MARKUS 6

Nyiŋra Yesu yaŋ Nazaret ya

(Mt 13:53-58; Lu 4:16-30)

1Yesu ur gin gŋ ge sǝr ahe, za syee mor ah gera ne ki ta. 2Ne cok ah com 'yak mo ge dai o, tǝŋ cuu ɓǝ nyi za ɓǝr yaŋ kee ɓǝ Masǝŋ. Za pǝlli mo laara ɓǝ faa ah o, so kaara tǝ ɓǝ ah gǝriŋ faara: Dǝɓ mai lwaa fan ma morãi kẽne? Azu ye nyi fatan mai nyi ko ne? Joŋ yeɓ matǝ gǝriŋ ah ra ne jol ah ta. 3Pa zyeɓ kpuu ye ka ne? Ka ɗii mam ne Maria ya ne? Wee mah ah ye ka Yakuɓ ne Yoses, Yudas ne Simon ya ne? Wee mah ah maŋwǝǝ laŋ ka kǝsyil man nyee ya ne? Syẽara ko ne ɓǝ ah naiko. 4Amma Yesu faa nyi ra: Ka syẽara profeto Masǝŋ pǝ cok ki ya, sai a syẽara ko pǝ sǝr ah tǝgǝǝ zum ah tǝkine yaŋ ahe. 5Gak joŋ dǝǝbǝǝri maki ah gŋ ya, sai kan jol ah tǝ za syem nje, laɓ ra. 6Yesu kaa tǝ ɓǝ ɓǝǝ gǝriŋ, mor nyiŋra ɓǝ ah ya. So kal ge kyãh tǝluɓ lal cuu ɓǝ nyi za gŋ.

Yesu pee za syee mor ah jemma tǝ gwa

(Mt 10:5-15; Lu 9:1-6)

7Yesu ɗii za syee mor ah matǝ jemma tǝ gwa, so tǝŋ pee ra gwa gwa. Nyi swah nyi ra tǝ coksyiŋrĩ, 8faa nyi ra: We ɓaŋ fan mor fahlii ka, we ɓaŋ farel ka, we ɓaŋ dah ka, we ɓaŋ solai pǝ jiibǝ ka ta, sai we ɓaŋ kǝndaŋ to. 9We maa sǝɓalle, we woo mbǝro gwa gwa ka. 10So Yesu faa nyi ra: We ge yaŋ ki ɓe, yaŋ mai we ge ɗǝr gŋ kǝpelle, we kaa gŋ ŋhaa we zol gin gŋ ne sõo. 11Koo zune mo nyiŋ we ya, wala mo laara ɓǝ faa ɓiir a ɓe, ka we pǝ̃ǝ gin yaŋ ɓǝǝ ɓe, we kǝ̃ǝ ɓǝm ɓal ɓii ka joŋ syedowal tǝ ɓǝǝra. 12So za syee mor Yesu matǝ jemma tǝtǝl gwa kalra ge cuu ɓǝ fer ɓǝ zahzyil nyi zana. 13Nĩira coksyiŋ tǝtǝl za pǝlli, sõmra nǝm tǝ za syem pǝlli, laɓra ra.

Wul Yohana ma joŋ baptisma

(Mt 14:1-12; Lu 9:7-9)

14Goŋ Herodes laa ɓǝ Yesu, mor tǝɗii ah myah cok daŋ. A faara: Yohana ma joŋ baptisma ur gin kǝsyil za mai mo wuk ɓo ɓe, mor ah a ne swah ka joŋ dǝǝbǝǝri. 15Amma za ki faara: Elias yo. Za ki faara faɗa: Profeto Masǝŋ ye ko tǝgbana profetoen ma kǝpelle.

16Amma Herodes mo laa ɓǝ Yesu so faa: Yohana mai me ŋgoŋ tǝtǝl ah ur gin pǝ wul ɓe. 17Mor Herodes ne suu ah pepee ge gbǝ Yohana baŋ ko, so ɓoo ge daŋgai tǝ ɓǝ Herodias mawin naa mah ah Filip, mor Herodes ɓaŋ kan ɓo. 18Mor Yohana a faa nyi ko: Mo kii nǝn pǝkoŋ ka ɓaŋ mawin naa ma ɓo kan a. 19Mor ah Herodias syiŋ Yohana tǝ ɓǝ ah kpǝtǝtǝ, a kyeɓ ka in ko pǝ wulli, amma lwaa fahlii ah ya, 20mor Herodes a ɗuu gal Yohana, mor tǝ ɓe, dǝɓ matǝ njaŋ yo, a daŋdaŋ, so byak ko pǝsãhe. Ne cok moo so laa ɓǝ faa Yohana, ɓǝ ah gaɓ ko pǝlli, ne daŋ laŋ a laa ɓǝ faa ah pǝ'nyahre.

21Amma comki Herodias lwaa fahlii ahe. Zah'nan byaŋ Herodes ge dai, so Herodes joŋ fĩi byaŋ ahe, ɗii zaluu ah ra, ne za swah salle, tǝkine zaluu sǝr Galile daŋ. 22Mǝlaŋ Herodias dan ge ɓǝr yaŋ dǝdaa pel ɓǝǝra. Daa ah 'nyah suu Herodes ne za mai mo kaara ɓo tǝ ren farel ne ki. Goŋ faa nyi mǝlaŋ ahe: Mo fii fan makẽne mo 'yah daŋ, me ga nyi nyi mo. 23Haa zah nyi ko faa: Koo mo fii fẽene daŋ me ga nyi nyi mo, koo raita goŋ ɓe laŋ mo lwaa. 24Mǝlaŋ pǝ̃ǝ ge lal fii mah ah faa: Me fii fẽene? Mam zyii zah ah faa: Mo fii tǝtǝl Yohana ma joŋ baptisma. 25Mǝlaŋ ɗuu kal ge wo goŋ ne pel gwari, pǝǝ ko faa: Me 'yah mo ŋgoŋ tǝtǝl Yohana ma joŋ baptisma nyi me pǝ tahsah zǝzǝ̃ǝko. 26Ɓǝ ah nǝǝ zahzyil goŋ pǝlli, amma mor haazah ah mo haa ɓo, tǝkine za mai mo kaara ɓo tǝ ren farel ne ki, so gak faa sõone zye zyii ya ya. 27Ne pel sǝ goŋ pee sooje ma byak ko, faa nyi ko: Mo ge ŋgoŋ tǝtǝl Yohana ge ne ko. 28Sooje kal ge ŋgoŋ tǝtǝl Yohana pǝ daŋgai ɓaŋ kan ge pǝ tahsah ge nyi mǝlaŋ ahe, so mǝlaŋ ge nyi mah ahe. 29Ne cok za syee mor Yohana mo laara ɓǝ ah o, so ge ɓaŋra wul ah cii.

Yesu nyi farel nyi za ujenere dappe

(Mt 14:13-21; Lu 9:10-17; Yoh 6:1-14)

30Zapee taira ge wo Yesu, keera ɓǝ yeɓ mai mo joŋra tǝkine ɓǝ mai mo cuura daŋ nyi ko. 31Yesu faa nyi ra: We ge na ge pǝ cok mai za mo ka gŋ ya, ka na kaa 'yak gŋ biŋ ɗao. Mor za ginra wo ɓǝǝ pǝlli, so za pii soo kal pǝlli ta, ŋhaa ka lwaara cok ren farel a. 32Yeera dah syak ɓǝǝra, kalra ge pǝ cok mai za mo ka gŋ ya.

33Za kwo ra tǝ ganne, za pǝlli tǝra Yesu ye ne za syee mor ahe, so ɗuura ne ɓal daga tǝgǝǝ yaŋ daŋ hǝǝ kalra ge pel ɓǝǝ pǝ cok mai mo tǝ gara gŋ. 34Ne cok Yesu mo pǝ̃ǝ gin pǝ dah kwo za gŋ pǝlli, so yee syak tǝ ɓǝǝra, mor ara tǝgbana pǝsǝ̃ǝ mai mo ka ne pakǝpii ya. So cuu fan nyi ra camcam pǝlli. 35Ka com tǝ yah dan o, za syee mor ah gera wol ah faara nyi ko: Cok mai lal o, com laŋ tǝ yah dan o, 36mo soɓ ra ge tǝgǝǝ yaŋ tǝkine yaŋ ma kah ah ra daŋ ka mo leara farel ka renne. 37Yesu zyii zah ɓǝǝ faa: Awe ye we nyi farel nyi ra re. Faara nyi ko: Ru ge lee farel ne solai temere gwa ka nyi nyi ra ren ne? 38Yesu faa nyi ra: We ne zahtǝfah kǝɗǝne? We ge ẽe ɗǝ. Mor tǝra ɓe, so faara nyi ko: A zahtǝfah dappe ne syiŋ gŋ gwa.

39So Yesu faa nyi ra ka mo zyeɓra za kaa ge sǝŋ tǝ fãa pǝ̃ǝ ne kul ɓǝǝ camcam. 40So za cwãara ge sǝŋ cok camcam, kaara pǝ cok mai temere, kaara pǝ cok mai jemma dappe. 41Yesu ɓaŋ zahtǝfah dappe ne syiŋ matǝ gwa kŋ, ɓaŋ nahnǝn ge sǝŋ, joŋ osoko tǝl ahe, ɓǝl zahtǝfah ahe, nyi za syee mor ah ka mo womra nyi zana. 42Rera kǝ̃ǝ daŋ. 43Woora mai mo myah ɓo tǝ sǝr col jemma tǝtǝl gwa ne syiŋ ah daŋ. 44Za ma renra farel ah za wǝǝ ujenere dappe.

Yesu syee tǝ bii

(Mt 14:22-33; Yoh 6:15-21)

45Ne pel sǝ Yesu nĩi za syee mor ah ka mo yeera dah kalra ge pel ah nǝzakǝŋhaa fah kǝ Betsaida. So nyi fahlii nyi zana. 46Fahfal mo nyi fahlii nyi zana, so kal ge tǝ waa ka juupel gŋ. 47Ne cok com mo danne, ka dah kǝsyil mabii, ka Yesu no zahgee ba. 48Kwo ra tǝ gaɓ ne ǝǝ dahe, mor zyak tǝ kuuni. Yesu ge wo ɓǝǝ ne cok zahmor'nanne, syee tǝ bii ne ɓalle, tǝ yah ka pǝ̃ǝ kah ɓǝǝ kalle. 49Ne cok mo kwora ko tǝ syee tǝ bii ne ɓalle, lǝŋra mǝǝzuwuŋ bii yo, so ŋwaara ɓǝ, 50mor kwora ko daŋ, gal re ra pǝlli. So Yesu faa nyi ra: Zahzyil mo nǝǝ we ka, ame yo, we ɗuu gal ka. 51So Yesu yee kaa ge pǝ dah kah ɓǝǝra, so zyak soɓ kuuni, kaara gǝriŋ pǝlli. 52Mor tǝra ɓǝ dǝǝbǝǝri mai Yesu mo joŋ ne farel a, mor zahzyil ɓǝǝ yer ɓo.

Yesu laɓ za ma ne syem pǝ sǝr Genesaret

(Mt 14:34-36)

53Ne cok mo yeera ge zakǝŋhaa sǝr Genesaret, ge zyiira dah zahbii. 54Ne cok mo pǝ̃ǝra gin pǝ dahe, za tǝra Yesu ne pel sǝ. 55Za ɗuura pǝ sǝr ah daŋ, tǝŋ woora syem ne ɗee ɓǝǝ daŋ ka gin pǝ cok mai moo laara a gŋ. 56Pǝ cok Yesu moo ga gŋ daŋ, pǝ yaŋ ma lalle ne yaŋ maluuri tǝkine yaŋ mai mo myah ɓo lalle, a gin kanra za syem pǝ cok cõo zana, a pǝǝra ko ka juu mbǝro ahe, za mai mo lwaa juura mbǝro ah daŋ a laɓra.

Currently Selected:

MARKUS 6: MUAR

Highlight

Copy