Saumu 66
66
Ritonõpo eahmary, “Kure mase,” katoh ke
Saumu, eremiatoh tokarose eremiaketõ tuisary a.
1Ritonõpo eahmatoko, okohtatohkõ ke,
ãtãkyemarykõme emero sero nono põkomo!
2Oeremiatoko eya, eahmaryme:
“Kure mase, Ritonõpo Imehxo,” kahtoko eya.
3Ynara kahtoko eya:
“Onyrityã pokoino osenuruhkãko ynanase!
Ajamitunuru imehnõ jamitunuru motye exiryke,
emero ozehno exiketõ tosekumuru po
porohnõko mã toto oẽpataka.
4Sero nono põkõ emero oeahmãko mã toto,
eremiãko mã toto, oeahmaryme,
eremiãko mã toto imehxo oekaroryme.”
5Osehtoko Ritonõpo nyrityã enese,
orẽpyra nase tynyrityã poko ahno pynanopyry poko.
6Nonome tuna konõto tyripose eya.
Tupupurukõ po kytamuru tõ toytose tuna akuohse.
Moroto tãkye sexiatose inyrihpyry poko.
7Tyjamitunuru ke tuisame exikehpyra mana jũme, imeimehnõ nonory põkõ enẽko mana. Ah Ritonõpo zehno exiketõ typoremãkasẽme nexĩ toto!
8Ah emero ahno tõ Ritonõpo Kuesẽkõ eahmã toto! Oeremiatoko opore eahmatohme.
9Towomase kymarokõ eya, isene kuehtohkõme,
takorehmase kymarokõ eya epukara kuehtohkõme.
10Ritonõpo, tukuhse ynanase oya; parata kuhtoh
samo apoto ke, moro sã tukuhse ynanase oya.
11Tynomose yna oya apoitoh pona yna epukatohme,
yna motary pona omoxinety tõ tyrise roropa oya.
12Yna tytũtũmapose oya yna zehno exiketomo a.
Apoto kuroko ynanytoase, tuna kuroko roropa,
yrome seromaroro kuenepyatose ropa
osa towomaneke exikety pona.
13Atapyĩ taka ynekarory tõ arõko ase
jahkatohme tytororo;
jomihpyry ae ro ynekarory ekarõko ase oya.
14Moro ekarõko ase, tykase ywy oya
popyra ehtoh toehse ahtao ya.
15Kaneru tõ ekarõko ase oya jahkatohme
apoto apõ pona;
pui orutua zahkãko ase, poti tõ maro,
mame orexĩto onuhnõko mana kakoxi kapu aka.
16Osehtoko, amarokõ emero Ritonõpo omipona
exiketomo, jomiry etatoko,
inyrihpyry ya ekarõko ase oya xine.
17Tykohmase ynororo ya jakorehmatohme;
mame eahmase roropa eremiatoh ke.
18Aryhnaka yyrypyry onekaropyra jahtao
jomiry onetara Kuesẽkõ exiry.
19Yrome jomiry totase Ritonõpo a rahkene,
jotururu eya totase.
20“Kure mase, Ritonõpo,” ãko ase eya
typanary anapurupyra aexiryke, tõturuse
jahtao eya, ypyno exikehpyra roropa aexiryke.
Currently Selected:
Saumu 66: apy
Highlight
Share
Copy
Want to have your highlights saved across all your devices? Sign up or sign in
©2017, Wycliffe Bible Translators, Inc.
