2 WANNU 21

Manase, wannu Juda

(Zɔk 2 Kal Ny 33.1-10,18-20)

1Manase a̧a̧ so nɛ̀ pɛ ɓu-zua-yiitoo ŋgimbi n'aa ɔɔ nɛ̀ wan, ɓɛɛ a̧ ɔ wan pɛ ɓu-mɔɔrɔ-zua-mɔɔrɔ sɛn Jerusalɛm. 2Nin nàà kɔ̧-a̧ nɛ́ Ɛfsi-Ba. A̧ dee mɔ ɗaŋ yí GASA WAN, wen a̧ zɔka ɗoŋ o ɗaŋ tom ko o tugun bíí nɛ̀ GASA WAN ndaka so ti o be *Israɛl'i. #Jer 15.4 3A̧ mboo o *kusa-fara nɛ̀ dáà kɔ̧-a̧ Ezɛkias ɗaŋa so woyo. A̧ mboo fara-ɗafi Bal, ɓɛɛ a̧ sɛk te nɛ‘i gasi gasi hee mɔ'ɔ nɛ̀ Akab wannu *Israɛl dee so ga. A̧ gbɛɛ zugur-aa nù ti o sɔra, ɓɛɛ a̧ gasi wa. 4A̧ mboo fara-ɗafi géé-sɔ̧ sɛn kɔ̧ Tua ko Sɔ̧ nɛ̀ GASA WAN tɔ̧ɔ̧ so wen zu-a ndé: «Mi tɛ e nin-am sɛn Jerusalɛm.» #2 Sam 7.13 5A̧ mboo o *fara-ɗafi-sɔ̧ ha̧ o sɔra sɛn bee-gara Tua ko GASA WAN yiitoo'i. 6A̧ dɔɔ bem kɔ̧-a̧ ɗafi nɛ̀ sɔ̧. A̧ pi̧i̧ tani ɓɛɛ a̧ de mɔɔ-kifi mbɛt. A̧ aa o wi-zɔk-sɔ̧-fio in o wan-gbánà. A̧ tu̧u̧ see GASA WAN tɛ dee mɔ ɗaŋ yí-a. 7A̧ sɛka géé-sɔ̧ Asɛra e kɔ̧ Tua ko GASA WAN nɛ̀ GASA WAN baa tɔ̧ so nɛnɛ ha̧ David in bem kɔ̧-a̧ Salomɔŋ‘e: «Nɛ́ sɛn kɔ̧ Tua’ɛ in sɛn Jerusalɛm n'am hoka mgbara o zuduk be *Israɛl a̧ nin-am tɛ duk sɛnɛ ɓɔnsɛnɛ. #1 Wan 9.3-5; 2 Kal Ny 7.12-18 8Mi beka de ha̧ o be *Israɛl mɛ yambali nyɛi̧ nɛ̀ nù n'am ha̧a̧ so ha̧ o dáà kɔ-wa na; wa a̧ dé nɛ́ mɔ nyɛm nɛ̀ ɗoŋ mɔ n'am tɔ̧a̧, nyɛm nɛ̀ ɗoŋ Heembea lɛŋ nɛ̀ wi-de-tom kɔ‘m Moisɛ yɔra so ha̧ wa.» 9Ɓɛɛ wa mbo zu na; Manase mgbɔɔ wa yɔ nɛ̀ kaya nɛ̀ ɗaŋ-a gan ko o tugun bíí nɛ̀ GASA WAN kuma so ti o be *Israɛl.

10GASA WAN tɔ̧ɔ̧ nɛ̀ nú o *wi-tɔ̧-wen oi nú Sɔ̧ in o wi-de-tom kɔ‘i hee mɔ'ɔ ga: 11«Manase wannu Juda dee ndiŋmɔ batɛ; ɗaŋmɔ kɔ̧-a̧‘i gana ko o be Amɔr; a̧ ɔra o be Juda pi̧ tɛ gasa géé-sɔ̧ mbɛt, 12sa GASA WAN Sɔ̧ ko Israɛl'e ndé, wi tɛ de ha̧ bɔnɛ mɛ tik zu Jerusalɛm in Juda, ɓɛɛ o bíí lɛŋ nɛ̀ tɛ zii nyɛrɛ-a tɛ ya yemsele. 13Ŋgamɔ nɛ̀ kpaa Samarii in o bíí nutua ko Akab tɛ kpa Jerusalɛm. Mi tɛ di̧ Jerusalɛm hee mɔ'ɔ nɛ‘i di̧ nɛ̀ nyɛk zik gu nù'ɛ ga. 14Mi tɛ e oi mɔɔ-oi kɔ‘m duk; mi tɛ e wa kɔ̧ er o wisɛn kɔ-wa. Wa tɛ ya nɛ́ mɔɔ-kɔ̧-er in mɔɔ-oi-biro ko o wisɛn kɔ-wa lɛŋ, 15wen wa dee ɗaŋmɔ sɛn ti'm, ɓɛɛ wa kaɗi tu̧u̧ see-am na ku̧u̧naŋ-a nɛ́ wese nɛ̀ o zɔmdáà kɔ-wa gboo so nɛnɛ Egiptɛ hɔ sɔsɔɔ.»

16O wi nɛ̀ de ɗaŋmɔ na, Manase gbɛɛ kànà wa; tɔk tɛ-wa foka dam Jerusalɛm lɛŋ. Wi tɔ̧ ɗaŋmɔ n'aa mgbɔɔ Juda pi̧ sɛnɛ de nɛ̀ mɔ ɗaŋ yí GASA WAN na.

17Oi o tom ko Manase, mɔ n'aa dea lɛŋ, hɔ tɛ ɗaŋmɔ n'aa dee so, yɔra zaŋ Kalata Nyɛrɛ ko o wannu Juda. 18Manase fea si ɗoŋ o dáà kɔ‘i, ɓɛɛ wa gun a̧ kpɛɛfɔ ko Uza ká̧ tua kɔ̧-a̧.

Bem kɔ̧-a̧ Amɔŋ ɔɔ wan oi-aa.

Amɔŋ wannu Juda

(Zɔk 2 Kal Ny 33.21-25)

19Amɔŋ baa wan ká a̧ a̧a̧ nɛ̀ pɛ ɓu-yiitoo-zua-yiitoo; ɓɛɛ a̧ de pɛ yiitoo tɛ wan sɛn Jerusalɛm. Nin nàà kɔ̧-a̧ nɛ́ Mɛsulɛmɛt, boko-bem ko Harus be Yotba. 20A̧ dee mɔ ɗaŋ yí GASA WAN hee ko dáà kɔ̧-a̧ Manase ga. 21A̧ dee mɔ tɛ gasa o géé-sɔ̧ hee mɔ'ɔ nɛ dáà kɔ̧-a̧ dee so ga, ɓɛɛ a̧ gu nù ti wa. 22A̧ bɛ̧ɛ̧ GASA WAN Sɔ̧ ko zɔmdáà kɔ̧-a̧, a̧ ba yuwar ko GASA WAN na.

23O wi-de-tom kɔ̧-a̧ baa ɗaŋ keta zu a̧, ɓɛɛ wa gbɛ a̧ kɔ̧ tua kɔ̧-a̧. 24Nɛ́ mɔ'ɔ nɛ̀ giiwi gbɛɛ o wi nɛ̀ baa ɗaŋ keta zu wannu Amɔŋ‘i, ɓɛɛ wa de wan ha̧ bem kɔ̧-a̧ Josias oi-aa.

25Oi o tom ko wannu Amɔŋ, o mɔ n'aa dea lɛŋ yɔra zaŋ Kalata Nyɛrɛ ko o wannu Juda. 26Wa guna a̧ kɔ̧ pɛsi kɔ̧-a̧ sɛn kpɛɛfɔ ko Uza, ɓɛɛ bem kɔ̧-a̧ Josias ɔ wan oi-aa.

Currently Selected:

2 WANNU 21: GB11DC

Highlight

Copy