KU̧U̧NAŊMƆ 26

Izak dee ye sɛn Gerar

1Kaɓa tika nù tɛ ŋgimbi'i, nɛ gana gan wan mɛ tɛ ŋgimbi ko Abraham, ɓɛɛ Izak nɛ sɛn tɛ ko Abimɛlɛk, wannu ko o be Filistii sɛn Gerar. 2GASA WAN usa tɛ ha̧ a̧ ɓɛɛ tɔ̧: «Ká mɛ zir si Egiptɛ na, ɓɛɛ mɛ̀ dúk tɛ nù n'am tɛ usi ha̧ mɛ‘i. 3Mɛ̀ dúk tɛ nù‘i; mi tɛ duk in mɛɛ, ɓɛɛ mi toka de yoŋgo zu mɛ. Mi tɛ ha̧ nù‘i ha̧ mɛ in o bezaŋ-mɛ, ɓɛɛ mi tɛ yor ɗoŋ kanamɔ n'am kana so ha̧ dáà kɔ-mɛ Abraham.#Ku̧u̧ 22.16-18 4Mi tɛ de ha̧ o bezaŋ-mɛ mɛ dɔk hee sɔra yiwese ga; mi tɛ ha̧ nù‘i lɛŋ ha̧ wa. O tugun bíí lɛŋ tɛ kpa de toka yoŋgo nɛ ɗoŋ bezaŋ-mɛ, 5wen Abraham zia so wen nú‘m, ɓɛɛ a̧ kasi o ha̧a̧nú, o heembea in o geŋa kɔ‘m.»

6Nɛ mɔ'ɔ nɛ Izak dee ye sɛn Gerar. 7O bíí fara'i aka a̧ wen zu kóò kɔ̧-a̧, ɓɛɛ a̧ kifi nú ha̧ wa: «Nɛ́ boko-nya'm», wen kíì dee a̧, kà̧ a̧ tɔ̧ so'e nɛ kóò kɔ̧-a̧ wó, wa tɛɛ gbɛ a̧ wen Rebeka yora so zɔŋa nyɛmna.#Ku̧u̧ 12.13; 20.2 8Izak duka hi̧i̧ zɛ dɔk. Ŋma wese Abimɛlɛk wannu ko o be Filistii zɔka mɔ nɛ woi-tua, ɓɛɛ a̧ zɔk Izak fara de saa in Rebeka kóò kɔ̧-a̧. 9Abimɛlɛk saa Izak ɓɛɛ tɔ̧ ha̧ a̧: «A̧ nɛ kóò kɔ-mɛ nɛ mbetɛ; wen ge sa mɛ tɔ̧a̧‘e, a̧ nɛ boko-nya-mɛ ge?» Izak kifa nú ha̧ a̧: «Mi tɔ̧ɔ̧ hegɔ wen ká‘m tɛɛ fe wen zu a̧.»

10Ɓɛɛ Abimɛlɛk ak mɔ woyo: «Ɛ̧ɛ̧ nɛ ge mɔ ge a̧ mɛ dee in yɛɛ ge? Ŋmafara kà ŋma bíí saaye’ɛ duk so in kóò kɔ-mɛ, bo nɛ mɛ tɛɛ de ha̧ ɗaŋmɔ mɛ tik zu yɛ na?» 11Abimɛlɛk ha̧a̧ nú ha̧ o bíí lɛŋ‘e: «Wi nɛ tɛ fo wi’ɛ, in kóò kɔ̧-a̧, wi tɛ gbɛ a̧.»

12Izak dɛma nyɔnɔ ti pɛ‘i tɛ nù ko o be Filistii nyɛmna. A̧ mɔi̧a nyɔnɔ nɛ dɔka-a war gɔmŋmaa gan mɔ n'aa guna, wen GASA WAN toka de yoŋgo zu a̧. 13A̧ dee mbɔi, ɓɛɛ a̧ kifi nɛ dita-bíí. 14A̧ kpaa o sami in o ndai ká bá nɛ̀ o wi-de-tom nɛ dɔka-a, ɓɛɛ o be Filistii a see mɔ in a̧.

15O be Filistii tura nù kpe nɛ zu gɔna-yí-nɔɔ nɛ o wi-de-tom ko Abraham dáà ko Izak za̧a̧ so ŋgimbi nɛ Abraham ɓɔna so nɛnɛ kpasa. 16Abimɛlɛk tɔ̧ɔ̧ ha̧ Izak: «Mɛ̀ yák nyɛi̧ nɛ ɛɛ, wen mɛ kpaa ŋgai gan zu yɛ kaɗi.» 17Izak kura hi̧i̧ nɛ́ɛ̀ de gbagari kɔ̧ ɗɔŋgɔ Gerar; a̧ ɔɔ hi̧i̧. 18Nɛ mɔ'ɔ nɛ Izak za̧a̧ ɗoŋ o gɔna-yì nɛ‘i za̧a̧ so ŋgimbi ko dáà kɔ̧-a̧ Abraham, ɓɛɛ nɛ̀ o be Filistii kpee ɗoŋ fio kɔ̧-a̧. Nɛ́ kale nin nɛ dáà kɔ̧-a̧ aa so ha̧ o gɔna-yi nɔ‘i, a̧ Izak aa ha̧ wa woyo.

19O wi-de-tom ko Izak gɔna yì sɛn kɔ̧ ɗɔŋgɔ‘i, ɓɛɛ wa kpa de kpút-kpút. 20O wi-dai-mɔ Gerar tɛɛ ku̧ naŋ kpɛri in o wi-dai-mɔ ko Izak woyo, ɓɛɛ wa tɔ̧: «Yì'ɛ nɛ́ k’ɛɛ.» Ɓɛɛ Izak a nin gɔna-yì‘i Ezɛk «Kpɛri», wen o be-nù kpɛra in a̧ hi̧i̧.

21Wa gɔna mbe kɔ̧-yì, ɓɛɛ kpɛri hɔ sɛnɛ woyo; a̧ aa nin i̧i̧ fara'i Sitna «Sɛnmɔ». 22A̧ duka hi̧i̧ yak nɛɛ gɔn nɛ ŋma mbe yì nɛ wa kpɛr in a̧ na, ɓɛɛ a̧ a nin i̧i̧ yi'i Rehobot «Ɛɛ ɔma», tɔ̧ nɛnɛ: «Kinii, GASA WAN ha̧a̧ fara h’ɛ́ɛ́ wen duka-a k’ɛɛ nɛ de-a tɛ nù'ɛ.» 23A̧ duka hi̧i̧ daŋ nɛnɛ si Bɛrseba. 24GASA WAN usa tɛ ha̧ a̧ mɛ zɛ‘i, ɓɛɛ tɔ̧: «Mi nɛ Sɔ̧ ko dáà kɔ-mɛ Abraham, ká mɛ́ de kíì na. Mi a̧a̧ in mɛɛ, mi tɛ tok de yoŋgo zu mɛ, mi tɛ de ha̧ bezaŋ-mɛ mɛ dɔk wen zu wi-de-tom kɔ‘m Abraham.» 25Ɓɛɛ Izak mbo fara-ɗafi-sɔ̧ sɛn hi̧i̧, ɓɛɛ a̧ kɔfi Sɔ̧ sa nɛ nin-a'e GASA WAN. A̧ dee tua-laa sɛn hi̧i̧, ɓɛɛ o wi-de-tom kɔ̧-a̧ gɔn yì hi̧i̧ mbɛt.

Izak nɔɔ tɔk in Abimɛlɛk

26Abimɛlɛk tɛɛ mɛ zɔk Izak sɛn Gerar. A̧ tɛɛ in Ahuzat wi-tɔ̧-mbɔrɔ ha̧ a̧ in Pikɔl gasawi ko o wi-biro kɔ̧-a̧.#Ku̧u̧ 21.22 27Izak tɔ̧ɔ̧ ha̧ wa: «Wen ge s’ɛnɛ tɛ sɛn tɛ‘m ge? Bo nɛ ɛnɛ sɛna so'm, ɓɛɛ ɛnɛ ndak am tɛ k’ɛ́nɛ́ na nde?»

28Wa kifa nú-wa: «Ɛ́ɛ́ iŋa'e GASA WAN a̧a̧ in mɛɛ, ɓɛɛ s’ɛɛ kɔ̧ɔ̧ ndé, kanamɔ a̧ duk mgbara yɛ in mɛɛ, nɛ tɛ duk nɛ *nɔɔ-tɔk k’ɛɛ in ŋmaa. 29Mɛ̀ kán mɔ ndé, mɛ́ beka de ŋma ɗaŋmɔ kpɔk in yɛɛ na. Ɛ́ɛ́ mbɛt, ɛ́ɛ́ beka de ŋgamɔ in mɛɛ na hee mɔ'ɔ n’ɛɛ dee kànà nɛ demɔ in mɛɛ e nɛ mɛ yak gee’ɛ ga. Kinii, mɛ́ dúk nɛ́ bíí nɛ̀ GASA WAN toka de yoŋgo zu a̧.» 30A̧ dee gasa gbaŋa ha̧ wa; wa nyɔŋa mɔ ɓɛɛ wa nɔ mɔ mbɛt. 31Mɛ tutuyɛ sút, wa kana mɔ ha̧ nɛ nú ha̧ ŋmaa. Izak mgbɔɔ wa e yuwar, ɓɛɛ wa e ŋmaa duk zaŋ ga̧a̧mɔ.

32Duka nɛ wese'i mbɛt a̧ o wi-de-tom ko Izak tɛɛ tɔ̧ nɛnɛ ha̧ a̧ nde, wi kpaa yì. 33A̧ saa nin gɔna-yì‘i Seba «Kanamɔ», nɛ́ wen mɔ‘i a̧ wa sa nɛ nin ye'i Bɛrseba#26.33 Bɛrseba: nɛ́ wen nɛ̀ tɔ̧́: gɔna-yì kanamɔ. hɔ sɔsɔɔ.

Esau baa kóò

34Ŋgimbi nɛ Esau kpaa nɛ pɛ ɓu-naar, a̧ baa be-zɔŋa Hit yiitoo nɛ kóò. Kuti-a nɛ Yehudit boko-bem ko Bɛri; yiitoo-aa nɛ Basmat boko-bem ko Elɔŋ. 35O kóò nɔ‘i ha̧a̧ tu̧u̧-see ha̧ for-wa Izak in Rebeka nyɛmna.

Currently Selected:

KU̧U̧NAŊMƆ 26: GB11

Highlight

Copy