MARKUS 12

Ɓǝ kikiŋ dǝɓ ma pea kpuu vin

(Mt 21:33-46; Lu 20:9-19)

1So Yesu tǝŋ faa ɓǝ kikiŋ nyi ra, faa: Dǝɓ ki no pea kpuu vin pǝ 'wah ahe, so pah zah ahe, cii lak ka ŋhǝǝ bii lee kpuu vin ah gŋ, gbǝ jul gŋ ka byak ahe, so soɓ 'wah ah jol za pǝǝ ahe, zol kal ge sǝr ki pǝɗǝkki. 2Ne cok gwahl mo ge o, dǝɓ yeɓ ah vaŋno ge wo za ma joŋra yeɓ pǝ 'wah kpuu vin ah ka nyiŋ zah fagwahl mǝ ah jol ɓǝǝra. 3Amma ge gbǝra dǝɓ yeɓ ah loɓra ko, so soɓra ko kal ne jol kolle. 4Pah 'wah so pee dǝɓ yeɓ ah maki ah faɗa, ge ira tǝtǝl nyi ko, so tǝǝra ko. 5Fahfal ah so pee dǝɓ yeɓ ah maki ahe, ge ira ko pǝ wulli, joŋra ne za yeɓ ah ra daŋ naiko, loɓra za ki, ikra za ki pǝ wulli. 6Coŋ wel ah jol ah vaŋno to, we 'yah ah yo, so pee ko ge wo ɓǝǝ fahfal lii, mor faa a ga gbǝra swãa we ɓe. 7Amma za pǝǝ 'wah faara tǝgǝǝ ki: We mai ma ga ren yaŋ ah yo, na ge i ko pǝ wulli, ka 'wah ah mo ciŋ ma mana. 8Gbǝra wel ah ira ko pǝ wulli, so ɓaŋra wul ah pǝ 'wah ɓoo ge lalle.

9Yesu fii ra faa: Pah 'wah a ga joŋ fẽe ne za mai ne? A ga ge ba, a ga ik za mai pǝ wulli, so a ga soɓ 'wah ah ga jol za ki. 10We kee cok Ɗerewol mai ya ne?

Tǝsal mai za ma vuura yaŋ mo ɓoora ge lalle,

So ciŋ tǝsal masãh lii ah ɓo.

11Ɓǝ ah gee wo Dǝɓlii ge,

A nahnǝn man gǝriŋ.

12Zaluu Yahuduen kyeɓra fahlii ka gban Yesu, mor tǝra ɓe, faa ɓǝ kikiŋ ah ɓo kal ɓǝǝra. Amma gal za re ra, soɓra ko, so zolra kalle.

Gǝraama Kaiser

(Mt 22:15-22; Lu 20:20-26)

13Peera za ki kǝsyil Farisien ne za Herodes ge wo Yesu mor ka gbanra ko ne ɓǝ faa zah ahe. 14Gera wo Yesu faara nyi ko: Pa cuu fanne, ru tǝ ɓe, mo faa goŋga, mo ka ɓaŋ syiŋ ɓǝ zan a, mor mo ka joŋ za camcam ya, amma mo cuu fahlii Masǝŋ njaŋ. Mo faa goŋga ɓǝ mai nyi ru ɗǝ, ɓǝ lai man nyi fahlii ka dǝɓ mo sǝǝ gǝraama nyi Kaiser Romanen ɓe ne? Wala nyi ya ne? 15Amma Yesu tǝ vǝrvǝr ɓǝǝ ɓe, so faa nyi ra: We kǝǝ me mor fẽene? We gee me ne solai ah me ẽe ɗǝ. 16Ɓaŋra ge nyi ne vaŋno, so Yesu fii ra: Foto zu ye gŋ ne tǝɗii mai mo ŋwǝǝ ɓo gŋ ne? Faara nyi ko: Mǝ Kaiser yo. 17So Yesu faa nyi ra: We nyi zah fan Kaiser nyi ko, we so nyi zah mǝ Masǝŋ nyi ta. So kaara tǝ ɓǝ ah gǝriŋ.

Fii tǝ ɓǝ ur pǝ wulli

(Mt 22:23-33; Lu 20:27-40)

18Sadusien mai moo faara za ka ur gin pǝ wul a, za ki kǝsyil ɓǝǝ gera wo Yesu fiira ko: 19Pa cuu fanne, Mosus ŋwǝǝ ɓǝ lai mai nyi ru: Naa mah dǝɓ ki mo wǝ mo soɓ mawin mo ka ne wel a ɓe, ka naa mah ah mo ɓaŋko mawin ah kan ka mo kanko nah naa mam ne ko. 20Wee mawin tǝ vaŋno no rǝŋ. Dǝɓ malii kan winni, wuu, soɓ wel a. 21Patǝtǝl ah so ɓaŋ mawin ah kanne, wǝ soɓ wel a ta. Patǝ sai ah laŋ joŋ nai ta. 22Ara rǝŋ daŋ soɓra wel a. Fahfal ɓǝǝ lii mawin ah laŋ wǝ ta. 23Amma ne cok ur pǝ wul mo ge urra ɓe, mawin ah ga ciŋ mǝ zu kǝsyil ɓǝǝ ne? Mor ara rǝŋ daŋ kanra ko daŋ.

24Yesu zyii zah ɓǝǝ faa: Awe, we zyak ɓe, mor we tǝ Ɗerewol tǝkine swah Masǝŋ ya. 25Ne cok za moo ga ur gin pǝ wul za wǝǝ ne ŋwǝǝ ka ga kanra ki ya, amma a ga yeara tǝgbana angeloi mo coksǝŋ. 26Amma ɓǝ za wul tǝkine ɓǝ ur ɓǝǝ we kee ɓǝ ah pǝ ɗerewol Mosus Masǝŋ mo faa ɓǝ ne ki pǝzyil waa ya ne? Faa: Ame Masǝŋ Abraham, Masǝŋ Isak ne Masǝŋ Yakuɓ. 27Mai 'yah cuu: Masǝŋ, Masǝŋ za ma wul ye ka, amma Masǝŋ za ma ne cee yo. Mor ah we zyak fahlii ɓo pǝ'manne.

Ɓǝ lai malii ahe

(Mt 22:34-40; Lu 10:25-28)

28Dǝɓ vaŋno kǝsyil za cuu ɓǝ lai ge laa ra tǝ fiira ki kǝsyil ki, laa Yesu tǝ zyii ɓǝ zah Sadusien pǝsãhe. So ge wo Yesu fii ko faa: Ɓǝ lai malii ma kal manyeeki ah daŋ ko makẽne? 29Yesu zyii zah ah faa: Ɓǝ lai malii ma kal manyeeki daŋ a naiko: Za Israel we laa, Dǝɓlii Masǝŋ man ako ye Dǝɓlii vaŋno to. 30Mo 'yah Masǝŋ Dǝɓlii ɓo ne zahzyil ɓo daŋ, ne mazwãhsuu ɓo daŋ, ne ɓǝ foo ɓo daŋ, tǝkine swah suu ɓo daŋ. 31Ɓǝ lai malii patǝ gwa ah laŋ a naiko: Mo 'yah jǝk ɓo tǝgbana moo 'yah suu ɓo ta. Ɓǝ lai ma kal matǝ gwa rai ne luu kǝka. 32So pa cuu ɓǝ lai faa nyi Yesu: A pǝsãhe, pa cuu fanne, ɓǝ mai mo faa goŋga yo. Dǝɓlii ako ye Masǝŋ to, Masǝŋ maki ah na ko kǝka. 33Dǝɓ mo 'yah Masǝŋ ne zahzyil ah daŋ, ne ɓǝ foo ah daŋ, tǝkine swah suu ah daŋ ɓe, so mo 'yah jǝk ah tǝgbana moo 'yahko suu ah ta ɓe, kal tǝǝ syiŋ suŋwii tǝkine ŋgoŋ fan joŋ syiŋ ne pel Masǝŋ ɓe. 34Ne cok Yesu mo kwo dǝɓ ah zyii ɓǝ ah pǝsãhe, so faa nyi ko: Mo ka pǝɗǝk ne Goŋ Masǝŋ ya. Fahfal ah za daŋ ɗuura gal fii ɓǝ zah ahe.

Kristu sye we zu ye ne?

(Mt 22:41-46; Lu 20:41-44)

35Ne cok Yesu mo tǝ cuu fan nyi za yaŋ Masǝŋ, fifii faa: Za cuu ɓǝ lai faara Kristu We David yo mor fẽene? 36Mor Tǝ'yak Matǝdaŋdaŋ cuu nyi David so faa ne suu ahe:

Dǝɓlii faa nyi Dǝɓlii ɓe:

Mo kaa jokǝsãh ɓe,

Ŋhaa ka me joŋ za ma syiŋ ɓo daŋ swahra ge sǝŋ mor ɓal ɓo.

37David ne suu ah ɗii ko ne Dǝɓlii ahe, a joŋ ɗii ka Kristu mo so ciŋ We David ne?

Yesu lai za tǝ ɓǝ za cuu ɓǝ laini

(Mt 23:1-36; Lu 20:45-47)

Za pǝlli mo taira ɓo gŋ laara ɓǝ cuu ah pǝ'nyahre. 38Yesu faa ɓǝ nyi ra: We joŋ yella ne za cuu ɓǝ laini, a ɓaara mbǝro pǝwah kyãh ne ko, a 'yahra za mo haozah wo ɓǝǝ pǝ cok tai zana, 39a kyeɓra cok kal masãh ah matǝ nahnǝn za ɓǝr yaŋ kee ɓǝ Masǝŋ tǝkine cok kal masãh ah pǝ cok ren farelle. 40A renra yaŋ ŋwǝǝ wulli, a juura pel ne nahnǝn za liilii ka za mo ẽe ra. A ga lwaara kiita magaɓɓe.

Fan nyi mawin wulli

(Lu 21:1-4)

41So Yesu kaa kah sunduku ma tai lak yaŋ Masǝŋ, kwo za joŋ tǝ ɓoora lak ga gŋ pǝlli. 42Mawin wul masyak ge ɓoo haɓ ge gŋ gwa, karaŋga vaŋno yo. 43So Yesu ɗii za syee mor ah faa nyi ra: 'Manna me faa nyi we, mawin wul masyak mai ɓoo lak ge pǝ sunduku kal za mai mo ɓoora ɓo daŋ. 44Mor kǝlii ɓǝǝ ɓoora mor ara ne lak pǝlli, amma mawin wul masyak mai ge ɓoo fan mai mo no jol ah ka wol suu ah ne tǝɗe'.

Currently Selected:

MARKUS 12: MUAR

Highlight

Copy