JAK 4
4
Kɔ̧ɔ̧ mɔɔ-zaŋnu
1Nɛ̀ ge a̧ dak biro in kpɛri pi̧ mgbara'nɛ́ ge? Bó nɛ́ o wɔ-mɔ k’ɛ́nɛ́ a̧ de biro tɛ́ kiitɛ‘nɛ́ na nde? 2Ɛ́nɛ́ de wɔ mɔ nyɛmna, ɓɛɛ ɛ́nɛ́ kpa na; ɛ́nɛ́ nɛ́ o wi-gbɛ-zu nɛ̀ a̧a̧ nɛ̀ aa-see-mɔ; hegɔ ɛ́nɛ́ beka kpa mɔ na. Ɛ́nɛ́ bí nɛ́ biro, dak nɛ̀ biro pi̧ nù. Ɛ́nɛ́ kpa mɔ na, wen ɛ́nɛ́ ak na. 3Ɛ́nɛ́ ak, ɓɛɛ ɛ́nɛ́ kpa na, wen ɛ́nɛ́ ak nɛ́ mɔɔ-ha̧-desee h’ɛ́nɛ́ ɓɛɛ. 4Ɛ́nɛ́ hɔɔ ŋmaa in ko-de-ŋgazu! Ɛ́nɛ́ iŋ‘e dee sɛm in mɔɔ-zaŋnu nɛ́ sɛna Sɔ̧ na nde? Wen wi nɛ̀ kɔ̧ɔ̧ mɛ́ de sɛm in mɔɔ-zaŋnu, duk nɛ́ wisɛn ko Sɔ̧. 5Ɛ́nɛ́ ta k’ɛ́nɛ́‘e nɛ́ géé wen a̧ Yɔramɔ tɔ̧a̧‘e: «Sɔ̧ kɔ̧ɔ̧ ɔmi n'aa ee mɛ́ duk tɛ-ɛɛ hegɔ hɔ tɛ̀ dee gɔya-a'i» nde? 6Zu mɔ‘i Sɔ̧ dee mɔ nɛ̀ ta-tɛ h’ɛ́ɛ́ gan zu i̧i̧ batɛ, wen Yɔramɔ tɔ̧a̧‘e: «Sɔ̧ kifi er kifi ha̧ o wi-gasi-zu, ɓɛɛ a̧ dee demɔ in o wi-mɔka-see.»#Tua-wen 3.34 7Ɛ̀nɛ̀ mbó zu ha̧ Sɔ̧, ɓɛɛ k’ɛ́nɛ́ kpɛk Wan-ɗaŋmɔ na; hegɔ, Wan-ɗaŋmɔ tɛ́ yu mɔ nyɛi̧ nɛ̀ ɛ́nɛ́. 8Ɛ̀nɛ̀ ɗɔ́ŋ pii katɛ Sɔ̧, ɓɛɛ a̧ tɛ́ ɗɔŋ pii katɛ‘nɛ́ mbɛt; ɛ̀nɛ̀ o ɗaŋwi, ɛ̀nɛ̀ fɔ́r er'nɛ́, ɓɛɛ ɛ́nɛ́ o wi nɛ̀ a̧a̧ nɛ̀ see yiitoo, ɛ̀nɛ̀ ɗáfí see'nɛ́ mɛ́ duk nɛ̀ sa̧a̧-a̧. 9Ɛ̀nɛ̀ tá bɔnɛ k’ɛ́nɛ́, ɛ̀nɛ̀ zím fio, ɛ̀nɛ̀ hí̧í̧ kɔ̧a̧; mami k’ɛ́nɛ́ a̧ dúk nɛ́ hi̧a̧-fio, ɓɛɛ desee k’ɛ́nɛ́ a̧ dúk nɛ́ dita-see. 10Ɛ̀nɛ̀ mɔ́k see'nɛ́ ti Gasa Wan, ɓɛɛ a̧ tɛ́ ba'nɛ́ e ŋgɔn.
Ká‘i gɔn kita zu nya-wi na
11O nya'm, k’ɛ́nɛ́ ɗaŋ wen tɛ́ ŋmaa in o ŋmaa na. Wi nɛ̀ ɗaŋ wen tɛ̀ nya-wi nɛ̀ ɗoŋ, tɔ̧́ nɛ́ ɗaŋ wen zu heembea gɔn nɛ̀ kita sɛnɛ mbɛt. Kà mɛ gɔn kita zu heembea, ɓɛɛ mɛ́ bó nɛ́ wi-kasi-heembea ɓɔna; mɛ́ kifa duk nɛ́ wi-gɔn-kita zu heembea. 12Wan-ha̧-heembea in wan-gɔn-kita nɛ́ kpɔk ɓɛɛ; nɛ́ à̧ á̧ nyɛma kpasa bíí, kóó dea-a ha̧ bíí mɛ́ yɔ mbɛt. Ɓɛɛ kɔ-mɛ, mɛ́ nɛ́ o mɛ́ gɔn kita zu ŋma-mɛ o?
Ká‘i gasi zu na
13Ɓɛɛ ɛ́nɛ́ nɛ̀ tɔ̧‘e: «Sɔsɔɔ, kóó mɔɔsa̧, ɛ́ɛ́ tɛ́ nɛ̀ saaye mɛ̀‘i, ɛ́ɛ́ tɛ́ duk hi̧i̧ pɛ kpɔk, ɗɔr nɛ̀ mɔ, kpa nɛ̀ mbɔi wo’ɛ,»#Tua-wen 27.1 14ɛ́nɛ́ iŋ duka-a k’ɛ́nɛ́ mɛ́ sa̧a̧mɔ na, wen ɛ́nɛ́ hɔɔ ŋmaa in kutu nɛ̀ duk ɗoŋ-aa nyɛi̧ na ɓɛɛ gɔna’ɛ. 15Ɛ́nɛ́ tɛ̀ɛ́ tɔ̧ so'e ndé: «Kà Gasa Wan nɛ́ kɔ̧a̧ ɛ́ɛ́ tɛ́ duk kpasa siti, de nɛ̀ ɛ̧ɛ̧, kóó i̧i̧.» 16Zɔk kinii, ɛ́nɛ́ gasi nɛ́ zu'nɛ́, ŋmaŋ nɛ̀ tɛ‘nɛ́; gasa zu hegɔ de na. 17Wi nɛ̀ iŋa dee demɔ, ɓɛɛ nɛ̀ de na, de nɛ́ ɗaŋmɔ.
Currently Selected:
JAK 4: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
