2 WANNU 16
16
Ahaz wannu Juda
(Zɔk 2 Kal Ny 28.1-27)
1Tɛ ɓu-zua-mɔɔrɔ-ɗoŋ-yiitoo pɛ-wan ko Pɛka bem ko Rɛmalia, Ahaz bem ko Yotam wannu Juda ɔɔ wan. 2Ahaz a̧a̧ so nɛ pɛ̀ ɓu-yiitoo, ɓɛɛ a̧ ɔ wan Jerusalɛm pɛ ɓu-zua-mɔɔrɔ-ɗoŋ-kpɔk. A̧ de mɔ nɛ̀ yuwar-a yí GASA WAN Sɔ̧ kɔ̧-a̧ hee mɔ'ɔ nɛ̀ zɔmdáà kɔ̧-a̧ David dee so ga na. 3A̧ baa nɛ́ yuwar ko o dɔka wannu *Israɛl; a̧ dɔɔ bem kɔ̧-a̧ ha̧ o géé-sɔ̧ ko o dukbíí nɛ̀ GASA WAN ndaka so yinɛ ti o be *Israɛl. #Wee-ɗoŋ-he 12.31 4A̧ ɗafa sɔ̧ dɔ nɛ̀ fuu-nyama zu o *kusa-fara, zu o kaya in ɗɔɔ o da̧a̧ wa̧a̧-te lɛŋ.
5Rɛsin wannu Aram in Pɛka bem ko Rɛmalia wannu *Israɛl daŋa mɛ nɛ̀ɛ́ bi Ahaz sɛn Jerusalɛm; wa kɛra ye, ɓɛɛ wa nyɛm so mɛ ku̧ biro na. #Es 7.1 6Tɛ ŋgimbi'i, wannu Edɔm baa Elat woyo. A̧ ndaka o be Juda sɛn Elat lɛŋ; o be Edɔm baa fara, ɓɛɛ wa ya sɛnɛ hɔ sɔsɔɔ. 7Ahaz toma bíí nɛnɛ tɛ Tiglat-Pilesɛr wannu Asirii mɛ tɔ̧ ha̧ a̧ hee mɔ'ɔ ga: «Mi nɛ wi-de-tom k’ɛ́nɛ́ in mi nɛ bem k’ɛ́nɛ́ mbɛt! Ɛ̀nɛ̀ tɛ́ɛ̀ gbó‘m er wannu Aram in wannu *Israɛl nɛ̀ kur zu'm’ɛ yinɛ.» 8Ahaz kaia bu-mbɔi in lɔr nɛ̀ duk kɔ̧ Tua ko GASA WAN in wan mɛ kɔ̧ tua ko wannu lɛŋ tom nɛnɛ ha̧ wannu Asirii nɛ̀ ha̧a̧mɔ. 9Wannu Asirii kpɛka ha̧a̧mɔ‘i, ɓɛɛ a̧ nɛ́ɛ̀ bi Damas ba; a̧ kaia o wi ye'i lɛŋ nɛ̀ bara-biro si Kir, ɓɛɛ a̧ gbɛ Rɛsin.
10Wannu Ahaz nɛɛ kpa ŋmaa in Tiglat-Pilesɛr wannu Asirii sɛn Damas. A̧ zɔka *fara-ɗafi-sɔ̧ nɛ̀ duk sɛn Damas, ɓɛɛ a̧ tom yuwar mboo fara-ɗafi-sɔ̧‘i in yuwar ɗafa-a ha̧ wi-ɗafi-sɔ̧ Uria, wen ha̧ a̧ mɛ zɔk de nɛnɛ. 11Uria wi-ɗafi-sɔ̧ mboo *fara-ɗafi-sɔ̧ nyɛm nɛ̀ ɗoŋ mɔ nɛ̀ wannu Akaz toma tɛnɛ nɛ̀ Damas. Tom'i kaɗa nɛti sɛka wannu Ahaz be tɛ̀ɛ́ pii ɗoŋ nɛ̀ Damas. 12Wannu zɔka *fara-ɗafi-sɔ̧ tɛ pia-a kɔ‘i nɛ̀ Damas, ɓɛɛ a̧ nɛ́ si ká̧ a̧. 13A̧ *dɔɔ kpoo-sɔ̧, ɓɛɛ a̧ ha̧ mɔ mbɛt. A̧ aa zɛzɛ, ɓɛɛ a̧ misi̧ tɔk saɗi ha̧a̧mɔ-gaŋmɔ a zu-a. 14A̧ baa *fara-ɗafi-sɔ̧ nɛ‘i dee nɛ̀ ndɛrɛ nɛ̀ duk ti GASA WAN yinɛ wen duka so mgbara mbe *fara-ɗafi-sɔ̧ in Tua ko GASA WAN, ɓɛɛ a̧ ba e nɛ̀ war mgbɔɔr nɛ̀ war ká̧-zan-mɛ-ŋgɔn. #Gboa-a 27.1-2; 2 Kal Ny 4.1 15Wannu Ahaz ha̧a̧ nú ha̧ wi-ɗafi-sɔ̧ Uria hee mɔ'ɔ ga: «Mɛ̀ dɔ́ kpoo-sɔ̧ mɛ tutuyɛ in ha̧a̧mɔ mɛ ga̧a̧mɔ; mɛ̀ dɔ́ kpoo-sɔ̧ in ha̧a̧mɔ ko wannu, gú nɛ̀ ha̧a̧mɔ in o zɛzɛ ko bíí lɛŋ sɛn zu gasa *fara-ɗafi-sɔ̧. Mɛ̀ gbáí tɔk o saɗi, dɔɔ kpoo-sɔ̧ lɛŋ, in tɔk o saɗi-ɗafi-sɔ̧ a zu-a; ɓɛɛ nɛ̀ war ko *fara-ɗafi-sɔ̧ nɛ‘i dee nɛ̀ ndɛrɛ, mi tɛ zɔk mɔ n'am tɛ de nɛnɛ.» 16Wi-ɗafi-sɔ̧ Uria dee mɔ lɛŋ nyɛm nɛ̀ ɗoŋ *ha̧a̧nú ko Ahaz.
17Wannu Ahaz yaia o ká̧-yí mɔɔ-tui-kpánà, kai o gasa kpánà nɛ̀ ya zu-a'i yinɛ, ɓɛɛ ba gba kpánà nɛ‘i dee nɛ ndɛrɛ nɛ̀ duk so zu o ndai-ndɛrɛ e zu nɛka-ta. #1 Wan 7.23-39; 2 Kal Ny 4.2-6 18A̧ kpaia mɔ sɛn kɔ̧ Gɔna-bɛr-tua Sabat kɔ̧ Tua ko Sɔ̧, in nú tua ko wannu nɛ̀ duk nɛ̀ war zan mbɛt mɛ ha̧ desee ha̧ wannu Asirii.
19Oi o tom ko wannu Ahaz in mɔ n'aa dea yɔra zaŋ Kalata Nyɛrɛ ko o wannu Juda. 20Ahaz fea si ɗoŋ o dáà kɔ‘i, ɓɛɛ wa gun a̧ in o dáà kɔ̧-a̧ sɛn *Ye ko David. Bem kɔ̧-a̧ Ezɛkias ɔɔ wan oi-aa. #Es 14.28
Currently Selected:
2 WANNU 16: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
