MARKUS 15

Yesu pel Pilatus

(Mt 27:1-2,11-14; Lu 23:1-5; Yoh 18:28-38)

1Ne cok zah'nan mo cee o, ne pel sǝ zaluu za joŋzahsyiŋ taira ki ne zaluu pel zana, za cuu ɓǝ lai tǝkine zaluu faadal daŋ mor ka faara ɓǝ. Baŋra Yesu gera nyi Pilatus ne ko. 2Pilatus fii Yesu: Amo ye goŋ Yahuduen ne? Yesu zyii zah ah faa: Amo ye faa. 3Zaluu za joŋzahsyiŋ ge cera ko tǝ ɓǝ camcam. 4So Pilatus fii Yesu faɗa: Mo zyii ɓǝ ki ya ne? Mo laa moo cenra mo tǝ ɓǝ camcam ya ne? 5Amma Yesu zyii ɓǝ ki ya, so Pilatus kaa gǝriŋ.

Ŋgoŋra kiita wul tǝ Yesu

(Mt 27:15-26; Lu 23:13-25; Yoh 18:39,40; 19:1-16)

6Ne fĩi Paska daŋ Pilatus a wǝǝ dǝɓ daŋgai mai za moo fiira nyi ra vaŋno. 7Dǝɓ ki no a ɗii ne Barabas, a pǝ daŋgai ne za mai mo urra ɓǝ mo ira dǝɓ ki ge lal pǝ wulli. 8Za taira ge wo Pilatus ka fiira ko ka mo joŋko nyi ra tǝgbana moo joŋko ɓaa. 9Pilatus zyii faa nyi ra: We 'yah me wǝǝ goŋ Yahuduen nyi we ne? 10Mor Pilatus tǝ ɓe, zaluu za joŋzahsyiŋ soɓra Yesu jol ah mor ɓǝ tǝwonni. 11Amma zaluu za joŋzahsyiŋ kǝǝra zah za ka mo fiira Pilatus mo wǝǝko Barabas nyi ra. 12Pilatus so fii za faa: We 'yah me joŋ fẽe ne dǝɓ mai wee ɗii ne goŋ Yahuduen ne? 13Ŋwaara ɓǝ zahki faara: Ɓaa ko ge wo kpuu. 14Pilatus so fii ra faɗa: Joŋ faɓe' fẽe ɓo ne? Amma so ŋwaara ɓǝ pǝ'man faara: Ɓaa ko ge wo kpuu. 15Pilatus 'yah joŋ fan ma 'nyah suu zana, wǝǝ Barabas nyi ra, so ɓaŋ Yesu loɓ ne bǝrǝǝ soɓ ko nyi gee za jol ka mo ge ɓaara wo kpuu.

Sooje syẽara Yesu

(Mt 27:27-31; Yoh 19:2-3)

16Sooje zaŋra Yesu ge zahpiicel govener ne ko, so ɗiira sooje mapãa ah daŋ. 17Ɓoora mbǝro syẽ nyi Yesu, so kaŋra mbǝlaori ne waa maa ge nyi tǝtǝlli. 18So tǝŋ faara nyi ko: Masǝŋ mo soɓ tǝ goŋ Yahuduen! 19So ira tǝtǝl nyi ko ne kǝndaŋ keeŋgai, so tǝɓra tǝsǝ̃ǝ ge wol ahe, keara ge sǝŋ pel ah ne zahciŋɓalle. 20Ne cok mo joŋra wol ah nai vǝr o, wǝǝra mbǝro syẽ gin wol ah so ɓaara fan mǝ ah nyi ko, so zaŋra kal ne ka ga ɓaa ga wo kpuu.

Ɓaara Yesu ge wo kpuu

(Mt 27:32-44; Lu 23:26-43; Yoh 19:17-27)

21Dǝɓ yaŋ Kirene no a ɗii ne Simon (ako ye pah Aleksandǝr ne Rufus) gee 'wah ge pǝ̃ǝ pǝ cok ahe. Sooje joŋra ko ne doole ka mo ɓaŋko kpuu ɓaa Yesu. 22Zaŋra Yesu kal ge pǝ cok ma ɗii ne Golgata, tǝgba faa: Cok Gbel Tǝtǝlli. 23Nyira bii lee kpuu vin ma suuki ne ɓǝrdi mazwak nyi ko, amma Yesu zyii zwan a. 24So ge ɓaara Yesu ge wo kpuu, womra mbǝro ah kǝsyil ki, ira cahcah tǝl ah ka tan dǝɓ mai moo lwaa re ne ko. 25Ɓaara Yesu ge wo kpuu ne cok com doraŋ ma ne zah'nanne. 26Ŋwǝǝra ɓǝ cen ah rao tǝtǝl ah sǝŋ faara gŋ: Goŋ Yahuduen yo. 27Ɓaara za kaafuu gwa ne ki, vaŋno jokǝsãh ahe, maki ah jokǝlǝɓai ahe. [28Ɓǝ mai Ɗerewol mo faa tǝl ah joŋ ɓe, faa: Keera ko ge kǝsyil za faɓe'.]

29Za mai moo gin pǝ̃ǝra pǝ cok ah a haara tǝtǝl ne syak ko, a faara nyi ko: Amo, mo faa mo ga dah yaŋ Masǝŋ ga sǝŋ ka vuu mafuu ah tǝgǝǝ zah'nan sai, 30mo ǝ̃ǝ suu ɓo o ya ne? Mo ɗǝr gin tǝ kpuu ge sǝŋ o. 31Zaluu za joŋzahsyiŋ tǝkine za cuu ɓǝ lai syakra ko nai ta, faara tǝgǝǝ ki: A ǝ̃ǝ za ki, amma ka gak ǝ̃ǝ suu ah ya. 32Amo Kristu goŋ Israel, mo ɗǝr gin tǝ kpuu zǝzǝ̃ǝko ka ru ẽere, ru ga nyiŋ mo. Za mai mo ɓaara ra ɓo tǝ kpuu kah Yesu tǝǝra ko ta.

Wul Yesu

(Mt 27:45-56; Lu 23:44-49; Yoh 19:28-30)

33Ne com kǝsyitǝtǝlli, cokfuu ge tǝ sǝr ah daŋ ŋhaa dai cok com sai ma ne lilli. 34Ne cok com sai ah Yesu ɓyaŋ ɓǝ ne kyaŋ pǝ'man faa: Eloi, Eloi, lama sabaktani, tǝgba faa: Masǝŋ ɓe, Masǝŋ ɓe, mo soɓ me mor fẽene? 35Za ki kǝsyil za mai mo gŋ laara ɓǝ ah faara: We laa ɗǝ, a ɗii Elias profeto Masǝŋ. 36Dǝɓ ki kǝsyil ɓǝǝ ɗuu ge ɓaŋ tãa yeri maa ge pǝ bii mbǝ̃ǝre, so baŋ ge tǝkeeŋgai nyen ge nyi Yesu ka mo zwǝko. Dǝɓ ah so faa: Na byak ɗao, ɗah Elias a gin ɗǝr ko tǝ kpuu ah gin sǝŋ ne? 37Amma Yesu so ɓyaŋ ɓǝ pǝ'manne, lee wulli.

38Godel ma cee ɓǝr yaŋ Masǝŋ ŋgǝ̃ǝ gin sǝŋ ge sǝŋ kǝsyil gwa. 39Ne cok dǝɓ swah sooje Romanen mo uu ɓo pel Yesu mo kwo Yesu mo ɓyaŋ ɓǝ mo lee wulli, so faa: 'Manna dǝɓ mai We Masǝŋ yo. 40Ŋwǝǝ ki no gŋ uura lal pǝɗǝk tǝ ẽera cok ginni. Kǝsyil ɓǝǝ Maria ma Magdala gŋ, Maria mah Yakuɓ malaŋne ne Yoses tǝkine Salome. 41Syeera mor Yesu ne cok mo yeako sǝr Galile, joŋra yeɓ mor ah ta. Ŋwǝǝ mapãa ah mai mo gera Jerusalem ne ki ɗǝ laŋ ara no gŋ ta.

Kanra Yesu ge pǝ palle

(Mt 27:57-61; Lu 23:50-56; Yoh 19:38-42)

42Ne cok ah lil joŋ o, ka com ma zyeɓ fan mor com 'yak yo, 43Yuseɓ ma yaŋ Arimatea ge dai. Dǝɓ yǝk yo, a kǝsyil za faadal maluuri, tǝ byak gin Goŋ Masǝŋ ta. Pee zahzyil mbaŋ kal ge wo Pilatus fii wul Yesu jol ahe. 44Amma Pilatus kaa gǝriŋ tǝ ɓǝ mai mo laa Yesu wǝ ɓo gwari naiko. So ɗii swah sooje ge wol ah ka fii ko Yesu wǝ ɓe 'manna ne? 45Fahfal ah mo laa njaŋ ah zah swah sooje o, so nyi fahlii nyi Yuseɓ ka mo ɓaŋko wul ah o. 46Yuseɓ lee zyim marwãhe, ɗǝr wul ah gin tǝ kpuu ge sǝŋ, so koo suu ah ɓaŋ kan ge pǝ pal mai mo cii ɓo tǝ pǝɗakka na yii. So hǝr tǝsal malii ah ge coo zah pal ne ko. 47Maria ma Magdala ne Maria mah Yoses kwora cok mai mo ciira ko gŋ ɓe.

Currently Selected:

MARKUS 15: MUAR

Highlight

Copy