EZEKIƐL 3
3
1 Wi-tɔ̧-wen ha̧'m'i tɔ̧a̧: «Mɛ́ bíí, mɛ̀ nyɔ́ŋ kara kalata nɛ‘i nyɛi̧a ha̧ mɛ‘i, ɓɛɛ mɛ̀ nɛ́ɛ̀ tɔ̧́ wen ha̧ o be Israɛl.»#Tɔ̧ɔ̧ Hu̧ 10.9-10
2Mi hu̧i̧a̧ nú‘m, ɓɛɛ a̧ pi̧ kara kalata'i kɔ̧ nú‘m, ɓɛɛ mi nyɔŋ. 3A̧ tɔ̧ɔ̧ ha̧‘m woyo: «Mɛ́ bíí, mɛ̀ nyɔ́ŋ kara kalata n'am ha̧a̧ ha̧ mɛ'ɛ, zaŋ-mɛ a̧ sur!» Mi nyɔŋa mɔ‘i, ɓɛɛ ɔ nyɔ̧ɔ̧ kɔ̧ nú‘m hee gɔrɔ ga.
4Ɓɛɛ nɛ mɔ'ɔ n'aa tɔ̧ɔ̧ ha̧‘m woyo: «Mɛ́ bíí, mɛ̀ bá war mɛ̀ yák mɛ nɛ̀ɛ́ tɔ̧ wen kɔ‘m ha̧ o be Israɛl. 5Mi tom mɛ sitɛ ŋma gɔni-duk nɛ tɔ̧ ŋma ŋga gɔni nú na, ɓɛɛ mi tom mɛ sitɛ o be Israɛl. 6Mi tom mɛ sitɛ o gba dukbíí nɛ nú kɔ-wa ɔ ŋgaya na, nɛ nú kɔ-wa tɛ gan mɛ tɛ zia-a na; kóó kà‘m tom so mɛ sitɛ o pɛrti bíí nɔ‘i, wa tɛ̀ɛ́ nyeŋ zer tɛ wen kɔ-mɛ. 7Ɓɛɛ o be Israɛl beka kɔ̧ mɛ zii wen nú-mɛ́ na, wen wa kɔ̧ mɛ zii wen nú‘m na mbɛt. O be Israɛl lɛŋ nɛ́ o wi-ŋgazu in o wi-ŋga-see. 8Kinii, mi tɛ de ha̧ see-mɛ mɛ ŋgai in ha̧ zu-mɛ mɛ ŋgai hee kɔ-wa ga mbɛt. 9Mi tɛ de ha̧ zu-mɛ mɛ ŋgai hee diamaŋ ga, mɛ ŋgai gan ta; ká kíì-wa de mɛ na, ká mɛ yu mɔ ti o yaa-ŋga-zu nɔ‘i na.»
10A̧ tɔ̧ɔ̧ ha̧‘m siti woyo: «Mɛ́ bíí'ɛ, mɛ̀ hú̧í̧ see-mɛ in zer-mɛ tɛ wen kɔ‘m, mɛ̀ kásí wa nɛ de-a. 11Mɛ̀ sí ɗoŋ sitɛ o bara-biro, o bezaŋ duk kɔ-mɛ nɛ ya gɔni nù mɛ, ɓɛɛ mɛ̀ tɔ̧́ ha̧ wa'e, mɔ nɛ GASA WAN Sɔ̧ tɔ̧ nɛ mɔ'ɔ. Kóó wa a̧ kpɛk, kóó wa a̧ bɛ̧, mɛ̀ tɔ̧́ kɔ-mɛ ha̧ wa.»
12Nɛ mɔ'ɔ nɛ ɔmi ko Sɔ̧ baa'm e ŋgɔn, ɓɛɛ mi zii ŋma zɔm giti mɔ nɛ war ɗoŋ-am nɛ tɔ̧‘e: «A̧‘i zɔn gasamɔ ko GASA WAN fara-duk kɔ̧-a̧ mɛ!»
13Ɓɛɛ mi zii giti ɓaa o saɗi nɛ gɔm ŋmaa in giti naŋ o keekee nɛ ya katɛ wa mbɛt. Mɔ‘i duka nɛ gasa giti mɔ nyɛmna. 14Nɛ mɔ'ɔ nɛ ɔmi nɛ baa so'm e ŋgɔn mgbɔɔ am yaknɛ. Mi yaka nɛ dita-see in kíì mbɛt, wen nɛ ŋgai ko GASA WAN dita zu'm ɗɔŋ-ɗɔŋ. 15Mi hɔɔ tɛ o bara-biro nɛ ya sɛn Tɛl-Aviv ká̧ zaŋ Kebar, ɓɛɛ mi duk hi̧i̧ in wa zɛ mɔɔrɔ-ɗoŋ-yiitoo nɛ gɔna-ɗɛɗɛ.
Gasa Wan ee Ezekiɛl hee wi-pɛm-mɔ ga
16Ɗoŋ zɛ mɔɔrɔ-ɗoŋ-yiitoo, GASA WAN tɔ̧ɔ̧ wen ha̧‘m: 17«Mɛ nɛ gee bíí, ɓɛɛ mi ee mɛ nɛ wi-pɛm-mɔ zu o be Israɛl. Mɛ tɛ zii wen mɛ kɔ̧ nú‘m, ɓɛɛ mɛ dala ha̧ wa. 18Kà‘m tɔ̧ ha̧ wi-ɗaŋ‘e, ‹Mɛ tɛ fe,› ɓɛɛ kà mɛ̀ mbaŋ tɛ-a na, kà mɛ̀ gai a̧ mɛ e yuwar ɗaŋ deemɔ duk na, kà wi’ɛi duk tɛ kale ɗaŋ yuwar kɔ̧-a̧‘i siti, wi’ɛi tɛ fe zaŋ ɗaŋmɔ kɔ‘i; ɓɛɛ wen-fio ko wi’ɛi tɛ duk zu mɛ. 19Kà mɛ a̧ nɛ̀ɛ́ tɔ̧ mbɔrɔ ha̧ wi-ɗaŋ‘i, ɓɛɛ nɛ mɔ'ɔ n'aa e ɗaŋ‘i duk na, a̧ tɛ fe zaŋ ɗaŋmɔ kɔ̧-a̧, ɓɛɛ kɔ-mɛ, mɛ tɛ kpasi. 20Ɓɛɛ kà a̧ boo nɛ wi-de-mɔ nɛ yuwar-a, nɛ mɔ'ɔ n'aa ee deemɔ nɛ yuwar-a duk mɛ de nɛ ɗaŋmɔ, mi tɛ tui pɛr ha̧ a̧, ɓɛɛ mɛ nɛ a̧ a̧ tɛ fe; wen nɛ̀ mɛ tɔ̧ mbɔrɔ ha̧ a̧ na'i, a̧ tɛ fe zaŋ ɗaŋmɔ kɔ̧-a̧, nɛ‘i beka ta mɔ wen deemɔ nɛ yuwar-a n'aa duka so de nɛti'i ɓɔna; ɓɛɛ mɛ̀ íŋ kana'e, mi tɛ ak tɔk tɛ wi’ɛi er mɛ. 21Ɓɛɛ ka mɛ mbaŋ tɛ wi-de-mɔ nɛ yuwar-a'i'e, ká a̧ de ɗaŋmɔ na, ɓɛɛ kà a̧ bɛ̧ dea-a, a̧ tɛ kpasi, wen zu mbɔrɔ kɔ-mɛ, ɓɛɛ mɛ nɛ tɛ-mɛ kpasa mbɛt.»
Ezekiɛl beka tɔ̧ wen na
22Ɓɛɛ nɛ mɔ'ɔ nɛ ŋgai ko GASA WAN baa'm woyo, ɓɛɛ a̧ tɔ̧ ha̧‘m: «Mɛ̀ kúr mɛ̀ zír si kɔ̧ ɗɔŋgɔ mɛ, mi kɔ̧ɔ̧ mɛ tɔ̧ wen ha̧ mɛ hi̧i̧.»
23Mi baa yuwar yak zir si kɔ̧ ɗɔŋgɔ mɛ, ɓɛɛ gasamɔ ko GASA WAN hee wan n'am zɔka so ká̧ Kebar mɛ‘i nɛti ga'i hɔ woyo; ɓɛɛ mi hɔ̧fi̧ ba sɔnti'm gu nu. 24Ɔmi ko Sɔ̧ yee tɛ‘m ba'm e ŋgɔn woyo, ɓɛɛ GASA WAN tɔ̧ ha̧‘m: «Mɛ̀ nɛ́ɛ̀ yé kɔ̧ tua kɔ-mɛ, mɛ̀ kpé nu tua e zu mɛ. 25Mɛ́ bíí, mɛ̀ zìì, wa tɛ hɛr mɛ nɛ nyak nɛ mɛ beka gbo si mgbara bíí ɓɔna. 26Mi tɛ fo leɓe-mɛ lati war ger-mɛ; nú-mɛ́ tɛ kpe, nɛ mɛ beka gai o wi-ŋgazu nɔ‘i ɓɔna. 27Ɓɛɛ ŋgimbi n'am be tɛɛ tɔ̧ ŋma mbe wen ha̧ mɛ woyo, mi tɛ ha̧ ŋgai tɔ̧ɔ̧-wen ha̧ mɛ, ɓɛɛ mɛ tɛ tɔ̧ ha̧ wa hee mɔ'ɔ ga: ‹Mɔ nɛ GASA WAN Sɔ̧ tɔ̧ nɛ mɔ'ɔ!› O wi nɛ tɛ kɔ̧ mɛ zii, wa a̧ zii, ɓɛɛ o wan nɛ tɛ kɔ̧ mɛ bɛ̧ zia-a, wa a̧ bɛ̧, wen wa nɛ o yaa-ŋgazu!»
Currently Selected:
EZEKIƐL 3: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
