Saumu 65
65
“Kure mase,” katopo tykyrysã apoiry poko
Tawi nymerohpyry, inekarohpyry eremiaketõ tuisary a.
1Ritonõpo, zae nase oeahmary yna a ypy Xião po, yna omihpyry ae ro ynanekarory
enepyry roropa oya tokarosẽme.
2Yna otururu etaneme oexiryke, oya ahno emero
nono põkõ oehnõko mana oeahmase
3tyyrypyhpyke yna exiryke.
Typoremãkase ynanase popyra yna ehtoh ke,
yrome yna rypyry korokãko mase.
4Tãkye mã mokaro onymenekatyamo,
oya oehnõko mã toto atapyĩ taka ehse!
Tãkye exĩko ynanase, tuesapare exiketõ samo,
okyryry kurã poko Atapyĩ tao,
amaro Oturutoh kurã tao.
5Ritonõpo, yna ezuhnõko mase orẽpyra
yna riryke oya, ajamitunuru enepõko mase yna a yna pynanohtohme oya.
Sero nono etyhpyry põkomo te, tuna konõto moino exiketõ roropa tosẽkõme oenetupuhnõko mã toto.
6Ypy tõ tosaka tyrise oya ajamitunuru ke,
moro ke jamihmehxo oehtoh tonepose oya.
7Tuna konõto panaikato exikety mynyhme
tyripõko mase pohkane konõto roropa,
ahno imoihmãkõ kui katoh roropa
mynyhpãkapõko mase.
8Onyrityã eneryke tyya xine sero nono põkõ emero
osenuruhkãko mã toto.
Onyriry eneryke tyya xine kohtãko mã toto tãkye
toexirykõke nono etyhpyry poe nono etyhpyry pona.
9Sero nono pyno oehtoh enepõko mase, konopo
enehpõko mase nono ehxikatohme kure ehtohme.
Konopo oepyryke iporiry kumanohnõko mana,
morararo otyro zamaro nono exĩko, eperytãko kure,
morara tyripose oya exiryke.
10Konopo enehpõko mase itamurume tupito tõ pona,
nono ahkahpyry pona.
Moro nono tohxikase ahtao tũpore pyra exĩko.
Otyro ahtanohpõko mase.
11Toehsehxo ahtao otytyko apoĩko itamurume,
onekarohpyry, kure oexiryke.
Emero pata tõ po tonahsẽ nae pitiko rokẽ pyra.
12Ona po onahpoty ahtãko,
pehme mana kaneru tõ ke;
somohmã po atãkyemãko roropa mã toto.
13Ekykõ tuhke jakanahmã ao exĩko mã toto.
Anarykatyãkõ eperytãko tiriiku tõkehko.
Emero kohtãko, eremiãko, tãkye toexirykõke.
Currently Selected:
Saumu 65: apy
Highlight
Share
Copy
Want to have your highlights saved across all your devices? Sign up or sign in
©2017, Wycliffe Bible Translators, Inc.
