2 WANNU 24

1Nabukɔdɔnɔsɔr wannu Babilɔŋ ku̧u̧ biro tɛ ŋgimbi-wan ko Jɔakim. Jɔakim duka ɗɔɔ ŋgai kɔ̧-a̧ tɛ pɛ taar, ɓɛɛ de ŋgazu in a̧ woyo. #Jer 25.1-38; Dan 1.1-2 2GASA WAN toma o wi-biro ko o be Kaldee, ko o be Aram, ko o be Moab in ko o be Amɔŋ si zu a̧. A̧ toma wa si zu nù Juda ha̧ wa mɛ ɗaŋ a̧ nyɛm nɛ̀ ɗoŋ wen nɛ̀ GASA WAN tɔ̧ɔ̧ nɛ̀ nú o *wi-tɔ̧-wen oi nú Sɔ̧, o wi-de-tom kɔ̧-a̧. 3Nɛ́ sɛn tɛ tɔ̧ɔ̧-wen ko GASA WAN a̧ mɔ‘i hɔɔ nɛnɛ zu o be Juda, wen ká GASA WAN tɛɛ zɔk wa yí wi. Nɛ́ wen zu o ɗaŋmɔ ko Manase, o mɔ lɛŋ n'aa dea, 4in wen zu tɔk tɛ o bíí nɛ̀ de ŋma mɔ na n'aa gbaia so fok nɛnɛ Jerusalɛm dam fara lɛŋ, à̧ GASA WAN kɔ̧ nɛnɛ mɛ e ɗaŋmɔ ha̧ Juda na.

5Oi o tom ko Jɔakim, mɔ lɛŋ n'aa dea yɔra zaŋ Kalata nyɛrɛ ko o wannu Juda. 6Jɔakim fea si ɗoŋ o dáà kɔ‘i, ɓɛɛ bem kɔ̧-a̧ Jɔakin ɔ wan oi-aa.

7Ɗoŋ ŋgimbi'i, wannu Egiptɛ gbo tɛ nù kɔ‘i ɓɔna, wen wannu Babilɔŋ baa so nù kɔ̧-a̧ lɛŋ, ku̧u̧naŋ-a nɛ̀ be-zer Egiptɛ hɔ tɛ nana-yí Efrat.

Jɔakin wannu Juda

(Zɔk 2 Kal Ny 36.9-10)

8Jɔakin a̧a̧ so nɛ̀ pɛ ɓu-zua-mɔɔrɔ-ɗoŋ-taar ŋgimbi n'aa ɔɔ nɛ̀ wan, ɓɛɛ a̧ ɔ wan fio-zɛ taar sɛn Jerusalɛm; nin nàà kɔ̧-a̧ nɛ́ Nɛhusta boko-bem ko Ɛlnataŋ be Jerusalɛm. #2 Kal Ny 36.9-10 9A̧ dee mɔ ɗaŋ yí GASA WAN hee ko dáà kɔ̧-a̧ ga.

10Tɛ ŋgimbi'i, o wi-biro ko Nabukɔdɔnɔsɔr wannu Babilɔŋ baa zu dúk nɛ̀ Jerusalɛm; wa kɛra ye e nù, 11ɓɛɛ Nabukɔdɔnɔsɔr wannu Babilɔŋ nɛ́ mɛ bi ye nɛ̀ o wi-biro kɔ̧-a̧ kpee e nù kaɗi'i. 12Jɔakin wannu Juda in nàà kɔ‘i, o wi-biro kɔ̧-a̧, o gasawi nú kira kɔ̧-a̧ in o bíí kɔ̧-a̧ mbɛt gboo, ɓɛɛ nɛ sitɛ wannu, ɓɛɛ a̧ kai wa nɛ̀ bara-biro. Ŋgimbi'i, Nabukɔdɔnɔsɔr dee pɛ mɔɔrɔ-ɗoŋ-taar tɛ wan kaɗi. #Jer 22.24-30; 24.1-10; 29.1-2 13A̧ kaia o mbɔi kɔ̧ Tua ko GASA WAN in o wan mɛ kɔ̧ tua ko wannu nyɛm nɛ̀ ɗoŋ mɔ nɛ̀ GASA WAN tɔ̧ɔ̧ so. A̧ gbina o mɔ lɛŋ nɛ̀ Salomɔŋ wannu *Israɛl dee so nɛ̀ I̧or e wen Tua ko GASA WAN a nù. 14A̧ kaia o wi Jerusalɛm nɛ̀ bara-biro yaknɛ: o wi nɔ‘i nɛ́ o gasa wi saaye in o wanmbɔi, wa lɛŋ dee hee booro-ɓu ga; o kela, in o wi-dui boi-nú-tua mbɛt; kànà nɛ́ o wisan a̧ ɓɔna tɛ nù‘i ɓɛɛ.

15A̧ baa Jɔakin nɛ̀ bara yaknɛ si Babilɔŋ mɛ; a̧ baa nàà ko wannu, o kóò kɔ̧-a̧ in o gasa wi-biro gú nɛ̀ o be-wan mbɛt; a̧ kaia wa nɛ̀ bara-biro nɛ̀ Jerusalɛm yaknɛ si tɛ kɔ̧-a̧. #Ez 17.12 16Wannu Babilɔŋ kaia o wanmbɔi lɛŋ booro-mɔɔrɔ-ɗoŋ-yiitoo, o kela in o wi-dui boi-nú-tua booro, ká bá nɛ̀ o ŋga wi-biro lɛŋ nɛ̀ bara-biro yaknɛ si Babilɔŋ.

17Wannu Babilɔŋ ee ŋma geɗek dáà ko Jɔakin nɛ̀ wan oi-aa. Nin geɗek dáà kɔ̧-a̧‘i nɛ́ Matania, ɓɛɛ a̧ gɔn mbe nin ha̧ a̧‘e Sedekias. #Jer 37.1; Ez 17.13

Sedekias, sɔŋkur wannu Juda

(Zɔk 2 Kal Ny 36.11-12; Jer 52.1-3)

18Sedekias a̧a̧ so nɛ̀ pɛ ɓu-yiitoo-zua-kpɔk ŋgimbi n'aa ɔɔ nɛ̀ wan, ɓɛɛ a̧ ɔ wan pɛ ɓu-zua-kpɔk sɛn Jerusalɛm; nin nàà kɔ̧-a̧ nɛ́ Hamutal boko-bem ko Yirmɛya be Libna. #Jer 27.1-22; 28.1-17 #2 Kal Ny 36.11-12; Jer 52.1-3 19A̧ dee mɔ ɗaŋ yí GASA WAN hee mɔ'ɔ nɛ̀ Jɔakin dee so ga. 20See GASA WAN nyima nyɛmna zu o be Juda in Jerusalɛm, ɓɛɛ a̧ fo wa yinɛ yí a̧. Duka ŋma ŋgimbi, ɓɛɛ Sedekias de ŋgazu in wannu Babilɔŋ. #Ez 17.15

Currently Selected:

2 WANNU 24: GB11DC

Highlight

Copy