GIMA 16
16
Kɔfa-sɔ̧
1Kɔfa-sɔ̧ ko David; gima ha̧ Miktam.
Sɔ̧, ɛ̀nɛ̀ pɛ́m am wen ɛ́nɛ́ nɛ́ fara-hu̧si-tɛ‘m.
2Mi tɔ̧ɔ̧ ha̧ GASA WAN: «Ɛnɛ nɛ́ wan kɔ‘m;
de duka-a kɔ‘m kànà nɛ́ sɛn katɛ‘nɛ́,
ŋma mɔ nɛ̀ yaka zu'nɛ́ bo na.»
3O sa̧a̧-bíí nɛ ya zu nu’ɛ nɛ de bíí nyɛmna;
wa nɛ́ desee kɔ‘m.
4O wi-ɗafi-gee-sɔ̧ ndak nɛ́ ɗoŋ o géé-sɔ̧ kɔ-wa'i.
Mi tɛ tɛn tɔk saɗi-wor-sɔ̧ ha̧ o géé-sɔ̧ nɔ‘i
nɛ er-am nde?
Ndó-ndó-ndó!
Mi tɛ hú̧í̧ nú‘m mɛ sa nin-wa nde?
Ndó-ndó-ndó!
5GASA WAN, mɔɔ-oi kɔ‘m in be ɗele-nɔ-mɔ kɔ‘m nɛ́ ɛnɛ;
nɛ́ ɛnɛ'ɛ pɛm duka-kpasa kɔ‘m.
6Ɛnɛ gbaa fɔ ha̧‘m tɛ de mɔka nù;
kɔ‘m, nɛ́ de mɔɔ-oi a̧‘m kpaa.
7Mi tu̧ tɛ GASA WAN, wan-tɔ̧-mbɔrɔ ha̧‘m;
mɛ zɛ lɛŋ see-am ɓɔn tɛ mɔ n'aa usi ha̧‘m.
8GASA WAN nɛ́ wan-duk-ti kɔ‘m ɓɔnsɛnɛ;
kà à̧ nɛ́ duka nɛ̀ war wii-er-am,
mi beka kɔ̧ naŋ-am na.
9Hegɔ mi duk nɛ̀ desee, mi de nɛ́ nyɛŋɛ,
ɓɛɛ kiitɛ‘m tɛ duk kànà nɛ̀ de-a mbɛt,
10wen ɛ́nɛ́ beka e ha̧‘m mɛ ɓɔn ye ko o fio na.
Ɛ́nɛ́ beka e ha̧ wi n’ɛnɛ kɔ̧a̧ mɛ tik kɔ̧ gombo-kɔ̧ na.
11Ɛ́nɛ́ tɛ usi yuwar duka-kpasa ha̧‘m;
ɛ́nɛ́ tɛ de ha̧‘m mɛ duk in'nɛ̀ɛ́ ha̧‘m mɛ kpa desee,
ɓɛɛ ɛ́nɛ́ tɛ e'm nɛ̀ war wii-er'nɛ́
ha̧‘m mɛ kpa demɔ nɛ̀ beka kaɗi na ɓɔnsɛnɛ.
Currently Selected:
GIMA 16: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
