JAK 3
3
Leɓe-wi
1O nya'm, ká bíí lɛŋ kíí mɛ́ duk nɛ́ wi-usi-mɔ na, wen ɛ́nɛ́ iŋa'e Sɔ̧ tɛ́ gɔn kita zu yɛ nɛ̀ ŋgaya-a gan ko o dɔka bíí. 2Ɛ́ɛ́ lɛŋ nɛ́ o wi-yɔ-kaya; kà ŋma bíí yɔ kaya tɛ̀ tɔ̧́ɔ̧́-wen na, wi’ɛi nɛ́ bíí nɛ̀ nyɛma sɛnɛ in nɛ̀ nyɛma mɛ́ dor kiitɛ-a tɛ́ mɔ lɛŋ. 3K’ɛ̀ɛ̀ pí̧ káná nú o nyaŋa, mɛ̀ nɛ́ wen ha̧ wa mɛ́ mbo zu h’ɛ́ɛ́, in h’ɛ́ɛ́ mɛ́ mgbɔ kiitɛ wa lɛŋ mbɛt. 4Ɛ̀nɛ̀ zɔ́k o kombon mbɛt, wa ɔ gasa nyɛmna, ɓɛɛ kóó nɛ́ búk a̧ ba wa nɛ̀ ŋgaya-a yaknɛ, mɛ̀ nɛ́ geɗek berewen a̧ wi-ba-kombon ba nɛ̀ kombon si fara n'aa kɔ̧a̧. 5Kale-a mbɛt, leɓe-wi nɛ́ ŋma geɗek dokoɗo-tɛ-wi nɛ̀ nyɛma mɛ́ de gasamɔ.
Ɛ̀nɛ̀ zɔk, mɛ̀ nɛ́ be wee tikiɗi a̧ dɔ zɔm zɔ̧ a nù. 6Leɓe-wi mbɛt nɛ́ wee, a̧ nɛ́ dam-ɗaŋmɔ; leɓe-wi duk mgbara dokoɗo-tɛ-wi, nɛ́ a̧ a̧ de ndiŋ tɛ-wi lɛŋ, pi̧ nɛ̀ wee tɛ̀ duka-a k’ɛ́ɛ́ lɛŋ; wee'i nɛ́ wee nɛ̀ tɛ́ nɛ̀ Gehɛn. 7Ŋma zuduk saɗi nɛ̀ bíí nyɛm mɛ́ kpa ŋgai zu-a na bó na, kóó nɛ́ boko-nam, kóó nɔ̧́í̧, kóó saɗi-gbur-zaŋ nɛ̀ nù, kóó nɛ́ zoro mbɛt. 8Ɓɛɛ nɛ̀ kó leɓe-wi, ŋma bíí nɛ̀ nyɛma mɛ́ kpa ŋgai zu-a bó na; a̧ nɛ́ ŋma mɔ nɛ‘i nyɛm mɛ́ kasi ká yora na, nɛ̀ duna nɛ̀ ma̧a̧da̧-gbɛ-wi. 9Nɛ́ a̧ ɛ̀ɛ̀ zɔ́n nɛ̀ Gasa Wan Dáà, nɛ́ a̧ mbɛt ɛ̀ɛ̀ fóm nɛ̀ o bíí nɛ̀ Sɔ̧ dee hɔ ŋmaa in a̧.#Ku̧u̧ 1.26 10Nɛ́ kpɔk kɔ̧ nú yɛ‘i a̧ toka-de-yoŋgo in toka-ɗaŋ-yoŋgo gbo nɛnɛ mbɛt. O nya'm, ká mɔ de hegɔ na. 11De yì in ɗaŋ yì tɛ́ fok nɛ̀ tɛ̀ kpɔk kpút-kpút-yì nde? 12O nya'm, waya-te-nɔ̧́ tɛ́ wai tɛ́ te-mbɔra nde? Kóó nyak-dɔ̧ɔ̧ tɛ́ wai waya-mbɔra nde? Ɗaŋ-yì beka ha̧ de yì na.
Kpasa iŋa-mgbara-mɔ nɛ̀ tɛ́ nɛ̀ yiwese
13Wi-iŋ-mgbara-mɔ in wi-iŋ-mɔ mgbara'nɛ́ nɛ́ o? Wi’ɛi a̧ usi mɔ‘i tɛ̀ deemɔ nɛ̀ de-a, tɛ̀ duka-a kɔ̧-a̧ nɛ̀ mɔka-see in nɛ̀ iŋa-mgbara-mɔ. 14Kà bó nɛ́ ɗaŋ aa-see-mɔ in wee-zu-nɛ-ŋmaa a̧ duna kɔ̧ see'nɛ́, ɓɛɛ k’ɛ́nɛ́ ŋmaŋ tɛ‘nɛ́ na, k’ɛ́nɛ́ de ndela kafi nɛ̀ kpasawen na mbɛt. 15Pɛrti iŋa-mgbara-mɔ hegɔ‘i tɛ́ nɛ̀ ŋgɔn mɛ̀ na; i̧i̧ nɛ́ mɔɔ-nù, nɛ̀ bó nɛ́ ko Sɔ̧ na, nɛ́ mɔɔ-saɗi, nɛ́ ko ɗaŋ-sɔ̧. 16Fara nɛ̀ aa-see-mɔ in wee-zu-nɛ-ŋmaa a̧a̧ sɛnɛ, ɓɛɛ foomɔ in ɗaŋmɔ lɛŋ a̧a̧ hi̧i̧ mbɛt. 17Ɓɛɛ iŋa-mgbara-mɔ nɛ̀ tɛ́ nɛ̀ ŋgɔn ɔ sa̧a̧, kia-wen bó sɛnɛ na, a̧ ɔ ga̧a̧, see-aa ɔ hu̧i̧a̧, deako nyɛmna a̧a̧ sɛnɛ in waya-a mbɛt; a̧ kɛ̧ mgbara bíí na, a̧ de mɔ nɛ̀ see yiitoo na mbɛt. 18O bíí nɛ̀ de ha̧ ga̧a̧mɔ mɛ́ duk zik wa, gún nɛ́ mɔ tɛ̀ ga̧a̧mɔ, ɓɛɛ waya-mɔ nɛ̀ wa kpa nɛ́ deemɔ nɛ̀ yuwar-a.
Currently Selected:
JAK 3: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
