EZEKIƐL 4

Ezekiɛl ŋgimbi kɛra Jerusalɛm

1Sɔ̧ tɔ̧a̧: «Mɛ́ bíí, mɛ̀ bá ŋma brik nɛ‘i dee nɛ gii e ti mɛ; mɛ̀ yɔ́r ye Jerusalɛm sɛnɛ, 2ɓɛɛ mɛ̀ ɗáfí ɗoŋ-aa mɛ usi'e wa kɛra a̧ kpe e nu; wa za̧a̧ kɔ̧ zik a kpa nu ŋmaa, mbo nu nɛ ɗoŋ-aa, a o gbagari biro in gba mɔɔ-de-biro zik a̧ lɛŋ. 3Mɛ̀ bá ŋma ndaɗala boi, ɓɛɛ mɛ̀ é mgbara mɛ in ye'i mɛ duk hee garo ga. Mɛ̀ mbáɗí ye'i: mɛ̀ nɛ́ ye nɛ‘i kɛra, wen nɛ mɛ a̧ kɛra a̧ kpe e nu; mɔ‘i nɛ mɔɔ-mbaŋ tɛ o be Israɛl.

4-5«Mɛ̀ ɔ́ nu nɛ war gale; ɓɛɛ tɛ ŋgimbi lɛŋ nɛ mɛ tɛ ɔ nu'i, mɛ tɛ tui nɛ ɗaŋmɔ ko o be Israɛl zu mɛ. Mi gɔna zɛ gɔmŋmaa-taar nɛ ɓu-mɔɔrɔ-ɗoŋ-naar ha̧ mɛ nyɛm nɛ ɗoŋ dɔka pɛ ɗaŋmɔ ko o be nutua ko Israɛl. Tɛ zɛ‘i lɛŋ, mɛ tɛ tui nɛ ɗaŋmɔ kɔ-wa. 6Kà mɛ a̧ kaɗa i̧i̧ zɛ‘i kaɗi, ɓɛɛ mɛ̀ zík tɛ-mɛ ɔ nu nɛ war wii-er mɛ woyo, ɓɛɛ mɛ̀ túí ɗaŋmɔ ko o be nutua ko Juda tɛ zɛ ɓu-naar. Mi gɔna zɛ ha̧ mɛ nyɛm nɛ ɗoŋ pɛ ɗaŋmɔ kɔ-wa; pɛ kpɔk ba nɛ ɔɔ-zɛ kpɔk.

7«Ɓɛɛ mɛ̀ zík yí-mɛ́ zɔk mɔ si zu ye Jerusalɛm nɛ‘i kpee e nu'i; mɛ̀ nyɛ́í̧ er-mɛ si zu a̧, ɓɛɛ mɛ̀ tɔ̧́ wen a zu ye'i. 8Mi tɛ hɛr mɛ nɛ ŋga nyak e ɓɔn hɛ̧ɛ̧ nɛ mɛ beka fo tɛ-mɛ, kà bó nɛ̀ zika tɛ-mɛ si mgbɔɔr na hɔ fara nɛ ŋgimbi-a tɛ dam. 9Mɛ̀ bá fuu alkamaari pɛr-a nɛtɛ nɛtɛ zaŋ nɛ ŋmaa in fuu fon, ká bá nɛ̀ gba̧a̧-wàr;#4.9 gba̧a̧-wàr: texte tɔ̧ɔ̧ nɛ́ blé, orge, fèves, lentilles, millet in épeautre. mɛ̀ á wa kɔ̧ ŋma nyɛk ɓɛɛ mɛ̀ záŋ wa nɛ ŋmaa nɛ de-a, de nɛ brɛt. Nɛ mɔ‘i a̧ mɛ tɛ nyɔŋ duk nɛnɛ tɛ ɔɔ-zɛ gɔmŋmaa-taar nɛ ɓu-mɔɔrɔ-ɗoŋ-naar nɛ mɛ tɛ ɔ nɛ nu nɛ gɛŋgɛlɛ‘i. 10Mɛ tɛ kɛ̧ mɔ‘i tikiɗi tikiɗi#4.10 mɔ‘i tikiɗi tikiɗi: texte tɔ̧ɔ̧ nɛ́ sicles ɓu-yiitoo, mɛ̀ nɛ́ grammes gɔŋmaa-yiitoo. kpɔk. nyɔŋ duk nɛnɛ, hegɔ wese kpɔk. 11Mɛ tɛ we yi wee nɔ nɛnɛ, hee reeta litrɛ ga, wese kpɔk kpɔk. 12Nyɔŋmɔ kɔ-mɛ tɛ duk hee makala be-fon ga. Mɛ tɛ ye wee zu kora-ɗɔr ko bíí dɔ nɛ makala'i nɛ gbaayí o bíí lɛŋ.»

13GASA WAN tɔ̧a̧: «Nɛ hegɔ a̧ o be Israɛl tɛ nyɔŋ nɛ ndiŋ nyɔŋmɔ tɛ gɔni nù n'am tɛ ndak wa si sɛnɛ‘i mbɛt.»

14Ɓɛɛ nɛ mɔ'ɔ n'am hiɗa mɔ: «Ho! GASA WAN Sɔ̧, mi tɛ de ndiŋ hegɔ a tɛ‘m nɛti na! Nɛ̀ naa koo nɛ‘m mɛ‘i, mi tɛ nyɔŋ wɔr-saɗi, koo ŋma saɗi nɛ mɔ baa ɓɛɛ ka fe gee na. Ŋma ndiŋ kpoo tɛ ye nú‘m nɛti na.»

15A̧ kifa nú ha̧‘m: «Mi zia wen kɔ-mɛ; kinii, mɛ̀ é gii nyɔŋmɔ nɛ ɗɔr ko bíí duk. Mi ee ɗɔr ndai oi ɗɔr ko bíí ha̧ mɛ mɛ gi nɛ nyɔŋmɔ.»

16Ɓɛɛ nɛ mɔ'ɔ n'aa tɔ̧ɔ̧ ha̧‘m woyo'e: «Mɛ́ bíí, mɛ̀ zɔ̀k, mi tɛ ɗaŋ fara-kpa-nyɔŋmɔ ko o bíí Jerusalɛm yinɛ. Wa tɛ nyɔŋ mɔ in nɔɔ mɔ nɛ gasa bɔnɛ; ɓɛɛ see-wa tɛ diti zu mɔ‘i nyɛmna. 17Nyɔŋmɔ in yi tɛ ɓan wa nyɛmna, zu-wa tɛ zik, ɓɛɛ wa tɛ ziɓi kifi geemɔ oi ɗaŋmɔ kɔ-wa.»

Currently Selected:

EZEKIƐL 4: GB11DC

Highlight

Copy