MARKUS 16

Yesu ur pǝ wulli

(Mt 28:1-8; Lu 24:1-12; Yoh 20:1-10)

1Ne cok zah'nan com 'yak Yahuduen mo pǝ̃ǝ kal o, Maria ma Magdala, Maria mah Yakuɓ, tǝkine Salome leara ɓǝrdi ka ga sah wo Yesu. 2Ne com damasyi ne zah'nan pim ka com zoo ɓe, gera zah pal ahe. 3Faara tǝgǝǝ ki: Azu ye ga hǝr tǝsal ma coo zah pal ah gai na lal ne? 4(Mor tǝsal ah pǝ'manne.) Ne cok mo ẽera cokki, kwora tǝsal ah fiŋ ge ɓo lal nǝkahe. 5Danra ge pǝ palle, ge kwora we tǝbanna kaa ɓo gŋ nǝfah jokǝsãhe, ɓoo mbǝro ɓo pǝfãi, so gal re ra. 6So we tǝbanna faa nyi ra: We ɗuu gal ka, we tǝ kyeɓ Yesu ma yaŋ Nazaret mai mo ɓaara ge wo kpuu, ka nyee yao, ur gin pǝ wul ɓe. We ẽe cok mai mo yea kanra ko ɓo gŋ. 7We gyo, we faa nyi za syee mor ah tǝkine Petar sye: Kal ga pel ɓii sǝr Galile, we ga kwo ko gŋ tǝgbana mo faako nyi we. 8Pǝ̃ǝra gin pǝ pal ne hǝǝre, ɗuura kalle, amma suu coora coo, ɗuura gal pǝlli, faara ɓǝ ah nyi za ki ya, mor a ɗuura galle.

Yesu cuu suu ah nyi Maria ma Magdala

(Mt 28:1-10; Yoh 20:18)

[9Ne cok Yesu mo ur gin pǝ wul com damasyi ne zah'nan pim, ge cuu suu ah kǝpel nyi Maria ma Magdala mai mo nĩi coksyiŋ rǝŋ tǝl ah ge lalle. 10Kal ge kee ɓǝ ah nyi za mai mo yeara ne Yesu, mor tǝ swaara ɓǝ tǝkine yeyee. 11Ne cok mo laara Maria mo faa Yesu no ne cee, zye kwo ko ɓe, zyiira nyiŋ ɓǝ faa ah ya.

Yesu cuu suu ah nyi za syee mor ah gwa

(Lu 24:13-35)

12Yesu cuu suu ah ne fahlii ki cam nyi za ki kǝsyil za syee mor ah gwa tǝ fahlii ka tǝ gara yaŋ ma lalle. 13Za syee mor ah matǝ gwa kalra ge kee ɓǝ ah nyi za syee mor ah manyeeki ahe, amma zyii nyiŋra ɓǝ faa ɓǝǝr a kpǝ.

Yesu cuu suu ah nyi za syee mor ah matǝ jemma tǝl vaŋno

(Mt 28:16-20; Lu 24:36-49; Yoh 20:19-23; Yeɓ 1:6-8)

14Fahfal mai so cuu suu ah nyi za syee mor ah matǝ jemma tǝl vaŋno ka tǝ renra farelle. Lai ra mor bai iŋ ɓǝǝ tǝkine zahzyil yak ɓǝǝra, mor zyii nyiŋra ɓǝ za mai mo kwora ko ur gin pǝ wul ɓe ya. 15So faa nyi ra: We ge wo sǝr daŋ ka we cuu Ɓǝ'nyah Masǝŋ nyi za daŋ. 16Dǝɓ mai moo ga nyiŋ, mo nyiŋko baptisma ta, a ga ǝ̃ǝ. Amma dǝɓ mo nyiŋ ya ɓe, Masǝŋ ga ŋgoŋ kiita tǝl ahe. 17Dǝǝbǝǝri mai za ma iŋ ah moo ga joŋra a naiko: a ga nĩira coksyiŋ pǝ tǝɗii ɓe, a ga faara ɓǝ ne zah mafuu ahe, 18a ga ɓaŋra soo ne jolle, wala a ga zwǝra fawulli, ka ga joŋ fan ki wo ɓǝǝr a. A ga kanra jol ɓǝǝ tǝ za syemme, zan ah ga laɓra.

Yesu pii soo kal ge sǝŋ

(Lu 24:50-53; Yeɓ 1:9-11)

19Fahfal mai Dǝɓlii Yesu mo faa ɓǝ nyi ra naiko, so kal ge sǝŋ ge kaa jokǝsãh Masǝŋ. 20Za syee mor ah kalra ge cuu Ɓǝ'nyah Masǝŋ cok daŋ. Dǝɓlii joŋ yeɓ ne ra, so cuu ɓǝ faa ɓǝǝ goŋga yo ne joŋ dǝǝbǝǝri tǝ yeɓ ɓǝǝra.]

Currently Selected:

MARKUS 16: MUAR

Highlight

Copy