LUKA 19

1Yeesu gul a Zeeriko, wɛɛ gi talk a waal gbɔɔl bɔ gedu. 2Wal za tooszekya gbɔɔl giro nuŋgɔ a Zakeyus, gi doo rɔɔsya. 3Gi ɓɛɛk an gi gbɛn Yeesu , wɛɛ ɗɛ̄ɛ̄ an gi gbɛnig a saal kit bɔ gedu gɛ, gii be, lɔɔbɔ. 4Nɔɔ dor doosɛ da kar a yɔmntnɔɔ ha an gi gbɛn Yeesu gɔ gi daako. 5Yɔ Yeesu tuur a lɛl bɔ ge raage:

a Zakeyus, sizum nɔɔko. Yɛrɛ be yok a mɔ raa du nɛɛko.

6Zakeyus sil nɔɔktɔnɔ dagige hi hato. 7Yɔ dood hi gbɛn anbɔ hi dɔnt hi raako:

a Yeesu rek sil a doo hin-ha̧a̧lya lɛl du!

8Zakeyus er a Waar Yeesu muutdu raage:

a Waar i, yɛrɛ be gɛ̧ɛ̧k rɔɔs be teesdu hi ya̧a̧rya wɔ; gid be gɔs doo za hin gi bɛr gɛ, gid be loo doo za wɔd hi maato, be wɛnsig du dɔɔ nasɔ.

9Yeesu raage:

a za̧a̧tig taazɔ a raa yɛrɛ gedu nɛɛko, anyɔ za̧a̧nɔ gi Abraham waaɔ hɛw. 10Ya̧a̧nɛ, Za̧a̧n Waa bɔ zaa an gi ɓɛɛ dood wɔ hi wagɔ gi za̧a̧sihi.

11Yɔ dood wɔ hi lag dɔgl wɔrɔ, anyɔ hi sɛ̧ɛ̧bik a Urusalima gid hi mɔ̀k a gi an Bɛt wáátɔ gi midz ɓɔrsɛ̧ɛ̧lyɔ, Yeesu wɛɛ dɔgsihi ya̧a̧daaniki, 12raa

a doo za nablɛ, rek a hɛbt za hɛmlɛ an gi dag waar umsɛ gi wɛɛ gi wɛɛza. 13El gbaarwalɛ ɔ̧ɔ̧ kooblɛ a zaadɛ teesdu, gaahi tus gaat yɔ hi gɔn hɛɛlmɔt gbunu gbunu hi sɛw, raahi: a zemnin wɔdɛ nɛ riŋgnɔ an nɛ dag zaaha, be wɛɛzugo. 14Hɔnɛ dood wɔ a waal bɔ gedu hi hɛ̧ɛ̧nig lɔlɛ, hi yaa dood a gi kuudu an hi re hi raa: a hā̧a̧w an wal bɔrɔ gi wɛɛ waar a wi zulha gɛ. 15Bɔrɔ yɔ dag waar ums bɔ wɛɛ wɛɛz a gi hɛbtdu, el woosɔya wɔ gaahi nɛ tusɛ an hi zemn wɔd hi riŋnɔ an gi mɛɛ hinyɔ hi dag ha gi daarɔ.

16Woosya biitir bɔ zaa raage: a ɗɛntyɔ, mɔ gaab nɛ tus gbunu, yɛrɛ be dag tus mɔ zaa kar ha kooblɛ. 17Ɗɛnt bɔ raage: a bɛɛrɔ, woosya rɔbo, anyɔ mɔ i̧i̧ tɛŋk mɔ a hin fɛŋwaa du, mɔ ɗɔɔtɔ mɔ wɛɛ waar a waal gbɔlɛ koobl zulha.

18Eesum bɔ zaa raage: a ɗɛntyɔ, tus mɔ gbun bɔ mɔ gaabe, be dag zaa karha nɔɔnɛ. 19Ɗɛnt bɔ raage: a mɔɔ hɛw ɗɔɔtum mɔ wɛɛ waar a waal gbɔlɛ nɔɔn zulha. 20Zaabɔ zaa raage: a ɗɛntyɔ, tus mɔ gbun bɔ mɔ gaabe, be wɔbtɔ a gbandil du be gbaa gɛrɛ. 21Beya hoobha̧a̧b mɔɔ ha̧a̧, be mɛɛ a mɔ gi doo kpoos ɓaatilya; mɔ look hinyɔ mɔ gbaa gɛ, mɔ wɛɛ mɔ ɓɛrk tot yɔ mɔ lug gɛ.

22Ɗɛnt bɔ raage: a hey! Woosya ha̧a̧lɛ! Bé gbaasum dɔgl a hinyɔ mɔ dɔg geha, Mɔ mɔk mɔ mɛɛ a be doo gabsyɔ, be look hinyɔ be gbaa gɛ, be ɓɛrk tot yɔ be lug gɛ mi! 23Nɛ nɔ mɔ gbāā tus be bɔ belk a tus luk du an be zaa be loo hi zaa ha gɛ?!

24Wɛɛ raa wɔ hi gidi: a loon tus bɔ gi ge, wɛɛn nɛ gaa za̧a̧nyɔ gin tus kooblɛ! [ 25Hi raage: a ɗɛntyɔ, gin tus koobl bɔ gin ma! ] 26Wɛɛ ta̧a̧: a be gisin raako: hi gaa za̧a̧nyɔ ginɔ, wɛɛ za̧a̧nyɔ da gin nɛ fɛŋ be, hi ha̧s fɛŋgɔwaa bɔ da gin nɛ hɛw. 27Yɛrɛ kamzin dood zaadɛ wɔ hi gib lɔlhɛ̧ɛ̧nuko, dood wɔ hā̧ā̧hi an be wɛɛ waar hi zulha gɛ, nɛ gbɔ̧hi be lɔlgbar hɛ.

28Yeesu yɔ dɔg anbɔ wɛɛ dor a saal wɔ hi muutdu dɔɔ a Urusalima. 29Yɔ Yeesu gi sɛ̧ɛ̧bik tuurik a Baytifaaze hi a Betani, a ga̧a̧t yɔ gɔ hi el a Kɔ̧ɔ̧b Ga̧a̧ti ge, yaa walɛsɛrɛ wɔ zaadɛya̧ eerɛ, 30raahi:

a rekin raat bɔ gi nɛ muutdu bɔ ge, gɔ nɛ gulɔ, nɛ zɛm hi ha̧b pɛɛzum waa za yɔ doo za kadir hage gɛ, nɛ pidige nɛ kamzig dihɛ. 31Doo za gi warinɛ a nɛ gig pidig nɔ? Nɛ ta̧a̧ge: a ha̧a̧ Ɗɛnt bɔ ga.

32Walɛsɛrɛ wɔ hi yaahi tɔmsɛ, hi rek hi zɛm anyɔ Yeesu raahi . 33Yɔ hi rek hi pidig pɛɛzum waa bɔ, pɛɛ-zumya wɔ hi warɔ:

a nɛ gig pidig nɔ?

34Hi ta̧a̧:

a ha̧a̧ Ɗɛnt bɔ ga.

35Hi kamz pɛɛzum waa bɔ hi ɓuu gbandilya̧ gi yɛl ha, hi kas Yeesu ɗɔɔt ha. 36Yɔ gi reko, dood hi ɓuu gbandilya̧ a gbɔnɔ du. 37Yɔ sɛ̧ɛ̧b tuurik a Urusalima, a Kɔ̧ɔ̧b Ga̧a̧t bɔ tiisɔ ge, fɔkya wɔ saalya̧ sɛw hi dag hat gbɔɔltɔnɔ. Hi yɛɛl Bɛt baanik hi ya̧a̧ɓolti, hi gɛrs gbɔlɛ wɔ hi gbɛn nɛ sɛw. 38Hi dɔko:

a an Waar Bɛt gi rɔbs Waar yɔ gi zaak a gi nuŋg du! Saŋtum gi a bɛtha, gbɔlums gi a Bɛt Yɔ Gi Gbɔɔl Gi Daarlɛl ge.

39Farisaya zaadɛ wɔ hi gi a saal tees bɔ gedu hi raa Yeesu :

a Hingokya , ya̧a̧lum fɔkya mɔ wɛrɛ!

40Gii wɛɛ ta̧a̧:

a be raasinɛ, an fɔkya be wɔ hi waks ya̧a̧boonɛ, bet wɔ yɔ hi kaaka.

41Anyɔ Yeesu re gi sɛ̧ɛ̧b a waal gbɔɔl bɔ dɔŋgɔdi gi gbɛnige, kaa gi zulha dɔgɔ:

42a à mɔɔ hɛw, mɔ mɛɛ nɛ hinyɔ gɔ gaam saŋtum mɔ dɔgl a ɔ̧t wɛrɛ gedu nɛɛko, yɔ bɛsibe! Yɛrɛ ɓɔryɔ, hinɔ yaat a mɔ lɔlgbarɔ. 43Ya̧a̧nɛ, ɔ̧tya̧ hi gisum zaako, dood wɔ hi book nɔk hi mɔɔ hi zaa gedu hi gɔ̧ɔ̧mɔ hi nɔk wɔdɛ, hi gɔ̧ɔ̧num wɔmto, hi kpɛ̧ɛ̧mɔ, hi ɓɔ̧ɔ̧m lɛl sɛw. 44Anyɔ mɔ́ mɛ̄ks ɔ̧tyɔ Bɛt zaa du a mɔɔge an gi ɗaasum gɛ, hi nuumɔ hi waat mɔ hii duhɔ, hi taasum bet gòksil ɔɔk gbunu a zaa ha.

45Yeesu re gul a Bɛtluk du, yɔ zɛm dood hinriŋsya wɔ duhɔ, yɛɛlihi niŋki. 46Raa:

a hi bi̧i̧ a Bɛt ɗɛɛrwol du: a luk be gi wɛɛ zɔ̧k luko. Yɛrɛ nɛɛ nɛ wɛɛn luurɛ wa̧lɔ.

47Gi hingok ɔ̧t nuŋg sɛw a Bɛtluk du. Bɛtmaakwookya gbɔlɛ wɔ hi Bɛtmaak-dɔkya wɔ hi dood gbɔlɛ wɔ hi tɛk an hi gbɔm Yeesu. 48Wɛɛ hi mɛɛ hinyɔ gɔ hi woo gɛ. Ya̧a̧nɛ dood sɛw hi gis Yeesu dɔglɔ waak kɛŋki; hā̧ā̧hi an dɔgl za gbun gi wagihi gɛ.

Currently Selected:

LUKA 19: NTD

Highlight

Copy