɛtmɛmɛ. Bɛt gii yaazig ya, dood yaazig ya ri?

5Hi watin hi teesdu anyɔ lɛ:

a à wɛ raa a Bɛt giya, yɔ raa a nɛ ɔɔg nɔ ɗɔbsugo? 6Wɛɛ à wɛ raa a dood yaazig be, anyɔ dood sɛw hi ɗɔbsig Yohana a gi Bɛtya̧a̧kɛŋkyayɔ, gɔ hi lag a wɛ ta̧a̧ anbɔ, hi duunɛ beto an wɛ wɔrɔ.

7Hi wɛɛ hi ta̧a̧ gɔ ma:

a wi mɛ̄ɛ̄ za̧a̧nyɔ yaazig an gi hotin dood Bɛtmɛm gɛ.

8Yeesu wɛɛ raahi:

a nɛ gi labɔ, bee be taasin dɔk tɛŋk yɔ be woonik hin wɔrɔ be!

9Yeesu yɛls dood wɔ ya̧a̧daanik yɛrɛ dɔki:

a doo za gbaa tɛ̧ɛ̧ humlya bako, waar in tɛ̧ɛ̧-ookya wɔ naan du, rek am a hɛbt za.

10Yɔ tɛ̧ɛ̧ huml wɔ hi ɔ̧ɔ̧ ha̧kɔ gi rı̄ı̄, yaaz gbaarɔ zaa a tɛ̧ɛ̧-ookya wɔ hi an hi ha̧bsig huml ɔ̧ɔ̧tɛ wɔ hi kamsige. Tɛ̧ɛ̧-ookya wɔ hi wa̧a̧ gbaar bɔ hi lɛge, hi yaag naan ɗɛndilɛ. 11Wɛɛ yaa gbaar za dɔɔmi; wɔrɔ hi wa̧a̧ge hi lɛge, hi niige, hi yaag naan ɗɛndil ɓɛ. 12Wɛɛ yaa gbaar za taasim ɓɛ. Wɔrɔ hi gaag nɔko, hi wɛɛ hi bisig lakɛ.

13Tɛ̧ɛ̧bak zulya bɔ raa: a be gɔ nɔ yɔ? Ɔbe yaa waa be yɔ ha̧a̧b gi muulɛ, kinsa hi ɗɔbsig ɔnɛ be! 14Hɔnɛyɔ tɛ̧ɛ̧-ookya wɔ hi gbɛn waaɔ bɔ zaako, hi watin hi tees du: a za̧a̧n bɔ gɔ gi yɛr bak bɔ kuudu gii yɔ, ɗɛn wɛ rek wɛ wa̧a̧ge wɛ gbɔŋge, an tɛ̧ɛ̧ wɔ hi wɛɛ wɛnɛ. 15Hi wa̧a̧ge hi tuunig a bak tɔlya̧ hi gbɔŋge. Yɔ anbɔ tɛ̧ɛ̧bak zulya bɔ yɔ gɔsihi nɔ? 16Yɔ zaa an gi gbɔm tɛ̧ɛ̧huml-ookya wɔrɔ, an gi wɛɛ gi yɛn tɛ̧ɛ̧-ookya zaadɛ.

Yɔ dood wɔ hi kɛm anbɔ hi raa:

a an Bɛt gi a̧a̧nɔ.

17Yeesu wɛɛ sɔ̧ɔ̧hi, raa:

a hin yɛrɛ hi bi̧i̧ a Bɛt ɗɛɛrwol du rɛ, wadigɔ gi ri: a bet yɔ wɔŋkya wɔ hi bisige, gii wɛɛ bet gbɔɔl tɛŋkya a lɛl yoogil bɔ hi gbaag gedu. 18Za̧a̧nyɔ mat a bet bɔ hage muulɔ gi belkɔ. Wɛɛ za̧a̧nyɔ bet bɔrɔ mɛɛ gi muulɛ, muulɔ gi hɔnɔ.

19Bɛtmaakwookya gbɔlɛ wɔ hi Bɛtmaakdɔkya wɔ hi kɛm a Yeesu dɔg ya̧a̧daanik bɔrɔ hi zulha, hi tɛb an hi wa̧a̧g ɓɔrbɔ, wɛɛ hoobha̧a̧hi dood be.

20Hi yɛɛl Yeesu ooki; hi yaa dood gɛdyaadɛ an hi kuutige, zɛnɛya̧ hi wɛɛn muutya̧ an hi gi dood hinrɔb wookyaadɛ an hi ton Yeesu dɔglɛ hi wa̧a̧ge hi gaa hɛbtzulya bɔ naan du hi a gi tɛŋk du. 21Dood wɔ hi zaa hi warige:

a Hingokya , wi mɛɛ a mɔ dɔk hinɛ, mɔ wɛɛ mɔ hingok hi gbɔnɔ, wɛɛ mɔ taa dood seek a muut du; mɔ wɛɛ mɔ gok Bɛt gbɔnɔ ɔnɛ anyɔ fɔbɔ. 22Gbɔnɔ gi an wɛ too toos a Waar Romaya bɔ Kaysara ge ya, taa ya ri?

23Yɔ Yeesu mɛɛ kɛ̧ɛ̧tigya̧, ta̧a̧hi:

24a zunsibe tus gaat gbunu. Yɔ hi zunsige, warɔ: a bɔ muut yɛrɛ hi hinyɔ hi bi̧i̧ du nɔ?

Hi ta̧a̧:

a Kaysara ɔ̧ɔ̧nɛ.

25Yeesu wɛɛ raahi ma gɔ:

a toosin Kaysara hinyɔ ginɔ; toosin Bɛt hinyɔ gin be.

26Yɔ anbɔ hi ɗɛ̄ɛ̄ an hi raa a dɔg hinza a̧a̧bi a dood lɔlgbar ma gɛ. Hinɔ gook bɔ kɔmsihi gɛrsɛ, hi wɛɛ hi kɔm ma sob.

27Sadukiya wɔ gɔ hi raak a wɔrkɛ hi taa zaa rɛmluko, hi sɔɔ hi war Yeesu :

28a Hingokya , hinyɔ Muusa bi̧i̧siw gɛrɛ: a doo za gi wɔrɔ gi ɔɔ nisɔ gi taan waa gɛ, yɛ̧ɛ̧tɔ yɛgi lootin hi nis bɔ an gi daks hindaɔ wɔrk bɔ waato. 29Walɛ zaadɛ hi mɔɔhi buu gbun du hi nɔɔn-erɛ. Gbɔɔl bɔ loo nisɛ, wɔrɔ, ɔ̄ɔ̄ waat gɛ, 30eesim bɔ yɛr nis bɔ. 31Kuudu taasum bɔ yɛr nis bɔ. Hinɔ tuur anbɔ hi nɔɔn-er sɛw, hi wɔrɔ, hi ɔ̄ɔ̄ waat gɛ. 32Gɔ ma nis bɔ wɔr gɔ be. 33Anyɔ nis gbun bɔ lootin hi walɛ nɔɔn-er wɔ sɛw, gɔ gi rɛmtig ɔ̧ti, a teesya̧ bɔ gedu rɛ, nis bɔ gi gi bɔ ɔnɛ nɔ?

34Yeesu ta̧a̧hi:

a walɛ wɔ hi nɛɛd wɔ ɓɔryɔ hi lootingo. 35Yɛrɛ wɔ gɔ hi zɛ̧hi hi rii an hi dag wɔrkɛ rɛmtig a ɔ̧tɔ ge hi wɛɛ hi za̧a̧ a waal bɔ gɔ gi zaa kuudu gedu, hi taa nis looko, hi taa wal looko. 36Yɔ anbɔ taa an hi wɔr zaa ma ya̧nɛ. Hi riitin an Bɛt walɛsɛrɛ , hi gi Bɛt waatɔ, anyɔ hi ɗund a wɔrk du.

37Muusa raa hinɔ gii gaattɔnɔ a wɔrkɛ hi rɛml hi kolɛ hi ɗundɔ. Dɔgl yɔ Muusa bi̧i̧ a kuusa laazebtya bɔ dɔglɔ gedu gi raa: a Waar Bɛt gi Abraham Bɛto, Isaaku Bɛto hi Yakuba Bɛto. 38Bɛt ɔnɛ taa wɔrkɛ Bɛto, gi dood za̧a̧til wɔ Bɛt ya̧a̧nɛ. Yɔ anbɔ dood sɛw hi gisig za̧a̧ko.

39Bɛtmaakdɔkya zaadɛ hi ta̧a̧:

a Hingokya , mɔ dɔg hin bɔrɔ rɔbo.

40Yɔ anbɔ an gɔ hi wɛɛ hi warig hinza ɓɛ, hi warig ma gɛ, hoobha̧a̧hiha̧. 41Hɔnɛ Yeesu warihi:

a ri dood hi dɔk a Masihu bɔ gi Dawda waawal gii nɔ? 42Dawda hi zulɔ dɔg a ɗɛɛrwol Zaabura du: a Waar Bɛt raa Waar be: a ɗɔɔtum be naanrɔbo, 43gi tuur an be gbàà yɔ̧lhɛ̧ɛ̧nikya mɔ wɔ hi wɛɛ dɔɔ mɔ ɗa̧a̧klɛlɛ. 44An Dawda el Masihu bɔ a Waar be, Waar ɔ yɔ wɛɛsig waaɔ ri ma nɔ?

45Yɔ dood wɔ hi gis Yeesu dɔglɔ kɛnk sɛwi, Yeesu raa walɛsɛrɛ ɔ̧ɔ̧ wɔ:

46a oon zul nɛ hi Bɛtmaakdɔkya wɔ ha̧a̧hi gbandil gbɔɔl hek an hi ɛmbinu, wɔ ha̧a̧hi an dood hi zagl di hi boohi a luumha, gi wɛɛ gi ha̧a̧hi ɗɔɔtillɛl rɔbɛ biitir wɔ a mɔksilluk du, hi ɗɔɔtillɛl rɔbɛ wɔ a leeslɛl du. 47Hi lek kuurɛ nɛɛd wɔ raatya̧, hi zɔ̧k Bɛt zi̧i̧tɔnɔ an dood hi gbɛnihi du be. Hí gbaas dood wɔrɔ dɔgl gi daarlɛlɛ.

Currently Selected:

LUKA 20: NTD

Highlight

Copy