MARKUS 10

Yesu faa ɓǝ tǝ ɓǝ syel mawin ne worre

(Mt 19:1-12; Lu 16:18)

1Yesu ur gin gŋ kal ge sǝr Yudea so yee el Yordan kal ge nǝzakǝŋhaa. Za so taira ge wol ah faɗa, Yesu cuu ɓǝ nyi ra tǝgbana mai moo joŋko cẽecẽe. 2Za ki kǝsyil Farisien gera wol ah mor ka lii ko, fiira ko: Ɓǝ lai man nyi fahlii ka dǝɓ mo syel mawin ah ɓe ne? 3Yesu zyii ɓǝ ah zah ɓǝǝ fii ra faa: Mosus ŋwǝǝ ɓǝ lai ɓo we tǝl ah ɗǝne? 4Faara: Mosus nyi fahlii nyi dǝɓ ka mo ŋwǝǝko ɗerewol syel ki ka mo nĩiko mawin ahe. 5So Yesu faa nyi ra: Mosus ŋwǝǝ ɓǝ lai mai nyi we mor zahzyil ɓii pǝyakke. 6Amma daga tǝtǝŋ ah Masǝŋ mo joŋ fanne, joŋ dǝwor ne madǝwinni. 7Mor mai dǝwor ga soɓ pah ah ne mah ahe, ga mgbãara ki ne mawin ahe, 8ara gwa daŋ ga ciŋra suu vaŋno, ara ka gwa yao, amma ara ye suu vaŋno. 9Dǝɓ mo syelko fan mai Masǝŋ mo tai ɓo wo ki ka.

10Ne cok mo danra ge ɓǝr yaŋ, za syee mor Yesu so fiira ko tǝ ɓǝ ahe. 11Yesu faa nyi ra: Dǝɓ mo syel mawin ah mo so ɓaŋ maki ah kan ɓe, ka joŋ ɓǝǝ ɓo tǝ mawin ma kǝpelle. 12Nai ta, mawin mo syel ki ne wor ah mo so ɓaŋ wor ki kan ɓe, ka joŋ ɓǝǝ ɓo tǝ wor ah ma kǝpel ta.

Yesu ẽe wee nyeere

(Mt 19:13-15; Lu 18:15-17)

13Za woora wee nyee ge wo Yesu ne ko ka mo juu ra, amma za syee mor ah cakra zan ahe. 14Ne cok Yesu mo kwo naiko, ɓaŋ kpãh so faa nyi za syee mor ahe: We soɓ wee nyee gera wo ɓe we cak ra ka, mor Goŋ Masǝŋ a mor za ma na ra. 15'Manna me faa nyi we, dǝɓ mo nyiŋ Goŋ Masǝŋ tǝgbana welaŋ ya ɓe, ka dan gŋ ya syaŋsyaŋ. 16Fahfal ah woo wee nyee gbah ge zahbii, so rǝk jol ah tǝ ɓǝǝ ẽe ra.

Pa joŋne

(Mt 19:16-30; Lu 18:18-30)

17Ne cok Yesu mo ur ɓaŋ fahlii, dǝɓ ki ɗuu ge wol ah ge kea ge sǝŋ ne zahciŋɓal fii: Pa cuu fan sãhe, me ga joŋ ɗii ka me lwaa cee ma ga lii ne? 18Yesu faa nyi ko: Mo ɗii me ne dǝɓ sãh mor fẽene? Dǝɓ masãh kǝka sai Masǝŋ vaŋno syak ah to. 19Mo tǝ ɓǝ lai daŋ ɓe, faa: Mo i wul ka, mo joŋ ɓǝǝ ka, mo kiŋ nyin ka, mo gwah ber tǝ dǝɓ ki ka, mo re fan jol za ne vǝrvǝr ka, mo kee pa ɓo tǝkine ma ɓo. 20Dǝɓ ah zyii faa nyi ko: Pa cuu fanne, ɓǝ lai mai daŋ me tǝ syee mor ah daga laŋ ɓe. 21So Yesu ẽe ko ne 'yahe, faa nyi ko: Fan vaŋno coŋ mo ɓo, mo ge lea fan ne fan ɓo ka mo wom lak ah nyi za syakke, mo ga lwaa joŋ coksǝŋ ba, ka mo pii soo ge syee mor ɓe. 22Amma ne cok dǝɓ ah mo laa ɓǝ ah naiko, zahzyil so nǝǝ ko, kal ne ɓǝ swaani, mor a ne joŋ pǝlli.

23Yesu ẽe za syee mor ah mo kah ahe, so faa nyi ra: 'Manna a pǝgaɓ no cam ka za joŋ mo dan Goŋ Masǝŋ. 24Za syee mor ah kaara tǝ ɓǝ ah gǝriŋ. Amma Yesu faa nyi ra faɗa: Wee ɓe, 'manna a pǝgaɓ ka dan Goŋ Masǝŋ. 25A pǝgaɓ ka njoŋnjoŋ mo gak pǝ̃ǝ mor baatal, amma ka pa joŋ mo dan Goŋ Masǝŋ o ɓe, a pǝgaɓ kal mai ɓe. 26So za syee mor ah kaara tǝ ɓǝ ah gǝriŋ faɗa, so fiira ki kǝsyil ki: Ɓǝ ah mo nai ɓe, azu yee gak ǝ̃ǝ ne? 27Yesu ẽe ra, so faa nyi ra: Fan mai mo pǝgaɓ wo dǝfuu amma ka wo Masǝŋ pǝgaɓ ya, mor Masǝŋ gak joŋ fan daŋ.

28So Petar faa nyi ko: Mo ẽe ɗao, aru ru soɓ fan ɓuu daŋ ru tǝ syee mor ɓo. 29Yesu zyii faa nyi ko: 'Manna me faa nyi we, koo zune mo soɓ yaŋ ahe, wee pah ah mawǝǝ ne maŋwǝǝre, mah ahe, pamme ne wee ah tǝkine 'wah ah mor ɓe tǝkine Ɓǝ'nyah Masǝŋ ɓe, 30a ga lwaa reba ah wo sǝr tǝ'nah kal mai zahlǝŋ temere: yaŋ, wee pam mawǝǝ ne maŋwǝǝre, mamme, weere, tǝkine 'wahe, so a ga lwaa bone ta. Pǝ sǝr mai mo tǝ gin laŋ a ga lwaa cee ma ga lii. 31Amma za pǝlli mo pel tǝ'nahko a ga ciŋra za fahfalle, so za pǝlli mo fahfal tǝ'nah laŋ, a ga ciŋra za pelle.

Yesu faa ɓǝ wul ah tǝkine ɓǝ ur ah ɓal sai ahe

(Mt 20:17-19; Lu 18:31-34)

32Ka ara tǝ fahlii ga yaŋ Jerusalem, Yesu kal pel ɓǝǝra, so za syee mor ah tǝ swaara ɓǝ pǝlli, za mai mo tǝ gara ne ra laŋ gal re ra o ta. So Yesu ɗii za syee mor ah matǝ jemma tǝl gwa gera wol ah so tǝŋ ne faa ɓǝ mai mo ga joŋ wol ah nyi ra faɗa. 33Yesu faa nyi ra: We ẽe na tǝ ga yaŋ Jerusalem, a ga soɓra We Dǝfuu ga jol zaluuri, ne jol zaluu za joŋzahsyiŋrĩ, tǝkine jol za cuu ɓǝ lai. A ga ŋgoŋra kiita wul tǝl ahe, ga soɓra ko ga jol za mai mo ye ka Yahuduen a, 34a ga syakra ko, a ga tǝɓra tǝsǝ̃ǝ ga wol ahe, ga loɓra ko ne bǝrǝǝ, a ga ira ko pǝ wulli, fahfal zah'nan sai ah a ga ur gin pǝ wulli.

Yakuɓ ne Yohana fiira Yesu

(Mt 20:20-28)

35Yakuɓ ne Yohana wee Zebedeus ge wo Yesu faara nyi ko: Pa cuu fanne, ru 'yah mo joŋ fan mai ruu ga fii jol ɓo nyi ru. 36Yesu so fii ra: We 'yah me joŋ fẽe nyi we ne? 37Zyiira faa nyi ko: Ne cok mo lwaa yǝk ɓo ɓe, ru 'yah mo nyi fahlii nyi ru ka dǝɓ vaŋno mo ge kaa jokǝsãh ɓo, dǝɓ maki ah mo kaako jokǝlǝɓai ɓo. 38Amma Yesu faa nyi ra: We tǝ fan mai we tǝ fii ya. We gak zwǝ bone mai mee ga zwǝ ne? We gak nyiŋ baptisma mai mee ga nyiŋ ne? 39Zyiira faa: Ru gakke. So Yesu faa nyi ra: We ga zwǝ bone mai mee ga zwǝ, we ga nyiŋ baptisma mai mee ga nyiŋ, 40amma kaa jokǝsãh ɓe tǝkine kaa jokǝlǝɓai ɓe, ɓǝ ah ɓǝ ɓe ye ka, cok ah a mor za mai Masǝŋ mo zyeɓ ɓo mor ɓǝǝra.

41Ne cok za syee mor Yesu matǝ jemma mo laara ɓǝ ahe, ɓaŋra kpãh tǝ Yakuɓ ne Yohana. 42So Yesu ɗii ra ge wol ah daŋ faa nyi ra: We tǝ ɓe, za mai mo rǝkra ra na zaluu tǝ zana, a ren ra ne swahe, zaluu ah a yeara ne swah tǝ ɓǝǝra. 43Amma ka nai kǝsyil ɓii ya, amma dǝɓ mo 'yah yeako dǝɓlii kǝsyil ɓii ɓe, mo ciŋko dǝɓ yeɓ ɓiiri. 44Dǝɓ mo 'yah yea dǝɓlii kǝsyil ɓii ɓe, mo ciŋko byak za daŋ. 45Mor We Dǝfuu ge ka za mo joŋra yeɓ mor ah ya, amma ge ka joŋ mor za tǝkine nyi cee ah mor ka wǝǝ za pǝlli.

Yesu laɓ rǝ̃ǝ ma ɗii ne Bartimeus

(Mt 20:29-34; Lu 18:35-43)

46Ge daira yaŋ Jeriko. Ne cok Yesu mo pǝ̃ǝ gin yaŋ ah ne za syee mor ah tǝkine za pãa daŋ, rǝ̃ǝ ma ɗii ne Bartimeus we Timeus kaa ɓo kah fahlii tǝ syea fanne. 47Ne cok mo laa Yesu ma yaŋ Nazaret yo, so ɓyaŋ ɓǝ pǝ'man faa: Yesu We David, mo kwo syak tǝ ɓe. 48Za pǝlli laira ko ne swahe, faara nyi ka mo faako ɓǝ ka. Amma so ɓyaŋ ɓǝ ne swah kal ma kǝpel faa: We David, mo kwo syak tǝ ɓe. 49Yesu uu so faa: We ɗii ko ge. So ɗiira rǝ̃ǝ faara nyi ko: Mo gbǝ zahzyilli, mo ur o, a ɗii mo. 50Rǝ̃ǝ wǝǝ mbǝro ah ɓoo ge lalle, so ur gaŋ kal ge wo Yesu. 51Yesu fii ko: Mo 'yah me joŋ fẽe nyi mo ne? Rǝ̃ǝ zyii faa: Pa cuu fanne, me 'yah me kwo cokki. 52So Yesu faa nyi ko: Mo gyo, iŋ ɓo gbǝr nahnǝn nyi mo ɓe. Ne pel sǝ kal tǝ kwan cokki, so kal ne Yesu.

Currently Selected:

MARKUS 10: MUAR

Highlight

Copy