KU̧U̧NAŊMƆ 25

JAKOB

O ŋma bezaŋ Abraham

(Zɔk 1 Kal Ny 1.32-33)

1Abraham baa mbe kóò woyo, nin-a nɛ Kɛtura. 2Kóò‘i koo Zimram, Yoksaŋ, Mɛdaŋ, Madiaŋ, Yisbak in Sua ha̧ a̧. 3Yoksaŋ koo Saba, in Dedaŋ. O bem ko Dedaŋ duka nɛ o be Asur, o be Lɛtus in o be Lɛum. 4O bem ko Madiaŋ nɛ́ Efa, Efɛr, Hanɔk, Abida in Elda. O wi nɔ‘i lɛŋ nɛ o bezaŋ Kɛtura.

5Abraham ha̧a̧ mɔɔ-oi lɛŋ ha̧ Izak. 6War ko o bem ko o zɔŋa kóò, Abraham ha̧a̧ o mɔ ha̧ wa, ɓɛɛ ŋgimbi n'aa tɛ fe na, a̧ foo wa nyɛi̧ nɛ bem kɔ̧-a̧ Izak, si war nú Kedɛm mɛ.

Fio ko Abraham

7Pɛ Abraham nɛ duka nɛnɛ zu nù nɛ gɔmŋmaa-nɛ-ɓu-mɔɔrɔ-ɗoŋ-yiitoo-zua-mɔɔrɔ. 8Abraham fea, ɓɛɛ fio kɔ̧ a̧ duka nɛ tu̧u̧-tɛ fio ko sɔkawi, nɛ kpaa pɛ nɛ dɔka-a, in nɛ zɔka wese ɗoŋ-aa nyɛi̧ mbɛt, ɓɛɛ wa gun a̧ mgbara o bíí kɔ̧-a̧. 9O bem kɔ̧-a̧, Izak in Ismaɛl guna a̧ sɛn kɔ̧ di̧i̧ Makpɛla sɛn ká̧ nú fɔ nɛ duka so nɛ ko Efrɔŋ, bem ko Sɔhar be nù Hit; fara'i zɔk ŋmaa in Mambre, 10ɓɛɛ nɛ́ nù nɛ Abraham hi̧fa so er o bezaŋ Hɛt: nɛ́ hi̧i̧ a̧ wa guna Abraham in kóò kɔ̧-a̧ Sara sɛnɛ.#Ku̧u̧ 23.3-16 11Ɗoŋ fio ko Abraham, Sɔ̧ toka de yoŋgo ha̧ Izak bem kɔ̧-a̧. Izak dee ye sɛn ká̧ gɔna-yì ko Lahai-Roi.

O bezaŋ Ismaɛl

(Zɔk 1 Kal Ny 1.28-31)

12O bezaŋ Ismaɛl bem ko Agar zɔŋa Egiptɛ, kó-de-tom ko Sara nɛ̀ kòó ha̧ Abraham 13nyɛm nɛ ɗoŋ nutua kɔ-wa nɛ mɔ'ɔ: kaya-bem ko Ismaɛl nɛ Nɛbayot; hɔ-ɗoŋ-aa nɛ Kedar, Adbeɛl, Mibsam, 14Misma, Duma, Masa, 15Hadad, Tema, Yɛtur, Nafis in Kɛdma. 16O bem ko Ismaɛl nɛ mɔɔ nɔ‘i. Nin-wa lɛŋ nɛ́ mɔɔ nɔ‘i. Wa a̧a̧ so nɛ̀ wan kɔ-wa ɓu-zua-yiitoo nyɛm nɛ ɗoŋ gbagari kɔ-wa. 17Ismaɛl duka zu nù pɛ gɔŋmaa-nɛ-ɓu-taar-zua-mɔɔrɔ-ɗoŋ-yiitoo, ɓɛɛ a̧ fe. A̧ fea, ɓɛɛ wa gun a̧ mgbara o bíí kɔ̧-a̧. 18O bezaŋ Ismaɛl dee ye sɛn Hawila hɔ sɛn Sur, ká̧ nú Egiptɛ si war Asur. Wa lɛŋ ɔɔ tan nɛ nya-wa, kà ɓan na ká wa tika zu wa nɛ biro.

Koo Esau in Jakob

19Pɛ́r-nam ko Izak, bem ko Abraham nɛ mɔ'ɔ. Ɗoŋ nɛ Abraham koo Izak, 20Izak kpaa pɛ ɓu-naar, ɓɛɛ a̧ ba Rebeka, bem ko Bɛtuɛl, be Aram sɛn bɔkɔ-nu Aram nɛ kóò; Rebeka duka nɛ boko-nya Labaŋ, be Aram. 21Izak aia nú ha̧ GASA WAN wen zu kóò kɔ̧-a̧ nɛ yar nɛ ndɔra; GASA WAN dee ko ha̧ a̧, ɓɛɛ kóò kɔ̧-a̧ Rebeka ba zaŋ. Duka nɛ o be-dan. 22O bem nɔ‘i too ŋmaa nyɛmna sɛn kɔ̧ zaŋ Rebeka, ɓɛɛ a̧ tɔ̧: «Kà mɔ de hegɔ, ɓɛɛ gana so a̧‘m fe.» Ɓɛɛ a̧ nɛ mɛ ak mɔ in GASA WAN.

23GASA WAN kifa nú ha̧ a̧: «Kpar dukbíí yiitoo a̧a̧ kɔ̧ zaŋ-mɛ; mɛ tɛ ko giiwi, dùk-aa yiitoo, kpɔk tɛ ŋgai gan ɓii-aa. Kaya-wi tɛ de tom ha̧ be-ɗoŋ.»#Rɔm 9.12 24Ŋgimbi koa-a hɔa, ɓɛɛ a̧ gbai dan. 25Tɛ wan nɛ gboo nɛti lɛŋ kpee nɛ bumu, nɛ gbɛ̧-a̧ hee buma saɗi ga; wa aa nin-a Esau. 26Wan nɛ gboo nɛ ɗoŋ kasa dukui-naŋ Esau; wa aa nin-a nɛ Jakob. Izak kpaa pɛ ɓu-mɔɔrɔ-ɗoŋ-kpɔk tɛ ŋgimbi koo Esau in Jakob.

27O bem nɔ‘i gasa; Esau duka nɛ gasa wi-de-gia nɛ zaŋbɛɛ, Jakob duka kɔ‘i nɛ be-ta-mɔ nɛ duk nɛ kɔ̧ tua-laa. 28Izak kɔ̧ɔ̧ so nɛ Esau gan, wen a̧ kɔ̧ɔ̧ so kpoo-zaŋbɛɛ nyɛmna, ɓɛɛ Rebeka kɔ̧ kɔ‘i nɛ Jakob.

29Ŋma wese, Jakob hun nɛ kɔ̧, ɓɛɛ Esau pii nɛ kpɛɛfɔ; a̧ mbɔia nyɛmna, 30ɓɛɛ a̧ tɔ̧ ha̧ Jakob: «Mi aia nú ha̧ mɛ, mɛ̀ é ha̧‘m nɔ ŋma gbɛ̧ yí kɔ̧ kɔ-mɛ'ɛ, wen mi mbɔia nyɛmna.» (Nɛ wen zu mɔ‘i a̧ wa aa nɛ nin-a'e, Edɔm; wen nɛ tɔ̧: «gbɛ̧-mɔ»).

31Jakob kifa nú ha̧ a̧: «Mɛ̀ é‘m nɛ̀ kaya-wi sɔsɔɔ.»

32Esau kifa nú: «Zɔk mi a̧‘m tɛ fe’ɛ; duka kaya-bem tɛ gbak am tɛ ge?»

33Ɓɛɛ Jakob tɔ̧ woyo: «Mɛ̀ kán mɔ ha̧‘m sɔsɔɔ.» Ɓɛɛ Esau kan mɔ; a̧ ee Jakob nɛ kaya-wi.#Heb 12.16 34Ɓɛɛ Jakob ha̧ brɛt in kɔ̧ ha̧ a̧. A̧ nyɔŋa mɔ, a̧ nɔɔ mɔ, ɓɛɛ a̧ kur yak. Esau baa duka kaya-wi e tɛ geemɔ.

Currently Selected:

KU̧U̧NAŊMƆ 25: GB11

Highlight

Copy