2 WANNU 22
22
Josias wannu Juda
(Zɔk 2 Kal Ny 34.1-2)
1Josias a̧a̧ so nɛ̀ pɛ mɔɔrɔ-ɗoŋ-taar ŋgimbi n'aa ɔɔ nɛ̀ wan, ɓɛɛ a̧ ɔ wan Jerusalɛm pɛ ɓu-taar-zua-kpɔk; nin nàà kɔ̧-a̧ nɛ́ Jɛdida, boko-bem ko Adaya be Boskat. 2Josias dee mɔ nɛ̀ yuwar-a ti GASA WAN; a̧ nɛɛ nɔ̀ tɛ yuwar ko zɔmdáà kɔ̧-a̧ David nɛ̀ baa so'i, a̧ e yuwar'i duk mɛ nɛ̀ si wiiko kóó si gale na mbɛt.
Kpaa kalata Heembea
(Zɔk 2 Kal Ny 34.8-28)
3Ɗoŋ nɛ Josias dee pɛ ɓu-zua-mɔɔrɔ-ɗoŋ-taar tɛ wan kaɗi, a̧ toma wi-yɔr-kalata Safaŋ bem ko Asalia be-koo Mɛsulam nɛnɛ kɔ̧ Tua ko GASA WAN, tɔ̧ nɛnɛ hee mɔ'ɔ ga: 4«Mɛ̀ nɛ́ tɛ gasa wan-ɗafi-sɔ̧ Hilkia; a̧ a̧ tɔ́r mbɔi nɛ̀ wa ha̧a̧ ha̧ GASA WAN nɛ̀ o wi-pɛm-tua mɔi̧a so er dukbíí; 5a̧ a̧ há̧ há̧ o wi-duk-zu tom Tua ko GASA WAN ha̧ wa mɛ yoɓi nɛ̀ o wi nɛ̀ ɗafa o fara nɛ̀ Tua'i ɗaŋa sɛnɛ‘i: 6o wi-mgboi-tua, o wi-de-tom tua, o wi-mbo-tua in ha̧ wa mɛ hi̧fi nɛ̀ o mbiŋ in o sɛka-ta wen ɗafa-a nɛ̀ Tua. 7Ɓɛɛ k’ɛ́nɛ́ ak ndaa sede nɛ‘i ha̧a̧ ha̧ wa'i na, wen wa de nɛ tom nɛ̀ yuwar-a.»
8Gasa wan-ɗafi-sɔ̧ Hilkia tɔ̧ɔ̧ ha̧ wi-yɔr-kalata Safaŋ: «Mi kpaa kalata Heembea sɛn kɔ̧ Tua ko GASA WAN.» Hilkia ha̧a̧ kalata'i ha̧ Safaŋ, ɓɛɛ a̧ tɔr. 9Safaŋ wi-tɔr-kalata nɛ̀ɛ̀ we ɗoŋ wen'i ha̧ wannu hee mɔ'ɔ ga: «O wi-de-tom k’ɛ́nɛ́ kpaa mbɔi sɛn kɔ̧ Tua ko GASA WAN, ɓɛɛ wa ha̧ ha̧ o wi-duk-zu o wi-de-tom kɔ̧ Tua ko GASA WAN.» 10Wi-yɔr-kalata Safaŋ tɔ̧ɔ̧ ha̧ wannu woyo: «Wan-ɗafi-sɔ̧ Hilkia ha̧a̧ ŋma kalata ha̧‘m.» Ɓɛɛ Safaŋ tɔr kalata'i ha̧ wannu.
11Ŋgimbi nɛ wannu zia gba̧a̧ wen nɛ̀ yɔra zaŋ kalata Heembea'i kaɗi, a̧ a̧ka̧ laa tɛ-a a nù. 12A̧ ha̧a̧ nú ha̧ wan-ɗafi-sɔ̧ Hilkia in Ahikam bem ko Safaŋ, Akbɔr bem ko Mikaya, ha̧ wi-yɔr-kalata Safaŋ, in ha̧ Asaya wi-de-tom ko wannu hee mɔ'ɔ ga: 13«Ɛ̀nɛ̀ nɛ́ɛ̀ zɔ́k GASA WAN wen am in o be Juda lɛŋ, wen wen zaŋ Kalata’ɛ n’ɛɛ kpaa’ɛ. Nyimsea ko GASA WAN nɛ̀ kura zu yɛ ɔ gasa nyɛmna, wen bó nɛ́ o dáà k’ɛɛ mboo so zu tɛ wen nɛ̀ yɔra zaŋ kalata’ɛ na, in wa de mɔ nyɛm nɛ̀ ɗoŋ mɔ lɛŋ nɛ̀ yɔra zaŋ-aa'i na.»
14Wan-ɗafi-sɔ̧ Hilkia in Ahikam, Akbɔr, Safaŋ in Asaya nɛ̀ɛ̀ kpa Hulda okoo-tɔ̧-wen oi nú Sɔ̧, kóò ko Salum wi-pɛm-laa, bem ko Tikwa be-koo Haras. A̧ ɔ tɛ mbe ye sɛn Jerusalɛm. Ɗoŋ nɛ wa wee ɗoŋ wen'i ha̧ a̧ kaɗi, 15a̧ kifa nú ha̧ wa: «GASA WAN Sɔ̧ ko *Israɛl tɔ̧ɔ̧ ndé: ‹Ɛ̀nɛ̀ tɔ̧́ ha̧ wi nɛ̀ toma'm tɛnɛ‘i: 16Mi tɛ pi̧ ŋgamɔ fara'i in zu o bíí ye'i lɛŋ, wen ha̧ wen zaŋ kalata nɛ̀ wannu Juda tɔra'i mɛ hɔ gba̧a̧ lɛŋ. 17Hee mɔ'ɔ nɛ wa bɛ̧a̧‘m, ɓɛɛ wa dɔ fuu-nyama ha̧ o ŋma sɔ̧, tu̧ nɛ̀ see-am tɛ o tom nɛ̀ wa de nɛ̀ er-wa'i ga, nyimsea kɔ‘m kura zu fara'i kaɗi, ɓɛɛ wee nyimsea'i beka bi ɓɔna. 18Ɛ̀nɛ̀ tɔ̧́ ha̧ wannu Juda nɛ̀ toma'nɛ́ tɛnɛ mɛ zɔk GASA WAN ndé, tɔ̧ɔ̧-wen ko GASA WAN Sɔ̧ ko *Israɛl nɛ́ mɔ'ɔ: Mɛ́ zia o wen nɔ‘i nɛ̀ de-a, 19wen nɛ̀ see-mɛ ŋmana. Mɛ́ mɔka see-mɛ ti GASA WAN ŋgimbi nɛ̀ mɛ zia nɛ̀ mɔ n'am tɔ̧ɔ̧ zu fara’ɛ in o wi-ɔ-sɛnɛ ndé, fara’ɛ tɛ duk nɛ́ fara-búù in fara-fom. Mɛ́ a̧ka̧ laa tɛ-mɛ, ɓɛɛ mɛ́ hi̧i̧ kɔ̧a̧ ti'm. Hegɔ, mi zia. Nɛ́ mí GASA WAN Sɔ̧ a̧ tɔ̧. 20Wen zu mɔ‘i, mi tɛ e mɛ kpɔk in o dáà kɔ-mɛ. Mɛ tɛ si ɗoŋ kpa wa tɛ ga̧a̧mɔ, ɓɛɛ mɛ beka zɔk o bɔnɛ n'am tɛ pi̧ zu nù'ɛ nɛ̀ yí-mɛ na.› »
Ɓɛɛ o betom ba kifa-nú si ɗoŋ ha̧ wannu.
Currently Selected:
2 WANNU 22: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
