MARKUS 11

Yesu kal ge yaŋ Jerusalem

(Mt 21:1-11; Lu 19:28-40; Yoh 12:12-19)

1Ne cok mo gera gwari ne yaŋ Jerusalem nǝfah kǝ yaŋ Betǝfaage ne Betaania, ge daira kah waa Ma Ne Tǝbaakãmme. Yesu pee za syee mor ah gwa kal ge pelle. 2Faa nyi ra: We ge yaŋ ma pel ɓiiri, we ge dai gŋ ɓe, we ga lwaa we korro saa ma saa, dǝɓ ɓah yee tǝl ah taa ya ba, ka we wǝǝ ge ne ko. 3Dǝɓ ki mo fii we, we wǝǝ korro mor fẽene ɓe, ka we faa nyi ko, Dǝɓlii ye tǝ 'yahe, a so jin pee ge gwari. 4Kalra ge o, ge lwaara we korro saa ɓo zahfah kah fahlii lalle, so wǝǝra. 5Za ki kǝsyil za mai mo ge lwaa ra gŋ ŋhaako fii ra: We joŋ fẽe sye mai we wǝǝ we korro ne? 6Zyiira zah ɓǝǝ na mai Yesu mo faa nyi ra. Zan ah soɓra ra wǝǝ kal ne ko. 7Gera wo Yesu ne we korro, so pahra mbǝro ɓǝǝ tǝl ahe, so Yesu yee kaa tǝl ahe. 8Za pǝlli rǝǝra mbǝro ɓǝǝ tǝ fahlii, za ki ceera goo kpuu pah gŋ. 9Za mai mo kalra ɓo pel Yesu tǝkine za mai mo tǝ syeera mor ah daŋ ŋwaara ɓǝ faa: Mo ɗah syee o, Masǝŋ mo ẽe Dǝɓ mai mo ge pǝ tǝɗii Dǝɓlii, 10Masǝŋ mo ẽe goŋ pa ɓuu David mo tǝ ginni, mo ɗah syee o Masǝŋ mo no sǝŋ.

11Yesu ge yaŋ Jerusalem, so dan ge pǝ yaŋ Masǝŋ, ẽe fan gŋ daŋ, so lil mo joŋ o, pii soo kal ge yaŋ Betaania ne za syee mor ah matǝ jemma tǝl gwa.

Yesu ɓoo zahyee nyi kpuu wuuri

(Mt 21:18-19)

12Tǝ'nan ah mo pǝ̃ǝra gin yaŋ Betaania, koŋ i Yesu. 13Kwo kpuu wuu ge pǝɗǝkki, zyee goo ɓo, Yesu cak kal ge mor ah lǝŋ ɗah zye ga lwaa lee ah gŋ no ne? Ne cok mo ge dai mor ah gwari, ge lwaa goo ye to, mor cok lee ah ge ya ba. 14So Yesu faa nyi kpuu wuuri: Dǝɓ ka re lee ɓo ya ŋhaa ga lii. Za syee mor ah laara ɓǝ ahe.

Yesu nĩi za lee fan gin pǝ yaŋ Masǝŋ

(Mt 21:12-17; Lu 19:45-48; Yoh 2:13-22)

15So gera yaŋ Jerusalem faɗa, Yesu dan ge ɓǝr yaŋ Masǝŋ, tǝŋ ne nĩi za ma lea fan tǝkine za ma hai ne fan lee gŋ, waa taabǝl za ma kun solai ɓaa ge sǝŋ tǝkine fakal za ma lea fan ne matǝvaa daŋ. 16Soɓ koo dǝɓ vaŋno ɓaŋ fan kyãh ne pǝ yaŋ Masǝŋ ya. 17So cuu ɓǝ nyi ra faɗa: Ɗerewol Masǝŋ faa: Yaŋ ɓe a ɗii ne yaŋ juupel mor za daŋ, amma awe we joŋ yaŋ ah tǝgbana yii za kaafuu.

18Zaluuri, zaluu za joŋzahsyiŋrĩ, tǝkine za cuu ɓǝ lai mo laara ɓǝ ah naiko, so kyeɓra fahlii ka in Yesu pǝ wulli, amma ɗuura gal ahe, mor za daŋ kaara tǝ ɓǝ cuu ah gǝriŋ.

19Ne cok ah lil mo joŋ o, Yesu ne za syee mor ah pǝ̃ǝra gin yaŋ Jerusalem kalle.

Kpuu wuu yakke

(Mt 21:20-22)

20Tǝ'nan ah ne zah'nan mo tǝ pǝ̃ǝra tǝ fahlii, za syee mor Yesu kwora kpuu wuu yak ɓo ne sǝ̃ǝ ah daŋ tǝɗe'. 21Petar foo ɓǝ mai Yesu mo faa wo kpuu wuu tǝsoo, so faa nyi Yesu: Dǝɓlii, kpuu wuu mai mo ɓoo zahyee nyi kŋ yak ɓe. 22So Yesu faa nyi za syee mor ahe: We nyiŋ Masǝŋ. 23Me tǝ faa goŋga nyi we, koo zune kǝsyil ɓii mo faa nyi waa mai, mo zol gin nyee mo lee ge pǝ bii, amma dǝɓ ah mo syesyel ne ɓǝ ah pǝ zahzyil ah ya mo nyiŋ a ga joŋ ɓe, fan ah ga joŋ ta. 24Mor maiko me faa nyi we, ne cok we tǝ juupel ka fii fanne, we nyiŋ we lwaa fan ah ɓe, we ga lwaa. 25Ne cok we uu ɓo ka juupel ɓe, we so foo we no ne ɓǝ kǝsyil ki ne dǝɓ ki ɓe, we rõm ko, mor ka Pa ɓii mai mo no sǝŋ mo rwah faɓe' ɓii ta. [26Amma we zyii rõm za ki ya ɓe, Pa ɓii mai mo no sǝŋ ka ga rwah faɓe' ɓii ga lal a ta.]

Yesu joŋ yeɓ ne swah fẽene?

(Mt 21:23-27; Lu 20:1-8)

27Gera yaŋ Jerusalem faɗa. Ne cok Yesu mo tǝ kyãh ɓǝr yaŋ Masǝŋ, zaluu za joŋzahsyiŋrĩ, za cuu ɓǝ lai, tǝkine zaluu pel za gera wol ahe, 28fiira ko: Mo joŋ fan mai ne swah fẽene? Azu ye nyi fahlii joŋ ah nyi mo ne? 29Yesu zyii faa nyi ra: Me ga fifii zah ɓii vaŋno, we zyii zah ɓe ɓe, so me ga faa nyi we me joŋ fan mai ne swah zune. 30Azu ye pee Yohana ma joŋ baptisma ge ne? Masǝŋ ye ne? Wala dǝfuu ye ne? We zyii zah ɓe. 31Amma so faara tǝgǝǝ ki: Na kal zyii faa Masǝŋ ye pee ko ge ɓe, a ga fii na: We nyiŋ ko ya mor fẽene? 32Amma so na faa dǝfuu ye peera ko ge...(A ɗuura gal zana, mor za daŋ tǝ ɓe, Yohana profeto Masǝŋ matǝ goŋga yo.) 33So zyiira faa nyi Yesu: Ru tǝ ya. Yesu zyii faa nyi ra: Ame laŋ me ka faa nyi we me joŋ fan mai ne swah zune ya ta.

Currently Selected:

MARKUS 11: MUAR

Highlight

Copy