2 WANNU 19
19
Wannu aka taamɔ ko Esaii
(Zɔk Es 37.1-7)
1Ŋgimbi nɛ wannu Ezɛkias zia wen kɔ-wa'i, a̧ a̧ka̧ laa kɔ̧-a̧, pi̧ laa bufu, ɓɛɛ nɛ́ si kɔ̧ Tua ko GASA WAN. 2A̧ toma Ɛliakim wi-duk-zu tua-wan, Sɛbna wi-yɔr-kalata in o gasa wi-ɗafi-sɔ̧; ɓɛɛ wa a laa bufu nɛ́ nɛnɛ tɛ Esaii bem ko Amɔs, 3mɛ́ tɔ̧ ha̧ a̧ ndé, «Ezɛkias tɔ̧a̧: ‹Wese’ɛ nɛ́ wese-ŋgamɔ, wese-bɔnɛ in wese-ziimɔ! Bem ee zu war kaɗi, ɓɛɛ ŋgai gɔfa a̧ bo na. 4Ŋmafara GASA WAN Sɔ̧ kɔ-mɛ tɛ zii wen nɛ̀ wannu Asirii toma nɛ̀ gasa betom kɔ‘i da̧ nɛ̀ Sɔ̧ nɛ̀ duk kpasa, ɓɛɛ Sɔ̧ dee bɔnɛ in a̧, wen o wen nɛ̀ GASA WAN Sɔ̧ kɔ-mɛ zia'i! Mɛ̀ kɔ́fí sɔ̧ wen o oi bíí nɛ̀ ɓɔna'i.› »
5O betom ko wannu Ezɛkias hɔɔ tɛ Esaii, 6ɓɛɛ Esaii tɔ̧ ha̧ wa: «Ɛ̀nɛ̀ nɛ́ɛ̀ tɔ̧ ha̧ wan k’ɛ́nɛ́; GASA WAN'e ndé: ‹Ká mɛ́ de kíì wen mɔ nɛ̀ mɛ zia'i na; ká mɛ́ de kíí dara nɛ̀ o bíí ko wannu Asirii da̧ nɛ‘m'i na. 7Mi tɛ e ŋma taamɔ kɔ‘m tɛ-a, a̧ tɛ zii ŋma nyɛrɛ, a̧ tɛ si ɗoŋ, ɓɛɛ mi dee ha̧ wa mɛ gbɛ a̧ nɛ̀ gba-paa tɛ mgbák nù kɔ̧-a̧.› »
O be Asirii nasa Jerusalɛm woyo
(Zɔk Es 37.8-13; 2 Kal Ny 32.17)
8Gasa betom zia'e wannu Asirii yaka si Lakis, ɓɛɛ a̧ nɛ́ɛ̀ kpa a̧ sɛn Libna, fara n'aa bi biro sɛnɛ‘i. 9Wannu zia nyɛrɛ ko Tiraka wannu Etiopii nɛ̀ tɛ de biro in a̧, ɓɛɛ wannu Asirii tom mɔ sitɛ Ezɛkias woyo hee mɔ'ɔ ga: 10«Ɛ̀nɛ̀ tɔ̧́ ha̧ Ezɛkias wannu Juda hee mɔ'ɔ ga: ‹Ká Sɔ̧ kɔ-mɛ nɛ̀ mɛ e ta nɛnɛ ɔr mɛ ndé, wannu Asirii nyɛm mɛ ba Jerusalɛm na,› na! 11Mɛ iŋa mɔ nɛ̀ o wannu Asirii dee in o nù lɛŋ; wa kuma o bíí lɛŋ, ɓɛɛ kɔ-mɛ‘e ndé, ŋma mɔ beka fo wi na! 12Nɛ́ ge gbakamɔ ge a̧ o sɔ̧ ko o zuduk nɛ̀ o dáà kuma so’ɛ gbaka nɛ̀ wa ge? Mɛ̀ nɛ́ o ye Gozaŋ, Haraŋ, Rɛsɛf in o be Edan nɛ̀ ɔ so sɛn Tɛlasar. 13O wannu Hamat, Arpad, Lair, Sɛfarvaim, Hɛna in wannu Iwa a̧a̧ déè nde?»
Kɔfa-sɔ̧ ko Ezɛkias
(Zɔk Es 37.14-20)
14Ezɛkias baa kalata er o betom, ɓɛɛ tɔr; a̧ daŋa si kɔ̧ Tua ko GASA WAN; a̧ yaia kalata'i ti GASA WAN, 15ɓɛɛ a̧ kɔfi sɔ̧ tɔ̧ nɛnɛ: «GASA WAN Sɔ̧ ko *Israɛl, ɛ́nɛ́ n’ɛ̀nɛ̀ dúk zu o *keribim, ɛ́nɛ́ kpɔk nɛ́ Sɔ̧ nɛ̀ duk zu o mɔɔ-wan zu nù'ɛ lɛŋ, wen nɛ́ ɛ́nɛ́'ɛ́ dee yiwese in nù. #Gboa-a 25.22 16GASA WAN, ɛ̀nɛ̀ yéŋ zer'nɛ́, ɛ̀nɛ̀ zíí mɔ, ɓɛɛ ɛ̀nɛ̀ hú̧í̧ yí‘nɛ́, ɛ̀nɛ̀ zɔ́k mɔ. Ɛ̀nɛ̀ zíí dara nɛ̀ Sɛnakɛrib toma da̧ nɛ̀ ɛ́nɛ́, Sɔ̧ nɛ̀ duk kpasa’ɛ! 17GASA WAN, o wannu Asirii kuma so o zuduk bíí, ɗaŋ nɛ̀ nù kɔ-wa lɛŋ nɛ̀ mbetɛ. 18Wa kaia o sɔ̧ kɔ-wa a tɛ wee, ɓɛɛ o sɔ̧ nɔ‘i bo nɛ́ o kpasa sɔ̧ na; wa nɛ́ o tom-er-bíí nɛ̀‘i dee nɛ̀ te in ta, ɓɛɛ sa o wannu Asirii ɗaŋ wa yinɛ. 19Ɓɛɛ k’ɛ́nɛ́ GASA WAN Sɔ̧ k’ɛɛ, ɛ̀nɛ̀ kpásí yɛ er Sɛnakɛrib, ɓɛɛ o mɔɔ-wan zu nù'ɛ lɛŋ tɛ iŋ‘e, ɛ́nɛ́ nɛ́ GASA WAN, ɛ́nɛ́ nɛ́ Sɔ̧ kpɔk ɓɛɛ.»
Kifa-nú ko GASA WAN
(Zɔk Es 37.21-35)
20Esaii bem ko Amɔs toma tom ha̧ Ezɛkias hee mɔ'ɔ ga: «Wen nɛ̀ GASA WAN Sɔ̧ ko *Israɛl tɔ̧ nɛ́ mɔ'ɔ: Mi zia kɔfamɔ kɔ-mɛ zu Sɛnakɛrib wannu Asirii. 21Wen nɛ GASA WAN tɔ̧ a zu a̧ nɛ́ mɔ'ɔ:
Zɔŋa *Siɔŋ mam nɛ mɛ,
a̧ zɔk mɛ hee geemɔ ga;
Jerusalɛm yàà-de-zɔŋa,
sɔr nɛ mɛ, zɛkɛɗi nɛnɛ!
22Nɛ́ o a̧ mɛ da̧a̧ zɛkɛɗi nɛnɛ'ɛ o?
Mɛ̀ nɛ́ o a̧ mɛ tɔ̧ɔ̧ ŋga wen zu a̧,
ŋmaŋ nɛ̀ tɛ-mɛ'ɛ o?
Mɛ̀ nɛ́ Sa̧a̧-wi ko *Israɛl.
23«Mɛ́ ee tom nú o betom kɔ-mɛ da̧ nɛ GASA WAN.
Mɛ tɔ̧a̧: ‹Tɛ̀ báá naŋanɔ ko o keekee-nyaŋa kɔ‘m,
mi daŋa zu o kaya.›
Mɛ ŋmaŋa tɛ-mɛ‘e ndé,
wi gɔma o kusa te *gbatui in o *zawaya,
nɛ́ mɔ'ɔ nɛ̀ wi yee kɔ̧ ɗuka kombo.
24Wi gɔna kɔ̧ yì gɔni nù,
ɓɛɛ wi nɔ;
wi i̧sa o gɔna-yí Egiptɛ lɛŋ ɔ̧si.
25«Mɛ́ íŋ kɔ-mɛ mɔ n'am ee so zu-a ɓeemɛ na nde?
Mɔ n'am taa so mɛ de ɓeemɛ‘i
nɛ́ mɔ'ɔ nɛ̀ de kinii'i.
Ɓɛɛ nɛ́ mɛ́ a̧ tɛ de
ha̧ o ta ŋga-ye nɔ‘i mɛ tir a nù.
26O wi ye nɔ‘i bo nɛ̀ ŋgai na,
tɛ-wa gbina, búù baa wa,
wa ya hee zɔ̧ in nuŋui kpɛɛfɔ ga.
Wa ya hee o mbɔɗimɔ nɛ̀ hɔ zu tua ga,
hee alkamaari nɛ laambam baa nɛti ha̧ mɛ sɔk ga.
27«Ŋgimbi nɛ̀ mɛ duk nù,
ŋgimbi nɛ̀ mɛ gbo,
ŋgimbi nɛ̀ mɛ ye tua, mi iŋa,
in ŋgimbi nɛ̀ tɛ-mɛ nak nɛ̀ tu̧u̧-see zu'm mbɛt.
28Mɛ kura zu'm
ɓɛɛ o ɗaŋ wen kɔ-mɛ lɛŋ aa zer-am;
hegɔ, mi tɛ pi̧ káná zɔ̧ɔ̧-mɛ
in nú-mɛ mbɛt.
Mi tɛ mgbɔ mɛ sinɛ ɗoŋ
nɛ̀ yuwar nɛ̀ mɛ tɛɛ nɛnɛ‘i.
29«Mɔ'ɔ tɛ duk nɛ́ mɔɔ-usi-mɔ ha̧ mɛ, Ezɛkias:
wi tɛ nyɔŋ nɛ́ nyɔnɔ mɛ pɛ'ɛ,
mɛ bin-mgba-pɛ,
wi tɛ nyɔŋ nɛ́ wan nɛ̀ hɔɔ nɛ ta-tɛ;
ɓɛɛ tɛ taar pɛ, ɛ̀nɛ̀ gún mɔ,
ɛ̀nɛ̀ mɔ́í̧ nyɔnɔ.
Ɛ̀nɛ̀ gún o nyak-dɔ̧ɔ̧,
ɓɛɛ ɛ̀nɛ̀ nyɔ́ŋ o waya-a.
30O be nutua ko Juda nɛ̀ ɓɔna,
nɛ̀ mɔ hɔɔ yɔɔ zu wa,
tɛ hɔ ŋmaa in ŋma te
nɛ̀ kunin-a yee nù nɛ̀ ɗuka-a,
ɓɛɛ wai woyo.
31Oi bíí nɛ̀ ɓɔna tɛ gbo nɛ̀ Jerusalɛm;
ɓɛɛ o wi nɛ̀ yuu so mɔ tɛ zir nɛ̀ zu kaya *Siɔŋ mɛ.
Mɔ nɛ̀ GASA WAN tɛ de
tɛ gasa *kɔ̧ɔ̧mɔ kɔ̧-a̧ nɛ́ mɔ‘i.
32«Wen nɛ̀ GASA WAN tɔ̧ɔ̧
zu wannu Asirii'i nɛ́ mɔ'ɔ:
‹A̧ beka ye saaye-ɛ na;
a̧ beka pi̧ góò si hi̧i̧ na,
a̧ beka kai ŋgee bi nɛ̀ ye'i na;
a̧ beka mbo mɔ mɛ hu̧si ɗoŋ-aa ɓɔna.
33A̧ tɛ si nɛ̀ kpɔk yuwar
n'aa tɛɛ so nɛnɛ‘i;
yéé kɔ̧-a̧ saaye bo na;
nɛ́ GASA WAN a̧ tɔ̧a̧.
34Mi tɛ pɛm ye’ɛ,
ɓɛɛ mi kpasa a̧ wen nin-am
in wi-de-tom kɔ‘m David.› »
Fio ko wannu Asirii
(Zɔk Es 37.36-38; 2 Kal Ny 32.21-22)
35Ŋma betom ko GASA WAN tɛɛ mɛ zaŋzɛ‘i, ɓɛɛ gbɛ bíí booro-gɔmŋmaa-nɛ-booro-ɓu-mɔɔrɔ-ɗoŋ-taar-zua-mɔɔrɔ sɛn kɔ̧ gbagari ko o be Asirii. Wa kura mɛ tutuyɛ, ɓɛɛ wa zɔk nɛ o wɔr mbɔɗɔnu nɛnɛ! 36Wannu Asirii Sɛnakɛrib kura ɓɛɛ gbin gbagari. A̧ sii ɗoŋ, ɓɔn sɛn Ninivɛ. 37Ŋma wese, a̧ nɛɛ ye kɔ̧ tua ko sɔ̧ kɔ̧-a̧ Nisrɔk mɛ gas'aa, ɓɛɛ o bem kɔ̧-a̧ Adramɛlɛk in Saresɛr gbɛ a̧ nɛ̀ gba-paa pi̧ nù; wa yuu mɔ yak si nú Ararat, ɓɛɛ bem kɔ̧-a̧ Asaradɔŋ ɔ wan oi-aa.
Currently Selected:
2 WANNU 19: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
