YouVersion Logo
Search Icon

Salamo 37

37
Salamo abidy. Ny tsi-faharetan’ny fanambinana ny ratsy fanahy, ary ny fahatezan’ny fitahiana azon’ny tsara fanahy.
1Nataon’i Davida.
AOKA tsy hirehitra ny fahatezeranao noho ny amin’ny mpanao ratsy;
Ary aza mialona ny mpanao meloka;
2Fa hojinjana faingana tahaka ny ahitra izy
Ka halazo tahaka ny ahi-maitso.
3Matokia an’i Jehovah hianao, ka manaova soa,
Dia honina amin’ny tany hianao ka ho faly amin’ny fahamarinana.
4Ary miravoravoa amin’i Jehovah hianao,
Dia homeny anao izay irin’ny fonao.
5Ankino amin’i Jehovah ny làlanao,
Ary matokia Azy, fa hataony tanteraka.
6Ary hampiseho ny fahamarinanao tahaka ny mazava Izy,
Ary ny rariny ho anao tahaka ny mitataovovonana.
7Miantombena tsara miandry an’i Jehovah hianao ka manantenà Azy;
Aza tezitra amin’izay ambinina amin’ny làlany,
Dia amin’izay olona manao sain-dratsy.
8Mitsahara amin’ny fahatezerana, ary mahafoiza ny fahavinirana;
Aoka tsy hirehitra ny fahatezeranao, fa ratsy no hiafaran’izany.
9Fa ny mpanao ratsy hofongorana;
Ary izay miandry an’i Jehovah no handova ny tany.
10Fa rehefa afaka kelikely, dia tsy hisy ny ratsy fanahy;
Handinika ny fonenany hianao, fa tsy ho hita izy.
11Fa ny mpandefitra kosa no handova ny tany
Ka hiravoravo amin’ny haben’ny fiadanana.
12Ny ratsy fanahy manao hevi-dratsy hamelezany ny marina
Ka mihidy vazana aminy.
13Ny Tompo mihomehy azy,
Satria hitany fa ho tonga ny androny.
14Ny ratsy fanahy nampitsoaka ny sabany ka nanenjana ny tsipìkany
Mba hampikarapoka ny ory sy ny malahelo
Ary hamono ny mahitsy làlana.
15Ny sabany hitsatoka amin’ny fony ihany,
Ary ny tsipìkany ho tapatapaka.
16Tsara lavitra ny kely ananan’ny olo-marina anankiray
Noho ny be ananan’ny ratsy fanahy maro.
17Fa ny sandrin’ny ratsy fanahy ho tapatapaka;
Fa Jehovah manohana ny marina.
18Fantatr’i Jehovah ny andron’ny mahitsy;
Ary ny lovany ho mandrakizay.
19Tsy mba ho menatra amin’ny andro fahoriana ireny;
Ary amin’ny taona mosarena dia ho voky izy.
20Fa ny ratsy fanahy haringana,
Ary ny fahavalon’i Jehovah ho tahaka ny voninahitry ny saha;
Ho levona izy, eny, ho levon-ko setroka izy.
21Misambotra ny ratsy fanahy, nefa tsy manonitra;#37.21 Na: tsy mahonitra.
Fa ny marina kosa mamindra fo ka manome.
22Fa izay tahìny no handova ny tany;
Ary izay ozoniny kosa no hofongorana.
23Avy amin’i Jehovah no mahalavorary ny dian’ny olona,
Ka Izy no mankasitraka ny làlany.
24Na dia lavo aza izy, tsy dia mikarapoka,
Fa Jehovah no mitantana azy.
25Efa mba tanora ihany aho, ary efa antitra ankehitriny;
Fa tsy mbola hitako izay marina nafoy, na ny zanany mangataka hanina.
26Miantra mandrakariva ireny ka mampisambotra;
Ary ny taranany hotahina.
27Halaviro ny ratsy, ka manaova soa,
Dia honina mandrakizay hianao.
28Fa Jehovah tia rariny sady tsy hahafoy ny olony masina;
Harovana mandrakizay ireo;
Fa ny taranaky ny ratsy fanahy hofongorana.
29Ny marina handova ny tany
Ka honina eo aminy mandrakizay.
30Ny vavan’ny marina miresaka fahendrena,
Ary ny lelany manambara ny rariny.
31Ny lalàn’Andriamaniny no ao am-pony;
Tsy mba ho solafaka ny diany.
32Mitsikilo ny marina ny ratsy fanahy
Ka mitady hahafaty azy.
33Jehovah tsy hahafoy azy ho eo an-tànany.
Na hanameloka azy, raha tsaraina izy.
34Miandrasa an’i Jehovah, ka tandremo ny làlany,
Dia hanandratra anao handova ny tany Izy;
Ho faly hahita ny hamongorana ny ratsy fanahy hianao.
35Efa hitako ny ratsy fanahy, fa loza loatra izy
Ary nandrahaka tahaka ny hazo maitso naniry ho azy;
36Kanjo nandalo izy ka, indro, tsy teo intsony;
Ary nitady azy aho, fa tsy hita izy.
37Diniho ny mahitsy, ka jereo ny marina;
Fa misy farany#37.37 Na: taranaka. ho an’ny olona tia fihavanana.#37.37 Na: Fa fiadanana no faran’izany olona izany.
38Fa ny mpanota haringana avokoa;
Ny hiafaran’ny ratsy fanahy ho fongotra.
39Fa ny famonjena ny marina dia avy amin’i Jehovah;
Fiarovana mafy ho azy amin’ny andro fahoriana Izy.
40Ary Jehovah mamonjy azy sy manafaka azy;
Eny, manafaka azy amin’ny ratsy fanahy Izy ka mamonjy azy,
Satria nialoka taminy izy.

Currently Selected:

Salamo 37: MBP

Highlight

Share

Copy

None

Want to have your highlights saved across all your devices? Sign up or sign in