MARKUS 1

Ɓǝ cuu Yohana ma joŋ baptisma

(Mt 3:1-12; Lu 3:1-18; Yoh 1:19-28)

1Tǝtǝŋ Ɓǝ'nyah ma cuu Yesu We Masǝŋ a naiko: 2Tǝgbana ɓǝ mai mo ŋwǝǝ ɓo pǝ ɗerewol profeto Esaia, faa:

We ẽe ɗǝ, me pee papee ɓe ga pel ɓo ka zyeɓ fahlii ɓo.

3Ako ye dǝɓ mai kyaŋ ah mo tǝ ɓyaŋ ɓǝ kǝsyicok faa:

We zyeɓ fahlii nyi Dǝɓlii,

We dǝǝ fahlii ah ra uu pǝsãhe.

4Yohana ge cuu ɓǝ nyi za kǝsyicokki, a faa: We toobii, we nyiŋ baptisma, Masǝŋ ga rwah faɓe' ɓii ga lalle. A joŋ baptisma nyi ra ta. 5Za sǝr Yudea ne za yaŋ Jerusalem daŋ a ginra wol ahe, a keera ɓǝ faɓe' ɓǝǝra, so a nyiŋra baptisma jol ah pǝ el Yordan.

6Yohana ne mbǝro ma ne syiŋ njoŋnjoŋ, a baŋ suu ne ganda wakke, a wol suu ah ne dahsyii tǝkine tǝnjwǝǝre. 7Cuu nyi ra faa sye: Dǝɓ mai mo tǝ gin fahfal ɓe, dǝɓ ah kal me ne yǝk ɓe, koo me kii ka ɗǝŋ ga sǝŋ ka wǝǝ sal sǝɓal ah ya. 8Ame tǝ joŋ baptisma nyi we ne bii, amma mǝ ah a ga joŋ baptisma nyi we ne Tǝ'yak Matǝdaŋdaŋ.

Baptisma Yesu

(Mt 3:13-17; Lu 3:21-22)

9Ne cok ah Yesu ur yaŋ Nazaret sǝr Galile, ge nyiŋ baptisma jol Yohana pǝ el Yordan. 10Ne cok ah mo tǝ pǝ̃ǝ gin pǝ bii o, kwo coksǝŋ gbǝrri, so Tǝ'yak ɗǝr ge tǝl ah tǝgbana matǝvaare. 11Kyaŋ cii ge sǝŋ ge faa: Amo ye We 'yah ɓe, me laa pǝ'nyah ne mo.

Satan kǝǝ Yesu

(Mt 4:1-11; Lu 4:1-13)

12Ne pel sǝ, Tǝ'yak Masǝŋ zaŋ Yesu kal ge cok ne ki. 13Kaa gŋ zah'nan jemma nai, Satan a gin kǝǝ ko. Yesu kaa kǝsyil nǝǝ cokki, angeloi a joŋra yeɓ mor ahe.

Yesu ɗii za gban syiŋ nai

(Mt 4:12-22; Lu 4:14-15; 5:1-11)

14Fahfal mo gbǝra Yohana ge daŋgai, Yesu ge Galile cuu Ɓǝ'nyah Masǝŋ gŋ faa: 15Cok ah ge ɓe, Goŋ Masǝŋ a gwari, we fer ɓǝ zahzyil ɓiiri, we nyiŋ Ɓǝ'nyah Masǝŋ.

16Yesu ge kyãh zah mabii Galile, kwo Simon ne naa mah ah Andreas tǝ ɓoora jin ga pǝ bii, ara ye za gbah syiŋ. 17Yesu faa nyi ra: We ge syee mor ɓe, me ga joŋ we na za ma gbah zana. 18Ne pel sǝ, soɓra jin ɓǝǝ so ge syeera mor ahe.

19Syee ge pel nje faɗa, kwo Yakuɓ we Zebedeus ne naa mah ah Yohana, kaara ɓo pǝ dah ɓǝǝ tǝ zyeɓra jinni. 20Yesu so ɗii ra, soɓra pa ɓǝǝ Zebedeus ne za yeɓ pǝ dahe, so ge syeera mor ahe.

Dǝɓ ma ne coksyiŋrĩ

(Lu 4:31-37)

21Gera yaŋ Kapernaum. Ne com 'yak Yesu so dan ge yaŋ kee ɓǝ Masǝŋ, tǝŋ cuu ɓǝ nyi zana. 22Kaara tǝ ɓǝ cuu ah gǝriŋ, mor a cuu nyi ra tǝgbana dǝɓ mayǝk ahe, ka tǝ cuu nyi ra tǝgbana za ma cuu ɓǝ lai moo cuura ya.

23Ne cok ah dǝɓ ki ge dan yaŋ kee ɓǝ Masǝŋ ɓǝǝra, coksyiŋ tǝl ahe. 24Dǝɓ ah ɓyaŋ ɓǝ faa: Yesu ma yaŋ Nazaret, mo 'yah fẽe wo ɓuu ne? Mo ge tǝ ɓeɓ ru ne? Me tǝ mo ɓe, amo ye Dǝɓ Matǝdaŋdaŋ mai Masǝŋ mo pee ge. 25Yesu lai coksyiŋ ah ne swah faa nyi ko: Mo yea zah ɓo, mo pǝ̃ǝ gin tǝl ahe. 26Coksyiŋ 'nam ko ne swahe, ɓyaŋ ɓǝ ne kyaŋ pǝ'manne, so pǝ̃ǝ gin tǝl ahe. 27Za daŋ kaara gǝriŋ, fiira ki faara: Ɓǝ fẽe ye mai ne? Ɓǝ lai fuu ye ne? A ɓaŋ coksyiŋ ne kpãhe, so a laara zah ah ta. 28Ne pel sǝ ɓǝ Yesu myah pǝ sǝr Galile daŋ.

Yesu laɓ za pǝlli

(Mt 8:14-17; Lu 4:38-41)

29Pǝ̃ǝra gin yaŋ kee ɓǝ Masǝŋ, Yesu kal ge yaŋ Simon ne Andreas. Yakuɓ ne Yohana gera ne ki ta. 30Magor Simon swǝ ɓo sǝŋ ne syem tǝtǝl 'wahe. Ge faara ɓǝ ah nyi Yesu gwari. 31Yesu ge wol ah ɓaŋ jol ah ur sǝŋ, tǝtǝl 'wah ah ceere, so ur sǝŋ kal tǝ joŋ fan nyi ra.

32Ne lil fahfal ka com dan ɓe, za gera wol ah ne za syem tǝkine za ma ne coksyiŋrĩ. 33Za yaŋ ah daŋ taira ge zahfah yaŋ Simon. 34Laɓ za ma ne syem camcam pǝlli, nĩi coksyiŋ gin tǝ za pǝlli ta, cak ra bai faa ɓǝ, mor tǝra ko ɓe.

Yesu kyãh cuu ɓǝ

(Lu 4:42-44)

35Ne zah'nan pimpim ka cok pǝfuu ba, Yesu ur kal ge cok mai za mo ka gŋ ya, juupel gŋ. 36Simon ne za yaŋ ah kyeɓra ko. 37Ge lwaara ko, faara nyi ko: Za daŋ tǝ kyeɓra mo. 38Faa nyi ra: Na ge yaŋ maki ah ka cuu nyi za gŋ ta, me ge ɓo mor yeɓ ahe. 39So ge kyãh sǝr Galile daŋ, a cuu ɓǝ Masǝŋ tǝkine nĩi coksyiŋ tǝ zana.

Yesu laɓ tǝkpiŋrĩ

(Mt 8:1-4; Lu 5:12-16)

40Tǝkpiŋ ge wol ah kea ge sǝŋ pǝǝ ko faa: Mo 'yah no ɓe, mo laɓ me o. 41Yesu yee syak tǝl ahe, ɓaŋ jol juu ne ko, faa nyi ko: Me 'yah no, mo laɓ o. 42Ne pel sǝ syem tǝkpiŋ soɓ ko, laɓ tǝɗe'. 43Yesu soɓ fahlii nyi lai ko faa: 44Mo faa ɓǝ ah kah dǝɓ ki ka, amma mo ge cuu suu ɓo nyi pa joŋzahsyiŋ ka mo ẽeko mo, ka mo joŋ syiŋ tǝgbana Mosus mo faa, ka cuu nyi za daŋ mo laɓ ɓe. 45Amma dǝɓ ah kal ge faa ɓǝ ahe, myah ɓǝ ah tǝluɓ daŋ ŋhaa Yesu ka gak kyãh tǝgǝǝ yaŋ ne nahnǝn zan a, amma kal ge kaa cok matǝ syaŋ, za urra gin cok daŋ gara wol ah gŋ.

Currently Selected:

MARKUS 1: MUAR

Highlight

Copy