MARKUS 5

Yesu laɓ dǝɓ ma ne tǝcemme

(Mt 8:28-34; Lu 8:26-39)

1Gera nǝzakǝŋhaa tǝ sǝr Gerasenien. 2Ne cok Yesu mo pǝ̃ǝ gin pǝ dahe, dǝɓ ma ne tǝcem pǝ̃ǝ gin pǝ yii mai moo ciira wul gŋ ge zyaŋ ne ki. 3Dǝɓ ah a kaa pǝ yii ah cẽecẽe, dǝɓ ma gak baŋ ko kǝka, koo ne celeelu laŋ ka gak gaara ko ya. 4A gaara ko ne ŋgǝyam a saara ko ne celeelu, so a hah ŋgǝyam a ɗǝǝ celeelu ta, dǝɓ ka gak lim ko ya. 5Ne suŋ ne com daŋ a yea pǝ yii ne tǝ waare, a ɓyaŋ ɓǝ, a ɗok suu ah ne tǝsalle.

6Ne cok mo kwo Yesu ge pǝɗǝkki, ɗuu ge kea ge sǝŋ pel ahe. 7So ɓyaŋ ɓǝ ne kyaŋ pǝ'man faa: Yesu We Masǝŋ mo no sǝŋ, mo 'yah fẽe wo ɓe ne? Me tǝ pǝǝ mo pǝ tǝɗii Masǝŋ, mo cuu syak nyi me ka. 8Mor Yesu tǝ faa ɓǝ nyi ko: Tǝcemme, mo pǝ̃ǝ gin tǝ dǝɓ ahe. 9So Yesu fii ko: A ɗii mo ɗǝne? Zyii faa: A ɗii me ne Kulpãare, mor aru pǝpãare. 10Pǝǝ ko pǝlli ka mo nĩiko ra pǝ sǝr ah ge lal ka.

11Ŋgaɓ bil tǝ pii kah waa ah pǝlli. 12Tǝcem pǝǝra Yesu faa: Mo pee ru ge kǝsyil ŋgaɓ billi, ka ru ge dan tǝtǝl ɓǝǝra. 13Yesu nyi fahlii nyi ra, so tǝcem pǝ̃ǝra ge danra tǝ billi, ŋgaɓ bil ah rǝkra ɗul zahkee bii leara ge pǝ mabii. Pãa bil ah a ujenere gwa, bii raa ra, wukra gŋ daŋ.

14Kǝpii bil ɗuura ge faa ɓǝ ah tǝgǝǝ yaŋ ne sǝr ah daŋ. Za gera cok ah ka ẽera fan mai mo joŋ ɓo. 15Gera wo Yesu, kwora dǝɓ mai tǝcem mo yea tǝl ah pǝpãa kaa ɓo gŋ, ɓoo mbǝro ɓo, tǝtǝl ah syil ɓe, so ɗuura galle. 16Za mai mo kwora fan ah mo joŋ so keera ɓǝ mai mo joŋ wo dǝɓ ma ne tǝcem tǝkine mai mo joŋ wo bil daŋ nyi zana. 17Mo laara ɓǝ ah o, tǝŋra pǝǝ Yesu ka mo soɓko sǝr ɓǝǝra.

18Yesu yee dahe, dǝɓ mai mo yea ne tǝcem fii fahlii ka ga ne ki. 19Yesu nyi fahlii nyi ko ya, amma faa nyi ko: Mo ge wo za yaŋ ɓo, ka mo ge kee ɓǝ yeɓ malii mai Dǝɓlii mo joŋ ɓo wo ɓo nyi ra tǝkine mai mo kwo syak tǝ ɓo daŋ. 20Dǝɓ ah pǝ̃ǝ kal o, ge myah ɓǝ yeɓ malii mai Yesu mo joŋ wol ah sǝr ma ɗii ne Yaŋmaluujemma daŋ, za daŋ kaara tǝ ɓǝ ah gǝriŋ.

Mǝlaŋ Yairus ne mawin mai mo ge juu mbǝro Yesu

(Mt 9:18-26; Lu 8:40-56)

21Yesu yee ge nǝzakǝŋhaa ne dahe, za taira ge wol ah pǝlli ka a no zahbii ba. 22Dǝɓ ki no a ɗii ne Yairus, swah byak yaŋ kee ɓǝ Masǝŋ yo, kwo Yesu, so ge wol ah kea ge sǝŋ mor ɓal ahe. 23Pǝǝ ko pǝlli faa: Mǝlaŋ ɓe tǝ yah wunni, mo ge kan jol ɓo tǝl ahe, ka mo laɓko ka mo yeako. 24Yesu so kal ne ki. Za gera mor ah pǝlli, so a waara ko.

25Mawin ki no, a ne syem ŋwǝǝ saŋne, kyaŋ ne syem ah syii jemma tǝtǝl gwa. 26Laa bone jol za syiŋ camcam pǝlli, myah fan mai mo yea jol ah daŋ, so laɓ ya, amma so syem ah a ga pelle. 27Dǝ̃ǝ fal ah ge laa ɓǝ Yesu, so dan ge kǝsyil za nǝfah kǝfal Yesu syee ge juu mbǝro ahe. 28Mor faa: Me lwaa juu mbǝro ah biŋ ɓe, me ga laɓɓe. 29Ne pel sǝ syem ŋwǝǝ saŋ ah soɓ ko, laa pǝ suu ah zye laɓ ɓe. 30Ne cok Yesu mo laa pǝ suu ah swah pǝ̃ǝ gin ɓo wo 'minni, so pak suu ah kǝsyil zan fifii faa: Azu ye juu mbǝro ɓe ne? 31Za syee mor ah faara nyi ko: Mo kwo za daŋ tǝ waara mo, mo so fifii azu ye juu me ne? 32Yesu ɓaŋ nahnǝn foo ra ne ko, a kyeɓ ka zye kwo ma joŋ fan maino. 33Amma ne cok mawin ah mo laa fan mai mo joŋ wol ahe, ge wo Yesu ne ɗuu galle, suu ah coo kpakkpak, so kea ge sǝŋ pel ah kee goŋga ɓǝ ah wol ah daŋ. 34Amma Yesu faa nyi ko: Mǝlaŋ ɓe, iŋ ɓo laɓ mo ɓe, mo ge jam o, syem ɓo laɓ lii ɓe.

35Ne cok ka Yesu tǝ faa ɓǝ, za ki gera gin yaŋ swah yaŋ kee ɓǝ Masǝŋ ge faara nyi swah yaŋ kee ɓǝ Masǝŋ: Mǝlaŋ ɓo wǝ ɓe, mo so tǝ gaɓ pa cuu fan mor fẽe faɗa ne? 36Yesu laa ɓǝ faa ɓǝǝra, so faa nyi swah yaŋ kee ɓǝ Masǝŋ: Gal mo re mo ka, mo nyiŋ Masǝŋ. 37Yesu soɓ za ki ge ne ki ya sai Petar, Yakuɓ, ne naa mah ah Yohana. 38Gera yaŋ swah yaŋ kee ɓǝ Masǝŋ, Yesu ge kwo za tǝ ŋwaara ɓǝ ne yeyee tǝkine dahgor gŋ. 39Ne cok mo dan ge yaŋ ah so faa nyi ra: We ŋwaa ɓǝ tǝkine yeyee mor fẽene? Mǝlaŋ ah wǝ ya, amma nǝnǝm ɓo. 40So syakra ko. Yesu so nĩi ra daŋ pǝ̃ǝ ge lalle, so ɗii pah we ne mah ah tǝkine za syee mor ah matǝ sai dan ge ɓǝr yaŋ pǝ cok mai mǝlaŋ mo gŋ ne ra. 41So ɓaŋ jol mǝlaŋ ah faa nyi ko: Talita kumi , tǝgba faa: mǝlaŋ winni, me faa nyi mo, mo ur o. 42Ne pel sǝ mǝlaŋ ah ur sǝŋ kal tǝ syelle. Mǝlaŋ ah joŋ syii ɓo jemma tǝtǝl gwa. Za daŋ kaara tǝ ɓǝ ah gǝriŋ. 43Yesu lai ra ne swahe, ka mo faara ɓǝ ah nyi za ka, so faa nyi ra ka mo nyira farel nyi mǝlaŋ ahe.

Currently Selected:

MARKUS 5: MUAR

Highlight

Copy