SIRAK 49
49
Jozias
1Taamɔ wen Jozias dúk hee ŋma de pɛr urdi nɛ wi-gi de pɛr mɔ zaŋá nɛ ŋmaa ga,
dúk hee nyɔɔ̧ gɔrɔ kɔ̧ nú-wi ga, dúk hee zia de giti biɔ̧-gbaŋa nɛ de dɔ̧ɔ̧ a̧-a̧ sɛnɛ ga.
2A̧ baa de yuwar tɛ kpaia dukaa ko dukbii in tɛ dora yuwar ɗafa geesɔ̧.
3A̧ zika see-a lɛŋ si tɛ Gasa Wan,
ɓɛɛ a̧ ha̧ nɔɔŋgiɗi ha̧ o bíí mɛ gasi Sɔ̧ tɛ ŋgimbi nɛ o ɗaŋwi ee nɛ A̧ tɛ gee mɔ.
O Sɔŋkur Wannu in o Sɔŋkur Witɔ̧wen oi nuà Sɔ̧
Jeremii
4Bá David, Ezekias in Jozias yinɛ, o oi wannu lɛŋ kusa ɗaŋmɔ zu ŋmaa.
Wa siŋa heembea ko Wan-mɛ-ŋgɔn pi nu. Sɔ̧ ee o wannu Judaa duk:
5A̧a̧ ha̧ŋgai kɔ-wa ha̧ o ŋma bii, in gasi kɔ-wa mbɛt ha̧ o ŋma gɔni duk.
6O wisɛn pii wee tɛ gasa ye nɛ Sɔ̧ hoka, ye nɛ Sa̧a̧-Tua dúk sɛnɛ,
ɓɛɛ o beegara kɔ̧-a̧ kifi bɛ́ɛ̀-oi,
7wen wa usa so bɔnɛ ha̧ Jeremii, a̧ n'A̧a̧ hoka so nɛ́ witɔ̧wen oi nu-Wi,
dika kɔ zaŋ naa kɔ̧-a̧, wen zuɗa mɔ yinɛ, ɗaŋá mɔ in gbinaa a nu,
ɓɛɛ mbɛt wen mboo mɔ in guna mɔ.
Ezekiɛl
8Hɔɗoŋ-aa duka nɛ Ezekiɛl, nɛ zɔka gasamɔ ko Sɔ̧ zaŋ hɔɔzu;
a̧ zɔka mɔ‘i zu keeke ko o keribim,
9wen tɛ-a mbaŋá ɗoŋ o wisɛn sɛn zaŋ ndiɓa-kórò, ɓɛɛ a̧ de demɔ in o wi nɛ bá tana yuwar.
O geɗɛk witɔ̧wen oi nú-Sɔ̧
10Nɛ war ko gba̧a̧tɛ o witɔ̧wen oi nú-Sɔ̧ ɓu-zu-a-yiitoo’ɛ,
wa a ɓɔ́ kpɛlɛ kpɛlɛ woyo daŋnɛ́ nɛ kɔ̧ pɛsi mɛ,
wen wa ha̧so nɔɔŋgiɗi ha̧ dukbii ko Jakɔb, ɓɛɛ wa kpasa a̧, wen nɛ tɛ-wa mbɔi tɛ ee ta nɛ Sɔ̧ na̧
Zorobabɛl in Jozué
11A'i zɔn nin Zorobabɛl hee ge? A̧, n'aa duka hee wele-tumbal wii-er ga’ɛ?
12Nɛ́ kpɔk in Jozué, bem ko Josedɛk mbɛt:
nɛ́ wa a baa so Sa̧a̧-Tua e ŋgɔn woyo tɛ ŋgimbi kɔ-wa,
wa mboo Sa̧a̧-Fara, nɛ‘i tɛ zɔn kpoo nɛ kpoo ha̧ Gasa Wan.
Nehemii
13Nehemii mbɛt dee zɔm mɔ, nɛ tɛ-yɛ bi ɗoŋ aa na; a̧ baa so o gbina garo ye k’ɛ́ɛ́ e ŋgɔn,
a̧ ɗafa so o kpar-nutua in o mɔɔ-gɔm-aa, ɓɛɛ ka̧ a̧ ba so o tua k’ɛ́ɛ́ e ŋgɔn’ɛ.
Henɔk
14Ŋma bii zu nu’ɛ, nɛ Sɔ̧ dea hɔ ŋmaa in Henɔk bo na,
a̧ n'A̧ baa so ɓɛlɛm, nɛ oi kiitɛ, yinɛ zu nu.
Jozɛf
15Ŋma bii woyo, hee Jozɛf ga, bo na; a̧ n'a̧-a̧ duka so nɛ wan ko o nya-a,
in sara-tɔn-mɔ ko dukbii kɔ̧-a̧. Wa ɗafa gba̧tɛ-a nɛ dea.
O kuti zɔmdáà
16Sɛm in Sɛt kpaa gasi mgbara o bii; ɓɛɛ mgbara o wi nɛ yá zu o bii lɛŋ nɛ Sɔ̧ dea, nɛ́ Adam á a̧-a̧ ti.
Currently Selected:
SIRAK 49: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.