KU̧U̧NAŊMƆ 38

Nyɛrɛmɔ ko Juda in Tamar

1Sɛn tɛ ŋgimbi'i, Juda a̧ra̧ so nɛ̀ o nya-wi, ɓɛɛ tɛ́ɛ̀ ndaɗi kɔ‘i in ŋma bíí ye Adulam, nin wi’ɛi nɛ Hira. 2Nɛ́ sɛn fara'i a̧ Juda nɛɛ zɔk ŋma boko-bem ko ŋma be Kanaŋ, nin wi’ɛi nɛ Sua. Juda hara a̧ nɛ kóò, ɓɛɛ wa ba ŋmaa. 3Kóò‘i baa zaŋ, ko nɛ̀ be-wiwii; wa aa nin-a'e Ɛr. 4A̧ baa mbe zaŋ ko nɛ̀ be-wiwii, ɓɛɛ a̧ a nin-a'e Onaŋ. 5A̧ koo nɛ̀ be-wiwii woyo, ɓɛɛ a̧ a nin bem’ɛi nɛ Sela. A̧ koo Sela ŋgimbi nɛ wa ɓɔna so sɛn Kezib.

6Juda baa kóò ha̧ kaya-bem kɔ‘i Ɛr. Nin kóò‘i nɛ Tamar. 7Ɛr duka so nɛ wi-ɗaŋ nyɛmna sɛn ti GASA WAN, ɓɛɛ GASA WAN gbɛ a̧ yinɛ. 8Nɛ́ mɔ'ɔ nɛ Juda tɔ̧ɔ̧ ha̧ Onaŋ: «Mɛ̀ sí tua ɗoŋ ko-oi zɔmwi kɔ-mɛ, mɛ̀ bá tom oi zɔmwi kɔ-mɛ de nɛnɛ ha̧ a̧ mɛ kpa bezaŋ.» 9Hee mɔ'ɔ nɛ Onaŋ iŋa'e, bem nɛ‘i tɛ ko in ko-oi'i beka duk nɛ be-oi kɔ‘i na ga, ŋgimbi lɛŋ n'aa duk in a̧, kà tɛ-a ku̧ naŋ gara-a, ɓɛɛ a̧ zira wen ka kóò‘i tɛɛ ba zaŋ. 10Mɔ nɛ Onaŋ duka so de'i ha̧a̧ tu̧u̧-see ha̧ GASA WAN, ɓɛɛ a̧ gbɛ a̧ mbɛt. 11Juda tɔ̧ɔ̧ ha̧ be-for-aa Tamar: «Mɛ̀ sí ɗoŋ tɛ ko dáà kɔ-mɛ zim nɛ gera, hɔ ŋgimbi nɛ bem kɔ‘m Sela tɛ gasi.» A̧ tɔ̧ɔ̧ wen'i wen kíì de so nɛ a̧ ka Sela tɛɛ fe hee o zɔmwi kɔ̧-a̧ ga. Ɓɛɛ Tamar si ɗoŋ nutua ko dáà kɔ‘i.

12Zɛ yaka nɛ dɔka-a, ɓɛɛ boko-bem ko Sua, kóò nɛ Juda baa so'i fea. Ŋgimbi nɛ Juda kaɗa zima mɔ kaɗi, a̧ daŋa si Timna in sɛm kɔ̧-a̧ Hira be Adulam tɛ ko o wi-gɔn-buma-tɛ o mɔ-dai. 13Nɛ́ mɔ'ɔ nɛ wa mbaŋa tɛ Tamar: «Mɛ̀ zɔ́k for-mɛ a̧ tɛ wen yaka-a si Timna mɛ́ gɔn buma-tɛ o mɔ-dai kɔ‘i'i.» 14Tamar kpɔ̧i̧a̧ o laa-zim-fio kɔ‘i tɛ, ɓɛɛ ba nɛ goe gu nɛ zu, kpe yí lɛŋ, ɓɛɛ nɛ́ɛ̀ duk nú garo Enayim, nɛ a̧a̧ yuwar mɛ si Timna. Tamar zɔka'e Sela gasa kaɗi, ɓɛɛ wa e yuwar ha̧ Sela mɛ si tua ɗoŋ-aa na.

15Juda pi̧i̧ yí zɔk a̧, ɓɛɛ ba kɔ‘i a̧ nɛ kó-de-mɔ nɛ mbɔɗɔnu, wen a̧ kpee so yí-a nɛ̀ goe lɛŋ. 16Juda baa war nɛ́ si sɛn katɛ a̧, ɓɛɛ tɔ̧ ha̧ a̧: «Mi kɔ̧ɔ̧ mɛ duk in mɛɛ!» Wen a̧ iŋ so'e nɛ be-for-aa na. Ɓɛɛ Tamar ak mɔ: «Kà mɛ duk in am, nɛ́ ge mɔ ge a̧ mɛ tɛ ha̧‘m ge?»

17A̧ kifa nú-a: «Mi tɛ tom be gbadua kɔ‘m kpɔk tɛnɛ ha̧ mɛ.» Ɓɛɛ Tamar kifi nú: «Mi kpɛka, ɓɛɛ mɛ tɛ e ziŋina hɔ fara nɛ̀ mɔ‘i tɛ hɔ sɛ!»

18Ɓɛɛ Juda ak mɔ woyo: «Nɛ́ ge mɔ ge a̧‘m tɛ e nɛ̀ ziŋina ha̧ mɛ ge?» Tamar kifa nú: «Tumbal in nyak-aa, in dɔra nɛ duk er-mɛ mbɛt.» Juda kaia mɔɔ nɔ‘i lɛŋ ha̧ Tamar, ɓɛɛ duk in a̧; Tamar baa zaŋ. 19Tamar kura yak, nɛ́ɛ̀ kai o laa tɛ yinɛ, kai nɛ o laa-zim-fio a tɛ woyo.

20Juda baa be gbadua e er sɛm kɔ‘i be Adulam, wen kaia o mɔɔ-ziŋina n'aa ha̧a̧ so ha̧ kóò‘i, ɓɛɛ sɛm kɔ̧-a̧‘i kpa kóò‘i na. 21A̧ aka o bíí hi̧i̧: «Kó-de-mɔ nɛ mbɔɗɔnu nɛ duka so sɛn yuwar Enayim hɛ̧ɛ̧, a̧a̧ dee?» O wi nɔ‘i kifa nú ha̧ a̧: «Ŋma kó-de-mɔ nɛ mbɔɗɔnu bo kɔ‘i sɛn hɛ̧ɛ̧ na.»

22A̧ pia ɗoŋ tɛɛ tɔ̧ ha̧ Juda: «Mi kpa a̧ na. Kóó o wi nɛ yaa hi̧i̧ mbɛt tɔ̧a̧‘e, ŋma kó-de-mɔ nɛ mbɔɗɔnu bo hi̧i̧ na.»

23Juda tɔ̧ɔ̧ woyo: «A̧ a̧ kai o mɔɔ nɔ‘i lɛŋ ɓɛɛ. Bó nɛ́ ɔ dee ha̧ bíí mɛ mam ɛɛ na. Mi toma mɛ nɛ be gbadua nɛnɛ ha̧ a̧, ɓɛɛ mɛ kpa a̧ na.»

24Hɔ-ɗoŋ fio-zɛ taar, ɓɛɛ wa tɛ́ɛ̀ mbaŋ tɛ Juda'e: «Be-for-mɛ Tamar dee dàlà, nɛ mɔ'ɔ n'aa baa zaŋ-dàlà kɔ̧-a̧‘i.» Ɓɛɛ Juda ha̧ nú: «Wa a̧ bá a̧ pi̧ zan, ɓɛɛ wa a̧ dɔ́ a̧ nɛ zu kpasa.»

25Ɓɛɛ hee mɔ'ɔ nɛ wa mgbɔ nɛ a̧ nɛnɛ ga, a̧ pi̧i̧ tom nɛnɛ ha̧ for-aa: «Mɔ nɛ a̧a̧ er-am’ɛ, nɛ́ mɔ ko wi nɛ ee zaŋ tɛ‘m. Mi aia nú h’ɛ́nɛ́, tumbal, nyak-aa in dɔra’ɛ nɛ́ ko o nde?»

26Juda iŋa o mɔɔ nɔ‘i, ɓɛɛ tɔ̧: «Tamar dee mɔ nɛ yuwar-a gan am, wen mi ha̧ so bem kɔ‘m Sela wen sii tua ɗoŋ-aa na.» Ɓɛɛ Juda duk in a̧ siti woyo ɓɔna.

27Ŋgimbi koo bem, nɛ o be-dan a̧ gboa. 28Ŋgimbi gboa-a ko be-dan nɔ‘i, ŋma ɓii be-dan pi̧i̧ er gbonɛ, ɓɛɛ kó-bà-kɔra ɗɛk er-a'i, ɓɛɛ kun be gbɛ̧ nyak sɛnɛ, ɓɛɛ tɔ̧: «Kaya-a nɛ ɛ̧ɛ̧.» 29Nɛ́ mɔ'ɔ n'aa daka er-a si ɗoŋ, ɓɛɛ nɛ́ nya-a̧ a̧ gboa, ɓɛɛ kó-bà-kɔra tɔ̧: «Ɛ̀nɛ̀ zɔ́k ŋma de yuwar n'aa ɗafa!» Ɓɛɛ a̧ a nin-a Pɛrɛs, mɛ nɛ wen nɛ tɔ̧: «Gboo-war». 30Sɔŋkur-aa, ɓɛɛ nya-a̧ nɛ wa kuna so be gbɛ̧ nyak er'i gbo tik nu, ɓɛɛ wa a nin-a'e Zera.

Currently Selected:

KU̧U̧NAŊMƆ 38: GB11DC

Highlight

Copy