2 WANNU 15

Azaria wannu Juda

(Zɔk 2 Kal Ny 26.3-4,21-23)

1Jeroboam wannu *Israɛl ɔɔ wan pɛ ɓu-yiitoo-zua-mɔɔrɔ-ɗoŋ-yiitoo, ɓɛɛ Azaria bem ko Amasia wannu Juda ɔ wan. 2A̧ a̧a̧ so nɛ̀ pɛ ɓu-zua-mɔɔrɔ-ɗoŋ-kpɔk ŋgimbi n'aa ɔɔ nɛ̀ wan, ɓɛɛ a̧ ɔ wan Jerusalɛm tɛ pɛ ɓu-mɔɔrɔ-zua-yiitoo; nin nàà kɔ̧-a̧ nɛ́ Yɛkɔlia zɔŋa Jeruslaɛm. 3A̧ dee mɔ nɛ̀ de-a yí GASA WAN, kànà hee mɔ'ɔ nɛ̀ dáà kɔ̧-a̧ Amasia dee so ga. 4Mɔ kpɔk, o *kusa-fara kaɗi na, ɓɛɛ o bíí ɓɔn tɛ ɗafa sɔ̧, dɔ nɛ̀ fuu-nyama fara-gasi o géé-sɔ̧ nɔ‘i. 5GASA WAN pi̧i̧ zɛɛ-doko tɛ wannu Azaria hegɔ hɔ wese fio kɔ̧-a̧. A̧ ɔ so kɔ̧ ŋma tua ɛ̀nɛ́-a, ɓɛɛ bem kɔ̧-a̧ Yotam, gasa wi-pɛm-kira ɔ wan oi nú-a tɛ ŋgimbi zɛɛ kɔ̧-a̧.

6Oi o tom ko Azaria, mɔ lɛŋ n'aa dea yɔra zaŋ Kalata Nyɛrɛ ko o wannu Juda. 7Azaria fea si ɗoŋ o dáà kɔ‘i, ɓɛɛ wa gun a̧ *Ye ko David in o dáà kɔ̧-a̧. Bem kɔ̧-a̧ Yotam ɔɔ wan oi-aa. #Es 6.1

Zakarii wannu *Israɛl

8Azaria ɔɔ wan Juda tɛ pɛ ɓu-zua-mɔɔrɔ-ɗoŋ-taar, ɓɛɛ Zakarii bem ko Jeroboam ɔ wan *Israɛl sɛn Samarii tɛ fio-zɛ mɔɔrɔ-ɗoŋ-kpɔk. 9Zakarii dee mɔ ɗaŋ yí GASA WAN hee o dáà kɔ̧-a̧ ga; a̧ e ɗaŋmɔ nɛ̀ Jeroboam bem ko Nɛbat dee so kai nɛ̀ o be *Israɛl a sɛnɛ‘i duk na. 10Salum bem ko Yabɛs baa ɗaŋ keta zu a̧; a̧ gbɛɛ a̧ pi̧ nù nɛ̀ gbaayí o bíí, ɓɛɛ ba wan oi-aa.

11Oi o tom ko Zakarii yɔra zaŋ Kalata Nyɛrɛ ko o wannu *Israɛl.

12Hegɔ wen nɛ̀ GASA WAN tɔ̧ɔ̧ so ha̧ Jɛhu hee mɔ'ɔ ga hɔɔ gba̧a̧: «O bem kɔ-mɛ tɛ daŋ zu damti *Israɛl hɔ tɛ bezaŋ taar!» Ɓɛɛ mɔ de kànà hegɔ. #2 Wan 10.30

Salum wannu *Israɛl

13Azaria ɔɔ wan Juda pɛ ɓu-taar-zua-mɔɔrɔ-ɗoŋ-naar, ɓɛɛ Salum bem ko Yabɛs ɔ wan tɛ fio-zɛ kpɔk sɛn Samarii.

14Mɛnahɛm bem ko Gadi daŋa kɔ‘i nɛ̀ Tirsa, ɓɛɛ hɔ Samarii. A̧ gbɛɛ Salum bem ko Yabɛs pi̧ nù hi̧i̧, ɓɛɛ ɔ wan oi-aa. 15Oi o tom ko Salum in ɗaŋ keta n'aa baa so yɔra zaŋ Kalata Nyɛrɛ ko o wannu *Israɛl. 16Tɛ̀ daŋa-a nɛ̀ Mɛnahɛm daŋa nɛ̀ nú Tifsa, a̧ tika zu ye Tirsa gbɛ nɛ̀ o bíí saaye'i in o bíí nɛ̀ ya zik fara'i mbɛt, wen nɛ̀ wa hu̧i̧ so nú garo ye ha̧ a̧ na. A̧ kaka zaŋ o nàá-zaŋ lɛŋ a nù.

Mɛnahɛm wannu *Israɛl

17Azaria dee pɛ ɓu-taar-zua-mɔɔrɔ-ɗoŋ-naar tɛ wan sɛn Juda, ɓɛɛ Mɛnahɛm bem ko Gadi ɔ wan zu *Israɛl; a̧ ɔɔ wan *Israɛl sɛn Samarii pɛ ɓu. 18A̧ dee mɔ ɗaŋ yí GASA WAN; a̧ e ɗaŋmɔ nɛ̀ Jeroboam bem ko Nɛbat dee so, kai nɛ̀ o be *Israɛl a sɛnɛ duk na. 19Pul, wannu Asirii tɛɛ mɛ bi nù, ɓɛɛ Mɛnahɛm ha̧ kilo bu-mbɔi booro-ɓu-taar ha̧ a̧, wen ha̧a̧ ŋgai ha̧ a̧ zu nù‘i ha̧ wan mɛ yor er-a nɛ̀ nɔa-a. 20Mɛnahɛm gɔna sede pi̧ zu o wanmbɔi *Israɛl, ha̧ wa kpɔk kpɔk mɛ ha̧ kɔya bu-mbɔi ɓu-mɔɔrɔ ha̧ wannu Asirii. Wannu Asirii baa sede'i kaɗi, ɓɛɛ si ɗoŋ si tɛ kɔ‘i. A̧ ɓɔn tɛ nù‘i na.

21Oi o tom ko Mɛnahɛm, mɔ lɛŋ n'aa dea, yɔra zaŋ Kalata Nyɛrɛ ko o wannu *Israɛl. 22Mɛnahɛm fea si ɗoŋ o dáà kɔ‘i, ɓɛɛ bem kɔ̧-a̧ Pɛkaya ɔ wan oi-aa.

Pɛkaya wannu *Israɛl

23Azaria dee pɛ ɓu-mɔɔrɔ tɛ wan sɛn Juda, ɓɛɛ Pɛkaya bem ko Mɛnahɛm ɔ wan *Israɛl sɛn Samarii tɛ pɛ yiitoo. 24A̧ dee mɔ ɗaŋ yí GASA WAN; nɛ́ kpɔk kale ɗaŋmɔ nɛ̀ Jeroboam bem ko Nɛbat dee so, kai nɛ̀ o be *Israɛl a sɛnɛ‘i, a̧ a̧ dea mbɛt. 25Baka-nyaŋa kɔ̧-a̧ Pɛka, bem ko Rɛmalia baa ɗaŋ keta zu a̧. A̧ gbɛɛ Pɛkaya ká bá nɛ̀ Argɔb in Ariya sɛn Samarii fara pɛm mɔ kɔ̧ tua ko wannu. O be Galad n'aa kaia tɛnɛ gbɛ nɛ̀ Pɛkaya nɛ́ bíí ɓu-mɔɔrɔ, ɓɛɛ a̧ ɔ wan oi-aa.

26Oi o tom ko Pɛkaya in o mɔ lɛŋ n'aa dea yɔra zaŋ Kalata Nyɛrɛ ko o wannu *Israɛl.

Pɛka wannu *Israɛl

27Ŋgimbi nɛ Azaria wannu Juda kpaa pɛ ɓu-mɔɔrɔ-zua-yiitoo tɛ wan kɔ‘i kaɗi, Pɛka bem ko Rɛmalia ɔɔ wan *Israɛl sɛn Samarii pɛ ɓu-yiitoo. 28A̧ dee mɔ ɗaŋ yí GASA WAN. Nɛ́ kpɔk ɗaŋmɔ nɛ̀ Jeroboam bem ko Nɛbat dee so, kai nɛ̀ o be *Israɛl a sɛnɛ‘i, a̧ a̧ dea mbɛt.

29Tɛ ŋgimbi ko Pɛka, wannu *Israɛl, Tiglat-Pilesɛr wannu Asirii nɛɛ ba o ye Iyɔŋ, Abɛl-Bɛt-Maka, Yanɔa, Kɛdɛs, Hasɔr, Galad, Galilee, ká bá nɛ̀ nú Nɛftalii lɛŋ, ɓɛɛ a̧ kai o wi ye nɔ‘i lɛŋ nɛ̀ bara-biro si Asirii mɛ.

30Osee bem ko Ela baa ɗaŋ keta zu Pɛka bem ko Rɛmalia, ɓɛɛ gbɛ a̧ pi̧ nù; a̧ baa wan oi-aa tɛ ɓu-yiitoo pɛ-wan ko Yotam bem ko Azaria. 31Oi o tom ko Pɛka in o mɔ lɛŋ n'aa dea yɔra zaŋ Kalata Nyɛrɛ ko o wannu *Israɛl.

Yotam wannu Juda

(Zɔk 2 Kal Ny 27.1-9)

32Pɛka bem ko Rɛmalia dee pɛ yiitoo tɛ wan sɛn *Israɛl kaɗi, ɓɛɛ Yotam bem ko Ozias wannu Juda ɔ wan. 33A̧ baa wan ká a̧ a̧a̧ nɛ̀ pɛ ɓu-yiitoo-zua-mɔɔrɔ. A̧ ɔɔ wan pɛ ɓu-zua-mɔɔrɔ-ɗoŋ-kpɔk sɛn Jerusalɛm. Nin nàà kɔ̧-a̧ nɛ́ Yɛrusa, boko-bem ko Sadɔk. 34A̧ dee mɔ nɛ̀ yuwar-a yí GASA WAN; a̧ dee kànà mɔ hee dáà kɔ̧-a̧ ga. 35Mɔ kpɔk, o *kusa-fara kaɗi na. O bíí ɓɔna kànà tɛ ɗafa sɔ̧ in dɔɔ fuu-nyama zu o fara-ɗafi géé-sɔ̧ nɔ‘i. Nɛ́ a̧ a̧ mboo nú Tua ko GASA WAN mɛ si ŋgɔn.

36Oi o tom ko Yotam in o mɔ n'aa dea yɔra zaŋ Kalata Nyɛrɛ ko o wannu Juda. 37Nɛ́ tɛ ŋgimbi'i a̧ GASA WAN ku̧u̧ nɛ̀ naŋ toma Rɛsin wannu Aram in Pɛka bem ko Rɛmalia nɛnɛ mɛ bi Juda. 38Yotam fee si ɗoŋ o dáà kɔ‘i, ɓɛɛ wa gun a̧ sɛn saaye ko dáà kɔ̧-a̧ David; bem kɔ̧-a̧ Ahaz ɔɔ wan oi-aa.

Currently Selected:

2 WANNU 15: GB11DC

Highlight

Copy