2 WANNU 25

Tika-a ko Jerusalɛm

(Zɔk 2 Kal Ny 36.13-21; Jer 39.1-7; 52.3-11)

1Sedekias kura zu wannu Babilɔŋ. Tɛ mɔɔrɔ-ɗoŋ-naar pɛ-wan ko Sedekias, tɛ ɓu fio-zɛ, tɛ ɓu ɔɔ-zɛ, Nabukɔdɔnɔsɔr wannu Babilɔŋ hɔɔ ti Jerusalɛm in o wi-biro kɔ‘i lɛŋ. A̧ baa fara nú Jerusalɛm, ɓɛɛ wa mbo nù zik nɛnɛ. #Jer 21.1-10; 34.1-5; Ez 24.2 2Wa kɛra ye'i duk nɛnɛ hegɔɔ hɔ tɛ ɓu-zua-kpɔk pɛ-wan ko Sedekias. 3Tɛ naar fio-zɛ, tɛ mɔɔrɔ-ɗoŋ-naar ɔɔ-zɛ, kaɓa tika, ɓɛɛ o bíí kpa mɔ mɛ nyɔŋ na. 4Garo mbaŋa, ɓɛɛ nɛ̀ oi kɛra ye nɛ̀ o be Kaldee kɛra e nù‘i, o wi-biro lɛŋ yuu mɔ nɛ̀ nú garo nɛ̀ duk mgbara ŋgeŋ yiitoo mgbák ká̧ be fɔ ko wannu; wa baa nɛ́ yuwar si nú Jurdɛn. #Ez 33.21 5O wi-biro Kaldee ndaka ɗoŋ wannu, ɓɛɛ wa kpa a̧ tɛ bɔkɔ-nú Jeriko. O wi-biro kɔ̧-a̧ yuu so mɔ e a̧ duk. 6O be Kaldee baa wannu nɛnɛ ha̧ wannu Babilɔŋ sɛn Ribla mɛ, ha̧ wa mɛ gɔn kita zu a̧. 7Wa gɔna ger o bem ko Sedekias nɛ̀ gbaayí-a, ɓɛɛ Nabukɔdɔnɔsɔr o yí Sedekias, hɛr a̧ nɛ̀ nyak-ndɛrɛ gbam ŋmaa yiitoo, ɓɛɛ mgbɔ a̧ si Babilɔŋ. #Ez 12.13

Wa gbina Tua ko GASA WAN

(Zɔk 2 Kal Ny 36.17-21; Jer 39.8-10; 52.12-23)

8Zɛ yaka mɔɔrɔ-ɗoŋ-yiitoo tɛ mɔɔrɔ fio-zɛ, ɓɛɛ Nabukɔdɔnɔsɔr, gasawi zu o wi-pɛm-wannu Babilɔŋ ye Jerusalɛm. Ŋgimbi'i ká Nabukɔdɔnɔsɔr wannu Babilɔŋ dee pɛ ɓu-zua-mɔɔrɔ-ɗoŋ-naar tɛ wan kaɗi. 9A̧ dɔɔ Tua ko GASA WAN, tua ko wannu in o tua sɛn Jerusalɛm lɛŋ; a̧ pi̧i̧ wee tɛ tua ko o gasawi lɛŋ. 10O wi-biro Kaldee lɛŋ nɛ̀ nɛ̀ɛ̀ so in gasawi kɔ‘i gbina garo nɛ̀ zika Jerusalɛm a nù. 11Nabukɔdɔnɔsɔr gasawi zu o wi-pɛm-wannu kaia oi bíí nɛ̀ ɓɔna yaknɛ si Babilɔŋ, in o wan nɛ̀ yuu so mɔ si ɗoŋ wannu Babilɔŋ, in oi o dɔka bíí mbɛt. 12Gasawi zu o wi-pɛm-wannu ee o ŋma gee bíí mɛ wa o fɔ-nyak-dɔ̧ɔ̧ in o géé fɔ.

13O be Kaldee gbina mbiŋ nɛ‘i dee nɛ̀ ndɛrɛ sɛn kɔ̧ Tua ko GASA WAN, wa gbina o mɔɔ-tui-kpánà in gba-kpáná-ndɛrɛ nɛ yaa so kɔ̧ Tua ko GASA WAN a nu, ɓɛɛ wa kai ndɛrɛ-a yaknɛ si Babilɔŋ mɛ. #1 Wan 7.15-26; 2 Kal Ny 3.15-17 14Wa kaia o nyɛk-a-bùk, o mɔɔ-ɗu-mɔ, o paa, o mɔɔ-nɔ-mɔ in o nyɛk-ndɛrɛ nɛtɛ nɛtɛ nɛ̀ ya wen dee tom kɔ̧ Tua ko Sɔ̧ yaknɛ mbɛt. #1 Wan 7.45; 2 Kal Ny 4.16 15Gasawi zu o wi-pɛm-wannu kaia o *dek-e-wee, o daaro wen misa̧ gaŋmɔ, o be yèè nɛ‘i dee nɛ̀ lɔr in bu-mbɔi mbɛt lɛŋ. 16War ko o mbiŋ yiitoo, gba-kpáná-ndɛrɛ in o mɔɔ-tui-kpánà nɛ̀ Salomɔŋ dee so wen Tua ko GASA WAN, in o nyɛk-ndɛrɛ lɛŋ, wi nyɛm mɛ iŋ dita-a na. 17Kusa kuti mbiŋ nɛ́ mɛtrɛ mɔɔrɔ-ɗoŋ-taar, nɛ̀ gan-ndui-ndɛrɛ a̧a̧ so zu a̧. Kusa gan-ndui'i nɛ́ mɛtrɛ kpɔk nɛ reeta. Fanamɔ, in o be waya kóɓò nɛ‘i dee nɛ̀ ndɛrɛ a̧a̧ so zu gan-ndui'i mbɛt. O mbiŋ yiitoo lɛŋ hee ŋmaa ga.

Wa kaia o be Juda si Babilɔŋ

(Zɔk Jer 52.24-27)

18Gasawi zu o wi-pɛm-wannu baa wan-ɗafi-sɔ̧ Sɛraya, in Sɛfania, yiitoo wi-ɗafi-sɔ̧, in o wi-pɛm Tua ko GASA WAN taar. 19A̧ baa ŋma gasawi sɛn saaye nɛ̀ duka so zu o wi-biro in o ŋma bíí mɔɔrɔ nɛ̀ duk katɛ wannu saaye'i; a̧ kaia ŋma gasa wi-yɔr-kalata ko o wi-biro nɛ̀ hok o bíí tɛ nù‘i in o bíí ɓu-mɔɔrɔ-ɗoŋ-kpɔk nɛ̀ ɓɔna saaye mbɛt. 20Nabukɔdɔnɔsɔr, gasawi zu o wi-pɛm-wannu kaia wa nɛ̀ bara-biro tom nɛnɛ ha̧ wannu Babilɔŋ sɛn Ribla. 21Ɓɛɛ wannu Babilɔŋ gbɛ wa sɛn Ribla nú Hamat. Nɛ́ hegɔ a̧ wa kaia nɛ̀ o be Juda yak nɛnɛ nɛ̀ bara-biro nyɛi̧ nɛ̀ nù kɔ-wa.

Gedalias gasawi-duk-zu Juda

(Zɔk Jer 40.7—41.18)

22Ko o oi bíí nɛ̀ Nabukɔdɔnɔsɔr wannu Babilɔŋ ee ɓɔn Juda, a̧ hoka nɛ Gedalias bem ko Ahikam be-koo Safaŋ mɛ duk zu wa. #Jer 40.7-9 23Ŋgimbi nɛ o gasa wi-biro in o bíí kɔ-wa zia'e ndé, nɛ́ Gedalias a̧ wannu Babilɔŋ hoka mɛ ɔ wan wó, wa tɛɛ kpa a̧ sɛn Mispa, wa in o bíí kɔ-wa. O wi nɛ̀ tɛa'i nɛ́ Ismaɛl bem ko Mɛtania, Yohanaŋ bem ko Karea, Sɛraya bem ko Tanumɛt be Nɛtɔfa, in Yazania bem ko Maka. 24Gedalias kàná mɔ ti wa'e ndé, ká wa ya nɛ̀ kíì wen duka-a mgbara o wi-de-tom ko o be Kaldee na. Wa a̧ ɔ́ tɛ nù‘i, wa a̧ dé tom ha̧ wannu Babilɔŋ, ɓɛɛ wa tɛ ya nɛ̀ de-a.

25Gedalias dee fio-zɛ mɔɔrɔ-ɗoŋ-yiitoo tɛ wan, ɓɛɛ Ismaɛl bem ko Nɛtania be-koo Ɛlisama, ŋma be-wan mbɛt kai o ŋma bíí ɓu in a̧, ɓɛɛ wa nɛ́ɛ̀ gbɛ Gedalias gú nɛ̀ o be Juda in o be Kaldee nɛ̀ dee so ye in a̧ sɛn Mispa. 26Dukbíí nɛ̀ oi-aa, o ge bíí ge ndé lɛŋ, gú nɛ̀ o gasawi, o wi-duk-zu o wi-biro yuu o be Kaldee, ɓɛɛ wa yak si Egiptɛ mɛ. #Jer 43.5-7

Wa gboo Jɔakin kɔ̧ zɔɓɔ

(Zɔk Jer 52.31-34)

27Tɛ ɓu-taar-zua-mɔɔrɔ-ɗoŋ-yiitoo pɛ nɛ̀ wa baa nɛ̀ Jɔakin wannu Juda yaknɛ nɛ̀ bara-biro, tɛ ɓu-zua-yiitoo fio-zɛ tɛ ɓu-zua-mɔɔrɔ-ɗoŋ-yiitoo ɔɔ-zɛ, Mɛrodak wannu Babilɔŋ dee kó ha̧ Jɔakin wannu Juda, ká a̧ yee wan nɛ̀ mbe-a, ɓɛɛ a̧ gbo a̧ yinɛ kɔ̧ zɔɓɔ. #Jer 52.31-34 28A̧ tɔ̧ɔ̧ de wen zu a̧, ɓɛɛ a̧ ha̧ de fara ha̧ a̧ gan ko o wannu nɛ̀ a̧a̧ so kɔ̧ zɔɓɔ in a̧ sɛn Babilɔŋ. 29Jɔakin kpɔ̧i̧a̧ o laa-bara a nù ɓɛɛ duk nyɔŋ mɔ in wannu wese lɛŋ. 30Wannu ha̧a̧ mɔ lɛŋ ha̧ a̧ wese kpɔk kpɔk wen duka-a kɔ̧-a̧ hɔ ŋgimbi fio kɔ̧-a̧.

Currently Selected:

2 WANNU 25: GB11DC

Highlight

Copy