SIRAK 50
50
Simɔn gasa Wanɗafisɔ̧
1Nɛ́ Simɔn, gasa wan-ɗafi-sɔ̧, bem ko Onias, a̧ ɗafa Tua ko Sɔ̧, ŋgimbi n'aa duka nɛnɛ
nɛ gbaayi; nɛ́ kpɔk ŋgimbi'i a̧ a ɗafa nɛ ɗoŋ Sa̧a̧-Fara'i nɛ nɔ̧a siti.
2Nɛ́ a̧ a ea naŋ ɓii kusa ŋgeŋ, nɛ wa mboo garo-zik-Tua ko Sɔ̧ zu a.
3Nɛ́ tɛ kpɔk ŋgimbi kɔ̧-a̧‘i a̧ wa za̧-a̧ gasa gɔnayi, gba kɔ̧, nɛ pɛsa-a duk hee ko gbatɔp ga.
4Tɛ taamɔ wen ká bɔnɛ tɛɛ tik zu dukbii kɔ̧-a̧, a̧ mboo garo zik nɛ ye ɗɛkɛt, wen ka wisɛn tɛ̀ɛ̀ kɛr ye.
5Oe zɔm gasi n'a̧-a̧ duk so sɛnɛ ŋmɛkɛkɛ, mgbara o bii kɔ̧-a̧, ŋgimbi n'a̧-a̧ gbo nɛnɛ
nɛ ɗoŋ gbabir-kpé-Sa̧a̧ Fara in n'aa zik nɛ Tua ko Sɔ̧ wa!
6Dúk so hee sɔra-doke zaŋ duule ga, hee nyaŋazɛ nɛ to ndaa nɛ nù ga,
7hee wese nɛ nyɛk zu Tua ko Wan-mɛ-ŋgɔn ga; hee yɔra-ɓutu nɛ tok zaŋ duule ga,
8hee gba de dote mɛ bɛ̀ɛ̀ ga, hee gbadɛŋ ka kpuput-yi ga, hee de bɔɔ-te Liban mɛ nukoro ga,
9hee fuu-nyama nɛ wa dɔ Fara-ɗafi-sɔ̧ ga, hee de kpana-lɔr, nɛ‘i ɗafa ɗoŋ-a
nɛ o de kina-ta nɛ mbɔi-a ɔ dɔka ga,
10hee te-nɔ́ nɛ wayá wɔsɔkɔɗɔ ga, hee gbatui nɛ kusi mɛ tɔn yiwese ga.
11Nɛ́ hegɔ a̧ Simɔn duka so nɛnɛ, ŋgimbi n'a̧-a̧ daŋ so si Sa̧a̧ Fara-ɗafi-Sɔ̧,
nɛ oi o laa-gbooyi in o de laa-ɗafi-Sɔ̧ tɛ-a̧: Tua ko Sɔ̧ lɛŋ duna nɛ gasamɔ kɔ̧-a̧.
12Ŋgimbi n'a̧-a̧ ba so nɛ o ha̧a̧mɔ er o wiɗafisɔ̧ yor nɛnɛ, sɛn ka̧ kusiɗafisɔ̧,
o nya kɔ̧-a̧ zika a̧ kpa nú ŋmaa, hee be kɔmbɔ gbatui sɛn Liban ga;
wa yàá zik a̧ hee bɔnyá te-ndɛŋgɛ ga;
13o bem ko Aarɔn lɛŋ, nɛ oi o laaɗafisɔ̧ kɔ‘i, yora ti giiwi Israɛl, nɛ oi ha̧a̧mɔ ko Gasa Wan kɔ̧ er-wa.
14Simɔn duka ɗafi nɛ Sɔ̧ ká̧ taŋge-ɗafisɔ̧ há̧ nɛ mɔ nɛ tu̧tɛmɔ ha̧ Wan-mɛ-ŋgɔn, Sɔ̧ nɛ a̧-a̧ nɛ ŋgayamɔ lɛŋ.
15A̧ nyɛi̧a er-a zu be-ɗele-dɔ̧ɔ̧, ɓɛɛ a̧ tɛ́n yi-dɔ̧ɔ̧ mɔktɛ á naŋ-faraɗafisɔ̧, hee de pɛr
nyama nɛ ɔ́ dee tɛ Wan-mɛ-ŋgɔn nɛ ɔɔ wan zu mɔ lɛŋ'ɛ ga.
16Bɛɛ o bezaŋ ko Aarɔn á nú tɛ gaia mɔ, dɔ́m nɛ o gagaazi kɔ-wa ndɔ dee nɛ bu-mbɔi,
gɛr-wa sakari ha̧ tɛ Wan-mɛ-ŋgɔn mɛ mbaŋ ɗoŋ wa.
17Ɓɛɛ o giiwi lɛŋ guu yi nu nyɛm ŋmaa mɛ gasi Gasa Wan, Wan-ŋgayamɔ, Sɔ̧ nɛ dúk ŋgɔn mɛ.
18Ɓɛɛ o wi-bii-gima gasi nɛ A̧ nɛ heeger; giti gɛr-wa lɛŋ yee ŋmaa, ɓɛɛ ɔ̧́ nɛ nyɔɔ̧ tɛ zia-a.
19Dukbii yaa ai nɛ nú ha̧ Gasa Wan nɛ dúk ŋgɔn mɛ́, kɔfi nɛ Yaa-de-ko
hɔ ŋgimbi nɛ zɔna Gasa Wan in mɔi̧a̧a kaɗa nɛnɛ.
20Hɔɗoŋ-aa, Simɔn zira, ɓɛɛ nyɛi er zu o be Israɛl nɛ mɔi̧a̧, tɔk nɛ de yoŋgo nɛ nin
Gasa Wan zu wa, kpa nɛ́ yuwar sa nin-A̧.
21Tɛ war yiitoo-a, wa lɛŋ guu nu wen kpaa de yoŋgo ko Wan-mɛ-ŋgɔn.
Kɔfasɔ̧ de yoŋgo
22Ɓɛɛ kinii, ɛnɛ dé osoko ha̧ Sɔ̧, nɛ ɔ wan zu mɔ lɛŋ, nɛ de gasa mɔ dam fara lɛŋ,
nɛ kasa ɛɛ tɛnɛ dika kɔ̧ zaŋ naa k’ɛ́ɛ́, ɓɛɛ nɛ demɔ in yɛɛ nɛ ko.
23A̧‘a ha̧ desee h’ɛ́ɛ́, ɓɛɛ A̧‘a de ha̧ ga̧a̧mɔ mɛ hɔ sɛn Israɛl, tɛ ŋgimbi k’ɛ́ɛ́ kinii, yak nɛnɛ sɔ̧ɔ̧‘i.
24Kɔ̧ɔ̧mɔ kɔ̧-A̧ a duk in yɛɛ ɓɔnsɛnɛ, ɓɛɛ A̧‘a kpasi yɛ tɛ dukaa k’ɛ́ɛ́.
O ɗaŋ zuduk
25Zuduk a̧-a̧ sɛnɛ yiitoo nɛ see-am sɛna, ɓɛɛ taar-a bó nɛ ŋma kpasa zuduk na:
26Nɛ́ o wi ya sɛn mgbara kaya Seir, o be Filistii, in o mgbele wi nɛ ɔ́ sɛn Sikɛm.
Gbɛɛ zu-wen
27Nɛ́ Jezu, be Jerusalɛm, bem ko Sirak, bezaŋ Eleazar,
a yɔra o zɔm gasa iŋamɔ in usa-ɗoŋ-mɔ zaŋ kalata’ɛ.
A̧ sɛ̧ɛ̧ ɗuka-taamɔ nɛ duka kɔ̧ see-a a sɛnɛ hee kórò ga.
28Wi nɛ tɛ hɛr tɛ nɛ o usamɔ nɔ'ɔ ɓɔnsɛnɛ a dúk nɛ desee.
Wi nɛ tɛ kasi wen’ɛ kɔ̧ see tɛ kifi wan-ɗuka-taamɔ.
29Ka a̧ ba wa de nɛ tom, a̧ tɛ kpa ŋgai zu mɔ lɛŋ,
wen sa̧a̧mɔ ko Gasa Wan tɛ nyɛk yuwar kɔ̧-a̧.
Currently Selected:
SIRAK 50: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.