GIMA 7
7
Kɔfa-sɔ̧ ko wi-de-mɔ nɛ yuwar-a tɛ bɔnɛ
1Gima nɛ David bia ha̧ Sɔ̧ wen Kus, bezaŋ Bɛnjamin.
2GASA WAN, fara-hu̧si-tɛ‘m nɛ́ tɛ‘nɛ́;
ɛ̀nɛ̀ kpás'am er o wi nɛ nukur'am,
ɛ̀nɛ̀ gbó‘m er-wa yinɛ,
3ká wa tɛɛ ba'm yaknɛ mɛ a̧k am pɛ́sɛ́-pɛ́sɛ́
hee mɔ'ɔ nɛ dila a̧k nɛ mɔ ga,
ɓɛɛ wi-kpas'am beka bo na.
4GASA WAN, Sɔ̧ kɔ‘m,
kà‘m nɛ́ ɔra bíí mɛ kai mɔ er wa ndé,
5kà‘m nɛ́ kifa er ɗaŋmɔ ha̧ o wi nɛ de demɔ in am ndé,
kà‘m nɛ́ ee ŋma wi-kur-zu'm mɛ yak géè ndé,
6ɓɛɛ nɛ̀ wisɛn kɔ‘m a̧ ndak am ba,
a̧‘a̧ i̧sa'm nɛ̀ zu kpasa,
ɓɛɛ mɔɔ-duk-tɛ kɔ‘m a̧ zakati fuunu.
7GASA WAN, ɛ̀nɛ̀ kúr nɛ nyimsea!
Sɔ̧ kɔ‘m, ɛ̀nɛ̀ tún!
Ɛ̀nɛ̀ gɔ́n ti o wi-kur-zu'm,
ɛ̀nɛ̀ dúk katɛ‘m, h’ɛ́nɛ́ mɛ gɔn gɔna kita.
8O dukbíí nɛ ya zaŋnu’ɛ a̧ zik'nɛ́,
ɓɛɛ sɛn zu damti k’ɛ́nɛ́, ɛnɛ ɔ wan zu wa.
9GASA WAN, nɛ́ ɛnɛ'ɛ gɔn kita zu o tugun bíí.
GASA WAN, ɛ̀nɛ̀ gɔ́n kita zu'm
nyɛm nɛ ɗoŋ deemɔ nɛ yuwar-a in duka-a kɔ‘m zóóŋ.
10Ɛ́nɛ́ nɛ̀ zɔk mɔ gbo kɔ̧ see-wi,
nɛ̀ mbaɗi taamɔ ko bíí mbɛt’ɛ, Sɔ̧ wi-de-mɔ nɛ yuwar-a,
ɛ̀nɛ̀ dé ha̧ kóó-ta ko o wi-de-ɗaŋmɔ mɛ kaɗi;
ɓɛɛ ɛ̀nɛ̀ há̧ nɔɔ-ŋgiɗi ha̧ wi-de-mɔ nɛ yuwar-a!
11Sɔ̧ nɛ́ ŋgee-kpe-ɗoŋ-am,
a̧ nɛ́ wan-kpasi o wi nɛ see ɔ tana.
12-13Sɔ̧ gɔn kita nɛ yuwar-a,
a̧ de nyimsea nɛ haya-a na, ɓɛɛ mɔ kpɔk,
o wi nɛ pii ɗoŋ tɛ a̧ na,
ɓan na see-aa nyima zu wa kaɗi.
Wisɛn a̧ bɛŋ nú gba-paa kɔ‘i,
a̧ a̧ ŋgaŋ kusaa kɔ̧-a̧, a̧ a̧ dak góò e ɗoŋ kusaa'i,
14ɓɛɛ o boi-gbɛ-wi nɔ‘i kɔ̧-a̧‘i lɛŋ tɛ gbɛ kànà nɛ a̧.
O góò kɔ̧-a̧‘i tɛ kifi nɛ́ géé kan-du-wee.
15Zɔ́k a̧ wo! Duk hee a̧ baa nɛ zaŋ-ɗaŋmɔ ga;
a̧ baa nɛ zaŋ-bɔnɛ ɓɛɛ ko nɛ ɗaŋmɔ pi̧ nù.
16Kɔ̧ n'aa za̧a̧, nɛ́ lim a̧ a̧ gɔna;
zɔk a̧ n'aa tɛ tik lim kɔ̧-a̧‘i!
17Gbɛɛ-zu kɔ̧-a̧ tɛ pii kànà ɗoŋ zu a̧ woyo;
dee ŋgamɔ kɔ̧-a̧ tɛ tik kànà bɛɗɛ zu-a.
18Mi tɛ de osoko ha̧ GASA WAN wen deemɔ kɔ̧-a̧ nɛ yuwar-a;
mi tɛ bìì gima zɔn nɛ̀ nin GASA WAN nɛ̀ duk ŋgɔn mɛ.
Currently Selected:
GIMA 7: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
