KU̧U̧NAŊMƆ 37

JOZƐF

O ɔɔ-zu ko Jozɛf

1Jakob ɓɔna so tɛ nù nɛ dáà kɔ̧-a̧ duka so sɛnɛ, sɛn nú Kanaŋ. 2Nyɛrɛ mɔ zu o bem ko Jakob nɛ́ mɔ'ɔ: Jozɛf kpaa so nɛ́ pɛ ɓu-zua-mɔɔrɔ-ɗoŋ-yiitoo, ɓɛɛ a̧ duk so in o zɔmwi kɔ̧-a̧ pɛm nɛ̀ o mɔ-dai. A̧ duka so mɛ yar in o bem ko Bilha gu nɛ o bem ko Zilpa, o kóò ko dáà kɔ̧-a̧, ɓɛɛ a̧ duka so mɛ tɛɛ dali ɗaŋ nyɛrɛ kɔ-wa ha̧ dáà kɔ-wa.

3Jakob kɔ̧ɔ̧ so Jozɛf gan o dɔka bem kɔ̧-a̧ lɛŋ, wen Jozɛf duka nɛ́ bem n'aa kòó zaŋ sɔki kɔ̧-a̧. A̧ fura ŋunyuŋ gasa laa ha̧ Jozɛf. 4O zɔmwi kɔ̧-a̧ zɔka'e dáà kɔ-wa kɔ̧ɔ̧ nɛ́ Jozɛf gan wi lɛŋ; nɛ́ hegɔ a̧ wa sɛna nɛ̀ Jozɛf pi̧ er tɛ wee, ɓɛɛ wa tɔ̧ de ger wen in a̧ ɓɔna.

5Jozɛf ɔɔ zu, ɓɛɛ a̧ ba zu'i tɔ̧ ha̧ o zɔmwi kɔ̧-a̧, ɓɛɛ wa sɛn a̧ siti woyo. 6A̧ tɔ̧ɔ̧ ha̧ wa: «Ɛ̀nɛ̀ zíí ŋma zu n'am ɔa: 7Ɛ́ɛ́ yaa so sik nɛ̀ alkamaari, ɓɛɛ nɛ́ mɔ'ɔ nɛ̀ sika alkamaari kɔ‘m kura yor ŋgɔn, ɓɛɛ o sika-a k’ɛ́nɛ́ mɔi̧ ŋmaa zik sika-a kɔ‘m e see-a, ɓɛɛ wa gu nù ti sika kɔ‘m'i.»

8O zɔmwi kɔ̧-a̧ kifa nú ha̧ a̧: «Mɛ kɔ̧ɔ̧ so kɔ-mɛ mɛ́ ɔ nɛ́ wan zu yɛ, kóó mɛ́ duk nɛ́ gasawi k’ɛɛ nde?» Ɓɛɛ wa sɛn a̧ siti gan woyo, wen ɔɔ-zu in o tɔ̧ɔ̧-wen kɔ̧-a̧.

9Siti woyo, a̧ ɔɔ ŋma mbe zu, ɓɛɛ a̧ ba tɔ̧ ha̧ o zɔmwi kɔ̧-a̧: «Mi ɔɔ zu woyo'e, wese in nyaŋa-zɛ gu nɛ o sɔra ɓu-zua-kpɔk guu nù sɛn ti'm.»

10Ɓɛɛ a̧ tɔ̧ zu'i ha̧ dáà kɔ̧-a̧ in o zɔmwi kɔ̧-a̧ lɛŋ, ɓɛɛ dáà kɔ̧-a̧ tuɓi da̧ a zu-a: «Nɛ́ ge zu ge a̧ mɛ ɔ kɔ-mɛ hegɔ‘i ge? Mɛ kɔ̧ɔ̧ so kɔ-mɛ ha̧‘m in nàà kɔ-mɛ in o zɔmwi kɔ-mɛ, h’ɛ́ɛ́ mɛ nɛ̀ɛ́ gu nù ti mɛ nde?» 11See o zɔmwi kɔ̧-a̧ lɛŋ nyima zu a̧, ɓɛɛ dáà kɔ̧-a̧ kasi mɔ‘i e kɔ̧ see.#Tom 7.9

Wa ɗɔra Jozɛf ɓɛɛ wa ba a̧ si Egiptɛ

12O zɔmwi ko Jozɛf yaka si sɛn Sikɛm, wen daia o mɔ-dai ko dáà kɔ-wa. 13Jakob tɔ̧ɔ̧ ha̧ Jozɛf: «Bó nɛ́ o zɔmwi kɔ-mɛ yaka mɛ nɛ̀ɛ́ kɔr o mɔ-dai sɛn Sikɛm na? Mi kɔ̧ɔ̧ mɛ tom mɛ sitɛ wa.» Ɓɛɛ Jozɛf kifi nú: «Mi tɛ nɛ.» 14Ɓɛɛ Jakob tɔ̧ woyo: «Mɛ̀ nɛ́ɛ̀ zɔ́k o zɔmwi kɔ-mɛ. Wa in o mɔ-dai ya hee ge? A̧ mɛ̀ tɛ́ɛ̀ wé ɗoŋ mɔ nɛ yak ha̧‘m zii.» Jakob duka mgbara ɗɔŋgɔ Hebrɔŋ tom nɛ a̧, ɓɛɛ Jozɛf nɛ hɔ Sikɛm. 15Ŋma bíí kpaa a̧ fara yɔ mɔ nɛ zaŋbɛɛ, ɓɛɛ ak a̧: «Mɛ kii nɛ ge?»

16Jozɛf kifa nú: «Mi kii nɛ o zɔmwi kɔ‘m, mi ai nú ha̧ mɛ́, mɛ̀ usi fara nɛ wa kɔr o mɔ-dai kɔ-wa sɛnɛ‘i ha̧‘m.»

17Ɓɛɛ wi’ɛi tɔ̧: «Wa gbina ɛ̧ɛ̧ fara’ɛ yak kaɗi; mi zia wa tɛ tɔ̧a̧-a̧‘e, a'i yak si sɛn Dotaŋ mɛ.» Nɛ mɔ'ɔ nɛ Jozɛf ndaka pata o zɔmwi kɔ‘i nɛɛ kpa wa sɛn Dotaŋ.

18Wa zɔka a̧ fara tɛa-a nɛ nyɛi̧a-a, ɓɛɛ nɛti ha̧ a̧ mɛ hɔ, wa ee nú mɛ gbɛ a̧. 19Wa tɔ̧ɔ̧ nɛ nú ŋmaa: «Ɛ̀nɛ̀ zɔ́k yaa-ɔ-zu a̧ tɛ‘i! 20Ɛ̀ɛ̀ gbɛ́ a̧ ŋgaɓo, ɓɛɛ ɛ̀ɛ̀ bá wɔr-aa pi̧ kɔ̧ ɗuka kɔ̧, ɓɛɛ ɛ̀ɛ̀ tɔ̧́‘e, nɛ́ ŋma boko-nam a̧ gbɛɛ a̧, h’ɛ́ɛ́ zɔk ndaa ɔɔ-zu kɔ̧-a̧‘i.»

21Rubɛn zia wen'i, ɓɛɛ a̧ kii mɛ́ kpasi Jozɛf. A̧ tɔ̧a̧: «K’ɛ́ɛ́ gbɛ a̧ na! 22K’ɛ́nɛ́ de ha̧ tɔk mɛ a nù na! Ɛ̀nɛ̀ bá a̧ pi̧ sɛn kɔ̧ ŋma ɗuka kɔ̧ ŋga-gbárà, ɓɛɛ k’ɛ́nɛ́ de ŋma ŋgamɔ in a̧ na.» Taamɔ ko Rubɛn duka so wen gboo a̧ yinɛ er-wa, ha̧ a̧ mɛ si tɛ dáà kɔ̧-a̧. 23Ŋgimbi nɛ Jozɛf hɔa sɛn mgbara o zɔmwi kɔ̧-a̧, wa kpɔ̧i̧a̧ ŋunyuŋ gasa laa nɛ duka so tɛ-a yinɛ. 24Wa baa a̧, ɓɛɛ wa pi̧ a̧ sɛn kɔ̧ ɗuka kɔ̧; nɛ́ ŋma kɔ̧ nɛ̀ duka géè, nɛ̀ yì bó sɛnɛ na.

25Wa yaa nù mɛ nyɔŋ mɔ. Kà wa tɛ ba yí-wa nɛ ŋgɔn wó, wa zɔk nɛ o wi-ɗɔr-mɔ nɛ gbar nɛ ɗoŋ ŋmaa tɛnɛ. Nɛ́ o be Ismaɛl a̧ tɛ nɛ nú Galad kai nɛ o fuu-nyama, o nɔ̧́-nyama in o yí-nyama zu ŋgeloba kɔ-wa yak nɛnɛ si Egiptɛ. 26Ɓɛɛ Juda tɔ̧ ha̧ o nya-a̧: «Nɛ́ ge a̧ ɛ̀ɛ̀ tɛ kpa oi gbɛɛ nya yɛ in hu̧sa̧ tɔk-tɛ-a ge? 27Ɛ̀ɛ̀ nɛ́ɛ̀ ɗɔ́r nɛ́ a̧ ha̧ o be Ismaɛl, ɓɛɛ k’ɛ́ɛ́ de ŋgamɔ in a̧ na, wen nya yɛ nɛ kiitɛ yɛ.» Ɓɛɛ o nya-a̧ zii wen nú-a. 28Ŋgimbi nɛ̀ o wi-ɗɔr-mɔ, o be Madiaŋ ɓira mɛ yak, o zɔmwi ko Jozɛf daka a̧ gbonɛ nɛ̀ kɔ̧́ kɔ̧‘i, ɓɛɛ wa ɗɔr a̧ ha̧ o be Ismaɛl tɛ kɔya sede ɓu yiitoo, ɓɛɛ o wi nɔ‘i ba kɔ‘i Jozɛf yaknɛ si Egiptɛ.#Tom 7.9

29Ŋgimbi nɛ̀ Rubɛn sii ɗoŋ nú kɔ̧‘i, Jozɛf bo sɛn hi̧i̧ ɓɔna. See Rubɛn ɗaŋa, ɓɛɛ a̧k laa tɛ yinɛ. 30A̧ pia ɗoŋ tɛɛ kpa o nya-a̧, ɓɛɛ a̧ tɔ̧: «Bem’ɛi bo hi̧i̧ ɓɔna! War kɔ‘m, mi tɛ e zu'm si dee?»

31Wa baa laa ko Jozɛf, ɓɛɛ wa gɔn gbadua, ba laa'i zakati nɛ tɔk-aa. 32Wa toma ŋunyuŋ gasa laa nɛ dap-aa nɛtɛ nɛtɛ ha̧ dáà kɔ-wa, ɓɛɛ wa tɔ̧: «Ɛ̀nɛ̀ zɔ́k laa n’ɛɛ kpaa’ɛ! Nɛ́ laa ko bem k’ɛ́nɛ́ nde?»

33Jakob zɔka laa'i, ɓɛɛ tɔ̧: «Nɛ́ laa ko bem kɔ‘m! Boko-nam a̧ nyɔŋa a̧. Mur-tɛ Jozɛf ɓira sɛ́kɛ́ɗɛ́-sɛ́kɛ́ɗɛ́.» 34Jakob a̧ka̧ laa tɛ yinɛ, ɓɛɛ mar nɛ bufu zim nɛ bem kɔ‘i ɗoŋ-aa nyɛi̧. 35O bem kɔ̧-a̧ be-wiwii-a in o be-okoo-a lɛŋ mɔi̧a ŋmaa mɛ ga̧ see-aa, ɓɛɛ a̧ bɛ̧; a̧ tɔ̧a̧: «Mi kɔ̧ na! Mi tɛ zim kànà bem kɔ‘m hegɔ fio ba nɛ‘m si kpa nɛ a̧ fara ko o fio mɛ.» Ɓɛɛ dáà kɔ̧-a̧ hi̧i̧ a̧. 36O be Madiaŋ baa kɔ‘i Jozɛf nɛ́ɛ̀ ɗɔr siti ha̧ Potifar, gasa wi-duk-zu o wi-pɛm-nù ko wannu Egiptɛ.

Currently Selected:

KU̧U̧NAŊMƆ 37: GB11DC

Highlight

Copy