2 WANNU 18
18
Ezɛkias wannu Juda
(Zɔk 2 Kal Ny 29.1-2; 31.1)
1Tɛ taar pɛ ɔɔ-wan ko Osee bem ko Ɛla wannu *Israɛl, Ezɛkias bem ko Ahaz wannu Juda ɔɔ wan. 2A̧ a̧a̧ so nɛ̀ pɛ ɓu-yiitoo-zua-mɔɔrɔ ŋgimbi n'aa ɔɔ nɛ̀ wan, ɓɛɛ a̧ ɔ wan pɛ ɓu-yiitoo-zua-mɔɔrɔ-ɗoŋ-naar sɛn Jerusalɛm. Nin nàà kɔ̧-a̧ nɛ́ Abi boko-bem ko Zakarii. 3A̧ dee so mɔ nɛ̀ yuwar-a yí GASA WAN, kànà hee ko zɔmdáa kɔ̧-a̧ David ga. 4A̧ gbina o *kusa-fara in o ta-zu-nù a nù, a̧ gɔma te nɛ‘i gasi gasi pi̧ nù, ɓɛɛ a̧ gbin gɔk-ndɛrɛ nɛ̀ Moisɛ dee so'i a nù, wen o be *Israɛl dɔɔ so fuu-nyama ti gɔk ndɛrɛ‘i hɔ ŋgimbi'i; wa sa so nin-a'e, Nɛhustaŋ. #Tɔra-bíí 21.9 5Ezɛkias ee ta nɛ̀ GASA WAN Sɔ̧ ko *Israɛl. Ɗoŋ n'aa fee kaɗi, ŋma wannu Juda nɛ‘i tɛ we nɛ̀ a̧ nɛti, kóó nɛ̀ ɗoŋ, bo na mbɛt. 6A̧ ndaɗa kànà in GASA WAN; a̧ zik tɛ-a na, a̧ kasa o geŋa nɛ̀ GASA WAN ha̧a̧ so ha̧ Moisɛ nɛ̀ de-a. 7GASA WAN duka so in a̧, ɓɛɛ o mɔ n'aa de lɛŋ hɔ nɛ́ gba̧a̧. A̧ dee ŋgazu in wannu Asirii, ɓɛɛ a̧ duk ɗɔɔ ŋgai kɔ̧-a̧ ɓɔna. 8A̧ bìì o be Filistii hɔ Gaza in nù nɛ̀ zii nɛ̀ a̧; a̧ ɗaŋa o kusa fara-pɛm-mɔ in o ŋga-ye-biro mbɛt.
9Tɛ naar pɛ-wan ko Ezɛkias, tɛ mɔɔrɔ-ɗoŋ-yiitoo-aa ko Osee bem ko Ɛla wannu *Israɛl, Salmanasar wannu Asirii baa zu dúk nɛ̀ Samarii, ɓɛɛ a̧ kpe ye e nu. 10O be Asirii baa ye'i ɗoŋ pɛ taar. Ezɛkias dee pɛ mɔɔrɔ-ɗoŋ-kpɔk tɛ wan, Osee wannu *Israɛl dee kɔ‘i mɔɔrɔ-ɗoŋ-naar sɛka wa be tɛ̀ɛ́ ba Samarii. 11Wannu Asirii kaia o be *Israɛl yaknɛ nɛ̀ bara-biro si tɛ kɔ‘i, ɓɛɛ a̧ mgbɔ wa si Hala, si ká̧ zaŋ yí Habɔr, foka-yì Gozaŋ, in sitɛ o ye Mɛdii.
12Mɛ̀ nɛ́ wen nɛ̀ wa zii wen ko GASA WAN Sɔ̧ kɔ-wa na, gbin nɛ̀ *nɔɔ-tɔk kɔ̧-a̧; mɔ lɛŋ nɛ̀ Moisɛ wi-de-tom ko GASA WAN yɔra so'i, wa zii géé zia-a, kà bó nɛ̀ kasa-a de nɛ̀ tom na mbɛt.
O be Asirii nasa Jerusalɛm
(Zɔk Es 36.1; 2 Kal Ny 32.1)
13Ezɛkias ɔɔ wan pɛ ɓu-zua-naar, ɓɛɛ wannu Asirii Sɛnakɛrib ba zu dúk nɛ̀ o ŋga-ye Juda lɛŋ, ɓɛɛ kai. 14Ezɛkias wannu Juda pi̧i̧ tom ha̧ wannu Asirii sɛn Lakis hee mɔ'ɔ ga: «Mi dee ŋma ɗaŋmɔ! K’ɛ́nɛ́ bi'm na! Mi tɛ de mɔ lɛŋ n’ɛnɛ tɛ kɔ̧ ha̧‘m mɛ de!» Wannu Asirii tɔ̧ɔ̧ ha̧ Ezɛkias wannu Juda mɛ yoɓi kilo bu-mbɔi booro-mɔɔrɔ-ɗoŋ-naar in kilo lɔr gɔmŋmaa-mɔɔrɔ-ɗoŋ-naar. 15Ezɛkias ha̧a̧ sede nɛ̀ duk kɔ̧ Tua ko GASA WAN'i in wan mɛ kɔ̧ tua ko wannu ha̧ a̧. 16Nɛ́ ŋgimbi'i a̧ Ezɛkias gbina nɛ̀ o nú Tua ko GASA WAN in kpar nú-a nɛ̀ a̧ nɛ̀ tɛ-a baa yɔk so ɗoŋ-aa nɛ̀ lɔr. A̧ kaia wa ha̧ wannu Asirii.
Tɔ̧ɔ̧-wen ko gasa betom ko wannu Asirii
(Zɔk Es 36.2-22; 2 Kal Ny 32.9-16)
17Wannu Asirii toma gasa wi-biro, gasawi ko o kpàná in gasa betom kɔ‘i ká bá nɛ̀ o ŋma gíí wi-biro nɛ̀ Lakis sitɛ wannu Ezɛkias sɛn Jerusalɛm. Nɛ̀ wa hɔɔ kaɗi, wa yora ká̧ fara-e-yì nɛ̀ duk nɛ̀ war ŋgɔn yuwar fara-mgbɔ-laa. 18Wa aka mɔ wen wannu, ɓɛɛ Ɛliakim bem ko Hilkia nɛ̀ duk zu tua-wan, in wi-yɔr-kalata Sɛbna, in Yɔa bem ko Asaf nɛ̀ duk nɛ́ wi-he-mbea gbo pii tɛ-wa. 19Gasa betom tɔ̧ɔ̧ ha̧ wa: «Ɛ̀nɛ̀ nɛ́ɛ̀ tɔ̧ ha̧ Ezɛkias ndé, gasa wannu Asirii tɔ̧ɔ̧ ndé, mɛ́ é ta-mɛ nɛ̀ o nde? 20Mɛ́ é ta-mɛ nɛ̀ o ha̧ mɛ mɛ de nɛ̀ ŋgazu in am o? 21Mɛ́ é ta-mɛ nɛ̀ Egiptɛ ɗaŋ nuka-tòrò sɔɔ géè, kà ŋma bíí de mɛ ba, ɓɛɛ gbina yur er-wi’ɛ nde? Wannu Egiptɛ duk hegɔ in o wi nɛ̀ e ta nɛ̀ a̧ lɛŋ!
22«Ŋmafara ɛ́nɛ́ tɛ́ tɔ̧ ha̧‘m ndé, wi e ta nɛ̀ GASA WAN Sɔ̧ kɔ‘i; ɓɛɛ nɛ́ a̧ á̧ Ezɛkias gbina o *kusa-fara kɔ̧-a̧ in o fara-ɗaf'aa, tɔ̧ nɛnɛ ha̧ o be Juda in o be Jerusalɛm ndé, a'i gbɛ́ zugur-wi nù ti *fara-ɗaf'aa sɛn Jerusalɛm wó'ɛ gɔ! 23Mɛ̀ é nú mɛ in nyaa wannu Asirii, ha̧‘m ha̧ o nyaŋa booro-yiitoo ha̧ mɛ, kà mɛ nɛ́ nyɛma mɛ kpa o wi-daŋ-aa! 24Kóó mɛ́ e ta-mɛ nɛ̀ Egiptɛ wen ha̧ mɛ mɛ kpa o keekee-nyaŋa in o wi-daŋ-aa! Héé ge mɛ tɛ zik ɗoŋ-mɛ e ha̧‘m, mi nɛ̀ duk nɛ́ geɗek wi-duk-zu zika-nù ko gasa wan kɔ‘m, mi nɛ̀ duk nɛ́ geɗek-wi mgbara o bíí kɔ̧-a̧, ge nde? 25Mɛ́ ta kɔ-mɛ‘e, ye kɔ-mɛ n'am tɛ ɗaŋ yínɛ́'ɛ, bó nɛ́ nɛ̀ ŋgai ko GASA WAN na nde? GASA WAN tɔ̧ɔ̧ ha̧‘m'e, a̧‘m tɛ́ɛ̀ bi ye’ɛ, a̧‘m ɗáŋ a̧ yinɛ!»
26Ɛliakim bem ko Hilkia in Sɛbna bá nɛ̀ Yoa tɔ̧ɔ̧ ha̧ gasa betom: «Ɛ́ɛ́ aia nú h’ɛ́nɛ́, ɛ̀nɛ̀ tɔ̧́ nɛ̀ nú aram sɛk’ɛɛ zia gba̧a̧-a̧; k’ɛ́nɛ́ tɔ̧ nú hébreu na, wen ká o bíí nɛ ya zu garo tɛɛ zii.»
27Gasa betom kifa nú ha̧ wa: «Nyaa toma'm ha̧ wan kɔ-mɛ in mɛɛ nde? Bo nɛ a̧ toma'm ha̧ o wi nɔ'ɔ n’ɛnɛ tɛ nɔ ini in nyɔŋa ɗɔr ndaa'nɛ́ in o ŋmaa’ɛ na nde?»
28Nɛ́ mɔ'ɔ nɛ̀ gasa betom yora ŋgɔn tɔ̧ nɛ̀ wen nɛ̀ hee-ger nɛ̀ nú hébreu hee mɔ'ɔ ga: «Ɛ̀nɛ̀ zíí wen ko gasa wannu Asirii nɛ tɔ̧‘i. 29Wannu tɔ̧ɔ̧ ndé, k’ɛ́ɛ́ e ha̧ Ezɛkias mɛ ɔr'nɛ́ géè na, wen a̧ nyɛm mɛ gbo'nɛ́ yinɛ er-am na. 30Ká Ezɛkias de h’ɛ́nɛ́ mɛ e ta nɛ̀ GASA WAN tɔ̧ nɛnɛ‘e: ‹GASA WAN tɛ gbo yɛ nɛ mbetɛ, wannu Asirii nyɛm mɛ ba ye’ɛ na wó,› na! 31K’ɛ́nɛ́ zii wen ko Ezɛkias na, wen wannu Asirii tɔ̧a̧: ‹Ɛ̀nɛ̀ nɔ́ tɔk in am, ɛ̀nɛ̀ mbó zu ha̧‘m, ɓɛɛ ɛ́nɛ́ tɛ nyɔŋ waya-nyak-dɔ̧ɔ̧ in waya-te-mbɔra k’ɛ́nɛ́; ɛ́nɛ́ tɛ nɔ yì k’ɛ́nɛ́ 32hɔ ŋgimbi n'am tɛ tɛ̀ɛ́ kai'nɛ́ sitɛ ŋma nù nɛ̀ hɔɔ ŋmaa in k’ɛ́nɛ́, nù nɛ̀ alkamaari in nyɔ̧ɔ̧ dɔ̧ɔ̧ a̧a̧ sɛnɛ, nù nɛ̀ nyɔŋmɔ in nyak-dɔ̧ɔ̧ a̧a̧ sɛnɛ, nù nɛ̀ o te-nɔ̧́ in gɔrɔ a̧a̧ sɛnɛ, hegɔ ɛnɛ tɛ ya kpasa, ɛnɛ beka fe na.› K’ɛ́nɛ́ zii ɔramɔ ko Ezɛkias na! Wen'i n'aa tɔ̧‘e, GASA WAN tɛ gbo'nɛ́ wó‘i, nɛ́ ndela! 33O sɔ̧ ko o tugun bíí nɛtɛ nɛtɛ gboo so o bíí kɔ‘i er wannu Asirii nde? 34O sɔ̧ ko o be Hamat in ko be Arpad a̧a̧ déè? O sɔ̧ ko o be Sɛfarvaim, ko o be Hɛna in Iwa a̧a̧ déè? Wa gboo Samarii yinɛ er-am nde? 35Mgbara o sɔ̧ nɔ‘i lɛŋ, nɛ́ o'o gboo nù kɔ‘i yinɛ er-am, sá nɛ́ GASA WAN a̧ tɛ gbo Jerusalɛm yinɛ er-am o?»
36O wi nɔ‘i yaa selele, wa kifi nú-wen kpɔk na, wen wannu ha̧a̧ so nú‘e ndé, ká wa kifi nú na. 37Ɛliakim bem ko Hilkia nɛ̀ duk zu tua-wan, in wi-yɔr-kalata Sɛbna, bá nɛ̀ Yɔa bem ko Asaf wi-he-mbea a̧ka̧ laa tɛ lɛŋ, ɓɛɛ wa nɛ́ ti Ezɛkias mɛ we ɗoŋ wen ko gasa betom ha̧ a̧.
Currently Selected:
2 WANNU 18: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
